1-2. Muyiile 1 Mpyeele 4:7, 8, nkinyi akiketukwasha bwa kukambila nkalakashi?

BU BYATUKWETE kwifubwila ku “mafuku a nfudiilo,” twibalombeene kupeta nkalakashi ikile bungi. (2 Tim. 3:1) Bu kileshesho, kunyima kwa kampanye mu dingi eumbo dya mu Afrique a kupona nguba, mu batukile ngoshi ikile bukopo. Munda mwa myeshi isamombo, nshalelo baadi bukopo bukile bwa bakwetu balume na bakashi, mwanda ngoshi ibaadi nka kwanka. Nkinyi kibaadi kibakwashe bwabadya kukambila yaya nkalakashi? Bangi abaadi bakafwamine ku mashibo a bakwabo bena Kidishitu abaadi mbalo ibuwa. Ungi mukwetu amba’shi: “Mu luno lukalakashi, nadi na muloo mwanda nadi na ba kuuku. Tubaadi atwinyingishena.”

² Nsaa aikabanga “mpombo ikata,” atukekala na muloo nka su twi na ba kuuku be buwa. (Kibaf. 7:14, Kilombeeno kipya 2014) Byabya, tunyingisheyi bukidibukidi kipwano kyetu na bakwetu bena Kidishitu kubanga binobino. (Badika 1 Mpyeele 4:7, 8.) Twibalombene kulonga bibungi kwi Yeelemiya. Ba kuuku baye abaadi bamukwashe bwa kunyingila nkalakashi mafuku apeela kumpala kwa kulwishiibwa kwa Yeelushaleme. * Twibalombeene kwambula Yeelemiya naminyi?

3. (a) Nkinyi kibadya kwikala kitakule Yeelemiya bwa kwitola? (b) Nkinyi kibaadi Yeelemiya mulungule sekretere aaye Baruke, na mbipeta kinyi bibatukile?

³ Yeelemiya baadi mushaale munda mwa bipwa bifikye ku 40  munkatshi mwa bantu babi mpa na bankungishanyi na pangi bakwabo ba ku kibundji kyabo kya Anatote. (Yel. 11:21; 12:6) Anka, tabadi mwitole nya. Kadi, balungwile sekretere aaye sha lulamato Baruke pabitale byapusha, mpa n’atwe lelo uno tubauku byanka mwanda mbebifunde. (Yel. 8:21; 9:1; 20:14-18; 45:1) Bino abilesha’shi, bu bibadi Baruke mufunde myanda ya Yeelemiya, abimweka’shi bubidi bwabo abaadi befulene na abenemekyeshena ngofu.​—Yel. 20:1, 2; 26:7-11.

4. Nkinyi kibaadi Yehowa mutekye Yeelemiya bwadya kukita, na mbikunyi bibaadi uno mudimo unyingishe bu kuuku bwa Yeelemiya na Baruke?

⁴ Yeelemiya na Baruke abaadi bafube pamune munda mwa bipwa bibungi bwa kulombasha mudimo ubaadi Efile Mukulu mwibape. Aa mafuku, Yeelemiya baadi mudimushe bena Isaleele n’eshimba dinyingye pabitale myanda ibaadi na kya kukitshika mu Yeelusaleme. (Yel. 25:3) Mususa wa nfudiilo ubaadi Yehowa atompo kulungula bena Isaleele bwabadya kwilanga kwishimba, Batekyele Yeelemiya bwadya kufunda kwakwa kudimusha mu mufungofungo. (Yel. 36:1-4) Bu bibaadi Yeelemiya na Baruke bakite wawa mudimo ubabadi bebape kwi Efile Mukulu ubaadi ukite myeshi ibungi pamune, kushii mpaka, abaadi abesamba miisambo ibaadi ayinyingisha lukumiino lwabo.

5. Mbikunyi bibaadi Baruke muleshe’shi nyi kuuku ebuwa a Yeelemiya?

⁵ Pabalombene nsaa ya kwakula mukandu ubaadi mu mufungofungo, Yeelemiya baadi mukulupile mwi kuuku aaye Baruke bwadya kewakula. (Yel. 36:5, 6) Baruke balombeshe uno mudimo wi masaku n’eshimba dinyingye. Bandayi kunangushena muloo ubaadi nao Yeelemiya pabaadi Baruke mwende ku ntempelo na kukabadika wawa mukandu! (Yel. 36:8-10) Bana ba nfumu a mu Yuuda abaadi bapushe bibadi Baruke abadika, abo nkumuteka bwadya kwibabadikila wawa mukandu n’eyi dibukopo.  (Yel. 36:14, 15) Bana ba nfumu nkulungula Nfumu Yoyakime mayi a Yeelemiya. Na kalolo koso, abo nkulungula Baruke’shi: “Katuka wende mu kufwama, pamune naa Yeelemiya; muntu sunga umune tawukanga kwanudi.” (Yel. 36:16-19) Dino dibaadi elango dibuwa bukile!

6. Nkinyi kibaadi Yeelemiya na Baruke bakite nsaa ibabadi abebalwisha?

⁶ Nfumu Yoyakime bafitshile munda bikata nsaa ibapushishe bishima bya Yeelemiya, aye nkushiika mufungofungo kaalo na nkutuma bantu bwabadya kukwata Yeelemiya na Baruke. Kadi, Yeelemiya tabaadi mutshine nya. Batshile ungi mufungofungo, eupa Baruke, amulungula mukandu wa Yehowa na Baruke nkufunda “bishima byoso bibaadi mu mukanda wa kwibedi ushiikibwe kaalo kwi Yoyakime, mulopwe a Yuuda.”​—Yel. 36:26-28, 32.

7. Nkinyi kibaadi kikitshikye pabaadi Yeelemiya na Baruke abafubu pamune?

⁷ Bantu abanyingiila lukalakashi lumune, abatamishaa bu kuuku bwabo. Abimweka’shi yaya nsaa ibabadi abafuduula mufungofungo ubabadi balwishe kwi Nfumu Yoyakime, nyi ibaadi Yeelemiya na Baruke beukene kalolo na kunyingisha bu kuuku bwabo. Kileshesho kya bano bantu basha lulamato babidi ki kwitukwasha naminyi?

8. Nkinyi kilombene kwitukutshishwa kukimba ba kuuku bebuwa, na bwakinyi tabitungu tukookye?

⁸ Bi kwitwelela bukopo bwa kulungula bangi byatupusha mwanda abaadi betufitshishe munda kala kwi muntu. (Nki. 18:19, 24) Sunga’shi twi kupwandikisha’shi tatwi na nsaa na bukome bwa kukimba ba kuuku. Anka, tatukookanga. Su atukumiina’shi bakwetu betukwashe nsaa yatupete nkalakashi, abitungu twikale atwibalungula bi mu binangu byetu na byatupusha kubanga binobino. Wawa ndjo mwanda wi na muulo bwa kubanga bu kuuku bwibuwa.​—1 Mp. 1:22.

9. (a) Mushindo kinyi ubaadi Yesu mukulupile ba kuuku baye? (b) Bwakinyi kulungula ba kuuku bobe byopusha akunyingisha bu kuuku bwenu? Tusha kileshesho.

⁹ Yesu baadi muleshe’shi mmukulupile bakuuku baye pa kwisamba nabo myanda yoso patooko. (Yo. 15:15) Twi kumwambula pa kulungula ba kuuku betu nkalakashi yatudi nayo, myanda ayitusankishaa na ayitufitshishaa munda. Nsaa ayikulungula muntu mwanda, muteemeshe kalolo, okamono’shi nwi na nkalakashi, binangu na bipatshila bi mumune. Tubande kwata kileshesho kya mukwetu Cindy, e na bipwa 29. Baadi mwikwatene bu lole na ungi mbala-mashinda e na bipwa 67 abetaminaa bu Marie-Louise. Cindy na Marie-Louise abatukaa mu bulungudi mu dya kananka moso ku nakashika, na abesambaa myanda yoso patoka. Cindy amba’shi: “Nasangelaa  kwisamba myanda i na muulo na ba kuuku mwanda bino abinkwashaa bwa kwibeuka na kwibapusha kalolo.” Nsaa y’olungula ba kuuku bobe byopusha na kwibatemesha kalolo nsaa yabakula, bu kuuku bwenu abunyingi ngofu. Nka bu Cindy, su wata mpàngo ya kwisamba na bangi myanda patoka na muloo, bu kuuku bwenu abwende na kunyinga.​—Nki. 27:9.

10. Muyiile Nkindji 27:17, mbipeta kinyi bi buwa bilombene kutuka nsaa yatufubu pamune na bakwetu bena Kidishitu?

¹⁰ Nka bubaadi bikitshikile Yeelemiya na Baruke, nsaa yatufubu pamune na bakwetu bena Kidishitu na kutala ngikashi yabo ibuwa, atulongyela ingi myanda kwabaadi, na atwifubwila peepi nabo. (Badika Nkindji 27:17.) Bu kileshesho, opushaa naminyi nsaa yanudi mu bulungudi na kuuku oobe, opusha kwakwete kwakula n’eshimba dinyingye pabitale Yehowa na mpàngo yaye na kushinkamisha kooso? Kushi mpaka, onyisha kumufula ngofu.

11-12. Tusha kileshesho akilesha bilombeene mudimo wa bulungudi kunyingisha bu kuuku bwetu na bakwetu.

¹¹ Tala bileshesho bibidi abilesha’shi kufuba pamune mu bulungudi nkulombene kukwasha bantu bwabadya kunyisha kwifulena. Ungi mukwetu mukashi abetaminaa bu Adeline e na bipwa 23, baadi mulungule umune a ku ba kuuku baye abetaminaa bu Candice, bwabadya kwenda mu kulungula mu mbalo yabasha bakambaa kulungula mukandu wibuwa. Adeline amba’shi: “Atukumiinaa kulungula na kisumi na kwikala na muloo. Atukumiinaa’shi betunyingishe bwa kumona bya kutungunuka na kupa Yehowa bintu byetu bya muulo.” Kufuba pamune nkwibakwashe naminyi? Adeline amba’shi: “ku nfudiilo kw’efuku, atwisambaa pabitale byatupusha, pabitale kibetunyingisha mu miisambo yetu na bantu mu bulungudi, na mushindo watumonanga bukunkushi bwa Yehowa. Ino miisambo ayitukwasha bwa kwiukena kalolo.”

¹² Laïla na Marianne bakwetu bakashi be bukupi ba mu France, abayile mu kulungula  mukandu wibuwa munda mwa mbingo itano mu Bangui, epata dya République centrafricaine di bantu bebungi. Laïla amba’shi: “Ami na Marianne twibapete nkalakashi ibungi, anka pa mwanda wa kwisamba kalolo na kifulo kya binyibinyi, bu lole bwetu mbunyingye. P’ami kumona bibadi Marianne mobeshe yawa nshalelo mupya, kifulo kyaye bwa bantu ba mu dyadya eumbo, na kisumi kyaye mu bulungudi, nanyishishe kumunemeka.” Tabitungu nka’shi wende mu dingi eumbo bwa kupeta ino myabi nya. Nsaa yoso yolungula mukandu wibuwa mu teritware obe na mukwetu mulume sunga mukashi, wena mushindo wa kumwiuka kalolo na kunyingisha bu kuuku bwenu.

13. Lukalakashi kinyi lwatudi balombene kufumankana nalo nsaa yatufubu pamune na ba kuuku betu?

¹³ Nsaa yatufubu pamune na ba kuuku betu, tatwiuku penda ngikashi yabo ibuwa nya, atwiuku dingi bilubilo byabo. Mushindo kinyi watudya kukila na luno lukalakashi? Tala dingi kileshesho kya Yeelemiya. Nkinyi kibaadi kimukwashe bwa kumona ngikashi ibuwa ya bangi na kwibafwila lusa?

14. Nkinyi kibaadi kilongye Yeelemiya pabitale Yehowa, na bibaadi bimukwashe naminyi?

¹⁴ Yeelemiya bafundjile mukanda wi na eshina dyadye, na abimweneka’shi, bafudjile dingi mukanda wa 1 na 2 wa Banfumu. Wawa mudimo ubaadi umukwashe bwa kumona mushindo ubaadi Yehowa mufwile bantu bakutwe kupwidjika lusa. Bu kileshesho, baadi auku’shi nsaa ibaadi Nfumu Akabe mwilangye ku bikitshino byaye bi bubi, Yehowa baadi mwambe’shi taafu lufu lwa buufu. (1 Bf. 21:27-29) Mu mushindo umune, Yeelemiya baadi auku’shi Manasee baadi mulwishishe Yehowa kukila mpa na Akabe. Sunga mbyabya, Yehowa baadi mufwile Manasee lusa nsaa ibaadi mwilangye. (2 Bf. 21:16, 17; 2 Mya. 33:10-13) Bino byoso bileshesho bibaadi bikwashe Yeelemiya bwa kwambula lwishinko lw’Efile Mukulu na lusa lwaye nsaa ayimulwishisha ba kuuku baye.​—Mis. 103:8, 9.

15. Yeelemiya baadi mwambule lwishinko lwa Yehowa naminyi nsaa ibabangile Baruke kwikala na kapungakanyi?

¹⁵ Tala bibaadi Yeelemiya mukwashe Baruke nsaa ibaadi mubagye kwikala na kapungakanyi ku mudimo waye. Pamutwe pa kutshiba bu kuuku naye musango umune, Yeelemiya bakwashishe Baruke pakumulungula mukandu wa Yehowa. (Yel. 45:1-5) Ndilongyesha kinyi dyatupete ku uno mwanda?

16. Nka bu byabadi bebileshe mu Nkindji 17:9, kinyi akitungu’shi tukite bwa kulama kipwano kyetu na bakwetu?

¹⁶ Mukwakula kwa kalolo, tatutengyelanga myanda ipwidikye kwi bakwetu bena Kidishitu nya. Su tubapu kwikala bu kuuku na muntu kampanda, abitungu tukite mwetu moso bwa kwibulama. Su ba kuuku betu abakitshi bi bubi, twibalombene kwibapa elango na mayi a kalolo a mw’Eyi dy’Efile Mukulu. (Mis. 141:5) Na su betulwishisha, abitungu twibafwile lusa. Su tubapu kwibafwila lusa, abitungu tulekye kwibalungula wawa mwanda ubaadi witufitshishe munda sunga kwiulungula bangi. (Badika Nkindji 17:9.) Bi na muulo mu ano mafuku ebukopo kutula binangu byetu ku ngikashi ibuwa ya bakwetu bena Kidishitu pe ku kubofula kwabo. Su tubakitshi bino atunyingisha kipwano kyetu nabo. Bi na muulo kwibikita kubanga binobino, mwanda atukekala na lukalo lwa ba kuuku mu mpombo ikata.

17. Yeelemiya baadi muleshe’shi, nkuuku e buwa mu nsaa ya malwa naminyi?

¹⁷ Bikitshino bya mutemuki Yeelemiya bibaadi abilesha’shi, nyi kuuku ebuwa mu nsaa ya malwa. Bu kileshesho, kunyima kw’abo kumupasha  kwi Ebede-Meleke baadi mwibalasa, p’aye kumutushisha mu kiina kya meema kibaadi kiwule matekye, Ebede-Meleke baadi na moo wa bana ba nfumu. Nsaa ibeukile Yeelemiya, tabaadi mushale mumiine, na kwamba’shi kuuku aye anyingila nya. Sunga mbibaadi mu lukano, baadi mukite mwaye moso bwa kunyingisha Ebede-Meleke pa ku mulungula mulayilo wa Yehowa.​—Yel. 38:7-13; 39:15-18.

18. Muyiile Nkindji 17:17, nkinyi kyatudi balombene kukita nsaa ayikyengye kuuku etu?

¹⁸ Lelo uno, bakwetu balume na bakashi be na nkalakashi ilekenelekene. Bu kileshesho, bebungi bakwete kukyenga mwanda wa masaku aatukila ku bipangwa sunga kwi bana ba bantu. Nsaa ayituku ino myanda, bangi mbalombene kwikala na ngobesha ya kutula bano ba kuuku ku mashibo aabo. Bangi bekutusha ekuta. Kadi atwe boso twi balombene kuteka Yehowa bwadya kukwasha bakwetu bena Kidishitu. Nsaa yatupusha’shi mukwetu mwina Kidishitu mmubofule kwishimba, twi kukutwa kya kwakula sunga kya kukita. Kadi sunga mbyabya, oso akwatudi mulombene kukita kintu kampanda. Bu kileshesho, Twibalombene kukisha nsaa nabo. Twibalombene kwibateemesha kalolo nsaa y’abakula. Na twibalombene kwibalungula pabitale kifundwe akitukwashaa. (Yesh. 50:4) Mwanda wi na muulo, nkwikala nabo nsaa yabaadi nobe lukalo.​—Badika Nkindji 17:17.

19. Kunyingisha kipwano kyetu kubanga binobino, akuketukwasha naminyi mu mafuku aafiki?

¹⁹ Abitungu twikale na kitshibilo kya kunyingisha kipwano kyetu na bakwetu balume na bakashi kubanga binobino. Bwakinyi? Mwanda beshikwanyi netu abatungunuka nka na kutompa kwitutshibuula na myanda ya madimi. Abatungunuka na kutompa kwitutakula mu kupela kukulupila bakwetu na kwibakwasha. Anka taboobesha nya. Tabekala na ngobesha ya kutshiba kifulo kyetu bwa bakwetu nya. Takwi kintu su nkimune akilwisha kipwano kyatudi bapwe kwikala na bakwetu. Byabya, kino kipwano takitukwasha penda kuno kufudiilo kwa nsenga nya, anka bwa looso!