1. Nsaa y’abatusha muntu abadi bafule mu kakongye bangi bena kifuko abapushaa naminyi?

 WE NA muntu oodi mufule abadi batushe mu kakongie su? Bino bi nkubofusha kuishimba! Ungi mukuetu mukashi abetanyinaa bu Hilda, amba’shi: “Pa baafuile mulume ande a kifulo, kunyima kua bipua 41 n’eyibakishi dietu,” na “namuene’shi mmuanda wi bubi bukile ushi naadi mulombene kupeta mu nshalelo ande. * Anka pa babatushishe muana ande mulume mu kakongye, mukashi aaye na bana baye babaadi kula n’ami, bi baadi bubi ngofu kuandi.”

2-3. Muyile Misambo 78:40, 41, Yehowa apushaa naminyi nsaa ayilekie bafubi baye kumufubila?

² Nangushena kenyongoshi kabaadi Yehowa mupushe nsaa ibaadi umune a ku ba mikeyilu mukatukie mu kifuko kiaye! (Yu. 6) Na nangushena bi baadi mutapikie kuishimba, pa kumona muilo wadi mufule wa bena Isaleele aumutombokiela misuusa na misuusa. (Badika Misambo 78:40, 41.) Shinkamisha’shi Nshetu sha kifulo e muiyilu, atapikaa kuishimba nsaa i muntu oodi mufule apele kumufubila. Apushaa bi kenyongoshi koodi nako, etuulu pa mbalo yobe, akunyingisha, na akupa biodi nabio lukalo.

³ Mu uno muisambo, atukesambila kiatudi balombene kukita bua kupeta bukuashi bua Yehowa nsaa ayilekie muntu atudi bafule kumufubila. Atukalongo dingi mushindo watudi balombene kukuasha bangi mu kakongye, nsaa y’abapete luno lukalakashi. Anka kia kumpala, tubandeyi kutala binangu bi bubi bi’atunangushenaa abitungu’shi tulekie.

4. Baledi be bungi abapushaa naminyi nsaa i muana aabo mulume sunga mukashi alekie kufubila Yehowa?

⁴ Nsaa i muana mulume sunga mukashi abadi bafule alekie kufubila Yehowa, baledi abanangushenaa ngofu kiabadi balombene kukita,  bua’shi bakuashe muan’aabo atungunukie na kufubila Yehowa. Kunyima kua muan’aaye mulume kutushibua mu kakongye, mukuetu Luke bambile’shi: “Naadi netopeka ami nabene. Ntshi naadi nalaala bufuku bua uno muanda. Ingi nsaa naadi nadidi, na eshimba dibaadi adinshiidika.” Mukuetu mukashi Elizabeth, baadi mufumankane na uno muanda wi mumune, akula n’eshimba dimushiidikie’shi: “Nkinyi kiandi mukite ki bubi ami nyina muana? Naadi nepusha’shi ntshi naadi moobeshe kulongiesha muana ande mulume bua kufula Yehowa nya.”

5. Nsaa ayilekie muntu kufubila Yehowa nkilubilo kia nanyi?

⁵ Abitungu tutentekieshe’shi, Yehowa mmupe oso a kuatudi kia buntu kia kuisanguila. Bino abipushisha’shi tui kusangula kumukookiela sunga kupela kumukookiela. Bangi bana ta be na baledi bekale bileshesho bi buwa kuabadi nya, kadi mbaate kitshibilo, kia kufubila Yehowa na kushala na lulamato kuadi. Kui bangi bana basangule baledi be buwa abebakuasha muyile mayi a kulonda a mu Bible aebakuasha bua kukula mu bia binyibinyi mpa na p’abakanunupa. Kunyima kua kutaluula, abitungu tuate kitshibilo atue banabene kia kukumina kufubila Yehowa. (Yos. 24:15) Biabia, ba nambutuile benyongole, lekayi kunangushena’shi su uno muanda ubakitshika nkilubilo kienu!

6. Ungi nsongua baadi mupushe naminyi nsaa ibalekiele muledi aaye kufubila Efile Mukulu?

⁶ Ingi nsaa muledi, e kuleka kufubila Yehowa sunga kukatuka mu kifuko kiaye. (Mis. 27:10) Bino bi kufuisha lukalakashi kui bana abamonaa ba nambutuile bu bileshesho. Esther, sha nshaye baadi mutushibue mu kakongye amba’shi: “Naadi nadidi, muanda namuene’shi ta baadi nka penda mulekie bia binyibinyi nya. Muanda baadi musangule aye nabene bua kuleka kufubila Yehowa. Naadi mufule nshami ngofu, anka nsaa i baadi mutushibue mu kakongye, naadi nekalakasha ngofu pabitale bukome buaye bua mbidi sunga mbibaabidi abinkalakasha mu binangu.”

7. Yehowa apushaa naminyi pabitale ba nsongua be na baledi batushibue mu kakongye?

⁷ Bansongua, su umune a ku baledi benu atushibua mu kakongye, mashimba etu aenyongolaa pamune nenu! Shinkamishayi’shi na Yehowa’nyi enyongolaa pamune nenu. Na mmuinufule, e na muloo pa muanda wenu bu bianukuete kutungunuka na kumufubila na lulamato, dingi atue bakuenu balume na bakashi be mu kakongye, tui na muloo pa muanda wenu. Tentekieshayi dingi’shi nta n’anue baatshile baledi benu kitshibilo. Nka bu biabadi be biteemune mu bikoso bi kunundu, Yehowa, mmupe muntu oso bulungantu bua kuisanguila kumufubila sunga kupela. Muntu oso muilambule na mubatshishibue, abitungu “esemwine bushito bwaye aye nabeene.”​—Nga. 6:5.

8. Bena kifuko baasha lulamato mbalombene kukita kinyi pabakuete kutengiela’shi mukuabo abadi bafule aalukie kui Yehowa? (Tala dingi kashibo akamba’shi “ Alukiila kui Yehowa.”)

⁸ Nsaa i muntu oodi mufule alekie kufubila Yehowa, we mukulupile’shi dingi efuku, aan’alukie kuadi. Nsaa y’otengiela’shi yawa muntu aalukie kui Yehowa we kukita kinyi? We mulombene kutungunuka na kunyingisha lukumino lobe. Su b’okitshi biabia, wekala kileshesho ki buwa bua bangi bena kifuko nobe, na pangi mpa na bua yawa mutushibue mu kakongye. Opete bukuashi bua kunyingiila nkalakashi yobe i mu binangu. Bua binobino, tuisambileyi angi matabula oodi mulombene kuela.

9. Mu mishindo kinyi moodi mulombene kuifubuila kui Yehowa? (Tala kashibo akamba’shi “ Bifundue abikunyingisha su we na muntu oodi mufule mulekie kufubila Yehowa.”)

⁹ Kita moobe moso bodia kuikala na lukumino lunyingie. Bi buwa’shi otungunukie na kuinyingisha obe nabene, na kunyingisha bangi bena kifuko nobe. We kuibikita naminyi? Efubuile kui Yehowa pa kuikala na kiubishi kia kubadikanga Eyi di’Efile Mukulu, kunangushena ku dianka, na kutungunuka na kutuela mu bisangilo bia bena Kidishitu. Joanna, sha nshaye na mukuabo mukashi bakatukie mu bia binyibinyi amba’shi: “Nampushaa butaale muishimba nsaa yambadika eyikashi dioso dia muntu a mu Bible bu: Abigaile, Esteere, Yoobo, Yoosefe na Yesu. Bileshesho biabo abinkumaa kuishimba na kunkuasha bua kuikadika na mueneno e buwa. Naadi mupete dingi ingi ngono ya ku ngono yetu i baadi inyingishe ngofu.”

10. Misambo 32:6-8 ayilesha kinyi pabitale mishindo yatudia kunyingiila tuinyongoshi?

¹⁰ Lungula Yehowa mianda yobe yoso ayikukalakasha. Nsaa yodi na mianda ayikuinyongosha, tolekanga kumuteka. Esendeele Efile mukulu etu sha kifulo, buadia nkukuasha wekale na mueneno e buwa bua uno muanda. Muanda amba’shi: “Naakakulambukisha, nkuleshe eshinda dya kulonda.” (Badika Misambo 32:6-8.) Mu binyibinyi, bi kuikala bukopo bua kupeta bishima biodia kulungala Yehowa biopusha. Anka Yehowa awuku kalolo bi’okuete okiengie muishimba. Mmukufule ngofu na akunyingisha bodia kumusumbuila mianda yobe yoso i kuishimba.​—Efi. 34:6; Mis. 62:7, 8.

11. Muyile Bena-Ebelu 12:11, buakinyi abitungu tukulupile mu dinyoka dia kifulo kia Yehowa? (Tala kashibo akamba’shi “ Kutushibua kua muntu mu kakongye, akulesha kifulo kia Yehowa kuatudi.”)

¹¹ Kuatshishena kitshibilo kia bakulu. Kutusha muntu mu kakongye kui mu mpàngo ya Yehowa. Na ngi mushindo wi buwa wa kukuasha muntu mulekie kufubila Yehowa na ngi mushindo wi  buwa dingi, bua baaba boso bakite miluisho ikata. (Badika Bena-Ebelu 12:11.) Bangi mu kakongie be kuamba’shi, bakulu nta mbaate kitshibilo ki bi buwa kia kutusha muntu mu kakongie. Anka kushi’bo kutentekiesha mianda i bubi ayikitanga yawa muntu, abaabatusha mu kakongye. Aku namu ta tui na bishinkamiisho bioso nya. Bi buwa kukulupila bakulu abasambisha uno muanda, muanda abekitshishaa muabo mooso buabadia kulonda mayi akulonda a mu Bible na abatshibi biimu “mwishina dya Yehowa.”​—2 Mya. 19:6.

12. Bangi mbapete miabi kinyi p’abo kukuatshishena mpàngo ya Yehowa ya dinyoka?

¹² Nsaa y’okuatshishena kitshibilo kia bakulu bua kutusha muntu oodi mufule mu kakongye, omukuasha buadia kualuka kui Yehowa. Elizabeth atudi bapue kuteemuna kunundu amba’shi: “Bi baadi bukopo buatudia kuleka kuisamba na muana etu nsongualume.” Anka kunyima kua muan’aye kualuka kui Yehowa, amba’shi: “Kitshibilo kia kumutusha mu kakongye kibaadi buwa. Ingi nsaa, muan’aye ambaa’shi ne mupete malongiesha e bungi e buwa. Amba’shi: Ne mufikie mukumona bi kinemo kia dinyoka dia Yehowa. “ Mulume aaye Mark akula’nyi’shi: “Kunyima kua mafuku, muan’etu bandunguile’shi nakumina kualuka mu kakongye, muanda ta tubaadi abesamba naye. Ne na lutumbu lukata bitukuashe Yehowa bua kumukookiela.”

13. Nkinyi kilombene nkukuasha bodia kunyingiila nkalakashi ya mu binangu?

¹³ Lungula ba kuuku bobe be bia nkuteemesha bi’opusha. Kisha nsaa pamune na bena Kidishitu babobe mu kikudi balombene nkukuasha biodia kulama mueneno e buwa. (Nki. 12:25; 17:17) Joanna atatupuile kuteemuna kunundu amba’shi: “Nepushaa bu e bupenka muishimba diande. Anka pandungulaa ba kuuku bande bandi mukulupile, abankuashaa buandia kunyingiila.” We kukita kinyi su abimueka’shi bangi mu kakongye abaakula mianda ayikuinyongosha?

14. Buakinyi tui na lukalo lua ‘kutungunuka na kwitwalena bushito ku muntu na muntu na kwifwileena lusa ku muntu na muntu’?

¹⁴ Ikala na luishinko kui bakuetu balume na bakashi. Anka uuka’shi nta muntu oso mulombene kuakula nka mianda i buwa nya. (Shak. 3:2) Boso buetu tui bantu bashi bapuidikie, su bangi baakula sunga kukita mianda, ilombene kuitutapa kuishimba. Tentekiesha elango dia Mpoolo mutumibua adiamba’shi: ‘Tungunukayi na kwitwalena bushito na kwifwileena lusa muntu na mukwabo, su mungi e na mwanda wadiila mukwabo.’ (Kol. 3:13, Kilombeeno Kipya 2014) Ungi mukuetu mukashi sha bakuabo babaadi batushibue mu kakongye apatuula’shi: “Yehowa bankuashishe buandia kufuila bakuetu balume lusa, babaadi abekitshisha bua kunyingisha kadi bantapanga’nyi kuishimba.” Kakongye ke kukita kinyi bua kukuasha bena kifuko baasha lulamato?

15. Nkinyi kiatudi balombene kukita bua kukuasha bena kifuko baasha mukuabo mutushibue mu kakongie binobino?

¹⁵ Ikalayi na kalolo na bu ba kuuku ba bena kifuko baasha lulamato. Mukuetu mukashi abetanyinaa bu Miriam akula’shi: “Naadi nenyongola bua kuenda ku bisangilo, kunyima ku’abo  kutusha mukuetu mulume mu kakongye. Naadi na moo wa bilombene bantu kuakula. Kubaadi ba kuuku be buwa babaadi abenyongola n’ami, kushi kulesha muikelo wi bubi kui mukuetu mulume baadi mutushibue mu kakongye. Nebatumbulaa ngofu, nta nepusha bupenka mu kenyongoshi kande nya.” Ungi mukuetu mukashi akula namu’nyi’shi: “Kunyima kua muan’etu mulume kutushibua mu kakongye, ba kuuku betu ba kifulo babaadi abafiki bua kuitunyingisha. Bangi babaadi abetulungula’shi t’atumono kia kuakula! Bangi babaadi abadidi n’ami, bangi namu bantuminanga mikanda ya kunyingisha. Biabia bi babaadi abakitshi mbinkuashe ngofu!”

16. Kakongye ke kutungunuka na kunyingisha na kukuasha baaba boso be na bakuabo batushibue mu kakongye naminyi?

¹⁶ Tutungunukieyi na kukuatshishena bena kifuko baasha lulamato. Bikishekishe mu kino kipungo, be na lukalo na kifulo kiobe na kuibanyingisha koobe. (Eb. 10:24, 25) Ingi nsaa, bena kifuko be na bakuabo babadi batushe mukakongye, abepushaa n’abo namu’nyi nka bu babingibue mu kakongye. Tanukitanga bia’shi bepusha mu uno mushindo! Bansongua be na baledi bakatukie mu bia binyibinyi, be na lukalo lua kuibakaanyishanga na kuibanyingisha. Maria sha mulume baadi mutushibue mu kakongye, na akatuka ku nshibo amba’shi: “Bangi ba ku bakuuku bande babaadi abafiki mu nshibo muande bateekanga bia kudia na kuitukuasha na lulanguilo lua mu kifuko. Babaadi abakiengie n’ami pamune na kudila n’ami pamune. Babaadi abangakuila pa baabadi abangakula mianda i bubi kui bangi bantu. Babaadi banyingishe mu kikudi ngofu!”​—Lom. 12:13, 15.

17. Bakulu mbalombene kukita kinyi bua kunyingisha boso benyongole?

¹⁷ Bakulu, fubishayi mishindo yoso yanudi nayo bua kunyingisha bena kifuko be na lulamato. Nui na mashito e pa buawo a kusamba balanguidi nenu be na bakuabo balekie kufubila Yehowa. (1 Tes. 5:14) Atayi mpàngo ya kuibanyingisha kumpala sunga kunyima kua bisangilo bia bena Kidishitu. Ebatembeleyi ku mashibo kuabo na kuteka n’abo pamune. Ikalayi anutuku n’abo mu bulungudi, na su kui mushindo nuibetanyine buabadia kutuela nenu mu lulanguilo lua mu kifuko. Bakulu, abitungu nuleshe mikooko ya Yehowa’shi, nukuete kukienga n’abo, anuibalesha lusa, nui bebafule, na anupasukila nkalo yabo.​—1 Tes. 2:7, 8.

18. Muyile 2 Mpyeele 3:9, Efile Mukulu akumina’shi bankitshishi a bubi bakite kinyi?

¹⁸ Yehowa “taakumiina’shi kushimine muntu su ngumune, anka’shi booso bafikye mu kwilanga.” (Badika 2 Mpyeele 3:9.) Sunga’shi muntu akita muluisho ukata, muwa waye winka na muulo ku meso ku’Efile Mukulu. Nangushena bukata bua muulo wadi mufute, mulambu wa nkuulo ya Muan’aye aadi mufule bua miluisho ya oso a kuatudi. Yehowa mmuwole eyasa na lusa loso, bua kukuasha boso balekie kumufubila buabadia kualuka kuadi. Na Mmukulupile’shi abakakumina kukita bino. Nka bu biatudi balombene kuibimona mu lukindi lua Yesu lua muana mushimine. (Luk. 15:11-32) Bantu be bungi balekie bia binyibinyi, kunyima abaalukaa kui Nshabo sha kifulo e muiyilu. Na kakongye akebakukilaa na muloo oso. Elizabeth atatupuile kuteemuna kunundu, baadi na muloo wa kumona muan’aye mulume balushibua mu kakongye. Tubandeyi kunangushena, akula’shi: “Naadi na lutumbu lukile bua baaba boso babaadi abetunyingisha bua’shi tatukookanga.”

19. Buakinyi tui balombene kutungunuka na kukulupila mui Yehowa?

¹⁹ Abitungu tukulupile mui Yehowa nsaa yoso. Buludiki buaye, abuituikashaa na muloo. E na kalolo na lusa, Nshetu e na kifulo kikata bua baaba boso bamufule na abamulanguila. Shinkamisha’shi Yehowa t’akakusumbushena mu kipongo kiodi na tuinyongoshi. (Eb. 13:5, 6) Yehowa “t’etusumbusheena nya,” ngi bibakuile Mark atudi bateemune kunundu. “T’ekula netu nsaa yatupete nkalakashi nya.” Yehowa akatungunuka na nkupa “bukome bushii bwa kupwandjikisha nabo kintu.” (2 Kod. 4:7) Eyendo, we mulombene kushala na lulamato na lukulupilo sunga nsaa i bantu boodi mufule abalekie kufubila Yehowa.