ATWE boso atukumiinaa’shi bantu betwambe’shi twi bantu bebuwa. Kadi kwikala muntu e buwa mu uno ndumbulwilo mmwanda wi bukopo. Mwanda, bantu bebungi ‘mbashikwe myanda i buwa.’ (2 Tim. 3:3) Tabakwete kukokyele miiya ya Yehowa nya. Kyoso akyamba Yehowa shi “kii buwa” abo abamba shi “kii bubi” na “kii bubi” abamba shi “kii buwa.” (Yesh. 5:20) Bi kwikala dingi bukopo bwa kwikala muntu e buwa mwanda, myanda yatudi bafumankane nayo i kwikala na bukitshishi bwibubi, na dingi mwanda twi bantu bakutwe kupwidika. Ingi nsaa twi kupusha nka bu bibapushishe Anne *. Sunga mbibaadi mufubile Yehowa munda mwa bipwa bi bungi, amba shi: “Naadi nakitshi mwande moso bwa kwimona bu muntu e buwa.”

Mwanda wa muloo nguno, oso a kwatudi mmulombene kwikala muntu e buwa. Buwa abutukila ku kikudi ky’Efile Mukulu, na kikudi kyaye ki bukome kukila kubofula kwetu sunga bikokoshi byoso bya mu uno ndumbulwilo byatudi balombene kufumankana nabyo. Tubandeyi kutaluula akipushisha buwa na tulongye byatudi balombene kulesha dino eyikashi.

Buwa nyi nkwikala na mwikelo wi buwa, kushi kwikala na mwikelo wibubi. Muntu e buwa akimbaa mishindo ya kukwasha bangi na kwibakitshina myanda i buwa misusa yoso.

Pangi tobomwene muntu akitshina kifuko kyaye sunga ba kuuku baye myanda i buwa, kadi, byabya nyi abilesha kwikala muntu e buwa su? Eyendo, tatwibalombene kulesha dino eyikashi mu kipaso kipwidikye nya, mwanda Bible alesha’shi: “Mwanda takwi muntu su ngumune mululame bikumbane pa nsenga bwa kukita biibuuwa kushii kukita mulwisho.” (Mul. 7:20) Mpoolo mutumibwa bakwile n’eshimba dimune’shi: “Nawuku’shi munda mwande, nyi nkwamba’shi mu mbidi yande, buuwa tambushaale mwanka nya.” (Lom. 7:18) Byabya, abilesha’shi abitungu tukulupile kwi Yehowa, aye Nsulo ya buwa, bwatudya kwikala na dino eyikashi.

Yehowa Efile Mukulu mmwele mwiya pabitale kii buwa. Bible akula pabitale Yehowa shi: “Obe we buwa, okitshînâ bantu bi buwa, byabya ndambukishe milangilo [mayi, NWT] yobe.” (Mis. 119:68, EEM) Tubande kutalula mishindo ibidi ya buwa bwa Yehowa yabadi baleshe mu uno verse.

Yehowa e buwa. Yehowa akitaa nka bi buwa. Tutaluleyi kibaadi kikitshikye pabadi Yehowa mulungule Moyiise shi: “Nankwabikiisha biiya byande byooso.” Yehowa balesheshe Moyiise ntumbo yaye mpa na buwa bwaye. Moyiise bapushishe mayi abaadi aalesha bi Yehowa, aamba shi: “Yehowa! Yehowa! Efile sha lusa na kalolo, shyaakwataa nsungu bukidi, muule na kifulo na boolokye; ashaala mulamate binunu bya ntandwa, alondesha na lwishinko kilema, butombo na milwisho, anka kushii kuleka kantu su nkamune akakidi.” (Efi. 33:19; 34:6, 7) Bino abilesha patoka’shi Yehowa e buwa mu mishindo yoso. Sunga’shi Yesu baadi muntu e buwa kukila bantu boso, bakwile shi: “Ta kwi e buwa su ngumune, kukaasha penda Efile Mukulu”—Luk. 18:19.

 Yehowa akitshînâ bantu bi buwa. Bintu byoso abikitshi Yehowa abilesha shi e buwa. “Yehowa ee buwa kwi bantu booso, aleesha kalolo [lusa] kwi bipangwa byaaye byooso.” (Mis. 145:9) Buwa bwa Yehowa tabwi na ntondo, mmupe bantu boso muwa na bintu byoso byabadi nabyo lukalo. (Bik. 14:17) Etuleshaa dingi buwa nsaa y’etufwila lusa. Mufundji a misambo bambile’shi: “Obe Yehowa, we buwa, sha lusa.” (Mis. 86:5, EEM) Tushinkamisheyi’shi ‘Yehowa . . . alesha kalolo kaye kwi abatambuka mu kululama.’—Mis. 84:11.

Efile Mukulu mwitupangye kwifwanyiko dyaye, byabya twi na mushindo wa kwikala n’eyikashi dya buwa na kukita bibuwa. (Kib. 1:27) Kadi, Eyi dy’Efile Mukulu adilungula bafubi baye shi: “Iyai bya kukita bi buwa.” (Yesh. 1:17, EEM) Mbikunyi byatudya kulonga bya kukita bibuwa? Tutaluuleyi mishindo isatu yatudya kulonga bya kukita bibuwa.

Wa kumpala, abitungu tutekye bwa kupeta kikudi ki selele, akyo nyi kilombene kukwasha bena Kidishitu bwabadya kwikala bantu bebuwa. (Nga. 5:22) Kikudi ky’Efile Mukulu nkilombene kwitukwasha bwa kufula myanda i buwa na kushikwa i bubi. (Lom. 12:9) Bible amba shi Yehowa mmulombene ‘kwitunyingisha mu kyoso kyatukitshi na mu kyoso kyatwamba.’—2 Tes. 2:16, 17.

Wa kabidi, abitungu tubadikye Bible. Su twekala atubadika Bible, Yehowa etulongyesha “bya kukita bilulame” na kwitwikasha ‘bakumbanyinyiine bwa mufubo ooso wibuwa.’ (Nki. 2:9, EEM; 2 Tim. 3:17, Kilombeeno kipya 2014) Nsaa yatubadika na kunangushena, atuusha mashimba eetu na myanda ibuwa pabitale Efile Mukulu na kikyebe ky’eshimba dyaye. Eshimba dyetu dinka bu musheete wa mabwe a muulo. Nsaa yatubadika Bible na kunangushena, atutweshe bintu bya muulo mwanka, na byabya bintu abiketukwasha mu mafuku aafiki.—Luk. 6:45; Ef. 5:9.

Wa kasatu, atukitshi mwetu moso bwa ‘kwambula . . . buwa.’ (3 Yo. 11) Atupete bileshesho bi buwa bya kwambula mu Bible. Anka, Yehowa na Yesu nyi mbileshesho bi buwa. Kadi, twi balombene kutalula dingi bingi bileshesho bya bantu babadi batemune mu Bible bwa buwa bwabo. Babidi batudi balombene kutemuna nyi Tabita na Barnabase. (Bik. 9:36; 11:22-24) Bileshesho byabo mbilombene kwitukwasha su atulongo abyakula Bible pabibatale. Mu kwilongyela kobe, taluula bibabadi bakite bwa kukwasha bangi. Nangushena pabitale mushindo odi mulombene kukwasha bena kifuko nobe sunga bena kakongye. Dingi talula myanda i buwa ibadi ifwile Tabita na Barnabase mwanda babadi abakitshina bangi myanda i buwa. Obe namu we kupeta yaya myabi i mumune.

 Twi balombene dingi kunangushena pabitale bantu bakwete kukita myanda i buwa. Bu kileshesho, banda kutala mufubo wi bukopo aukitaa bakulu mu kakongye, abo ‘bafule myanda ibuwa.’ Tatulubanga bakwetu bakashi ‘balambukishi ba myanda ibuwa’ ku byabakula na byabakitshi. (Tt. 1:8; 2:3) Mukwetu mukashi abetanyinaa bu Roslyn amba’shi: “Loole ande kwete kwitatshisha ngofu bwa kukwasha bangi na kwibanyingisha mu kakongye. Kwete kunangushena pabitale myanda yabo na kunyima ebapa bintu sunga kwibakwasha mu mishindo i buwa. Nanangushena pabimutale’shi nyi mmuntu e buwa bwi kashaa.”

Yehowa kwete kukwasha bantu baye bwa ‘kukimba bya kukita bi buwa.’ (Am. 5:14) Kukita bino akwitukwasha bwa kufula bya binyibinyi bya Yehowa, na kufula kukita myanda i buwa.

Bwa kwikala bantu be buwa, tabitungu nka’shi tupe bantu bintu bikata sunga bya muulo wibukopo nya. Bu kileshesho, muntu asolaa, tafubaa penda na kasala kamune sunga tubidi tukata nya. Afubaa na tusala tupela twibungi. Mu mushindo umune, su atukitshina bantu tu myanda tupelatupela twa kwibakwasha, bino abikalesha’shi twi bantu be buwa.

Bible etunyingisha bwa kwikala “belumbuule” na “be peepi” bwa kukita bibuwa. (2 Tim. 2:21; Tt 3:1) Su tukwete kutala myanda ayikitshikila bangi kalolo, twi kupeta mishindo yakusankisha bakwetu bwa “buuwa na kutamisha lukumiino” lwabo. (Lom. 15:2) Bino abipushisha kupa bantu bintu byatudi nabyo. (Nki. 3:27) Twi balombene kwitanyina muntu kwetu ku nshibo bwa kya kudya na kunyingisha bu kuuku. Su atuuku muntu kampanda e na maladi, twi balombene kumutembela sunga kumwitanyina ku telefone. Eyondo, twi balombene kupeta mishindo i bungi ya kwakula bishima ‘bi buwa [bipwandikile] kwibaka mupuunda lukalo bwa’shi kitwadile baaba abekipusha buuntu bw’Efile Mukulu.’—Ef. 4:29.

Nka bu Yehowa, atukimbi kukitshina bantu boso myanda i buwa. Atukitshina bantu myanda kushii ntondo. Mushindo wi buwa wa kukita bino nyi nkulungula mukandu wi buwa wa Bufumu kwi bantu boso. Nka bu bibakwile Yesu, atukitshina bantu boso myanda i buwa, mpa na betushikwe. (Luk. 6:27) Ta bi bubi kwikala na kalolo na kukitshina bangi myanda i buwa mwanda “ta kwi eyi dya kukanda bintu bii byaabya nya.” (Nga. 5:22, 23) Nsaa yatukitshina bantu myanda i buwa, mpa na baba abetukitshina myanda i bubi, atukaka bangi ku bya binyibinyi na kutumbisha Efile Mukulu.—1 Mp. 3:16, 17.

“Muntu e buwa namu akatambula bwedi mupunda bikitshîno byê bi buwa.” (Nki. 14:14, EEM) Atukapete ingi myabi kinyi ? Nsaa yatukitshina bantu myanda i buwa, abaketukitshina namu myanda i buwa. (Nki. 14:22) Sunga bangi bakutwa kwitukitshina myanda i buwa, abitungu tutungunukye na kwibakitshina myanda i buwa. Bu bipeta, bekushintuula binangu byabo na kwitukitshina myanda i buwa.—Lom. 12:20.

Atupete myabi su tubakitshi myanda i buwa na kuleka kukita myanda i bubi. Bakwetu balume na bakashi abakula’shi bino mbibakitshikile. Tubande kutala mwanda wa Nancy. Amba’shi: “Mu kukula kwande, naadi nakitshi myanda i butete, na ntshinadi na kanemo.” Anka, panadi mubangye kulonga Bible na kutumikila myanda inadi nalongo, nabangile kupusha muloo. Binobino, ne na kinemo.

Kabingilo kakata ka kwikala na eyikashi dya buwa nyi nka kusankisha Yehowa. Sunga bantu be bungi tabamono byatukitshi, Yehowa kwetu kumona. Auku nsaa yoso yatukitshi myanda i buwa na yatupete binangu bi buwa. (Ef. 6:7, 8) Atukapete bipeta kinyi? “Muntu eebuuwa apete mwabi kwi Yehowa.” (Nki. 12:2) Tutungunukyeyi na kwikala na dino eyikashi. Yehowa mmulee shi “ntumbo, kineemo na butaale abikeekala kwi ooso akitshi myanda iibuuwa.”—Lom. 2:10.