1-2. Muyile mwanda wa Angelito, abitungu oso a kwatudi akite kinyi?

MBAKUKUSHE kwi baledi ba Temwe ba Yehowa su? Su mbyabya, uuka’shi kwikala mu kipwano kibuwa na Yehowa twe mulombene kwikupyana kwi baledi bobe nya. Baledi betu byabekala ba Temwe sunga bashi ba Temwe, muntu ese e na lukalo lwa kwikala mu kipwano kibuwa na Yehowa aye nabene.

² Tubande kutaluula mwanda ubaadi ufumankane nao ungi mukwetu mulume abetamina bu Angelito. Baadi mukudile mu kifuko kya ba Temwe ba Yehowa. Kadi, pabaadi kii mwana mukinga, tabaadi epusha bu e peepi n’Efile Mukulu nya. Amba’shi: “Naadi nafubila Yehowa mwanda naadi nalondo bibaadi abikitshi bena kifuko kyetu.” Anka, Angelito batshile kitshibilo kya kubadika Eyi dy’Efile Mukulu na kunangushena ku dyanka, na babangile kuteka Yehowa ngofu. Nkinyi kibakitshikile? Amba’shi: “Nalongyele’shi mushindo umune wa kwifubwila peepi na Nshami Yehowa, nyi kumuuka kalolo.” Mwanda wa Angelito awitutakula mu kunangushena ku ino nkonko: Nkwilekena kinyi kwi pankatshi pa kuuka myanda ipeela pabitale Yehowa na kumuuka kalolo? Na mbikunyi byatudi balombene kuuka Yehowa?

3. Nkwilekena kinyi kwi pankatshi pa kuuka myanda ipeela pabitale Yehowa na kumuuka kalolo?

³ Twi kwamba’shi muntu auku eshina dy’Efile Mukulu na ndambo ya myanda yadi mwakule sunga yadi mukite auku Yehowa. Kadi, kuuka Yehowa kalolo akutekye myanda ibungi.  Abitungu twate nsaa ya kulonga pabitale Yehowa na ngikashi yaye ya kukanya. Nka penda kukita bino nyi kulombene kwitukwasha bwa kupusha kibaadi akimutakula bwa kwakula sunga kukita ingi myanda. Byabya abitukwasha bwa kutundula su akumiina mweneno eetu a myanda, bitshibilo na bikitshino byetu. Nsaa yatutundula akikyebe Yehowa bwetu, byabya abitutakula bwa kutumikila byabya byatubalongo.

4. Kutaluula bileshesho bya mu Bible akuketukwasha naminyi?

⁴ Bangi bantu be kwitubepuula mwanda tubakumiina kufubila Yehowa, na be kwitulwisha nsaa yatubanga kwibunga na bafubi baye. Kadi, su twekala bakulupila mwi Yehowa, taketulekyeela nya. Atukekala mu kipwano kibukopo n’Efile Mukulu mu muwa wetu oso. Twi balombene kuuka Yehowa kalolo su? Oolo, twi kumuuka kalolo! Bileshesho byabadi betulekyele kwi bantu bakutwe kupwidika bu Moyiise na Nfumu Daavide, abilesha’shi mbibofule bwa kumuuka kalolo. Su twataluula myanda ibabadi bakite, atwaluula ku ino nkonko ibidi: Mbikunyi bibabadi bafikye mu kuuka Yehowa? Na malongyesha kinyi atudi balombene kupetela ku kileshesho kyabo?

5. Moyiise badi mukumiine kukita kinyi?

⁵ Moyiise basangwile bwa kufubila Efile Mukulu. Pabaadi na bipwa 40, Moyiise bakumiinyine kwikala ku lupese lwa mwilo w’Efile Mukulu, bena Ebelu, pamutwe pa kwikala muukibwe bu “mwana a mwana mukashi a Faraone.” (Eb. 11:24) Moyiise bapelele mwasu ukata. P’aye kwikala ku lupese lwa bena Ebelu abaadi ku bupika mu Ejiipitu, Faraone nfumu mukata ababadi abamono bu efile, baadi mumufitshile munda ngofu. Baadi na lukumiino lukata! Moyiise baadi mukulupile mwi Yehowa. Lwalwa lukulupilo nyi lubaadi lumukwashe bwa kwikala mu kipwano na Yehowa bwa loso.​—Nki. 3:5.

6. Nkinyi kyatulongyela ku kileshesho kya Moyiise?

⁶ Bwakinyi bino bi bu dilongyesha kwatudi? Nka bu Moyiise, atwe boso twi na bitshibilo bya kwata: atukumiina kufubila Efile Mukulu na kwikala pamune na mwilo waye? Abitungu kwikutshishwa ingi myanda bwa kufubila Efile Mukulu, na be kwitulwisha kwi bantu bashabauku Yehowa. Kadi su twekala bakulupile mwi Nshetu e mwiyilu, aketukwatshishena!

7-8. Nkinyi kibaadi Moyiise mutungunukye na kulonga?

⁷ Moyiise batungunukile na kulonga ngikashi ya Yehowa na kukita kikyebe ky’eshimba dyaye. Bu kileshesho, Pabadi Yehowa mutekye Moyiise bwa kutuusha mwilo wa Isaleele ku bupika mu Ejiipitu na bwa kwiukunkusha, tabaadi emono bu mulombane nya, nyi bwakinyi baadi alungula Yehowa misusa yoso’shi ntshimulombane. Efile Mukulu baadi amwalula na kalolo koso, na baadi amukwasha. (Efi. 4:10-16) Bu kipeta, Moyiise baadi na ngobesha ya kulungula mukandu wa kiimu kwi Faraone. Akupu, Moyiise bamwene bibaadi Yehowa mufubishe bukome Bwaye mu mushindo wa kukanya p’Aye kupasha bena Isaleele na kubutula Faraone na bilwilo byaye mu Kalunga kamonga.​—Efi. 14:26-31; Mis. 136:15.

⁸ Kunyima kwa Moyiise kwibatusha mu Ejiipitu, bena Isaleele abaadi nka abedidi misusa yoso. Sunga mbyabya, Moyiise bamwene bibaadi Yehowa na lwishinko bwa mwilo ubaadi mutuushe mu bupika. (Mis. 78:40-43) Moyiise bamwene dingi bibaadi Yehowa muleshe kwiyisha kukata nsaa Ibaadi mushintuule binangu Byaye pabaadi Moyiise mumutekye’shi tabutulanga bena Isaleele.​—Efi. 32:9-14.

9. Muyile Beena-Ebelu 11:27, kipwano kya Moyiise na Yehowa kibadi bukopo naminyi?

 ⁹ Kunyima kw’abo kutuka mu Isaleele, kipwano kya Moyiise na Yehowa kibafikile bukopo nka bu’shi baadi amono Nshaye e mwiyilu. (Badika Beena-Ebelu 11:27.) Palesha bibaadi bukopo bwa kyakya kipwano, Bible amba’shi: “Bakulanga na Moyiise mpala na pala, byabaakulaa kwi muntu na muntu.”​—Efi. 33:11.

10. Bwa kuuka Yehowa kalolo, nkinyi akitungu’shi tukite?

¹⁰ Bino abitulongyesha kinyi? Bwa kuuka Yehowa kalolo, tabitungu penda kulonga ngikashi yaye nya, kadi abitungu dingi kulonga akikyebe eshimba dyaye. Kikyebe ky’eshimba dya Yehowa lelo uno nkya’shi “bantu booso bapande na bafikye ku kyuukilo kya biinyibiinyi.” (1 Tim. 2:3, 4) Kipaso kimune kyatudya kukita kikyebe ky’eshimba dya Yehowa nyi mpa kulongyesha bangi pabimutale.

11. Nsaa yatulongyesha bangi pabitale Yehowa, mushindo kinyi watunyisha kumwiuku kalolo?

¹¹ Kebungi, nsaa yatulongyesha bangi pabitale Yehowa atunyisha ku mwiuka kalolo. Kileshesho, atumonaa lusa lwa Yehowa nsaa y’etukwasha bwa kupeta bantu abakumiina kwikala ba kuuku baye. (Yo. 6:44; Bik. 13:48) Atumono bukome bw’Eyi dy’Efile Mukulu, mwanda adikwasha bantu batulongo nabo Bible bwabadya kuleka bikitshino bibubi na kushintuula nshalelo aabo. (Kol. 3:9, 10) Atumono lwishinko lwaye bwa bantu ba mu teritware etu mishindo ibungi bwabadya kulonga pabimutale na kupashibwa.​—Lom. 10:13-15.

12. Anka bu byabaadi bebileshe mu Efilu 33:13, nkinyi kibaadi Moyiise atekye, na bwakinyi?

¹² Moyiise baadi aata kipwano kyaye na Yehowa na muulo. Sunga kunyima kwaye kukita bilengyeleshi bibungi mwishina dya Yehowa, Moyiise baadi mutungunukye na kumuteka bwashi amukwashe amwiukye kalolo. (Badika Efilu 33:13.) Nsaa ibaadi mutekye byabya, Moyiise tabaadi na bipwa bikile 80, anka baadi auku’shi kii na bibungi bya kulonga pabitale Yehowa.

13. Mushindo kinyi umune watudi balombene kulesha’shi atwata na muulo bu kuuku bwetu n’Efile Mukulu?

¹³ Bino abitulongyesha kinyi? Sunga twekala bapwe kufubila Yehowa munda mwa bipwa bungi kinyi, tatukumanga kwakula’shi bu kuuku bwatudi bapwe kwikala naye mbulombane. Mushindo umune watudi balombene kulesha’shi atwata bu kuuku bwetu naye na muulo nyi pa kwisamba naye mu luteko.

14. Bwakinyi luteko ndulombene kwitukwasha bwa kulonga bibungi pabitale Efile Mukulu?

¹⁴ Bwakwikala mu bu kuuku bwi bukopo na muntu kampanda, abitungu wesambe naye nsaa yoso. Byabya, bwa kwikala mu bu kuuku bwi bukopo n’Efile Mukulu, mutekye nsaa yoso na totshinanga kumulunga byopusha na bi mu bingangu byobe. (Ef. 6:18) Krista mushale mu Turquie amba’shi: “Kifulo na lukulupilo lwande mwi Yehowa abitamaa nsaa yoso yammulungula bi mu binangu byande mu luteko na byankwasha. Nsaa yamono mushindo awaluula Yehowa nteko yande na kunkwasha, namumono bu Nshami na bu kuuku ande.”

15. Yehowa etamina Nfumu Daavide bu nanyi?

¹⁵ Nfumu Daavide baadi mutandjikwe mu mwilo ubaadi upwe kwilambula kwi Yehowa Efile Mukulu. Daavide tabaadi alangwila Yehowa mwanda washi kifuko kyaye namu kibaadi akimulangwila. Baadi munyingishe kipwano kyaye’ye nabene n’Efile Mukulu, na Yehowa baadi mumufule ngofu. Yehowa etamina Daavide bu “muntu muyile eshimba [dyaye].” (Bik. 13:22, Esambi dipya 2015) Mushindo kinyi ubaadi Daavide munyingishe bu kuuku byaye na Yehowa?

16. Nkinyi kibaadi Daavide mulongye pabitale Yehowa pa kutala bintu bipangibwe?

 ¹⁶ Daavide baadi mulongye pabitale Yehowa ku bintu bipangibwe. Nsaa ibaadi nsogwa, Daavide baadi akisha nsaa ibungi mu mapya bwa kulama mikooko ya nshaye. Pangi nyi nsaa ibabangile kunangushena ku bintu bipangye Yehowa. Bu kileshesho nsaa ibaadi atala mwiyilu bufuku, tabaadi amono penda binunu bya nyenyenyi nya, baadi dingi amono ngikashi ya Yawa mwiyipangye. Nyi bwakinyi ku bukwashi bwa kikudi, bafundjile’shi: “Eilu adilungulâ ntumbo y’Efile Mukulu. Bintu byoso bi mwanka abyakula bi mifubo yê.” (Mis. 19:2, 3, EEM) Nsaa ibaadi munagagushene mushindo ubabaadi bapangye bantu, bamwene bi kinangu kya Yehowa. (Mis. 139:14) Nsaa ibadi Daavide munangushene kubintu bibaadi Yehowa mupangye, bamwene’shi mmupela ngofu pa kwipwandjikisha na Yehowa.​—Mis. 139:6.

17. Nkinyi kyatudi balombene kulonga su twabandjila bintu bipangibwe?

¹⁷ Bino abitulongyesha kinyi? Ikala obandjila bintu bipangibwe. Ata nsaa ya kubandjila buwa bwi bintu byabadi bapangye kwi Yehowa pano pa nsenga; bikukaanyishe! Efuku dyoso ikala onangushena ku akikulongyesha bintu bipangibwe byomono mbalo yodi pabitale Yehowa​—mitshi, nyema, na bantu. Paapa, efuku dyoso wekala olongo myanda ipya pabitale Nshobe sha kifulo. (Lom. 1:20) Dingi, efuku dyoso kifulo kyobe bwaye akyende na kutama.

18. Bu byabaadi bebileshe mu Misambo 18, nkinyi kibaadi Daavide auku?

¹⁸ Daavide baadi auku’shi Yehowa baadi amukwasha. Bu kileshesho, pabaadi Daavide mukalwile mikooko ya nshaye ku ntambwe na ku kimungu, bambile’shi Yehowa nyi bamukwashishe bwa kwipaa yaya nyema i bukyelo. Nsaa ibaadi mwipe Goliate kilobo kya ngoshi, Daavide bamwene patooka’shi Yehowa nyi baadi amukunkusha. (1 Sam. 17:37) Na pabaadi asuuku Nfumu Saule mwanda wa mukao waye, Daavide baadi auku’shi Yehowa nyi baadi amupaasha. (Mis. 18, mayi a ku mbangilo kwa shapitre) Su Daavide baadi na kwitatula, badya kwamba’shi kubukome bwaye kwadi mukite yaya yoso myanda. Kadi Daavide baadi mwiyishe, mwanda baadi mutundule bukwashi bwa Yehowa mu muwa waye.​—Mis. 138:6.

19. Nkinyi kyatudi balombene kulongyela ku kileshesho kya Daavide?

¹⁹ Bino abitulongyesha kinyi? Abitungu tukite bibungi kukila penda kuteka bukwashi bwa Yehowa. Abitungu dingi twikale na ngobesha ya kutundula nsaa na mushindo awitukwasha Yehowa. Su twekala beyishe, atutundula’shi tatwibalombene kukita myanda yoso atwe banabene, anka Yehowa nyi kwete kwitukwasha bwa kukita byoso byatushi balombene kukita. Nsaa yoso yatumono bukwashi bwa Yehowa, kipwano kyetu naye akinyisha kunyinga ngofu. Isaac ungi mukwetu e mu Fiji baadi mufubile Yehowa munda mwa bipwa bibungi mumone’shi bya binyi. Amba’shi: “Pa nangushena mafuku ashale, namono bibaadi Yehowa munkwashe kubanga pa nabangile kulonga Bible mpa na lelo. Nyi bwakinyi, Yehowa mmuntu a binyibinyi bwade’mi.”

20. Nkinyi kyatulongyela pabitale kipwano kya Daavide na Efile Mukulu?

²⁰ Daavide baadi mwambule ngikashi ya Yehowa. Yehowa mmwitupangye na ngobesha ya kwambula ngikashi yaye. (Kib. 1:26) Nsaa yatunyisha kulonga pabitale ngikashi ya Yehowa, atunyisha kwikala na ngobesha ya kwambula ngikashi yaye. Daavide baadi mwiukye Yehowa kalolo, nyi bwakinyi baadi na ngobesha ya Kumwambula mu nsahalelo  aye na bangi. Banda kutala penda kileshesho kimune. Daavide baadi mulwishishe Yehowa nsaa ibaadi mutambukye masandji na Batesheba na kwipayisha mulume aye. (2 Sam. 11:1-4, 15) Anka Yehowa baadi mumufwile lusa, mwanda aye namu baadi mufwile bangi lusa. Mwanda Daavide baadi mu kipwano kibuwa na Yehowa, bena Isaleele abaadi bamufule ngofu, na Yehowa baadi mu mufubishe bu kileshesho kibuwa bwa bangi ba nfumu ba mu Isaleele.​—1 Bf. 15:11; 2 Bf. 14:1-3.

21. Muyile Beena-Efeso 4:24 na 5:1, ‘kwambula Efile Mukulu’ akwitukwasha ku kinyi?

²¹ Bino abitulongyesha kinyi? Abitungu ‘twambule Efile Mukulu.’ Nsaa yatukitshi byabya, abitukwasha atwebanabene na atulongo bibungi pabitale Efile Mukulu. Nsaa yatwambula ngikashi yaaye, atulesha binyibinyi’shi twi bana baye.​—Badika Beena-Efeso 4:24; 5:1.

22-23. Nkinyi akikitshika su twatumikila byatulongo pabitale Yehowa?

²² Nka byatwibimonanga, twi balombene kulonga pabitale Yehowa ku bukwashi bwa bintu byadi mupangye na bwa Eyi dyaye Bible. Wawa mukanda wi pabwao wi na bileshesho bibungi bya bafubi ba Efile Mukulu basha lulamato batudi balombene kwambula, bu Moyiise na Daavide. Yehowa mmupwe kukita waye mufubo. Atwe namu abitungu tufungule meso, matwi na mashimba eetu.

²³ Tatwi balombene kwimika kulonga pabitale Yehowa nya. (Mul. 3:11) Kintu ki na muulo ta mbungi bwa myanda yatuuku pabimutale nya, kadi nkyatukitshi na yaya yatuuku. Su twatumikila myanda yatulongo na kwambula Nshetu sha kifulo, atungunuka na kwifubwila peepi netu. (Shak. 4:8) Ku bukwashi bw’Eyi dyaye, etushinkamiisha’shi takasumbushena baaba abamukimbi.