1. Bwakinyi abitungu’shi tulamate nka kwi Yehowa?

ABITUNGU tulamate nka kwi Yehowa mwanda aye ngi Mupangi eetu na Etupeyaa muwa. (Kib. 4:11) Anka twi na lukalakashi. Sunga byatudi bafule Yehowa na kumunemeka, twi kudimbibwa na kukutwa kumulamata penda aye. Abitungu tupushe byabidi bilombene kukitshika. Kya kumpala, tubandeyi kutaluula mu myanda kampanda amutungu’shi twikale na lulamato.

2. Muyile Efilu 34:14, nkinyi kyatudya kukita su twibalamate nka penda kwi Yehowa?

² Mu Bible, kulamata penda kwi Efile Mukulu akulesha kumufula bikata. Nsaa yatudi balamate nka penda kwi Yehowa, atumulangwila nka penda aye. Tatutadiila muntu su ngumune sunga kintu kampanda kyate mbalo yaye.​—Badika Efilu 34:14.

3. Bwakinyi tatwi balamete kwi Yehowa bulamatelamate?

³ Tatwi balamate kwi Yehowa bulamatelamate nya. Bwakinyi? Mwanda lulamato lwetu ndwimene pa myanda yatudi balongye pabimutale. Twibasankile ngikashi yaye. Atuuku myanda yadi mufule na yadi mushikwe. Atuuku na atukwatshishena mpàngo yaye bwa bantu. Twi na kineemo kya kwikala bu ba kuuku baye. (Mis. 25:14) Myanda yoso yatudi balongye pabitale Mupangi eetu ayitukwasha bwa kwifubwila peepi naye.​—Shak. 4:8.

4. (a) Diabulu afubishaa kinyi bwa kubofusha lulamato lwetu kwi Yehowa? (b) Nkinyi kyatukyebe kutaluula mu uno mwisambo?

 ⁴ Satana kwete kukunkusha uno ndumbulwilo, na kwete amufubisha bwa kwikasha bintu byabasankila kwi bantu, bu bi na muulo ukata mu nshalelo eetu na kukita bya’shi tumone bu bibukopo kwibikambila. (Ef. 2:1-3; 1 Yo. 5:19) Kepatshila kaye nka’shi tatwikalanga balamate penda kwi Yehowa. Tubandeyi kutala mishindo ibidi yadi mulombeene koobesha. Kya kumpala, atompo kwitutakula mu kukimba bupeta, na kya kabidi, atompo kwitutakula mu kwata bitshibilo bibubi mu kukisha kwa kapapi.

5. Bwakinyi abitungu twilame ku kifulo kya makuta?

⁵ Atwe boso atwikalaa na lukalo lwa kupeta bidibwa, bilamba bibuwa, na mbalo ibuwa ya kulaala. Anka, abitungu twilame ku kifulo kya makuta. Bantu bebungi lelo uno, “mbasha kifulo kya mmono.” (2 Tim. 3:2, EEM) Yesu baadi auku’shi balongi baye abakatompibwa bwa kwikala na kyakya kifulo. Yesu bambile’shi “Takwi su ngumune mulombeene kufubila bamfumu babidi, bisumanga ashikwa umune, afule ungi; sung’shi alamata kwi umune, apeeshe ungi. Tatwi balombeene kufubila Efile Mukulu na mfwalanga.” (Mat. 6:24) Muntu alangwila Yehowa aku namu atusha nsaa na bukome bwibungi, bwa kukimba bupeta bwa mu uno ndumbulwilo, bi nka bu kwete kufubila ba nfumu babidi. Tekala mulamate nka penda kwi Yehowa nya.

6. Ndilongyesha kinyi dyatulongyela ku bishima bya Yesu kwi kakongye ka ku Laodisee?

⁶ Peepi na ku nfudiilo kwa siekele a kumpala bino bipugo byetu (B.B.), kakongye ka mu Laodisee kabaadi akekanyisha’shi: “Ne mpeta, naawinyi, ntshii na lukalo na kintu.” Kadi ku meso kwa Yehowa na Yesu, kabaadi ka ‘sha-mpombo, ka kufwilwa lusa, kalanda  na ke muswa.’ Yesu baadi mulangye bena kaka kakongye, kushii mwanda wa’shi abaadi na bupeta nya, kadi mwanda kifulo kyabo kya bupeta kibaadi akilwisha kipwano kyabo na Yehowa. (Kibaf. 3:14-17) Su twamona’shi kifulo kya kukimba bupeta kikwete kutama mu mashimba eetu, abitungu tushintuule binangu byetu bukidibukidi. (1 Tim. 6:7, 8) Su twakutwa kwibishintuula, atubanga kufula bingi bintu na Yehowa takumiina dingi lulangwilo lwetu. Nyi “Efile a mukao.” (Miy. 4:24) Mbikunyi byatudi balombeene kukutwa kwikala na nkatshinkatshi pabitale makuta?

7-9. Mwanda wa David ubakulongyesha kinyi?

⁷ Tubande kutaluula kileshesho kya David, ungi mukulu afubaa ngofu a mu États-Unis. Namwinyi eamba’shi baadi afubu ngofu. Abaadi mpa na bamukamishe mwasu mu kompanyi mubaadi afubu, bamukamiisha efuto na abaadi abamumono bu umune a ku bena mufubo bebuwa ba mwiumbo. Amba’shi: “Aa mafuku naadi namono dyadya efuto bu myabi ya Yehowa.” Nyi bibaabidi su?

⁸ David babangile kumona bitundwilo abilesha’shi mudimo waye wi na bukitshishi bwibubi ku kipwano kyaye na Yehowa. Amba’shi: “ Mu bisangilo sunga mu bulungudi, naadi nanangushena nka ku myanda ya ku mudimo. Naadi napete makuta ebungi, kadi bibabangile kunkalakasha, na ami na mukashi ande tubaadi nka na bilumbu.”

⁹ David bamwene’shi abitungu ataluule bintu bi na muulo mu nshalelo aaye pa mbalo ya kumpala. Amba’shi: “Natshile kitshibilo ki bukopo kya kushituula nshalelo aande.” David bakuminyine kushintuula programe a ku mudimo waye, na aye nkumulesha mukata aaye a mudimo. Nkinyi kibakitshikile? David bashimiishe mudimo waye! Bakitshine kinyi?  Amba’shi: “Efuku dibalondele, naadi muushe esaki dya kufuba bu mbala-mashinda mukwashi.” Bwa kwikwasha, ababangile kukita mudimo wa kusula mu ma nshibo. Mafuku apeela, babangile kufuba bu mbala-mashinda a myeshi yoso, na kunyima mukashi aaye nkubanga namu kufuba bu mbala-mashinda a myeshi yoso. Uno mulume na mukashi abaadi basangule bwa kukita midimo ya masa yababepuulaa kwi bantu bebungi, kadi kintu kibaadi na muulo kwabadi ta mudimo wa kumbidi nya. Sunga’shi ekuta dyabakwete kupeta dipeela ngofu pe makuta abapetanga kumpala, mweshi oso bakwete kupeta ekuta dilombane bwa kulombasha nkalo yabo. Abakumiine kutuula Yehowa pa mbalo ya kumpala, na mbamone’shi Yehowa apasukilaa baaba abatuulu Bufumu pa mbalo ya kumpala.​—Mat. 6:31-33.

10. Mbikunyi byatudya kulama mashimba eetu?

¹⁰ Byatwikala na makuta e bungi sunga apeela, abitungu tulame mashimba eetu. Mushindo kinyi? Tulekye kufula mapeta. Dingi tatutuulanga midimo ya ku mbidi kumpala kwa mufubo wa Yehowa. Mbikunyi byodya kutundula’shi bino bikwete nkukitshikila? Tala ingi nkoonko yodya kwiyipusha: ‘Nsaa yandi mu bisangilo sunga mu bulungudi, nanangushenaa ku mudimo wande wa ku mbidi su? Nekalakashaa pabitale makuta ankekala nao mu mafuku aafiki su? Ami na mwina dibaka naami twi na bilumbu mwanda wa makuta na bintu bya ku mbidi su? Ne kukumiina kukita mudimo wa ku mbidi wabamonaa kwi bangi bu ushadile, kadi ukwete kundekyela nsaa ibungi ya kufubila Yehowa su?’ (1 Tim. 6:9-12) Nsaa yatutaluula ino nkoonko, tutentekyesheyi’shi Yehowa mmwitufule na alombashaa uno mulayilo kwi baaba bamulamate: “Nya, ntankupoosola, ntankusumbusheena.” Nyi bwakinyi Mpoolo mutumibwa bafundile’shi: “Lwabi lwa mfwalanga talwinumunanga mu nshaaleelo eenu.”​—Eb. 13:5, 6.

11. Kukisha kwa kapapi kwi kukita kinyi kwi muntu?

¹¹ Yehowa akumiina’shi twikale na muloo mu nshalelo eetu, na atupetaa muloo nsaa yatukisha kapapi. Eyi dy’Efile Mukulu ndiambe’shi: “Ta kwi kingi ki buwa kwi muntu kukila kudya na kutoma na kusepêla mu mifubo yê.” (Mul. 2:24, EEM) Kadi, mishindo ibungi ya kukisha kapapi i kwanka mu uno ndumbulwilo, i kwikala na bukitshishi bwibubi kwatudi. Ikwete kulwisha mwikelo wa  bantu, ayibanyingisha bwa kutadiila​—sunga kufula​—myanda yabadi bapele Mwiyi dy’Efile Mukulu.

12. Muyile 1 Beena-Kodinda 10:21, 22, bwakinyi abitungu tusangule mushindo wa kukisha kapapi kalolo?

¹² Atukumiina kulamata nka penda kwi Yehowa, byabya tatwibalombene kudya “ku meesa a Yehowa” na a “kafilefile pamune nya.” (Badika 1 Beena-Kodinda 10:21, 22.) Kudya pamune na muntu kampanda akulesha’shi nwi mu kipwano. Su twasangula mushindo wa kukisha kapapi wi na myanda ya lukiso, ya bikudi bibi, i na myanda i butete, sunga ayikwatshishena nkalo na binangu bya kumbidi, abilesha’shi tukwete kudya kidibwa kyabadi batekye kwi mwishikwanyi a Efile Mukulu. Yaya nsaa, tatukwete penda kwikyengyesha atwe banabene nya, kadi atulwisha mpa na kipwano kyetu na Yehowa.

13-14. Muyile Shake 1:14, 15, bwakinyi abitungu twikale badimukye pabitale mushindo watusangula wa kukisha kapaapi? Tusha kileshesho.

¹³ Tubandeyi kutala mu mishindo kampanda mulombene kwikala kukisha kwa kapapi bu kidibwa. Nsaa y’atudi, atutaluulaa kalolo bintu byatwele mukanwa. Nsaa yatuminyi byatudi, tatwi dingi na matalwa a kusangula kyabikakitshi mu mbidi yetu nya. Bidibwa bibuwa abitwikasha na mbidi bukome; bidibwa bibubi bi kwitukumbisha. Bipeta ta mbilombene kutuuka nka dyadya efuku dyatudi nya, kadi abikatuuku mwenda mafuku.

¹⁴ Mu mushindo umune, nsaa yatusangula mushindo wa kukisha kapapi, twi na matalwa a kusangula byatwele mu binangu byetu. Kunyima kwa byabya, myanda yatudi basangule ayibanga kwitwelela mu binangu na mu mashimba eetu. Kukisha kapapi kwibuwa kwi kwitupa muloo; kadi kwibubi kwi kwitwinyongosha. (Badika Shake 1:14, 15.) Bukitshishi bwinabo mushindo wibubi wa kukisha kapapi, tambulombene kutuuka nka mususa umune nya, kadi abukatuuku mwenda mafuku. Nyi bwakinyi Bible etudimusha’shi: “Tanudimbibwanga: Efile Mukulu taasepiibwa nya; mwanda akikunu muntu, ngi kyaawumbula. Akunyina mbidi yaaye awumbula akituusha mbidi: nyi ndufu.” (Nga. 6:7, 8) Bi na muulo ukata bwashi tusumbule mishindo yoso ya kukisha kapapi ayikwatshishena byabya byabadi bashikwe kwi Yehowa!​—Mis. 97:10.

15. Bukwashi kinyi bukwete kwitupa Yehowa bokwete kusangeela?

¹⁵ Ba Temwe ba Yehowa be bungi abasangeelaa kutala Tv a JW, kisashi kyetu ki ku Internete. Ungi mukwetu abetaminaa bu Marilyn amba’shi: “Tv a JW mmunkwasha bwa kwikala na muloo, na dingi ne mulombeene kwikutala bintu bibungi abinkwasha. Nsaa ya nepusha bupenka sunga mubofule kwishimba, natalaa misambo sunga Lulangwilo lwa Kunakashika abinyingishaa. Bino abingikasha peepi na Yehowa na ndumbulwilo aye. Tv a JW mu nshintuule muwa wande.” Okwete kupeta bukwashi bwa kino kyabuntu kya Yehowa su? Kukatusha programe a ku mweshi oso, mu Tv a JW bakwete kwimutuusha miisambo yabadi bakobole penda mayi, ma video na misambo ibungi ayingisha, yodi mulombeene kutala sunga kupusha nsaa yoso.

16-17. Bwakinyi abitungu tudimukye pabitale bungi bwa nsaa yatukisha kapapi, na bwakinyi abitungu twibikite?

¹⁶ Tabitungu tutale penda mishindo yatusangula bwa kukisha ka paapi nya, anka abituntu tutale dingi bungi bwa nsaa yatukisha. Su tatwibatale kalolo, twi kukisha nsaa ibungi mu kwasha pe nsaa yatufubila Yehowa. Bantu be bungi abamonaa’shi bibukopo bwa kutshintshikila nsaa yabakisha kapaapi. Ungi mukwetu mukashi e na bipwa 18 abetaminaa bu  Abigail amba’shi : “kukyolwa ami bapu kufuba ngofu, na talaa Televizion bwa kwikisha. Kadi su tshi mudimukye, ne kukisha nsaa ibungi nka bya mbadila’bi.” Ungi nsongwalume abetaminaa bu Samuel e na bipwa 21 amba’shi: “ingi nsaa natalaa ma video ebungi elekenelekene ku Internete. Nabanda kubandjila umune, kadi nasamuka nka napu kukisha nsaa isatu sunga inanka.”

¹⁷ Mushindo kinyi odya kutala nsaa yokisha kapapi? Mwanda wa kumpala ngwa kuuka bungi bwa nsaa yokwete kukisha binobino. We mulobeene kwikala na programe ku lubingo. Nfunda ku kalandrie bungi bwa nsaa yokisha mu kubandjila televizion, ku Internete, kwasha ku telefone obe. Su bomono’shi okwete kukisha nsaa ikile bungi, kita programe. Tshiba nsaa ya kukita bintu bi na muulo, akupu djo otule nsaa ya kukisha kapapi. Na dingi, teka Yehowa bwa’shi akukwashe olondo programe obe. Kukita bino abikukwasha bodya kwikala na nsaa na bukome bwi bungi bwa kwilongyela Bible, lulangwilo lwa mu kifuko, kutwela bisangila bya bena Kidishitu, na kufubila Yehowa mu mudimo wa bulungudi. Wekala dingi na muloo wa nsaa yokisha kapapi, mwanda botulu Yehowa pa mbalo ya kumpala.

18-19. Mushindo kinyi watudya kulesha’shi twibalamate nka penda Yehowa?

¹⁸ Nkunyima kwaye kufunda pabitale ndubulwilo a Satana na pabitale nsenga ipya, Mpyeele mutumibwa bafundjile’shi: “Anwe baa kuuku bande, mu kuno kutengyela, ekalakasheyi bwa’shi eenusangane mu kufukama, bapwidikye, dingi bashii kato.” (2 Mp. 3:14) Nsaa yatukookyela dino elango na kukita mwetu moso bwa kulangwila Yehowa mu kipaso kya kumiina, atulesha’shi twibamulamate nka penda aye.

¹⁹ Satana na ndubulwilo aye atungunuka nka bwa’shi tutule bingi bintu kumpla kwa Yehowa. (Luk. 4:13) Byabya sunga twekala na nkalakashi kinyi, tatutadiila muntu sunga kintu kampanda kyate mbalo ya Yehowa mu mashimba etu. Twi na kitshibila kya kupa Yehowa kyakya ki mulombeene​—kumulamata nka penda aye!