1-2. Mbananyi balombene kukwasha mulongi a Bible bwadya kwela matabula mpa na ku lubatshisho?

UNGI mukwetu abetaminaa bu Amy, mushalele mu Fiji amba’shi: “Nadi mufule myanda i nadi nalongo mu Bible. Nadi nauku’shi ngya binyibinyi. Anka, nsaa i nabangile kukisha nsaa pamune na bakwetu balume na bakashi, bi bankwashishe bwandja kushintuluka na kubatshishibwa.” Kileshesho kya Amy akitulongyesha uno mwanda wi na muulo: Mulongi a Bible mulombene kwela matabula mpa na ku lubatshisho nsaa yapete bukwashi bwa bangi mu kakongye.

² Mulungudi oso mulombene kukwasha muntu mupya bwadya kwikala mwina kakongye. (Ef. 4:16) Ungi mukwetu mukashi mbala-mashinda a betaminaa bu Leilani mushalele mu Vanuatu amba bino: “Kwi mwele awamba’shi, mwana nga mwilo. Kakongye kashima nkalombene kukwasha muntu bwadya kufika mu bya binyibinyi.” Bena kifuko, ba kuuku na balongyeshi mbalombene kukwasha mwana bwadya kukula na kunyinga. Bi mumune, balongyeshi mbalombene kutusha malango, kunyingisha na kwikala kileshesho ki buwa kwi balongi ba Bible, su abakitshi bino abakwasha balongi ba Bible bwabadya kwenda kumpala na kubatshishibwa.​—Nki. 15:22.

3. Myanda ibakula Ana, Dorin, na Leilani ibakulongyesha kinyi?

³ Bwakinyi mulungudi kwete kulonga Bible na muntu abitungu apushe muloo nsaa y’amono bena kakongye abakwasha mulongi aye a Bible? Pusha abyakula mungi mukwetu mukashi mbala-mashinda a nsaa yoso mushalele mu Moldavie, abetaminaa bu Ana. Amba’shi: “Mulongi a Bible ena lukalo lwa bukwashi bwi bungi na  bi bukopo bwa’shi penda mulongyeshi aye a mukwashe bupenka bwaye.” Dorin, mbala-mashinda afubila mu dino eumbo dimune amba’shi: “Misusa i bungi, bangi balungudi abakula myanda ayikumu eshimba dya mulongi a Bible yanshikele sunga napwandjikisha.” Leilani alesha kangi kabingilo kalombene kwitwikasha na muloo nsaa yatukwasha bangi. Amba’shi: “Nsaa i mulongi a Bible amono kifulo na by’abamupasukila kwi bakwetu balume na bakashi, abimukwasha bwadya kushinkamisha’shi, twi mwilo wa Yehowa binyibinyi.”​—Yo. 13:35.

4. Nkinyi ky’atwisambila mu uno mwisambo?

⁴ Anka, we kwiyipusha’shi: ‘Mushindo kinyi wandi mulombene kukwasha mulongi a Bible bwa kwenda kumpala, su ta n’ami kwete kulonga naye Bible?’ Tubande kutala kyatudi balombene kukita nsaa y’atushindjikila mulungudi ende mu kulonga Bible na muntu, na kya kukita nsaa i mulongi a Bible babanga kutwela mu bisangilo. Atutalula dingi kilombene bakulu kukita bwa kukwasha balongi ba Bible bwa kwela matabula mpa na ku lubatshisho.

5. Nkinyi kyodi mulombene kukita nsaa y’oshindjikila mulungudi mu kulonga Bible na muntu?

⁵ Nsaa y’atushindjikila mulungudi mu kulonga Bible na muntu, aye nyi ena bushito bwa kukwasha mulongi aye a Bible bwa kupusha Eyi dy’Efile Mukulu kalolo. Lukalo lwetu ndwa kumukwatshishena. (Mul. 4:9, 10) Nkinyi kyodi mulombene kukita bwa’shi kwakwa kulonga kukitshikye kalolo?

6. P’oshindjikila mulungudi mu kulonga Bible na muntu, mushindo kinyi odya kutumikila Eyi dya kulonda di mu Nkindji 20:18?

⁶ Elumbule bwa kulonga kwa Bible. Epusha mulongyeshi akulungule ingi myanda pabitale mulongi a Bible. (Badika Nkindji 20:18.) Mwipushe’shi: “Ouku kinyi pabitale mulongi obe a Bible? Mwisambo kinyi w’anukalongo? Okumina’shi mulongi obe a Bible alamine kinyi mu kino kipindji? Kwi myanda kampanda yandji mulombene kwakula sunga kukutwa kwakula nsaa y’atulongo su? Mushindo kinyi wandji mulombene kumunyingisha bwa kwela matabula?” Anka, t’abitungu’shi mulongyeshi aye akule myanda itale mulongi ishi ilombene kuuka ungi muntu, kadi amulungule myanda ilombene kukwasha. Ungi mukwetu misionere abetaminaa bu Joy esambaa na balungudi abamushindjikila mu kulonga Bible na bantu amba’shi: “Mwisambo bu uno aukwasha bakwetu ambashindjikila mu kulonga Bible na bantu bwa kuuka kyabadi balombene kwakula nsaa y’atulongo.”

7. Bwakinyi abitungu w’elumbule nsaa y’oshindjikila mulungudi mu kulonga Bible na muntu?

⁷ Su munlungudi etuteka bwa kumushindjikila mu kulonga Bible na muntu, mbikilekile buwa tulumbule mwisambo w’atukalongo. (Esel. 7:10) Dorin, mukwetu atatupwile kutemuna amba’shi: “Nasanka nsaa i mulungudi  ashindjikila mu kulonga Bible na muntu elumbula, mwanda mulombene kwakula myanda ayinyingisha.” Na dingi mulongi a Bible amono’shi anwe boso nwi b’elumbule kalolo na bi kwikala kileshesho ki buwa kwadi. Na su twena nsaa ya kulumbula mwisambo kantu pa kantu, ata nsaa ya kulumbula myanda ina muulo ya mu mwisambo.

8. We kukita kinyi bwa’shi luteko lwele nsaa ya kulonga Bible na muntu lumunyingishe?

⁸ Luteko lwi na muulo ukata nsaa y’anulongo na muntu, byabya nangushena myanda yodya kwakula, nsaa y’abakutekye bwa kwela luteko. Yaya nsaa luteko lobe alwikala na bukwashi ngofu. (Mis. 141:2) Hanae mushale mu Japon, kyatentekyesha luteko lubadi lwele ungi mukwetu mukashi badi mushindjikile mulongyeshi aye a Bible. Amba’shi, nadi mumone’shi e mu kipwano ki buwa na Yehowa, na nadi nakumina kumwambula. Nadi mumone dingi’shi munfule nsaa ibadi mutemune eshina dyande mu luteko lwaye.

9. Muyile Shake 1:19, nkinyi kyodi mulombene kukita nsaa y’oshindika muntu mu kulonga Bible?

⁹ Kwatshishena mulongyeshi nsaa y’anulongo. Mungi mukwetu mukashi mbala-mashinda mushale mu Nigeria abetaminaa bu Omamuyovbi amba’shi: “Muntu ashindikishena mu kulonga Bible e buwa, atemesha kalolo nsaa ayikitshika kulonga kwa Bible, atushaa binangu bi buwa, anka takambaa kwakula bi bungi, mwanda auku’shi nyi mbushito bwa mulongyeshi.” Byabya, nsaa kinyi y’odya kwakula na nkinyi kyodya kwakula? (Nki. 25:11) Temesha kalolo nsaa ayisamba mulongyeshi na mulongi aye. (Badika Shake 1:19.) Paapa, we mulombene kuuka nsaa i buwa yodya kwakula. Anka, abitungu onangushene kumpala kodya kwakula. Bu kileshesho, t’abitungu kwakula bi bungi, kutshiba mulongyeshi ku mayi sunga kutwesha ungi mwisambo. Anka, kutusha binangu bitshintshikile, kileshesho, sunga kwela lukonko, nkulombene kukwasha sunga kutosha mwanda wanukwete kulonga. Ingi nsaa we kumona’shi tw’ena bi bungi bya kwakula pa mwanda w’anwisamba. Kadi su otumbula mulongi na kulesha by’omupasukila, okitshi bi bungi bwa ku mukwasha bwadya kwela matabula.

10. Myanda yodi mupete mu muwa obe ngilombene kukwasha mulongi a Bible naminyi?

¹⁰ Mulungule myanda yodi mupete. Su kwi mushindo, we kulungula mulongi a Bible mu kitshibo byodi mulongye bya binyibinyi, byodi mukambile lukalakashi, na byodi mumone bukwashi bwa Yehowa mu muwa obe. (Mis. 78:4, 7) Pangi myanda yodi mupete nyi inayo mulongi lukalo bwa kuteemesha. Mbilombene kunyinginsha lukumino lwaye na kwela matabula mpa na ku lubatshisho. Na mbilombene ku mukwasha bwa kunyingila lukalakashi lwadi nalo. (1 Mp. 5:9) Gabriel mushale mu Brésil kwete kufuba lelo bu mbala-mashinda a myeshi yoso, atentekyesha  bukwashi bu badi mupete nsaa ibadi alongo Bible amba’shi: “Nsaa ibadi bakwetu abadondela myanda ibabadi bapete, na byabadi beyikambile bibandongyeshe’shi, Yehowa amonaa nkalakashi yatudi nayo. Su abadi bobeshe bya kwiyikambila, n’ami namu ne kobesha.”

11-12. Bwakinyi abitungu tukuukile na muloo oso balongi ba Bible abafiki mu bisangilo?

¹¹ Bwa mulongi a Bible kwela matabula mpa na ku lubatshisho, abitungu ekale atwele mu bisangilo bya kakongye pa kyubishi. Bino abimukwasha. (Eb. 10:24, 25) Mulongyeshi ekumwitamina ku bisangilo bwa mususa wa kumpala. P’afiki kwanka atwe boso twi balombene kumunyingisha bwa’shi atungunukye na kutwela mu bisangilo. We kwibikita naminyi?

¹² Kuukila mulongi a Bible na muloo oso. (Lom. 15:7) Su twakuukila mulongi a Bible kalolo nsaa y’afiki ku bisangilo, mbilombene ku mutakula bwa kutungunuka na kufika kwanka. Pamutwe pa kumutula kafu lupese, mukukile na muloo na omuleshe kwi bangi. Esambe naye, mwanda pangi mulongyeshi aye e kwikala t’afikile sunga’shi kwete kukita ingi midimo mu Nshibo ya Bufumu. Teemesha kalolo abyakula mulongi a Bible, na oleshe’shi omupasukila. Su omukuukila na muloo, bi kwikala na bukitshishi kinyi kwadi? Tala mwanda wa Dmitrii mubatshishibwe takudi bipwa bipela na kwete afubu bu mufubi a midimo mu kakongye. P’atentekyesha bisangilo byaye bya kumpala, amba’shi: “Ungi mukwetu mulume mbamwene ne mwimane pasha pa Nshibo ya Bufumu n’etutusha bwa kutwela, anka na kalolo koso bankwashishe bwa kutwela. Bantu be bungi abafikile mu kungimuna. Bino bibadi bikanyishe ngofu. Nadi musankye ngofu mu mushindo unadi nakumina’shi bisangilo bikale abikitshika efuku dyoso. Kashaa, tamwene mwanda bu uno ingi mbalo.”

13. Mwikelo obe wi kwikala na bukitshishi kinyi kwi mulongi a Bible?

¹³ Ikala kileshesho ki buwa. Mwikyelo obe ngulombene kushinkamisha mulongi a Bible’shi bapete bya binyibinyi. (Mat. 5:16) Vitalii, kwete kufuba bu mbala-mashinda a myeshi yoso mu Moldavie amba’shi: “Namwene bi nshalelo, binangu na mwikyelo wa bangi mu kakongye. Bino bibadi binshikamishe’shi, ba Temwe ba Yehowa nyi be mu lulangwilo lwa binyibinyi.”

14. Kileshesho kyobe ki kukwasha mulongi a Bible bwadya kutungunuka na kwela matabula naminyi?

¹⁴ Kumpala kwa kubatshishibwa, abitungu mulongi a Bible atumikile byabya bya kwete kulonga. Bino ta mbibofule nya. Anka nsaa ayimono mulongi a Bible bikukwashe kutumikila mayi a kulonda e mu Bible, mbilombene kumutakula bwa kulonda kileshesho kyobe. (1 Kod. 11:1) Tala mwanda wa Hanae, atatupwile kutemuna. Amba’shi: “Bakwetu balume na bakashi abadi abakitshi myanda i nadi nalongo. Nadi nalongo  bya kunyingisha bangi, kwibafwila lusa na kwibafula. Abadi nka abakula bangi myanda i buwa. Nadi nakumina kwibambula.”

15. Muyile Nkindji 27:17, bwakinyi abitungu twikale kuuku a mulongi a Bible nsaa y’atungunuka na kutwela mu bisangilo?

¹⁵ Ikala kuuku a mulongi a Bible. Apatungunuka mulongi a Bible na kutwela mu bisangilo, tungunuka na kumupasukila. (Fid. 2:4) Kimba bya kumwiuka kalolo. Pamutwe a kumulungula myanda ayimutulu kafu lupese, mutumbule bwa myanda ya kwete kushintula mu nshalelo aye, we kumwipusha pabitale kulonga kwaye kwa Bible, mudimo waye na kifuko kyaye. Miisambo bu yaya, ngilombene kunyingisha kipwano kyenu. Nsaa y’ofiki kuuku a mulongi, we mulombene kumukwasha mpa na ku lubatshisho. (Badika Nkindji 27:17.) Hanae kwete kufuba binobino bu mbala-mashinda a myeshi yoso. P’atentekyesha musango wa kumpala ubadi mutwele mu bisangilo, amba’shi: “Panabangile kupeta ba kuuku mu kakongye, nadi natentegyela efuku dya bisangilo na muloo, nadi n’emwende sunga ne mukokye. Nadi na muloo wa kwikala na ba kuuku bande bapya, na bino bibadi bi nkwashe bwa kutshiba kipwano na ba kuuku bashibadi abafubila Yehowa. Nadi nakumina kwifubwila pepi na Yehowa na bakwetu balume na bakashi. Nyi’mi nkwata kitshibilo kya kubatshishibwa.”

16. Nkinyi dingi kyodi mulombene kukita bwa kukwasha mulongi a Bible bwa’shi epushe bu mwina kakongye?

¹⁶ Nsaa ayitungunuka mulongi a Bible na kwela matabula na kushintula nshalelo aye, mukwashe bwadya kwipusha bu mwina kakongye. Pakwikala omwitamina bwa kukisha naye nsaa pamune. (Eb. 13:2) P’atentekyesha mafuku abadi kwete kulonga Bible, Denis mushale mu Moldavie amba’shi: “Ke bungi ami na mukashi ande abadi abetwitamina kwi bakwetu balume na bakashi bwa kukisha nabo nsaa pamune. Abadi abetulondela bibadi Yehowa mwibakwashe. Bino bibadi abitunyingisha. Kukisha nsaa i bino kubadi akwitukwasha bwa kumona’shi, su twafubila Yehowa atupete nshalelo e buwa.” Su mulongi a Bible afika mulungudi sha batshishibwe, we mulombene kumuteka bwadya nkushindika mu bulungudi. Diego mulungudi a mukandu wibuwa a mu Brésil amba’shi: “Bakwetu balume be bungi abadi abantyekye bwa kwi bashindjikila mu bulungudi. Bino bibadi mushindo wi buwa wa kwibauka kalolo. Panadi nebikitshi, nadi mulongye bi bungi nadi mwipushe mu kipwano ki buwa na Yehowa na Yesu.”

17. Bakulu be kukwasha balongi ba Bible naminyi?

¹⁷ Ikala na nsaa ya kwisamba na balongi ba Bible. Bakulu, p’anupasukila balongi ba Bible na kifulo kyoso, nwi balombene kwibakwasha bwa kwela matabula mpa na ku lubatshisho. Ikala w’esamba nabo kunyima kwa bisangilo. Abamono’shi  webapasukila su otentekyesha mashina abo, bikishekishe nsaa y’ababanga kutusha myalulo mu bisangilo. We kulumbula programe obe bwa kushindjikila mulungudi nsaa yende mu kulonga Bible na muntu. We kukwasha mulongi a Bible mu kipaso kyosh’opwandjikishanga. Ungi mukwetu mukashi mbala-mashinda abetaminaa bu Jackie mushale mu Nigeria amba’shi: “Balongi ba Bible be bungi abakanya pa kuuka’shi mukwetu nshidikiile mu bulungudi, mmukulu. Ungi mulongi a Bible bakwile’shi: ‘Pastere etu te kukita byabya, ayiyaa nka penda kwi ba mpeta. Binyi byabya nka su abamupa makuta!’” Binobino yawa mulongi a Bible kwete kutwela mu bisangilo.

18. Muyile Bikitshino 20:28, bakulu be kukumbasha kalolo mudimo wabadi be bape naminyi?

¹⁸ Longyesha na nyingisha balongyeshi ba Bible. Bakulu, nwina bushito bukata pabitale kukwasha bakwetu, bwabadya kwikala balungudi na balongyeshi be buwa. (Badika Bikitshino 20:28.) Su mulungudi apusha buufu bwa kukunkusha kulonga kwa Bible p’odi, muteky’obe bodya kukunkusha. Jackie atatupwile kutemuna amba’shi: “Ke bungi, bakulu abanyipushaa pabitale balongi bande ba Bible. Nsaa yampete lukalakashi pabitale kukunkusha kulonga kwa Bible, abampeya malango e buwa.” Bakulu mbalombene kukita bi bungi bwa kunyingisha balongyeshi ba Bible. (1 Tes. 5:11) Jackie akumbasha’shi: “Napusha muloo nsaa ayingisha bakulu na nsaa y’abandungula’shi abasankila mudimo wande. Ano mayi, aantaadishaa kwishimba nka bu‘mi batomo mema e mashika pakudi kanya ke bukopo. Mayi abo e buwa aankwasha bwa kuuka’shi nkwete kukita mudimo wi buwa nsaa yandongo Bible na bantu na abinyisha kumpa muloo wi bungi.”​—Nki. 25:25.

19. Twi kupeta muloo kinyi?

¹⁹ Su t’okwete kulonga Bible na muntu binobino, we kukwasha mulongi a Bible bwa kwela matabula mpa na ku lubatshisho. Su we mwilumbule kalolo, we kukwatshishena mulongyeshi, pa kutusha binangu abikwasha mulongi kushi kwakula bi bungi. Twikale ba kuuku ba balongi ba Bible nsaa y’abafiki ku Nshibo ya Bufumu, na twikale kileshesho ki buwa bwabo. Bakulu, mbalombene kunyingisha balongi ba Bible pa kwaata nsaa ya kwisamba nabo, na dingi mbalombene kunyingisha balungudi pa kwibalongyesha na kwibatumbula. Su tubakitshi bino, atupete muloo wi bungi, nsaa y’atukitshi kintu kampanda sunga kyekala kipela bwa kukwasha muntu bwa’shi afule na afubile Yehowa.