1. Nkinyi kilombeene Yehowa kukita bwa kulombasha mpàngo yaye?

YEHOWA ekwiyikasha kyoso kyakumiina bwa kulombasha mpàngo yaye. Bu kileshesho, Yehowa mmwiyikashe Mulongyeshi, yawa anyingishaa, mulambukishi, bino nyi mbintu bipeela bya ku bintu bibungi byadi mulombene kwiyikasha. (Yesh. 48:17; 2 Kod. 7:6; Nga. 3:8) Afubaa dingi na bantu bwabadya kulombasha mpàngo yaye. (Mat. 24:14; 28:19, 20; 2 Kod. 1:3, 4) Yehowa mmulombene dingi kupa oso akwatudi binangu na bukome bwatudi nabo lukalo bwatudya kufika kyoso kyakumina bwa kulombasha kikyebe ky’eshimba dyaye. Kino kikoso akipatuula bilombene Yehowa kufika kyoso kyakumiina sunga kwitwikasha kyoso kyakumiina bwa kulombasha mpàngo yaye.

2. (a) Bwakinyi ingi nsaa twibalombeene kwelesha mpaka’shi Yehowa takwete kwitufubisha? (b) Nkinyi kyatwisambila mu uno mwisambo?

² Oso a kwatudi akumiina’shi Yehowa amufubishe, bangi mbalombene kupwadjikisha’shi Yehowa te kwibafubisha. Bwakinyi? Abepusha’shi ta be na ngobesha ya kukita bibungi mwanda wa bununu bwabo sunga nshalelo aabo. Bangi namu mbalombeene kumona’shi byabakwete kukita mbilombane, tabena lukalo lwa kukita bikile byabya byabakitshi. Mu uno mwisambo, atwisambila mishindo ikwete Yehowa kupa oso akwatudi bwa kulombasha mpàngo yaye. Akupu, atutaluula miisambo ya mu Bible ayilesha mushindo ubaadi Yehowa mupe bafubi baye balume na bakashi lukalo na bukome bwa kufuba. Ku nfudiilo, atukamono  mushindo watudi balombeene kutadiila Yehowa bwa’shi afube netu.

3. Muyiile byabidi mu Beena-Fidipe 2:13, mushindo kinyi ulombeene Yehowa kwitupa lukalo lwa kufuba?

³ Badika Beena-Fidipe 2:13. * Yehowa mulombeene kwitupa lukalo lwa kufuba. Ekwibikita naminyi? Bu kileshesho, twikumona’shi mu kakongye mwi muntu e na lukalo lwa bukwashi sunga’shi kwi mudimo kampanda awukyebe kukita. Sunga’shi bakulu ababadika mukanda wa ku filiale awitulungula’shi kwi mbalo kampanda i lukalo. Yaya nsaa twibalombeene kwiyipusha’shi: ‘Nkinyi kyadya kukita bwa kukwasha?’ Pangi twi na lukalakashi lwa kufuba mudimo kampanda na tatuku kya kukita bwa kwiukita kalolo. Pangi kunyima kwa kubadika bifundwe kampanda bya mu Bible, we kwiyipusha’shi: ‘Ne kufuba na kino kifundwe bwa kukwasha bangi naminyi?’ Yehowa tetukitshisha mwanda su ngumune pa bukopo. Anka su bamono’shi atunangushena mushindo watudya kukwasha, paapa mulombeene kwitupa lukalo lwa kufuba.

4. Mushindo kinyi ulombeene Yehowa kwitupa bukome bwa kufuba?

⁴ Yehowa mulombeene dingi kwitupa bukome bwa kufuba. (Yesh. 40:29) Mushindo kinyi? Ekwitupa kikudi ki seleele bwa’shi tunyishe kwikala na ngobesha ibungi. (Efi. 35:30-35) Kubukwashi bwa ndubulwilo aye, Yehowa ekwitulongyesha mushindo watudya kufuba midimo ilekenelekene. Su omono’shi twe bya kulombasha mudino kampanda, teka bukwashi. Na dingi epushe bulungantu bwa kuteka Nshetu e mwiyilu sha kalolo na “bukome bushii bwa kupwandjikisha.” (2 Kod. 4:7; Luk. 11:13) Mu Bible mwi bileshesho bibungi abilesha mushindo ubaadi Yehowa mupe balume na bakashi lukalo na bukome bwa kufuba. Patutaluula bingi bya ku bino bileshesho, nangushena mu mushindo ulombeene Yehowa kufuba nobe mu kipaso ki mumune.

5. Nkiyi kibatulongo pabitale mushindo na nsaa ibaadi Yehowa mufube na Moyiise bwa kukuula mwilo Waye?

⁵ Yehowa baadi mwikashe Moyiise bu mukuudi bwadya kukuula mwilo wa Isaleele. Nsaa kinyi ibaadi mufube naye? Nkunyima kwaye “kulonga myanda yooso ya binangu bya bena Ejiipitu su”? (Bik. 7:22-25) Nya, Yehowa baadi mufube na Moyiise kunyima kwaye kumukwasha bwa kwikala muntu mwiyishe, na sha butaale. (Bik. 7:30, 34-36) Yehowa baadi mupe Moyiise eshimba dinyingye dya kwimana kumpala kwa nfumu sha bukome a mu Ejiipitu. (Efi. 9:13-19) Nkinyi kibatulongo pabitale mushindo na nsaa ibaadi Yehowa mufube na Moyiise? Yehowa afubisha baba boso abatompo kwambula ngikashi yaye na bakulupile mwadi bwa kupeta bukome.​—Fid. 4:13.

6. Nkiyi kibatulongo pabitale mushindo ubaadi Yehowa mufube na Barziilaayi bwa kukwasha Nfumu Daavide?

⁶ Bipwa nkama kunyima, Yehowa baadi mufubishe Barziilaayi bwa kukwasha Nfumu Daavide. Daavide na mwilo waye abaadi ‘bakôkye bikata, dingi abaadi na nsala na nyôta’ nsaa ibaabadi abasuuku mwana a Daavide, Absalome. Barziilaayi muntu mununu na bangi babaadi nabo, babaadi batule myuwa yaabo mu masaku bwa kukwasha Daavide na bantu babaadi nabo. Barziilaayi tabaadi mupwandikishe’shi pa mwanda wa bununu, Yehowa ta mulombeene kumufubisha nya. Na kalolo kooso, baadi mukite mwaye moso bwa kukwasha bafubi baye abaadi mu lukalo. (2 Sam. 17:27-29) Bino abitulongyesha kinyi? Sunga twekala banunu, Yehowa mulombeene kufuba  netu bwa kulombasha nkalo ya bakwetu bena Kididishitu, yaya mbalo yatudi sunga mu dingi eumbo mushii bidibwa. (Nki. 3:27, 28; 19:17) Sunga byekala’shi tatwibalombeene kwibakwasha atwe banabene, twi kutusha byabuntu bwa mudimo wa mu nsenga ishima bwa kukwasha bakwetu balume na bakashi nsaa yakudi lukalo.​—2 Kod. 8:14, 15; 9:11.

7. Mushindo kinyi ubaadi Yehowa mufubishe Simeone, na bwakinyi kwiuka bino akwitunyingisha?

⁷ Yehowa baadi mulee Simeone, muntu mununu sha lulamato baadi mu Yeelushaleme’shi taafu kumpala kwa kumona Mesiya. Uno mulayilo ubaadi unyingishe Simeone ngofu, sunga baadi mutengyele bipwa bibungi bwa kumona Mesiya. Yehowa baadi mwelele Simeone mwabi mwanda wa lukumiino na lulamato lwaye. Dingi efuku “ku bukome bwa kikudi,” bayile ku ntempelo. Kwakwa bakamwene Yesu pa kii kyalaala, na Yehowa nkufuba na Simeone bwa kutemuka pabitale uno mwana akekala Kidishitu. (Luk. 2:25-35) Sunga bibaadi Simeone mufwe kumpala kwa’shi Yesu abangye mudimo waye wa pa nsenga, baadi na lutumbu bwa bibaadi Yehowa mufube naye mu kino kipaso. Na ingi myanda ibuwa ibungi ayimutengyela mu mafuku aafiki. (Kib. 22:18) Twibalombeene natwe namu kulesha lutumbu bwa bipaso byoso bikwete abitufubisha Yehowa mu mudimo waye.

8. Mushindo kinyi ulombeene Yehowa kwitufubisha bu bi baadi mufubishe Barnabase?

⁸ Mu siekele a kumpala bino bipungo byetu (B.B), Yoosefe baadi akumiina’shi Yehowa afube naye. (Bik. 4:36, 37) Abimweka’shi Yoosefe baadi anyingisha bangi, nyi bwakinyi batumibwa abaadi bamuudikye bu Barnabase, kwamba’shi “muntu akankamisheenaa.” Bu kileshesho, kunyima kwa Soolo kwikala mwina Kidishitu, bena Kidishitu bebungi abaadi abatshinyi kwifubwila peepi naye mwanda wa nkumo yaye ya bu muntu abingabingaa tukongye. Anka, Barnabase baadi munyingishe Soolo na kumukwasha, nyi bwakinyi Soolo baadi na lutumbu lukata bwa kalolo kaye. (Bik. 9:21, 26-28) Kunyima, nsaa ibaadi bakulu abaadi ku Yeelusaleme na lukalo lwa kunyingisha bena Kidishitu abaadi kula mu Antyoshe a mu Sirii, nnanyi abaabadi batume? Barnabase! Abaadi basangule kalolo kakile. Barnabase baadi ‘akankamika booso bwabadya kushaala balamate kwi Mwanana n’eshimba dyabo dyooso.’ (Bik. 11:22-24) Bi mumune na lelo uno, Yehowa mulombeene kwitwikasha ‘bantu abakankamikaa’ bakwetu bena Kidishitu. Bu kileshesho, mulombeene kwitufubisha bwa kunyingisha muntu bafwisha mukwabo aadi mufule. Sunga’shi mulombeene kwitutakula bwa kwenda mu nkatala sunga kwitamina muntu e na maladi ku telefone na tubishima twa kalolo. Okumiina kutadiila Yehowa akufubishe bu bibaadi mufubishe Barnabase su?​—1 Tes. 5:14.

9. Nkinyi kibatulongo pabitale mushindo ubaadi Yehowa mukwashe ungi mukwetu abetaminaa bu Vasily bwadya kwikala mukulu ebuwa?

⁹ Yehowa baadi mukwashe ungi mukwetu abetamina bu Vasily bwa kwikala mukulu ebuwa. Nsaa ibaabadi ba musangule bwa kwikala bu mukulu baadi na bipwa 26 na baadi na moo wa’shi ta mulombeene kukwasha bena Kidishitu, bikisheshe bano be na nkalakashi. Byabya, baadi mupete malonyesha ebuwa a bakulu na baadi mutwele mu Kalasa ka Bufumu. Vasily baadi akitshi mwaye moso bwa koobesha. Bu kileshesho, baadi mwifundjile bipatshila. Binobino amba’shi: “Naadi na moo, anka binobino neena muloo wibungi. Nsaa ayinkwasha Yehowa bwa kupeta kifundwe kya kunyingiisha nakyo bakwetu bena Kidishitu, paapa nekala na muloo ukile.” Bakwetu balume, anka bu Vasily, su wekala na lukalo lwa kufubila Yehowa, mmulombeene nkupa ngobesha ya kwikala na mashito ebungi mu kakongye.

10. Nkinyi kibakitshine Abigaile, na ndilongyesha kinyi dibolongyela ku kileshesho kyaye?

¹⁰ Daavide na bantu baye abaadi abebabingabinga kwi Nfumu Saule, na abaadi na lukalo lwa bukwashi. Bantu ba Daavide abatekyele mpeta mwina Isaleele abetamina bu Nabale bwa’shi ebakwashe na ndambo ya bidibwa, mupunda kyoso kyadi nakyo. Tababaadi bealasheene pa kumuteka nya, mwanda abaadi bakwashe Nabale pa kumulamina lombe lwaye lwa mikooko. Kadi, mwanda wa bukonkoto bwaye, Nabale bapelele kwibapa kintu sunga nkimune. (1 Sam. 25:3-13, 22) Anka, mukashi a Nabale, Abigaile, baadi buwa bwa mpala na baadi na binangu, baponene ku ngwa ya Daavide n’eshimba dinyingye. Amuteka bwa’shi taponeshanga mase bwa kwiobwela. Bamupele elango na kanemo koso bwadya kutuula myanda mu maasa mwa Yehowa. Bishima bya kwiyisha bya Abigaile na bikitshino byaye, bibakumine Daavide kwishimba ngofu. Aye nkwamba’shi nyi Yehowa bamutumu. (1 Sam. 25:23-28, 32-34) Abigaile baadi na ngikashi ibaadi imwikashe na muulo ku meso kwa Yehowa. Mu mushindo umune, bakwetu bakashi bena Kidishitu be na binangu na bukalanga, mbalombene kwibafubisha kwi Yehowa bwabadya kunyingisha bifuko byabo na kunyingisha bangi mu kakongye.​—Nki. 24:3; Tt. 2:3-5.

11. Bana ba Shalume abakitshine kinyi, na mbananyi bakwete kwibambula lelo uno?

¹¹ Bipwa nkama kunyima, bana bakashi ba Shalume, babaadi munkatshi mwa baaba babaadi Yehowa mufubishe bwa kulumbuula bimano bya Yeelusaleme. (Ne. 2:20; 3:12) Sunga’shi nshabo baadi mwana a nfumu, bana ba Shalume abaadi bakumiine kukita mudimo wi bukopo na wi masaku. (Ne. 4:15-18) Abaadi belekene ngofu na bana balume bena Teko, mwanda ‘tababakookyeele’ ku mufubo nya! (Ne. 3:5) Banda kunangushena muloo ubaadi nao bana bakashi ba Shalume pabaadi mudimo upwe munda mwa mafuku penda 52! (Ne. 6:15) Lelo uno, bakwetu bakashi bebungi bakwete kukumiina kukwasha na muloo oso mu mifubo i selele i pabwayo ya nsaa yoso​—bu mudimo wa lwibako na wa kubamba mashibo abadi balambule kwi Yehowa. Ngobesha, muloo, na lulamato bi na muulo bwa kukita uno mudimo.

12. Mbikunyi bilombeene Yehowa kwitufubisha bu bibaadi mufubishe Tabita?

¹² Yehowa bakwashile Tabita bwadya kukita “myanda iibungi iibuuwa na kupeesheena bya-pa-lusa.” (Bik. 9:36) Mwanda w’eyikashi dyaye dya kupaana na kalolo, bantu bebungi abamudidile ngofu pabafwile. Kadi, babasangele bikata pabaadi Mpyeele mumusangule. (Bik. 9:39-41) Nkinyi kibatulongyela kwi Tabita? Byatwikala bantu bakulu sunga bana bakinga, balume sunga bakashi, twi balombene kukita myanda kampanda bwa kukwasha bakwetu bena Kidishitu.​—Eb. 13:16.

13. Mushindo kinyi ubaadi Yehowa mufubishe ungi mukwetu mukashi abetaminaa bu Ruth baadi na buufu, na amba kinyi?

¹³ Mukwetu mukashi sha buufu abetamina bu Ruth baadi akumiina kwikala bu misionere. Pabaadi kii ka nsongwakashi, baadi ende ku nshibo na nshibo mu kupa bantu ma trakte. Amba’shi: “Naadi na muloo wa kukita uno mudimo.” Kadi, kwenda ku nshibo na nshibo na kulungula bantu pabitale Bufumu bw’Efile Mukulu kubaadi bu lukalakashi kwadi. Sunga mbibaadi na buufu, Ruth batshile mudimo wa bu mbala-mashinda a myeshi yoso pabaadi na bipwa 18. Mu 1946, baadi mutwele mu kalasa ka Galaade, kunyima babamutumine mu Hawaï na mu Japon. Yehowa baadi  mu mufubishe bwa kukita bibungi bwa kulungula mukandu wibuwa mu ano maumbo. Kunyima kwa kukisha bipwa 80 mu mudimo wa bulungudi, Ruth amba’shi: “Yehowa ekalanga anyingiisha nsaa yoso. Ankwashanga bwa kukambila bufu bwande. Nashinkamisha’shi Yehowa mulombeene kunyingisha yawa oso mukulupile mwadi.”

14. Muyile Beena-Kolose 1:29, nkinyi akitungu tukite su atukumiina’shi Yehowa etufubishe?

¹⁴ Kubanga kala, Yehowa mufubishe bafubi baye mu mishindo ilekenelekene. Yehowa mmulombeene nkwikasha kinyi? Byoso mbitale mushindo okumiina kufuba. (Badika Beena-Kolose 1:29.) Su okumiina kufuba na Yehowa, mmulombeene nkwikasha mulungudi a kishima, mulongyeshi ebuwa, nkupa ngobesha ya kunyingisha bangi, nkupa ngobesha ya kufuba, nkwikasha kuuku ebuwa, sunga nkwikasha kyoso kyakumiina bwa kulombasha akikyebe eshimba dyaye.

15. Nka bu byabadi bebileshe mu 1 Timote 4:12, 15, nkinyi akitungu’shi bakwetu bakii ba nsongwalume batekye kwi Yehowa bwa’shi ebakwashe bekikite?

¹⁵ Twikwamba naminyi b’obe nsongwa kwete kwenda na kukula? Kwi lukalo lukata lwa bana balume be na bukome, bwabadya kwibapa mashito, bu mufubi a midimo. Mu tukongye twi bungi, bakulu be bungi kukila bafubi ba midimo. Anwe bakwetu bakii ba nsongwa, nwi kukumiina kulonga bya kutwala angi mashito mu kakongye su? Pangi bangi bakwetu be kwamba’shi “Ami nakumiina kwikala penda bu mulungudi.” Su nyi byokumiina, teka Yehowa bwa’shi akukwashe bwa kukumiina kulombasha myanda itekibwe bwa kwikala bu mufubi a midimo na bwa’shi akupe bukome bwa kukita mobe moso bwa kufula kumufubila. (Mul. 12:1) Atukumiina’shi wetukwashe!​—Badika 1 Timote 4:12, 15.

16. Nkinyi akitungu’shi tutekye Yehowa na bwakinyi?

¹⁶ Yehowa e nkwikasha kyoso kyakumiina bwa kulombasha akikyebe eshimba dyaye. Byabya, mutekye akupe lukalo lwa kumufubila, na akupe bukome bodi nabo lukalo. Sunga wekala nsongwa sunga muntu mukulu, fubisha nsaa yobe, bukome, na bingi bintu byodi nabyo kubanga binobino bwa kutumbisha Yehowa. (Mul. 9:10) Totadiilanga moo sunga binangu bya kwimona bu shii mulombane bikukutshishwe uno mwabi wa kufubila Yehowa mupunda ngobesha yobe. Twi na mwabi ukata wa kukita sunga kantu kapela bwa kutumbisha Nshetu sha kifulo!