MU mafuku a kala, mulami baadi akunkukusha nshibo sunga bintu bya ungi muntu. Kishima kya mu kina Ebelu na kya mu kina Greke kyabadi baluule bu “mulami” kibaadi akilesha mukunkushi sunga muntu akunkushaa midimo ya mu nshibo.

Nsaa ibaadi Yoosefe mwana a Yakobo bu mpika mu Ejiipitu, Yoosefe bafikile bu mukunkushi a nshibo ya nfumwaye. Na dingi, nfumwaye mwina Ejiipitu “nkuleka bintu byaye byooso mu maasa aa Yoosefe.” (Kib. 39:2-6) Nsaa ibafikile Yoosefe bu mukunkushi mu Ejiipitu, baadi mutule namu aaye muntu a kukunkusha nshibo yaye.​—Kib. 44:4.

Mu mafuku a Yesu, muntu sha mafuba baadi ashala mu kibundji kula na kwi mafuba aye. Baadi asangula muntu a kunkukusha yaya midimo ya ku ntshamba efuku dyoso.

Nnanyi baadi mulombene kusangulwa bu mukunkushi? Ungi mufundji mwina Looma a mu siekele a kumpala abetamina bu Columella baadi mutushe dino elango’shi: Muntu ababaadi abasangula bu mukunkushi abitungu “ekale mulongye kukita mudimo kalolo.” Baadi na kya kwikala muntu e na ngobesha ya “kukunkusha kalolo kushi kwikala na lukiso.” Balombeshe’shi: “Kintu kibaadi na muulo nkya’shi, mulami tabaadi na kya kunangushena’shi auku byoso nya, na dingi baadi na kya kwikala alongo myanda ipya.”

Eyi dy’Efile Mukulu ndifubishe uno ngakwilo a mu kifwanyi a mulami bwa kulesha ingi midimo ayikitshika mu kakongye ka bena Kidishitu. Bu kileshesho, Mpyeele mutumibwa anyingisha bena Kidishitu bwabadya kufubisha ngobesha yabadi bebape kwi Efile Mukulu bwa ‘kwikwashena muntu ooso muyile kipeebwa kyaadi mupete, ku muntu na muntu bu balami bebuwa ba buntu bw’Efile Mukulu.’​—1 Mp. 4:10.

Yesu nabene baadi mufubishe kileshesho kya mulami mu lukindji lwi mu Luka 16:1-8. Dingi mu butemuki butale bitundwilo bya kufika kwaye bu Nfumu, Yesu ashinkamiisha balongi baye’shi atuulu “mpika a kishima na mupatulukye,” sunga “mulami sha kishima.” Mudimo wa yawa mulami ubaadi wa kupa balondji ba Kidishitu bidibwa bya mu kikudi nsaa yoso mu ano mafuku a ku nfudiilo. (Mat. 24:45-47; Luk. 12:42) Twi na muloo wa kupeta mikanda yabatuushaa kwi mulami sha kishima bwa nsenga ishima.