Nya, mu Bible sunga mu ingi mikanda ya kala, ta mwi mbalo ailesha’shi bino bibadi abikitshika.

Mushindo wabadi baluule uno verse mu angi ma Bible, autakula bantu mu kunangushena’shi bantu abaadi ababatshishibwa pa mbalo ya bafwe mu mafuku a Mpoolo. Bu kileshesho, mbaluule’shi: “Su bînyibînyi bafwe t’abakasanguka, byabya, mmwanda kinyi w’ababatshishibwa pa mbalo ya bafwe?”​—Ebuku dy’Efile Mukulu.

Anka, banda kutala abyakula bano bantu babidi abakimbuulaa myanda ya Bible. Dr. Gregory Lockwood amba’shi: “Takwi kishinkamisho su nkimune mu Bible sunga mu mikanda ya kala akilesha’shi bantu abadi ababatshishibwa pa mbalo ya bafwe.” Mu mushindo umune, Professeur Gordon D. Fee bafundile’shi: “Mu Bible sunga mu mikanda ya kala ta mwi kileshesho su nkimune kya luno lubatshisho. Takwi mbalo nsu ngimune mu Kilombeno kipya aishinkamisha’shi bino bibadi abikitshika kwi bena Kidishitu ba kumpala sunga kwi bipwilo bibatukile mafuku apeela kunyima kwa lufu lwa batumiibwa.”

Bible amba’shi balongi ba Yesu abadi ‘abende mu milo yooso [na] kwiyikasha bu balongi, kwiyibatshisha na kwiyilambukisha byooso’ bibaadi mwibafundjile. (Mat. 28:19, 20) Kumpala kwa’shi muntu ekale bu mulongi a Yesu mubatshishibwe, abitungu alongye pabitale Yehowa na Mwanaye, akumiine mwabadi na ebakookyele. Muntu mupwe kufwa ta mulombene kwibikita sunga mwina Kidishitu atala kumukitshina byanka.​—Mul. 9:5, 10; Yo. 4:1; 1 Kod. 1:14-16.

Byabya, Mpoolo badi akyebe kwakula kinyi?

Bangi bena Kodinda abaadi ababepula’shi bafwe ta mbalombene kusanguka. (1 Kod. 15:12) Mpoolo badi mwibaleshe’shi binangu byabo ta bi buwa. Mushindo kinyi? Bakwile’shi “mafuku ooso ne’ nka mu masaku a lufu.” Aku namu badi nka na muwa. Anka sunga bibadi mu masaku, badi mushinkamishe’shi kunyima kwa lufu, abakamusangula bwa kwikala na muwa mwiyilu nka bu Yesu.​—1 Kod. 15:30-32, 42-44.

Bibadi abitungu’shi bena Kodinda baukye’shi bena Kidishitu bedibwe mwimu, abadya kwikala abapete nkalakashi na kufwa kumpala kwa’shi bebasangule. Byabya, nsaa ‘yababatshishibwa mu Kidishitu, ababatshishibwa dingi mu lufu lwaye.’ (Lom. 6:3) Bino abipushisha’shi nka bu Yesu, abapete nkalakashi na kufwa bwa kwenda mwiyilu.

Bipwa bibidi kunyima kwa Yesu kubatshishibwa mu mema, balungwile babidi ba ku batumiibwa baye’shi: “Anukabatshishiibwa ku lubatshisho lwankeekala’mi mubatshishiibwe.” (Mak. 10:38, 39, Kilombeeno kipya 2014) Mu uno verse, Yesu t’akwila bwa kubatshishibwa kwaye kwa mu mema nya. Anka, Yesu alesha’shi kwikala na lulamato kwi Efile Mukulu, akukamutwala ku lufu. Pabitale bena Kidishitu bedibwe mwimu, Mpoolo bafundjile’shi ‘abakafwambuka pamune naaye [bwa’shi] bakeekale dimo mu ntumbo pamune naaye.’ (Lom. 8:16, 17; 2 Kod. 4:17) Byabya, nabo namu abitungu bafwe bwa’shi bebasangule bwa kwenda mwiyilu.

Bibamweka patoka’shi, mayi a Mpoolo e kwaluulwa kalolo bino: “Byabya, nkinyi akikitshi baba ababatshishibwa bwa kufwa? Su bafwe t’abakasanguka, bwakinyi ababatshishibwa bwa kufwa?”