1. Nkalakashi kinyi ikwete kupeta bafubi ba Yehowa?

WENA lukalakashi lwi bukopo su? Pangi, mwina kakongye mmukutape kwishimba. (Shak. 3:2) Sunga’shi pangi, bena mudimo nobe sunga bena kalasa nobe, bakwete abakusepe mwanda wa’shi okwete kufubila Yehowa. (1 Mp. 4:3, 4) Sunga’shi bena kifuko nobe bakwete abakitshi mwabo moso bwa’shi olekye kutwela mu bisangilo, na kulungula mukandu wibuwa. (Mat. 10:35, 36) Su lukalakashi ndukile bukopo, we kupwandjikisha’shi bi buwa su oleka kufubila Yehowa. Anka ikala mushinkamishe’shi sunga opeta lukalakashi lwi naminyi, Yehowa akupa kinangu bwa’shi wate kitshibilo ki buwa na bukome bwa kwilunyingila.

2. Muyile Bena-Looma 15:4, kubadika Eyi dy’Efile Mukulu kwi kwikala na bukitshishi kinyi kwatudi?

² Mwiyi dyaye, Yehowa mmufundjishe bileshesho bya bantu bakutwe kupwidjika, abaadi banyingile nkalakashi. Bwakinyi? Bwa’shi tulongyele ku bileshesho byabo. Nyi kibadi Yehowa mutakule Mpoolo mutumibwa bwadya kufunda. (Badika Bena-Looma 15:4.) Kubadika ino miisambo nkulombene kwitunyingisha na kwitupa lukulupilo. Anka, t’abitungu penda’shi tubadikye Bible nya. Abitungu tutadile Bifundwe, bishintule ngyelelo etu a binangu, na bikume mashimba etu. Twi kukita kinyi su atukimbi bukunkushi pabitale bya kukila na mwanda kampanda? Twi kufubisha ano mayele ananka: (1) Teka, (2) Pwandjikisha, (3) Nangushena, na (4) Tumikila. Tutaluleyi bya kufubisha ano mayele. * Akupu atutalula byatudya kufubisha ano mayele bwa kulongyela ku myanda ibadi ifikile Mfumu Davide na Mpoolo mutumibwa.

3. Kumpala kodya kubanga kubadika Bible, nkinyi akitungu’shi okite, na mbwakinyi?

 ³ (1) Teka. Kumpala kodya kubanga kubadika Bible, teka Yehowa bwa’shi byobadika, bikukwashe. Bu kileshesho, su okimbi elango bwa kukila na mwanda kampanda, teka Yehowa bwa’shi opete mayi a kulonda Mwiyi dyaye aakukwasha bwa kwata bitshibilo bi buwa.​—Fid. 4:6, 7; Shak. 1:5.

4. Nkinyi kilombene nkukwasha bodya kumona mwisambo wa mu Bible bu aukitshika yaya nsaa yobadika?

⁴ (2) Pwandjikisha. Kupwandjikisha nyi ngobesha ipabwayo itupe Yehowa. Bwa’shi omone mwanda wa mu Bible bu aukitshika yaya nsaa yobadika, tompa kwiupwandjikisha, na wetule pa mbalo ya yawa muntu abesambila. Tompa kumona myanda ibadi ayimono yawa muntu na bibadi epusha.

5. Kunangushena nkinyi, na mushindo kinyi odya kunangushena?

⁵ (3) Nangushena. Kunangushena akupushisha kwela binangu ngofu ku byobadika na, byodi mulombene kwibitumikila. Akukukwasha bwa kubunga binangu na bodya kupusha kalolo mwisambo obadika. Kubadika Bible kushi kunangunshena, kwi nka bu muntu mutule tupese twa foto yabadi batshibe pa mesa kushi kwitulunga. Kunangushena kwi bu kulunga twatwa tupese twa foto pamune, bwa kumona foto yoso ishima. Bwa’shi onangushene, eyipushe na, walule ku ino nkonko ayilondo: ‘Uno muntu badi mukite kinyi aye nabene bwa kupwa mwanda waye? Mmushindo kinyi ubadi Yehowa mumukwashe? Mmushindo kinyi wandya kufubisha ano malongyesha bwandya kunyingila nkalakashi?’

6. Bwakinyi abitungu tutumikile byabya by’atulongo?

⁶ (4) Tumikila. Yesu bakwile’shi su t’atutumikila byatulongo, twi nka bu muntu bayibaka nshibo yaye mu lusenga. Mmufube ngofu, anka mmukite mudimo wa bisumanga. Bwakinyi? Mwanda nsaa ayele kipapi ki bukopo na mpeshi, abiponesha nshibo yaye sunga kwiyilwisha. (Mat. 7:24-27) Mu mushindo umune, su atutekye, atupwandjikisha, atunangushena kadi kushi’twe kutumikila byatulongo, tukwete atushimisha nsaa yetu. Nsaa ayitompibwa lukumino lwetu pa mwanda wa lukalakashi sunga kubingwabingwa, t’atwikala na bukome bwa kunyingila. Anka, su twalonga Bible na kutumikila byabya by’atulongo, atwata bitshibilo bi buwa, atupete butaale, na atunyingisha lukumino lwetu. (Yesh. 48:17, 18) Tufubisheyi ano mayele ananka abatukatuka mu kulonga, bwa kumona kyatudi balombene kulongyela ku myanda ya mu nshalelo a Mfumu Davide.

7. Mmwisambo kinyi wa mu Bible watukyebe kutalula binobino?

⁷ Kwi kuuku sunga mwina kifuko mu kutape kwishimba su? Su mbyabya, kintu kilombene nkukwasha, nkulonga bibakitshine Mfumu Davide nsaa ibadi mwan’aye Absalome mumutape kwishimba, na akimba kumunyenga bufumu bwaye.​—2 Sam. 15:5-14, 31; 18:6-14.

8. Nkinyi akitungu’shi okite bwa’shi Yehowa akukwashe?

⁸ (1) Teka. Na mwisambo mu binangu, lungula Yehowa mushindo opusha pabitale byabadi bakulwishishe. (Mis. 6:6-9) Lungula Yehowa byopusha. Akupu, teka Yehowa akukwashe opete mayi a kulonda alombene nkukwasha bwa kumona bya kupwa luno lukalakashi.

9. Mushindo kinyi odya kulesha mu kikoso bibakitshikile pankatshi pa Davide na Absalome?

⁹ (2) Pwandjikisha. Nangushena pa uno mwanda wa Mfumu Davide, na opwandikishe bibadi epusha. Munda mwa bipwa, Absalome mwana a Davide badi akitshi mwaye moso bwa’shi bantu bamumone bu muntu e buwa. (2 Sam. 15:7) Pabamwene Absalome’shi nsaa ibalombana, batumine ba mpuupa mu Isaleele mushima, bwa kulumbula mwilo bwa’shi umusangule’ye  bu mfumu abo. Badi mpa na mukakye Ayitofele kuuku a Davide a p’eshimba, badi amupa malango bwa’shi, amulonde ku bwabwa bu ntomboshi. Absalome badi mwitule bu mfumu, na aye nkukimba bya kwipa Davide. Mu aa mafuku, Davide badi pangi na mukumbo wi bukopo. (Mis. 41:1-9) Davide bapushishe luno lukuku, aye nkukatuka mu Yelusaleme nkusuka. Dingi, basalayi ba Absalome babalwile ngoshi na basalayi ba Davide. Basalayi ba Davide abatshokwele bano ba ntomboshi, na abo nkwipa Absalome mwana a Davide.

10. Mfumu Davide badi mulombene kukita kinyi?

¹⁰ Binobino, pwandjikisha mushindo ubadi ulombene kupusha Davide bwa bino byoso bibadi bimufikile. Badi mufule Absalome na mukulupile Ayitofele. Anka, boso abadi bamulwishishe. Abadi benyongoshe Davide ngofu, abo nkukimba mpa na kumwipaa. Davide badi mulombene kupela kukulupila bangi ba kuuku baye na kupwandjikisha’shi, nabo namu mbekwatene na Absalome. Badya kukimba kwipasha nka aye nabene na kukimba kusuka bupenka bwaye. Sunga kubofula kwishimba mususa umune. Anka Davide ta mmukite bino nya. Sunga mbyabya, badi mukambile luno lukalakashi. Nkinyi kibadi kimukwashe?

11. Nkinyi kibadi Davide mukite mu luno lukakalashi lwi bukopo?

¹¹ (3) Nangushena. Mmayi kinyi a kulonda obolongyela mu uno mwanda? Alula ku lukonko alwamba’shi: “Davide bakitshine kinyi bwadya kwikwasha?” Davide ta badi mupangayikye na kwata bitshibilo bi bubi lubilolubilo nya. Na dingi ta badi mupushe moo ukilekile ubadya kumukutshishwa bwa kwata kitshibilo nya. Anka, batekyele bukwashi kwi Yehowa. Na dingi, batekyele mpa na bukwashi kwi ba kuuku baye. Na musango umune, aye nkutumikila bitshibilo bibadi mwate. Sunga Davide badi mwinyongole, ta badi mulekye kukulupila bangi nya, sunga kwibashikwa. Batungunukile na kukulupila mwi Yehowa na kukulupila ba kuuku baye.

12. Nkinyi kibakitshine Yehowa bwa kukwasha Davide?

¹² Mushindo kinyi ubadi Yehowa mukwashe Davide? Su b’okimbula, okalongo’shi Yehowa badi mupe Davide bukome bubadi nabo lukalo, bwa kunyingila lukalakashi lwaye. (Mis. 3:1-8) Yehowa beleele bitshibilo bya Davide mwabi. Na badi mukwatshishene ba kuuku ba Davide ba sha lulamato nsaa ibabadi abalu bwa kukalwila mfumwabo.

13. Mushindo kinyi odya kwambula Davide su mungi muntu bakulwishisha? (Mateo 18:15-17)

¹³ (4) Tumikila. Eyipushe’shi: ‘Ne kwambula Davide naminyi?’ Abitungu’shi okite bukidi bwa kupudisha mwanda obe. Muyile myanda yodi nayo, we mulombene kutumikila elango dya Yesu di mu Mateo 18 nka byabya byadidi sunga kutumikila eyi dya kulonda di mwanka. (Badika Mateo 18:15-17.) Anka, tokumanga kwata bitshibilo lubilolubilo podi na nsungu. Abitungu otekye kwi Yehowa bwa’shi akupe butaale bw’eshimba na binangu bwa’shi, omone bya kukila na wawa mwanda. Tokumanga kukutwa kukulupila ba kuuku bobe. Anka, kumina bukwashi bwabo. (Nki. 17:17) Ki na muulo, londa elango dyabakupa kwi Yehowa di Mwiyi dyaye.​—Nki. 3:5, 6.

14. Mmyanda kinyi ilombene nkufikisha mu kutuula binangu ku mayi e mu 2 Timote 1:12-16; 4:6-11, 17-22?

¹⁴ Kifuko kyobe kikwete nkubingabinga mwanda okwete kufubila Yehowa su? Sunga’shi okwete kufubila Yehowa mwiumbo dyabadi bemikye ingi midimo yetu, sunga dyabadi bakandjikye yoso su? Su mbyabya, mayi e mu 2 Timote 1:12-16 na 4:6-11, 17-22, * e nkunyingisha. Mpoolo badi mufunde ino verse pabadi mu lukano.

15. Nkinyi akitungu’shi otekye Yehowa?

 ¹⁵ (1) Teka. Kumpala kodya kubadika ino verse, lungula Yehowa mwanda obe, na by’opusha pabitale wanka. Mulungule mwanda oso. Otekye’nyi Yehowa akukwashe otundule mayi a kulonda e mu mwanda ubadi ufikile Mpoolo, alombene nkukwasha bwa kumona byodya kukila na lukalakashi lodi nalo.

16. Mmushindo kinyi odi mulombene kulesha mu kikoso mwanda ubadi ufwile Mpoolo?

¹⁶ (2) Pwandjikisha. Pwandjikisha’shi nnobe Mpoolo. Mbamwanye nkano mu lukano mu Looma. Abadi bamwele mu lukano kumpala, kadi bwa uno musango ashinkamisha’shi, abakyebe kumwipaa. Bangi ba kuuku baye abamusukile na mbidi ibadi ipwe kumubofula.​—2 Tim. 1:15.

17. Mpoolo badya kukita kinyi?

¹⁷ Mpoolo badya kwalusha binangu ku mongo, apwandjikisha’shi su ta badi mwate kitshibilo kya kwikala mwina Kidishitu, ta babadya kumukwata. Badi mulombene kufiitshila bantu ba mu Asie nsungu, mwanda abadi bamusumbushene, na dingi badi mulombene kukutwa kukulupila bangi ba kuuku baye. Anka, Mpoolo ta mukite byabya nya. Bwakinyi badi mushinkamishe’shi ba kuuku baye t’abamusumbushena na’shi Yehowa amwelela mwabi?

18. Mpoolo bakitshine kinyi pabadi na lukalakashi lwi bukopo?

¹⁸ (3) Nangushena. Alula luno lukonko alwamba’shi: “Mpoolo badya kukita kinyi bwa kwikwasha?” Sunga mbibadi Mpoolo auku’shi tadi pepi na kufwa, tabadi mulube’shi kintu ki na muulo ukata kwadi nkutumbisha Yehowa. Na batungunukile na kunangushena ku mushindo wadya kunyingisha bangi. Badi mukulupile mwi Yehowa pa kumuteka nsaa na nsaa. (2 Tim. 1:3) Mpoolo ta badi mutungunukye na kunangushena pabitale bakwabo bena Kidishitu babadi bamusumbushene nya. Anka amba’shi, badi na lutumbu kwi ba kuuku baye abadi bamukwashe na kifulo kyoso. Na dingi Mpoolo batungunukile na kulonga Eyi dy’Efile Mukulu. (2 Tim. 3:16, 17; 4:13) Mwanda wi na muulo, badi mushinkamishe’shi Yehowa na Yesu mbamufule. Ta babadi bamusumbushene, na badi mushinkamishe’shi abamwelela mwabi bwa mudimo wadi mukite na lulamato loso.

19. Yehowa badi mukwashe Mpoolo naminyi?

¹⁹ Yehowa badi mupwe kuukisha Mpoolo’shi, akanyingila kubingwabingwa mwanda, mmwina Kidishitu. (Bik. 21:11-13) Yehowa badi mukwashe Mpoolo naminyi? Balulwile ku nteko ya Mpoolo, na amupa bukome pa nsaa ilombane. (2 Tim. 4:17) Abalungwile Mpoolo’shi, akapete efuto bwa mudimo wi bukopo wadi mufube. Yehowa, nyi badi mufubishe ba kuuku ba Mpoolo basha lulalamato, bwabadya kumupa bukwashi bubadi nabo lukalo.

20. Muyile Bena-Looma 8:38, 39, twi balombene kwambula Mpoolo naminyi?

²⁰ (4) Tumikila. Eyipushe’shi: ‘Ne kwambula kileshesho kya Mpoolo naminyi?’ Anka bu Mpoolo, abitungu tushingule’shi atukabingwabingwa mwanda wa lukumino lwetu. (Mak. 10:29, 30) Bwa kulama lulamato lwetu kwi Yehowa nsaa yatudi na nkalakashi, abitungu tutungunukye na kumuteka, na kulonga Eyi dyaye nsaa yoso. Na abitungu twikale atutentekyesha’shi kintu ki na muulo kyatudya kukita, nkutumbisha Yehowa. Abitungu twikale bashinkamishe’shi, Yehowa ta mulombene kwitusumbushena nya na, takwi kintu su nkimune kilombene kumukutshishwa kwitufula.​—Badika Bena-Looma 8:38, 39; Eb. 13:5, 6.

21. Nkinyi kibadi kikwashe mukwetu Aya na Hector bwabadya kunyingila nkalakashi ibabadi nayo?

²¹ Bileshesho bya mu Bible mbilombene kwitukwasha bwa kwikala na bukome bwa kunyingila  nkalakashi yatudi nayo. Bu kileshesho, ungi mbala-mashinda a mu Japon abetaminaa bu Aya, amba’shi, mwisambo wa Yona, ubamukwashile bwadya kukambila moo wa kutusha bu kamonyi pa mbalo i bantu be bungi. Kileshesho kya Luta, kibadi kinyingishe Hector mungi nsongwalume a mu Indonésie e na baledi bashi balangwidi ba Yehowa, bwadya kulonga pabitale Yehowa na kumufubila.

22. Nkinyi kilombene nkukwasha nsaa yokwete kutemesha ma drame a mu Bible na nsaa yobadika miisambo ya mu Bible ayamba’shi “Ambulayi lukumino lwabo”?

²² Mbalo kinyi yodya kupeta bileshesho mu Bible bilombene nkunyingisha? Ma video, ma drame atupusha penda mayi na mwisambo awamba’shi: “Ambulayi lukumino lwabo,” abikwasha bwa kumona myanda ya mu Bible nka byayibadi ikidikye. * Kumpala kwa kutala, kutemesha sunga kubadika miisambo yabadi bakimbule kalolo, teka Yehowa bwadya nkukwasha, opete malongyesha e na muulo odi mulombene kutumikila. Emone bu yawa muntu abakwila. Nangushena bibadi bikite bano bafubi ba Yehowa basha lulamato na, bibadi Yehowa mwibakwashe bwabadya kunyingila nkalakashi ibabadi nayo. Akupu otumikile aa malongyesha mu nshalelo obe. Tumbula Yehowa bwa bukwashi bwa kwete nkupa. Na lesha’shi, we na lutumbu bwa bwabwa bukwashi pa kukimba mishindo ya kunyingisha na kukwatshishena bangi.

23. Muyile Yeeshaya 41:10, 13, Yehowa mmulee’shi etukitshina kinyi?

²³ Nshalelo mu uno ndumbulwilo akunkushibwa na Satana, mmulombene kwikala bukopo, na ingi nsaa, twi balombene mpa na kukutwa kya kukita. (2 Tim. 3:1) Anka tatukumanga kwinyongola sunga kwikala na moo nya. Yehowa auku lukalakashi lwatudi nalo. Su twapona, mmulee’shi, etwibwesha na mboko yaye ilume i bukome. (Badika Yeeshaya 41:10, 13.) Na lukulupilo loso mu bukwashi bwaye, atupete bukome mu Bifundwe na kukambila lukalakashi loso lwatudya kufumankana nalo.