YOOSEFE A MU ARIMATIYA tabadi apwandjikisha shi mulombene kupeta bukome bwa kwifubwila pepi na Guvernere a bena Looma. Ponse Pilaato badi aukibwa bu muntu sha mutwe wi bukopo. Anka, su bibadi shi Yesu e na kya kushikibwa na kinemo, bibadi abitungu shi muntu kampanda atekye Pilaato bwashi amupe kitanda. Muyile bibabidi bikidikye, kwimonena kwa Yoosefe na Pilaato takubadi bukopo bu bibadi apwandikisha nya. Kunyima kwa kupusha ungi mukata amba shi Yesu bafu, Pilaato bakuminyine kumupa kitanda. Binobino Yoosefe, na kisukusuku kyoso bende lubilo bwa nkalumbula mbalo.​—Maako 15:42-45.

• Uno Yoosefe a mu Arimatiya badi nnanyi?

• Badi na kipwano kinyi na Yesu?

• Na nkinyi akikusankisha mu mwisambo waye?

Mu Evanjile a Maako mufundjibwe ku bukwashi bwa kikudi ki selele abetamina Yoosefe bu “muntu mukata a mu kipango.” Muyile bifundwe bi kumpala, Kipango nkilombene kwikala penda Sanedrine, kadimbo kakata ka beena Yunda na kisaka kya bakata ba mbulamatadi. (Maako 15:1, 43) Yoosefe badi umune a ku bakunkushi ba mwilo waye, abilesha bwakinyi badi na mushindo wakwimonena na guvernere a mu Looma. Ta mbilombene kwitukanyisha bu bibadi Yoosefe mpeta.—Mat. 27:57.

Kisaka kya bena Sanedrine, kibadi kishikwe Yesu. Bantu ba mwanka abadi abamudimbiila bwashi ayipayibwe. Anka Yoosefe, abamwitamina bu “muntu e buuwa mululame.” (Luk. 23:50) Mu kwilekena na bakwabo bena Sanedrine, badi muntu mululame mu nshalelo aye na, badi akitshi mwaye moso bwa kukokyela miiya y’Efile Mukulu. Badi “ayindjila aye naamu, Bufumu bw’Efile,” abilesha bwakinyi bafikile umune a ku balondji ba Yesu. (Mak. 15:43; Mat. 27:57) Pangi badi mufule mukandu wa Yesu mwanda bya binyibinyi na kululama bibadi na muulo kwadi.

Mukanda wa Yowano 19:38 awakula pabitale Yoosefe shi, “baadi mulondji aa Yesu, anka bafwamanga bwa moo wa beena Yuuda.” Yoosefe badi atshinyi kinyi? Badi auku mushikwa ubadi nao bena Yuuda kwi Yesu na kitshibilo kibabadi nakyo kya kubinga muntu oso amba shi e na lukumino mwi Yesu mu kitumbwilo. (Yo. 7:45-49; 9:22) Muntu abadi babingye mu kitumbwilo badi asengibwa, abamusuku na kumwata bu shii mukumbene kwibunga na bena Yuuda. Nyi bwakinyi Yoosefe badi apusha bufu bwa kwamba patoka shi mmukumine mwi Yesu. Su mbadya kwakula byabya, badya kushimisha mwasu waye ukata.

Yoosefe tabadi bupenka badi na luno lukumino nya. Mukanda wa Yowano 12:42 aulesha shi: “Munkatshy’a bakunkushi baanabeene, beebungi babaadi bapwe kukumiina mwadi; anka, pa mwanda wa baafadisee, tababaadi na nkomanga yakwibileesha patooka babaatshinanga kubingiibwa mu kitumbwilo.” Ungi muntu badi byabya nyi Nikodeme, badi naye namu mwina Sanedrine.​—Yo. 3:1-10; 7:50-52.

Yoosefe namu badi mulondji, anka tabadi mukumbene kwibyakula munkatshi mwa bantu nya. Byabya bibadi bu mwanda ukata muyile bibambile Yesu shi: “Yawa ooso akangakwila kumpala kwa bantu, ami namu nankamwakwila kumpala kwa Shami e mwiulu. Anka yawa ooso akantunu kumpala kwa bantu, ami namu nakamutunu kumpala kwa Shami e mwiulu.” (Mat. 10:32, 33, Kilombeeno kipya 2014.) Yoosefe tabadi mupele Yesu nya, anka badi mukutwe kunyinga eshimba bwa kwamba shi mmumukumine. Nnobe namu?

Yoosefe bakitshine kintu kibuwa, Bible amba shi tabadi mukwatshishene mpàngo  ibubi ibabadi batshile Yesu kwi bena Sanedrine nya. (Luk. 23:51) Muyile abilesha bangi, pangi Yoosefe tabadi panka nsaa ibabadi abasambisha Yesu nya. Sunga byekala naminyi, Yoosefe badi mukumbene kupusha bubi pa kutala kuno kukutwa kwa kululama​—anka tabadi na kya kukita nya!

Nsaa ibafwile Yesu, Yoosefe badi mukambile moo aye nkwata kitshibilo kya kukwatshishena balondji ba Yesu. Kino kitshibilo ki mu mayi e mu Maako 15:43 aamba shi: “Aye nkupeta nkomanga ya kutwela kwa Pilaato bwa kuteka kitanda kya Yesu.”

Abimweneka shi pabafwile Yesu Yoosefe badi panka. Baukile shi Yesu bafu kumpala kwa Pilaato. Byabya, nsaa ibatekyele Yoosefe kitanda kya Yesu, guvernere “baakanyine bitabaadi [Yesu] mupwe kufwa.” (Mak. 15:44) Su Yoosefe bamwene pabadi Yesu alu n’eshimba ku mutshi, tomono shi badi mukalakashwe ngofu mu mushindo ubadi munyingye eshimba bwa kulesha patoka shi, aye ngumune a ku balondji ba Yesu? Nnabyo. Mu yaya nsaa, bibadi abitungu shi Yoosefe akite kintu kampanda. Ta mulombene kwikala dingi mulondji a Yesu mbufyefye nya.

Mwiya wa bena Yuuda ubadi aulesha shi muntu oso abadi batshibile kibawe kya lufu ashiikibwe kumpala kwa’shi nguba apone. (Miy. 21:22, 23) Bu byabibadi bitale dingi beena Looma, bitanda bya ba ntomboshi abadi abebilekye ku mutshi sunga kwibyela  mu mashama a bantu boso. Anka Yoosefe tabadi na binangu bi byabya pabitale Yesu nya. Pepi na mutshi ubabadi bamupudikye, Yoosefe badi na mashama apya a lubwebwe. Bu byabidi shi luno lubwebwe tababadi babande kwi lufubisha kwi muntu, abilesha shi Yoosefe badi kyakatuka ku Arimatiya * bafiki mu kushala mu Yeelusaleme na badi akumina kutula lupango lwaye bwa kushiika bena kifuko. (Luk. 23:53; Yo. 19:41) Kushiika Yesu mu mashama ababadya kushiika Yoosefe nyi mmwanda ubadi aulesha kalolo ka Yoosefe na kulombasha kwa butemuki bwa Mesiya abwamba shi abamushiiki na, “bampeta.”​—Yesh. 53:5, 8, 9.

Ma Evanjile oso ananka aalesha shi kunyima kwa kukatusha kitanda kya Yesu ku mutshi, Yoosefe badi mumupombele kilamba kya lene amutula mu mashama aye ye nabene. (Mat. 27:59-61; Mak. 15:46, 47; Luk. 23:53, 55; Yo. 19:38-40) Muntu abadi baleshe badi mukwashe Yoosefe nyi Nikodeme, bafikile na malashi a kushika nao kitanda. Bu byabidi shi bano bantu babidi abadi bende nkumo, abimweneka shi tababadi bayishe kitanda bubidi bwabo nya. Pangi abadi bate bena mufubo bwabadya kwisha kitanda na kwikishiika. Sunga byekala byabya, mudimo ubakitshine bano bantu babidi taubadi wa bisumanga nya. Muntu oso badya kukuma kitanda badi na kya kwikala bu muntu e butete munda mwa mafuku musambobidi, kintu kyoso kyadi mukume ki butete. (Mb. 19:11; Ang. 2:13) Su be byabya tababadi balombene kwikala pepi na bantu mu lubingo lwa Pasaka na tababadya kutwela mu musangelo nya. (Mb. 9:6) Abadi balombene kusenga Yoosefe kwi benaye su bashiki Yesu. Anka, mu ino nsaa badi mukumine shi, akifiki kifikye su bashiki Yesu na kinemo kyoso na kwilesha patoka shi mmulondji a Kidishitu.

Kunyima kwa kushika Yesu, takwi mbalo su ngimune yabadi batemune dingi Yoosefe a mu Arimatiya mu Bible nya, abibwesha luno lukonko: Nkinyi kibadi kikitshikye? Tatuuku nya. Muyile bibatupu kumona kumbangilo, abitushinkamisha kalolo shi, badi muleshe patoka shi mmulondji a Kidishitu. Kunyima kwa byoso, nsaa ya nkalakashi na bitompwanga, lukumino lwaye lubadi lunyingye na kutama ta ndushimine nya. Wawa ubadi mwanda wibuwa.

Uno mwanda awibwesha lukonko alutungu shi oso a kwatudi ataluule: Kwi kintu kampanda​—mwasu, mudimo, bintu, kifulo kya kifuko, sunga bulungatu bwetu—​kyatudi bate na muulo kukila kipwano kyetu na Yehowa?