1. Muyile Mateo 24:9, bwakinyi t’abitukanyisha su bantu ba pano betushikwa?

YEHOWA mwitupangye bwatudya kwifulena. Nyi bwakinyi, su muntu mwitushikwe, atupushaa bi bubi byabya, mpa na kupusha moo. Bu kileshesho, ungi mukwetu mukashi abetaminaa bu Georgina amba’shi: “Panadi na bipwa 14, mama badi munshikwe mwanda nafubila Yehowa. Nabangile kupusha bubi na kwipusha bupenka, ami kubanga kupwandjikisha’shi ne muntu e bubi.” * Ungi mukwetu abetaminaa bu Danylo bafundjile’shi: “Pabadi basalayi abankupila, abankaa, abankyengyesha mwanda ne Temwe a Yehowa, nadi napusha moo na bu mwishibwe milongo.” Uno mushikwa awitwinyongosha, anka t’awitukanyisha. Yesu bambile’shi abaketushikwa.​—Badika Mateo 24:9.

2-3. Bwakinyi mbashikwe balongi ba Yesu?

² Ba pa nsenga mbashikwe balongi ba Yesu. Bwakinyi? Mwanda nka bu Yesu ‘tatwi ba pa nsenga.’ (Yo. 15:17-19) Sunga atunemekaa bakata ba mbulamatadi, t’atwibalangwila, kuyimba loono lw’eumbo, sunga kutshibila ebendela mpala. Atulangwila nka penda Yehowa bupenka bwaye. Atukwatshishena matalwa a Yehowa a kukunkusha bantu. Anka Satana na bena dyaye, ababepula’shi Yehowa t’ena ano matalwa. (Kib. 3:1-5, 15) Tukwete kulambukisha’shi Bufumu bw’Efile Mukulu nyi abupu myanda yoso ya bantu, na’shi abubutula binobino boso bash’abebukumina. (Nda. 2:44; Kibaf. 19:19-21) Uno nyi mukandu wi buwa bwa bantu b’eyishe, anka mukandu wi bubi bwa ba ntomboshi.​—Mis. 37:10, 11.

 ³ Mbetushikwe dingi mwanda atukokyela miya ilulame y’Efile Mukulu. Mweneno a Yehowa pabitale ki buwa na ki bubi mwilekene ngofu na mweneno a bantu pabitale ki buwa na ki bubi. Bu kileshesho, bantu be bungi lelo uno abapwandjikisha’shi kwikala na mwikelo wi butete, bu uno ubadi utakule Efile Mukulu bwa kubutula kibundji kya Sodome na Gomore, ta kwi bubi nya! (Yu. 7) Mwanda atukokyela miiya ya mu Bible pabitale uno mwikelo wi butete, bantu be bungi bakwete kwitusepa na kwitumona bu batshimbakane!​—1 Mp. 4:3, 4.

4. Nyikashi kinyi ayitunyingisha nsaa ayitushikwa bantu?

⁴ Nkinyi ki kwitukwasha bwa kunyingila nsaa ayitushikwa bantu na kwitukaa? Abitungu twikale na lukumino lwi bukopo’shi Yehowa etukwasha. Anka bu ngabo, lukumino lwetu ndulombene “kushima kaalo ka mikyetwe ya Mubi.” (Ef. 6:16) Anka ta twi na penda lukalo na lukumino nya. Twi na dingi lukalo na kifulo. Bwakinyi? Mwanda kifulo “taakikwata nsungu.” Akikumina na kunyigila myanda yoso i bubi. (1 Kod. 13:4-7, 13) Binobino, tutaluleyi mushindo ulombene kifulo bwa Yehowa, bwa bakwetu bena Kidishitu mpa na bwa beshikwanyi netu kwitukwasha bwa kunyingila mushikwa.

5. Kifulo kya Yesu bwa Nshaye kibadi kimutakule bwa kukita kinyi?

⁵ Bufuku kumpala kwa’shi beshikwanyi naye bamwipe, Yesu balungwile batumibwa baye basha lulamatu’shi: ‘Nemufule Yaya [nyi bwakinyi] nakitshi bibadi Yaya mundungule’shi kite.’ (Yo. 14:31) Pa mwanda Yesu badi mufule Yehowa, nyi kibadi kimukwashe bwa kunyingila nkalakashi i bukopo. Su twi bafule Yehowa, twi balombene kunyingila nka bu Yesu.

6. Muyile Bena-Looma 5:3-5, bafubi ba Yehowa bakwete abapusha naminyi nsaa ya bakwete kwi babingabinga kwi bantu ba pano pa nsenga?

⁶ Kifulo kya Yehowa akikwasha bafubi baye bwabadya kunyingila kubingwabingwa. Bu kileshesho, nsaa ibadi tumiladi tukata kwa bena Yuda tutoshe batumibwa bwabadya kulungula mukandu wibuwa, kifulo bw’Efile Mukulu kibadi kibatakule bwabadya ‘kukokyela Efile Mukulu pe kukokyela bantu.’ (Bik. 5:29; 1 Yo. 5:3) Kino kifulo ki bino, kikwete dingi kunyingisha bakwetu lelo uno, mwanda be bungi bakwete abashala banyingye kumpala kwa bu ntomboshi na kwa mbulamatadi. Nsaa y’abetushikwa kwi bantu ba pano, t’atubofula kwishimba nya, anka twi na muloo.​—Bik. 5:41; badika Bena-Looma 5:3-5.

7. Kinyi kyatudi balombene kukita nsaa y’abetushikwa kwi bena kifuko netu?

⁷ Pangi lukalakashi lukata alufiki kwi bena kifuko netu. Nsaa y’atubanga kufula bya binyibinyi, bena kifuko netu be kupwandjikisha’shi tubadimbibwa. Bangi be kupwandjikisha’shi, tubapauka mombe. (Pwandjikisha na Maako 3:21.) Mbalombene mpa na kwitunkyengyesha ngofu. Uno mushikwa ta ngulombene kwitukanyisha nya. Yesu bambile’shi: “Beshikwanyi ba muntu banekale ba mu nshibo yaye.” (Mat. 10:36, Esambi dipya 2015) Binyibinyi’shi, sunga bena kifuko netu betukitshina myanda mu uno mushindo, t’atwibashikwa nya, anka apatama kifulo kyetu bwa Yehowa, mpa na kya bantu netu nyi, akitama. (Mat. 22:37-39) T’atulekye kukokyela mayi a kulonda e mu Bible bwa penda kusankisha bantu.

8-9. Nkinyi kibadi kikwashe ungi mukwetu mukashi bwa kunyingila mushikwa wi bukopo?

⁸ Georgina, atatupwile kutemuna, badi munyingile mushikwa wi bukopo wa nyin’aye. Amba’shi: “Ami na mama tubabangile kulonga Bible na ba Temwe ba Yehowa. Anka  myeshi isamombo kunyima, patanadi nakyebe kwenda mu bisangilo, binangu bya mama bibashintulukile musango umune. Natundwile’shi, badi esamba na bantu basumbule lukumino na badi afubisha binangu byabo nsaa ibadi esamba nami. Badi a nkaa, kungyela kabao na nkusumbwila mikanda. Pa nalombeshe bipwa 15, nadi mubatshishibwe. Nyin’ami badi akitshi mwaye moso bwa’shi ndekye kufubila Yehowa pa nkantula mu nshibo mwi bansongwakashi abatomaa bintu abikolwana, na abakitaa myanda ya bu tomboshi. Mushikwa awikalaa bukopo kunyingila bikishekishe nsaa yautukila kwi muntu mulombene nkufula na nkupasukila.”

⁹ Nkinyi kibadi kikwashe Georgina bwa kunyingila? Amba’shi: “Efuku dibadi mama muntombokyele nadi mupwe kubadika Bible oso mushima. Nadi mushinkamishe’shi napete bya binyibinyi, na nadi nepusha pepi na Yehowa. Nadi namutekye nsaa yoso, na badi anteemesha. Nsaa inadi ku ino nshibo, ungi mukwetu mukashi badi mungitamine ku nshibo kwaye na, tubadi atulongo Bible pamune. Munda mwa kino kyoso kipungo, bakwetu balume na bakashi abadi abanyingisha ku Nshibo ya Bufumu. Abadi bangikashe nka bu mwina kifuko nabo. Nadi mumone patoka’shi, Yehowa e bukome kukila beshikwanyi netu sunga bekala naminyi.”

10. Twi balombene kukulupila’shi Yehowa Efile Mukulu etukitshina kinyi?

¹⁰ Mpoolo mutumibwa bafundjile’shi, “takwi kintu kilombene kwitulamuna ku kifulo ky’Efile Mukulu na kiitufumbwilwe mu Yesu Kidishitu, Mfumwetu.” (Lom. 8:38, 39) Sunga twakyenga bwa kapindji, Yehowa ekala nka ku lupese lwetu bwa kwitupa bukome na kwitunyingisha. Nka bu abitulesha mwanda wa Georgina, Yehowa etukwasha dingi ku bukwashi bwa bakwetu balume na bakashi mu kakongye.

11. Kifulo kyabadi baleshe kwi Yesu mu Yowano 15:12, 13, kibadi kikwashe balongi baye naminyi? Tusha kileshesho.

¹¹ Bufuku bwa muladilo wa lufu lwaye, Yesu batentekyeshe balongi baye bwabadya kwifulena. (Badika Yowano 15:12, 13.) Badi muukye’shi kyakya kifulo kya kwipana, akibakwasha bwa kushala mu buumune na kunyingila mushikwa wa uno ndumbulwilo. Banda kutala kileshesho kya kakongye ka mu Tesalonika. Kubanga nka pakabadi kakitshibwe, bena kakongye abapetele kubingwabingwa. Anka bakwetu balume na bakashi ba mwanka mbafikye bileshesho bya lulamato na kifulo. (1 Tes. 1: 3, 6, 7) Mpoolo badi mwibanyigishe bwabadya kutungunuka na kwifulena, mpa na ‘kukisha paapa.’ (1 Tes. 4:9, 10, Kilombeeno kipya) Kifulo kibadi kibatakule bwa kusamba abakyengye na kunyingisha babofule. (1 Tes. 5:14) Abaadi batumikile malango a Mpoolo, mwanda mu mukanda wa kabidi ubadi mwibafundjile kunyima kwa kipwa kimune, Mpoolo bambile’shi: “Kifulo kyanudi nakyo munkatshi mwenu kikwete kutama kwi ooso aa kwanudi.” (2 Tes. 1:3-5) Kifulo kyabo kibadi kibakwashe bwa kunyingila mushikwa na kubingwabingwa.

12. Mu kipungo kya ngoshi, mushindo kinyi ubadi bangi bakwetu balume na bakashi ba mu dingi eumbo beleshene kifulo?

¹² Tubande kutala mwanda wa Danylo atutemwine kumpala na mukashi aye. Pabadi ngoshi itwele mu kibundji kyabo, abatungunukile nka na kwenda mu bisangilo, kulungula mukandu wibuwa pakudi mushindo na kupa bakwabo balume na bakashi bidibwa. Dingi efuku, basalayi abafikile ku nshibo ya Danylo mbatwale ma mputu. Danylo amba’shi: “Abandungwile bwa’shi ndekye kwikala Temwe a Yehowa. Panadi mupele, abadi bankupile bakyeba mpa na kungasa, bankisha esashi ku mutwe. Kumpala kwabadya ku katuka abadi batshinyishe’shi, abaluka balale na mukashi ande pa bukopo. Anka bakwetu abadi betutweshe mu mashuwa a ndjandja benda netu mususa umune. Ntshi mulombene kwilwankana kifulo kibadi kituleshe baba bakwetu. Na patubafikile mu kyakya kibundji, bakwetu ba mwanka abadi betupe bya kudya, na bankwasha bwandja kupeta mudimo mpa na nshibo! Bino bibadi bitukwashe bwa kutula namu bangi ba Temwe abadi abasuku ngoshi.” Ino myanda ayilesha’shi, kifulo kya bwina Kidishitu nkilombene kwitukwasha bwa kunyingila mushikwa.

13. Mushindo kinyi ulombene kikudi kiselele kwitukwasha bwa kunyingila mu mudimo wa Yehowa sunga mbetushikwe?

¹³ Yesu balungwile balongi baye bwabadya kufula beshikwanyi babo. (Mat. 5:44, 45) Mbibofule su? Nya! Anka mbibofule ku bukwashi bwa kikudi kiselele ky’Efile Mukulu. Mu bipindji bya kikuba kya kikudi kiselele ky’Efile Mukulu mwi kifulo, lwishinko, kalolo, kupopela na butontshi bwa mbidi. (Nga. 5:22, 23) Ino nyikashi ayitukwasha bwa kunyingila mushikwa. Beshikwanyi be bungi mbalekye kwitukyengyesha pa mwanda wa’shi, mulume, mukashi, mwana sunga nkungishanyi nabo  mmuleshe ino nyikashi ya bwina Kidishitu. Bangi abadi beshikwanyi, tabadi binobino mpa na bena Kidishitu netu. Byabya su omono’shi bi bukopo bwa kufula baba bakushikwe mwanda okwete kufubila Yehowa, mutekye akupe kikudi kiselele. (Luk. 11:13) Na ikala mushinkamishe’shi, kukokyela Efile Mukulu nsaa yoso nyi kwi na muulo.​—Nki. 3:5-7.

14-15. Mushindo kinyi wi mukanda wa Bena-Looma 12:17-21, ukwashe Yasmeen bwadya kufula mulume aye sunga bibadi amukyengyesha?

¹⁴ Tubande kutala kileshesho kya mukwetu mukashi abetaminaa bu Yasmeen. Pabafikile Temwe a Yehowa, mulume aye bapwandjikishe’shi abamudimbi; naye nkutompa ku mutosha bwa’shi alekye kufubila Efile Mukulu. Badi mumukee, alungula bena kifuko, mpa na mukata a kipwilo na nganga bwabadya ku mutshinyisha, na kumwanba’shi batshibi kifuko. Mulume aye badi mpa na mwende a kakaa bakwetu abadi mu bisangilo bya kakongye! Yasmeen badi nka adidi nsaa yoso mwanda abadi abamukyengyesha.

¹⁵ Ku Nshibo ya Bufumu bakwetu abadi abanyingisha Yasmeen. Bakulu abadi bamunyingishe bwa kutumikila mayi e mu Bena-Looma 12:17-21. (Badika.) Yasmeen amba’shi: “‘Bibadi bupoko.’ Anka nadi mutekye Yehowa bwa’shi a nkwashe, na nakitshine mwande moso bwa kutumikila abyamba Bible. Byabya nsaa ibadi mulume ande asumbula butshiafu mu kikuku, nadi nemusula. Nsaa ibadi a nkaa nadi namwalula na kalolo koso. Na pabadi akumbu nadi nka namupasukila.”

16-17. Nkinyi kibolongyela ku kileshesho kya Yasmeen?

¹⁶ Yasmeen bapetele mwabi mwanda badi alesha mulume aye kifulo. Amba’shi: “Mulume ande babangile ku nkulupila ngofu mwanda badi mushingule’shi nakulaa nka bya binyibinyi. Babangile kuntemesha na kanemo koso nsaa inadi nakula myanda itale lulangwilo, na aye nkukumina bwa kutwesha kufukama mu kifuko. Binobino kwete anyingisha bwandya kwenda mu bisangilo. Binobino, ami na mulume ande twi mu kipwano ki buwa, na kifuko kyetu ki mu kufukama. Nankulupila’shi, mulume ande akakumina bya binyibinyi na kufubila Yehowa pamune n’ami.”

¹⁷ Kileshesho kya Yasmeen akilesha’shi kifulo ‘akikumiinaa byooso, . . . akikulupila byooso, akinyingila mu byooso.’ (1 Kod. 13:4, 7) Mushikwa ngulombene kwikala bukopo, anka kifulo ki na bukome bukile. Akishintula mashimba. Na akisankishaa Yehowa. Anka sunga beshikwanyi batungunuka nka na kwitushikwa, twi kwikala nka na muloo. Mushindo kinyi?

18. Bwakinyi twi balombene kwikala na muloo nsaa y’abetushikwa?

¹⁸ Yesu bambile’shi: “Nwi baa-sha-mwabi [muloo] paabeenushikwa kwi bantu.” (Luk. 6:22) T’atukumina bwa’shi betushikwe nya. T’atukumina bwa’shi betubingyebingye pa mwanda wa lukumino lwetu nya. Byabya bwakinyi twi balombene kwikala na muloo nsaa y’abetushikwa? Tala tuno tubingilo tusatu. Ka kumpala, nsaa y’atunyingila, atusankisha Efile Mukulu. (1 Mp. 4:13, 14) Ka kabidi, lukumino lwetu alunyisha kunyinga. (1 Mp. 1:7) Ka kasatu, atukapete bwedi bukata, muwa loso.​—Lom. 2:6, 7.

19. Bwakinyi batumibwa abadi na muloo kunyima kwabo kwibakupila?

¹⁹ Mafuku apela kunyima kwa lufu lwa Yesu, batumibwa abapetele muloo ubadi Yesu mwakwile. Kunyima kwabo kwibakupila na kwibatosha bwabadya kulungula mukandu wibuwa, abadi na muloo. Bwakinyi? “Mwanda baabatundwilwe bu balombeene kukayiibwa bw’Eshina dya Yesu.” (Bik. 5:40-42) Kifulo kyabo bwa Mfumu abo kibadi kikile mushikwa wa beshikwanyi babo. Na babadi baleshe kifulo kyabo pa kulungula mukandu wibuwa “kushi kuleka.” Lelo uno, bakwetu be bungi bakwete kutungunuka na kufuba na lulamato loso sunga mu nkalakashi. Abashingula’shi Yehowa ta mulombene kwilwankana mudimo wabo na kifulo ky’abalesha bw’eshina dyaye.​—Eb. 6:10.

20. Nkinyi kyatukalongo mu mwisambo aulondo?

²⁰ Bu biki nka uno ndumbulwilo kwanka, bantu abekala nka abetushikwa. (Yo. 15:19) Anka t’abitungu’shi twikale na moo. Muyile by’atukalongo mu mwisambo aulondo, Yehowa ‘akankamika na kulama bafubi baye basha lulamato.’ (2 Tes. 3:3) Byabya, tutungunukyeyi na kufula Yehowa, bakwetu balume na bakashi mpa na kufula’nyi beshikwanyi betu. P’atulondo dino elango, atushala mu buumune na banyinge mu kikudi, atutumbisha Yehowa, na atulesha’shi kifulo ki bukome kukila mushikwa.