1. Nkinyi akitunshinkamiisha’shi twi mu “mafuku a ku nfundîlo”?

BOODI mutandjikwe kunyima kwa kipwa kya 1914 su? Su mbyabya mafuku obe oso a muwa we akisha mu “mafuku a nfudiilo” a uno ndumbulwilo. (2 Tim. 3:1) Oso a kwatudi mupushe myanda ibaabadi batemune kwi Yesu bwa kino kipungo. Baadi muteemune ngoshi, nsala, kutshinkatshinka kwa nsenga, bipupa, kufiima kwa myanda ya kukutwa kululama, na kubingwabingwa kwa bafubi ba Yehowa. (Mat. 24:3, 7-9, 12; Luk. 21:10-12) Twi bamone dingi bantu be na mwikelo ubabadi batemukye kwi Mpoolo mutumibwa. (Tala kashibo akamba’shi: “ Mwikelo wa bantu ba ano mafuku.”) Bu byatudi balangwidi ba Yehowa atushinkamisha’shi twi mu “mafuku a ku nfundîlo.”​—Mik. 4:1, EEM.

2. Twi na lukalo lwa kupeta ngaluulo ku nkonko kinyi?

² Bu bitakudi mafuku ebungi kubanga mu 1914, twi bapwe kwikala ku nfudiilo a “mafuku a ku nfudiilo.” Bu bi nfudiilo ibefubwila peepi, twi na lukalo lwa kupeta ngaluulo ku nkonko i na muulo: Myanda kinyi akikakitshika ku nfudiilo kwa “mafuku a ku nfudiilo”? Na Yehowa etutekye’shi tukite kinyi pano patukwete kutengyela yaaya myanda?

3. Muyiile butemuki bwi mu 1 Beena-Tesalonika 5:1-3, miilo ayikeele musaase kinyi?

³ Badika 1 Beena-Tesalonika 5:1-3. Mpoolo akula pabitale “efuku dya Yehowa.” Mu kino kifundwe nditale kipungo akibanga  na ngoshi yabalu na “Babilone Mukata,” nsangilo a bipwilo byoso bya madimi, na akikafudiila na Armagedone. (Kibaf. 16:14, 16; 17:5) Kumpala kwa’shi dyadya “efuku” dibangye, miilo ayikele musaase wa “kufukama na kwiyikela!” (Mu angi ma Bible mbafunde’shi: “Butaale na bulungantu.”) Bakata ba nsenga abakulaa kino kishima nsaa yabesambila kulumbuula kwa kipwano kyabo munkatshi mwa maumbo. * Anka, musaase wa “kufukama na kwiyikeela” wabesambila mu Bible ngwilekene. Bwakinyi? Nsaa yabele uno musaase, bantu mbalombene kupwandikisha’shi bakata ba nsenga aboobesha kutuula butaale pa nsenga, na butaale bwibungi. “Mpombo ikata” ayikabanga na “kabutu akafiki mususa umune”.​—Mat. 24:21.

4. (a) Nkinyi akitungu’shi twiukye pabitale musaase wa “kufukama na kwiyikeela”? (b) Nkinyi kyatudi bapwe kuuka pabitale wanka?

⁴ Atuuku ungi mwanda pabitale musaase wa “kufukama na kwiyikeela.” Anka, kwi ingi myanda yatushatwiuku. Tatwiuku myanda ayikatakula bakunkushi bwa kwela wawa musaase sunga mushindo wabakewele. Na tatwiuku su akukela penda musaase umune sunga’shi akukekala misaase ibungi . Sunga byekala naminyi, atushinguula bino: Tatwi balombene kudimbibwa na binangu bya’shi bakunkushi ba nsenga mbakumbene kutwesha butale mu nsenga nya. Anka, wawa musaase ngwabadi betulungule mu Bible bwa kutengyela. Nkitundwilo nkya’shi “efuku dya Yehowa” tadidi pa kubanga!

5. Mukanda wa 1 Beena-Tesalonika 5:4-6, awitukwasha naminyi bwa kwikala beluumbule bwa “efuku dya Yehowa”?

⁵ Badika 1 Beena-Tesalonika 5:4-6. Mpoolo etulungula kyatudya kukita bwa kwiuka’shi twi belumbuule bwa “efuku dya Yehowa.” Tabitungu ‘tulaale tulo bu bangi.’ Abitungu ‘twikale bapasukye.’ Bu kileshesho, abitungu twikale badimukye pa kupela kutwelakana mu myanda ya politike. Su twatwelakana mu ino myanda, twikufika ‘bapano pa nsenga.’ (Yo. 15:19) Atuku’shi nka penda Bufumu bw’Efile Mukulu nyi abukatwesha butale pa nsenga.

6. Nkinyi akitungu’shi tukite bwa kukwasha bangi, na bwakinyi?

⁶ Sunga twekala atwebanabene bapasukye, abitungu dingi tukwashe bangi bantu bwashi balongye abyamba Bible pabitale akikakitshika mu nsenga. Abitugu twibikite nka binobino mwanda mpombo ikata tayidi pa kubanga, na mbilombene nkaikeela bantu bukopo bwa kulangwila Yehowa. Nyi bwakinyi bi na muulo kulungula mukandu wibuwa kubanga binobino! *

7. Nkinyi akitutekye Yehowa’shi tukite kubanga binobino?

⁷ Mu ano mafuku apeela abashala kumpala  kwa’shi “efuku” dyaye dibangye, Yehowa etutekye bwatudya kufuba ngofu mu mudimo wa bulungudi. Abitungu twikale bashinkamishe’shi twi na “katshintshi ku mufubo wa mwanana.” (1 Kod. 15:58) Yesu baadi muleshe akitungu’shi tukite. Nsaa ibaadi akula myanda yoso ibaadi na kya kufika mu mafuku a ku nfudiilo, balombeshe dingi’shi: “Mwanda, abikyebe kubanda kupalakasha mukandu wibuwa mu bisamba byoso.” (Mak. 13:4, 8, 10; Mat. 24:14) Banda kunangushena: Efuku dyoso dyokwete kwenda mu bulungudi, okwete kukwasha mu kulombana kwa buno butemuki bwa mu Bible!

8. Mudimo wa kulungula mukandu wa Bufumu ukwete kwenda kumpala naminyi?

⁸ Twi kwakula kinyi pabitale bikwete kwenda mudimo wa kulungula mukandu wa Bufumu kumpala? Kipwa kyoso, uno mudimo ukwete kwenda kumpala. Bu kileshesho, banda kunangushena pabitale kufwima kwa balungudi ba Bufumu mu ano mafuku a ku nfudiilo. Mu 1914, kubaadi penda balungudi 5 155 mu maumbo 43. Lelo uno, kwi balungudi bakile pa midiyo 8 na kipindji mu maumbo 240! Sunga mbyabya, mudimo wetu ta ngupwe nya. Abitungu tutungunukye na kulungula’shi nka penda Bufumu bw’Efile Mukulu, nyi abukapudisha makyenga a bantu.​—Mis. 145:11-13.

9. Bwakinyi abitungu tutungunukye na kulungula mukandu wa Bufumu?

⁹ Mudimo wetu wa bulungudi awikala nka kwanka mpa na apakamba Yehowa’shi kubapu. Kubashala mafuku bungi kinyi bwa’shi bantu bakimbe bya kuuka Yehowa Efile Mukulu na Yesu Kidishitu? (Yo. 17:3) T’atuuku nya. Atuuku’shi mpa na apakabanga mpombo ikata, baba boso “be na mashimba alombane bwa muwa wa looso” abatungunuka na kukumiina mukandu wibuwa. (Bik. 13:48) Mbikunyi byatudi balombene kukwasha bano bantu kumpala kwa’shi dyadya efuku difikye?

10. Mbukwashi kinyi bukwete Yehowa kwitupa bwa kulongyesha bantu bya binyibinyi?

¹⁰ Ku bukwashi bwa ndumbulwilo aye, Yehowa kwete kwitupa kyoso kyatudi nakyo lukalo bwa kulambukisha bantu bya binyibinyi. Bu kileshesho, atulongyeshibwaa ku lubingo loso mu bisangilo bya munkatshi mwa lubingo. Bino bisangilo bikwete kwitukwasha bwa kubanga mwisambo mu bulungudi na bya kwalukiila bantu. Abitulongyesha dingi mushindo wa kukunkusha kulonga Bible na bantu. Ndumbulwilo a Yehowa mwitupe bintu bi mu kasheete  ketu ka bina mudimo. Bino bintu abitukwasha bwa . . .

• kubanga mwisambo,

• kupa muntu malaka a nkuteemesha,

• kupa bantu malaka a kulonga bibungi pabitale Bible,

• kulongyesha balongi ba Bible bya binyibinyi, na

• kwitamina bantu ku Nshibo yetu ya Bufumu na kwibalesha site eetu.

Eyendo, kwikala penda na byabya bintu ta nkulombane nya. Abitungu tufube nabyo. * Bu kileshesho, su wesamba kalolo na muntu asankila bya binyibinyi, omulekyela trakte sunga jurnale, apete nsaa ya kumubadika mpa na nsaa yokalukiila bwa kumutala dingi. Kufuba ngofu mu mudimo wa bulungudi mweshi oso nyi mbushito bwetu.

11. Bwakinyi mbatuushe Malongyesha a kulonga Bible ku Internete?

¹¹ Malongyesha a kulonga Bible ku Internete e mu jw.org^®, nyi ungi mushindo ukwete Yehowa kukwasha bantu bwabadya kulonga bya binyibinyi. Bwakinyi abaadi batushe ano malongyesha? Mweshi oso, bantu be bungi mu nsenga ishima abakimbaa malongyesha a Bible ku Internete. Malongyesha e mu site eetu ngalombeene kukwasha bantu bwabadya ku banga kulonga bya binyibinyi pabitale Eyi dy’Efile Mukulu. Bangi bantu bwesamba nabo mbalombene kupela kukumiina kulonga Bible nobe. Su bi byabya, ebaleshe ino mbalo mu site eetu sunga kumutumina linke. *

12. Mmyanda kinyi ilombene muntu kulonga mu Malongyesha a kulonga Bible ku Internete?

¹² Malongyesha a kulonga Bible ku Internete aakwila ino myanda: “Bible na mumutuushe,” “Bantu babadi bakambe kwakwila mu Bible,” na “Mukandu wa lukulupilo wa mu Bible.” Mu ino miisambo abalongyesha:

• Bilombeene Bible kukwasha muntu

• Bi Yehowa, Yesu na ba miikeyilu

• Bwakinyi Yehowa baadi mupangye bantu

• Bwakinyi makyenga na myanda i bubi bi kwanka

Ino miisambo ayakwila dingi abikakitshi Yehowa bwa . . .

• kupudisha makyenga na lufu,

• kusangula bafwe, na

• kupyanikisha mbulamatadi ya bantu na Bufumu bw’Efile Mukulu.

13. Malongyesha a kulonga Bible ku Internete ngapyane mpàngo ya kulonga Bible na bantu su? Patuula.

¹³ Malongyesha a kulonga Bible ku Internete ta ngapyane mpàngo ya kulonga Bible na Bantu nya. Yesu mmwitupe mudimo wa kwikasha bantu bu balongi. Aa malongyesha mbeakite bwa’shi asankishe bantu abakumiina kulonga Bible ku Internete, bwabadya kukumiina kulonga bibungi. Byabya, pangi be kukumiina kulonga Bible. Ku nfudiilo kwa dilongyesha dyoso, kwi esaki dya kuusha bwa muntu akyebe kuteka kulonga Bible. Ku bukwashi bwa site eetu, bantu bakile pa 230 mu nsenga ishima bakwete kuteka kulonga kwa Bible efuku dyoso! Kulonga Bible na muntu kwi na muulo!

14. Muyile mayi akulonda a Yesu e mu Mateo 28:19, 20, tukwete kwitatshisha bwa kukita kinyi, na bwa kinyi?

¹⁴ Badika Mateo 28:19, 20. Nsaa yatulongo Bible na bantu, abitungu tukite mwetu moso bwa ‘kwikasha bantu bu balongi . . . , twibalambukishe bya kulama byoso bibaadi [Yesu] mwitufundjile.’ Atukumiina kukwasha bantu bwabadya kupusha muulo wi nao kwata mpàngo ya kufubila Yehowa na kukwatshishena  Bufumu bwaye. Bino abilesha’shi abitungu tupe bantu malaka a kusankila bya binyibinyi pa kutumikila byabalongo, kwilambula kwi Yehowa, na kubatshishibwa. Su bakita byabya, abakapanda kwifuku dya Yehowa.​—1 Mp. 3:21.

15. Tatwi na nsaa ibungi ya kukita kinyi, na mbwakinyi?

¹⁵ Nka bu byatwibimonanga kunundu, kubashala mafuku apeela ngofu pankatshi pa lelo uno na nfudiilo ya uno ndumbulwilo. Nyi bwakinyi, tatwi na nsaa ibungi ya kutungunuka na kulonga Bible na muntu sh’akumiina kufika mulongi a Kidishitu nya. (1 Kod. 9:26) Mudimo wetu ngwa kukita luntuluntu! Kwi bantu bebungi abakumiina kuteemesha mukandu wa Bufumu kumpala kwa’shi nfudiilo ifikye.

16. Muyile Kibafumbwilwe 18:2, 4, 5, 8, nkinyi akitungu’shi atwe boso tukite? (Tala dingi mayi e kuushi kw’esaki.)

¹⁶ Badika Kibafumbwilwe 18:2, 4, 5, 8. Ano ma verse aalesha kingi kintu akikyebe Yehowa’shi bafubi baye bakite. Bena Kidishitu boso ba binyibinyi be na kya kulesha kwilekena kwi pankatshi pabo na Babilone Mukata. Kumpala kwa kulonga bya binyibinyi, mulongi oso a Bible baadi mu kipwilo kampanda kya madimi. Baadi atwele mu kyakya kipwilo na kukita myanda yabalambukisha mwanka. Sunga’shi baadi atuusha makuta bwa kukwatshishena kyakya kipwilo. Bwa kukumiina’shi mulongi a Bible ekale bu mulungudi shii mubatshishibwe, abitungu ekale mushinkamishe’shi takii dingi mu kipwano na kipwilo kya madimi. Abitungu afunde mukanda wa kulesha’shi takii dingi mu kipwano na kipwilo kyaye kya kala sunga mu kisaka kampanda ki na myanda ipushene na Babilone Mukata. *

17. Mmidimo kinyi ya ku mbidi ishii ilombene kukita mwina Kidishitu, na mbwa kinyi?

¹⁷ Abitungu mwina Kidishitu oso ekale mushinkamishe’shi mudimo waye wa ku mbidi tawi na myanda ya mu Babilone Mukata. (2 Kod. 6:14-17) Bu kileshesho, ta mulombene kukumiina’shi bamwate ku mufubo ku kipwilo kampanda nya. Na dingi, mwina Kidishitu abadi bate ku mudimo kampanda, tamulombene kukumiina’shi akafubile ku nshibo yabakitshinaa myanda ya kipwilo kya madimi. Su e na waye mudimo, tamulombeene kukumiina kwipushena na bisaka bya myanda ya Babilone Mukata bwa’shi bafube pamune. Bwakinyi atwata bitshibilo bi bukopo byabya? Mwanda tatukumiina kwisanga mu mifubo na milwisho ya bisaka bya bipwilo bishii bi selele ku meso kw’Efile Mukulu.​—Yesh. 52:11. *

18. Mbikunyi bibaadi ungi mukwetu mutumikile mayi a kulonda a mu Bible pabitale midimo ya ku mbidi?

 ¹⁸ Takudi bipwa bibungi, ungi mukulu a mu kakongye baadi na mufubo waye’ye nabene, na abo nkumwitamina kwi ungi muntu baadi akunkusha midimo ya lwibako lwa kingi kipwilo kya mu kyakya kibundji bwa’shi bafube pamune. Yawa muntu baadi aukushi yawa mukwetu baadi akula misusa yoso’shi tamulombeene kukumiina kufuba midimo ya bipwilo. Kadi, tabaadi na kwa kupeta ungi muntu a kufuba naye nya. Sunga mbyabya, mukwetu bapelele, ashala mulamate ku mayi a kulonda a mu Bible. Lubingo lubalondele, jurnaliste a mu kyakya kibundji baadi mutushe foto ya muntu kwete kukookola mabaya ku musaka wa kipwilo. Su yawa mukwetu baadi mutupilwe ku miiya ya mu Bible, foto yaye nyi ibabadya kutuusha. Banda kunangushena bibaadya kulwila nkumo yaye kwi bakwabo bena Kidishitu! Nangushena dingi Yehowa bibadya kwikala mupushe.

19-20. (a) Nkinyi kyatubalongo? (b) Myanda kinyi yatudi na lukalo lwa kulonga?

¹⁹ Muyile butemuki bwa mu Bible, ungi mwanda ukata aukyebe kukitshika binobino pa nsenga, nyi musase wa “kufukama na kwiyikeela” wabakele kwi bakunkushi ba pa nsenga. Atutumbula Yehowa ngofu bu byadi mwitulongyeshe, mwanda atuuku’shi maumbo ta ngalombene kutwadila bantu butaale bwa looso nya. Nkinyi akitungu’shi tukite kumpala kwa’shi wawa mwanda mpa na kabutu ka mu kimpulunkamba bikitshikye? Yehowa akumiina’shi twikale na bibungi bya kukita mu mudimo wa kulungula mukandu wa Bufumu na kwitatshisha bwa kwikasha bantu bu balongi. Abitungu dingi twikale kula na myanda yoso ya bipwilo bya madimi. Byabya mbitale kukatuka mu Babilone Mukata na kupela kukita mudimo oso wipushene naye.

²⁰ Kwiungi mwanda aukyebe kukitshika ku nfudiilo kwa “mafuku a nfudiilo.” Kwi ingi myanda dingi ayikyebe Yehowa’shi tukite. Mmyanda kinyi, na twikwiluumbula naminyi atwe banabene bwa myanda ayikitshika binobino? Atukeyimono mu mwisambo aulondo.