MWISAMBO WA KULONGA 19
Ta kwi kintu kilombene kukokosha balulame
“Bafule Miiya yoobe bee mu butaale: bw’abo, takwi kikokoshi.”—MIS. 119:165.
LOONO 122 Tushimateyi pepoo kushii kusanyishwa!
KY’ABAKWILA MWANKA *
1-2. Ungi mufundji a mikanda badi mufunde kinyi, na nkinyi ky’atutalula mu uno mwisambo?
MIDIYO ya bantu lelo uno, ikwete kwamba’shi ngikumine mwi Yesu; anka ta bakwete abakumina myanda yadi mulongyeshe. (2 Tim. 4:3, 4) Ungi mufundji a mikanda bakwile’shi: “Su kwekala ungi Yesu lelo uno akula myanda bu Yesu . . . , twi kupela kumutemesha bu bibadi bibikite bangi bantu, takudi bipwa binunu bibidi? . . . Lwalulo lwi’shi: Oolo, twi kwibikita.”
2 Mu siekele a kumpala, bantu be bungi abadi bapushe malongyesha a Yesu na kumona bilengyeleshi bibadi mukite, anka t’abadi na lukumino mwadi. Bwakinyi? Mu mwisambo ubashala, tumwene myanda inanka ibadi ikokoshe bantu pa mwanda wa bibadi abyakula Yesu na bibadi akitshi. Tutaluleyi ingi myanda inanka. Atumono dingi bwakinyi bantu be bungi lelo uno, bakwete kupela kutemesha balongi ba Yesu, na kyatudya kukita bwa kupela kukokola.
(1) YESU TA BADI NA NTONDO
Be bungi abadi bakokole pa mwanda wa bantu babadi Yesu akisha nabo nsaa, Ino myanda ngilombene kukokosha bamo lelo uno naminyi? (Tala kikoso 3) *
3. Nkinyi kibadi Yesu mukite kibadi kikokoshe bangi?
3 Pabadi pa nsenga, Yesu badi akisha nsaa na bantu belekenelekene. Badi mudye na bantu ba mpeta na ba sha matalwa, anka badi akisha dingi nsaa na bantu balanda na ba shi na matalwa. Na dingi, badi etulu pa mbalo ya bantu bababadi abamono bu “ba sha milwisho.” Bangi bantu abadi balulame bikilekile, abadi bakokole pa mwanda wa bino bibadi Yesu akitshi. Abadi bepushe balongi ba Yesu’shi: “Mbwa-kinyi bwanudiila na kutoma na bafutshishi ba bitadi na bankitshishy’a bubi?” Yesu bebalulwile’shi: ‘Ta mbee na mbidi-bukome bee na lukalo lwa ba munganga, anka baa-sha-mikumbo. Ntshi mufikye Luk. 5:29-32.
mu kwitaanyina balulame, anka baa-sha-milwisho bwa’shi beelangye.’—4. Muyile butemuki bwa Yeshaya, nkinyi kibadi akitengyela bena Yuda pabitale Mesiya?
4 Bifundwe abyakula kinyi? Bipwa bi bungi kumpala kwa’shi Mesiya afikye, mutemuki Yeshaya badi muleshe’shi ekala muntu abash’abakumina kwi ba pa nsenga. Butemuki abwamba’shi: “Babaadi bamubende, baamusumbusheena kwi bantu, . . . baadi uno abaabasuukanga kwi bantu bwa kupela kumumona, baadi mupeeshiibwe, tabaadi na muulo sunga upeela kumpala kwetu.” (Yesh. 53:3) Butemuki abulesha’shi, bibadi abitungu’shi “bantu” basumbushene Mesiya, nyi bwakinyi bena Yuda ba mu siekele a kumpala, abadi abaatengyela’shi bantu basumbushene Yesu.
5. Bantu be bungi abamonaa balongi ba Yesu lelo uno naminyi?
5 Okwete kumona uno mwanda lelo uno su? Oolo. Nsaa ayifiki bantu bakata, ba sha makuta na babamono bu ba sha binangu mu bipwilo byabo, bakata ba bipwilo abekalaa na muloo. Abakuminaa bano bantu sunga bekala abakitshi myanda ikutwene na miya y’Efile Mukulu. Bano bakata ba bipwilo ababepulaa bafubi ba Yehowa ba sha kisumi, ba sha mwikelo wi buwa mwanda bantu be bungi lelo uno, abapwandjikisha’shi ta be na muulo. Nka’bu abyakula Mpoolo, Efile Mukulu musangule bantu babamono bu ‘balotakane.’ (1 Kod. 1:26-29) Kadi, bwa Yehowa, bafubi baye boso ba sha lulamato be na muulo.
6. Muyile Mateo 11:25, 26, twi kwambula mweneno a Yesu naminyi?
6 Twi kukita kinyi bwa kupela kukokola? (Badika Mateo 11:25, 26.) Totadilanga binangu bi bubi bya uno ndumbulwilo pabitale mwilo w’Efile Mukulu bwabidya kwikala na bukitshishi kodi. Uuka’shi Yehowa afubishaa nka penda bantu beyishe bwabadya kukita kikyebe ky’eshimba dyaye. (Mis. 138:6) Na nangushena bintu bungi bibapu kukita Yehowa p’aye kufubisha bano bantu babamono kwi ba pa nsenga bu ba shi na binangu na bu ba shi balongye.
(2) YESU BADI MUTOPEKYE MALONGYESHA A MADIMI
7. Bwakinyi Yesu badi mwitamine Bafadisee bu ba nsesa, na nkinyi kibabakitshine?
7 Yesu badi mutopekye bu nsesa bwa bakata ba bipwilo ba mu mafuku aaye. Bu kileshesho, badi mutopekye bu nsesa bwa Bafadisee abadi abakalakashwa pabitale mushindo wa kwiyosha mema ku masa, pamutwe pa kupasukila baledi babo. (Mat. 15:1-11) Balongi ba Yesu abadi pangi bakanye pakupusha ano mayi. Byabya, abamwipwishe’shi: “Owuku’shi, bafadiseo bekeele bakokoshwe pa kupusha diadia eyi?” Yesu bebalulwile’shi: “Mutshi ooso wabashibakune kwi Shami a mwiulu aukashudiibwa. Ebalekyeleyi; nyi mbampofu, bakunkushi ba bampofu: na su mpofu akunkusha [mungi] mpofu, abakapono booso babidi mu bwina.” (Mat. 15:12-14, Kilombeeno kipya 2014) Sunga bibadi bakata ba bipwilo bafitshile Yesu munda mwanda wa bibadi mwakule, Yesu ta badi mulekye kwakula bya binyibinyi.
8. Mushindo kinyi ubadi Yesu muleshe’shi ta mbipwilo byoso byabadi bakumine kwi Efile Mukulu?
8 Yesu badi dingi muleshe patoka malongyesha a madimi a bipwilo. Badi mwambe’shi, ta mbipwilo byoso byabadi bakumine kwi Efile Mukulu. Na dingi, badi mwakule’shi be bungi abakekala mu kilayi kikata akitwala ku kabuto, anka bantu bapela nyi abakekala mu kashinda kapela akatwala ku muwa. (Mat. 7:13, 14) Badi muleshe’shi, be bungi abakamweka bu abafubila Efile Mukulu, anka ta bakwete kumufubila. Bakwile’shi: “Dimukaayi na batemuki ba-madimi, abafiki kwanudi bafwale buu mikooko, anka munda nyi mmiseu ayidiiyanaa. Ku bikitshino byaabo nyi nkwanukeebatundwila.”—Mat. 7:15-20.
Be bungi abadi bakokole mwanda Yesu badi mutopekie nkumino na bikitshino bi bubi. Ino myanda ngilombene kukokosha bamo lelo uno naminyi? (Tala kikoso 9) *
9. Malongyesha kinyi a madimi abadi Yesu muleshe patoka?
9 Bifundwe abyakula kinyi? Butemuki bwa mu Bible bubadi bupwe kwamba’shi, Mesiya akekala na kisumi ki bukopo bwa nshibo ya Yehowa. (Mis. 69:9; Yo. 2:14-17) Kino kisumi, kibadi kitakule Yesu bwa kulesha patoka malongyesha a madimi na bikitshino bi bubi bya bipwilo. Bu kileshesho, Bafadisee abadi abakumina’shi anyima t’afwiyaa; anka Yesu badi mulongyeshe’shi, bafwe mbalale. (Yo. 11:11) Basanduseo abadi abapele’shi ta kwi lusangukilo; anka Yesu badi musangule kuuku aye Lazare. (Yo. 11:43, 44; Bik. 23:8) Bafadisee abadi abakula’shi Efile Mukulu nyi akunkusha myanda yoso ayitukitshikila sunga myanda yatukyebe kukita; anka Yesu badi mulongyeshe’shi muntu nyi asangula bwa kufubila Efile Mukulu sunga kupela kumufubila.—Mat. 11:28.
10. Bwakinyi be bungi bakwete abakokola pabitale malongyesha etu?
10 Okwete kumona uno mwanda lelo uno su? Oolo. Bantu be bungi lelo uno, bakwete abakokola mwanda tukwete kufubisha Bible bwa kulesha’shi angi malongyesha a bipwilo, nga madimi. Bakata ba bipwilo, bakwete kulongyesha bena bipwilo byabo’shi, Efile Mukulu kwete anyoko bantu babi mu kaalo. Bakwete abafubisha dino dilongyesha bwa kwikala na matalwa pe bantu. Atwe bafubi ba Yehowa, abafubila Efile Mukulu sha kifulo, tukwete kulesha patoka’shi dino dilongyesha ndya madimi. Bakata ba bipwilo bakwete abalongyesha dingi’shi, anyima t’afwiyaa. Su dino dilongyesha ndya binyi, muntu su ngumune tabadya kwikala na lukalo lwa lusangukilo. Anka, tukwete atulongyesha’shi, dino dilongyesha tadi mu Bible. Sunga bipwilo bi bungi bikwete abilongyesha’shi kintu kyoso ky’atukitshi lelo uno, Efile Mukulu badi mupwe kwikilumbula kumpala, atwe tukwete atulongyesha’shi, muntu e na bulungantu na mulombene kusangula bwa kufubila Efile Mukulu. Bakata
ba bipwilo abakitaa kinyi p’abapusha atulongyesha bino? Ke bungi, abafitaa munda!11. Muyile mayi a Yesu e mu Yowano 8:45-47, Efile Mukulu atekye bafubi baye kinyi?
11 Twi kukita kinyi bwa kupela kukokola? Su twi bafule bya binyibinyi, abitungu tukumine byoso abyakula Efile Mukulu. (Badika Yowano 8:45-47.) Mu kwilekena na Satana Diabulu, abitungu tushimatshile mu bya binyibinyi. T’atukitshi kintu su nkimune kikutwene na nkumino yetu. (Yo. 8:44) Efile Mukulu atekye bafubi baye’shi, ‘bashikwe bubi’ anka ‘balamate ku myanda ibuwa,’ nka bu bibadi bibikite Yesu.—Lom. 12:9; Eb. 1:9.
(3) YESU BADI MUBINGWEBINGWE
Be bungi abadi bakokole pa mwanda wa lufu lua Yesu ku mutshi. Ino myanda ngilombene kukokosha bamo lelo uno naminyi? (Tala kikoso 12) *
12. Bwakinyi mushindo ubadi Yesu mufwe ubadi ukokoshe bena Yuda be bungi?
12 Nkinyi kingi kibadi kikokoshe bena Yuda mu mafuku a Yesu? Mpoolo amba’shi: ‘Atwe atulambukisha Mesiya abadi bakokole ku mutshi, nyi kikokoshi kwi bena Yuda.’ (1 Kod. 1:23) Bwakinyi bena Yuda be bungi abadi bakokole mu mushindo ubadi Yesu mufwe? Bwabo, lufu lwa Yesu ku mutshi lubadi alumweka bu lwa ntomboshi, nkitshishi a bubi—ku shi bu Mesiya.—Miy. 21:22, 23.
13. Nkinyi kibadi kikutwe kutundula bano abadi bakokole pa mwanda wa Yesu?
13 Bano bena Yuda abadi bakokole pa mwanda wa Yesu, abadi bakutwe kutundula’shi, Yesu ta badi musole mwanda, abadi ba mudimbile na’shi abadi bamukitshine myanda na kukutwa kwa kululama. Bano abadi basambishe Yesu, t’abadi bakite myanda na kululama. Tumiladi tukata twa bena Yuda, tubadi twibungye lubilolubilo bwa kusambisha Yesu, na ta tubadi tulonde miya pabitale kusambisha bilumbu. (Luk. 22:54; Yo. 18:24) Kukatusha myanda ya madimi ibabadi abafundu Yesu, ba nsushi banabene abadi abakimbi “kwanyiina Yesu myanda ya-madimi bwa kumona bya kumwipaa.” Anka, t’abadi bobeshe kwibikita, nyi bwakinyi tshite-mwakwidi mukata, badi atompo su Yesu akula mwanda kampanda wi bubi bwa’shi bamone pakumukwatshila. Bino bibadi bikutwene ngofu na miya. (Mat. 26:59; Mak. 14:55-64) Na kunyima kwa Yesu kusanguka, bano ba nsushi bakutwe kululama, abadi bafute basala bena Loma, abadi abalama ku mashama “makuta eebungi,” bwa’shi bapalakashe myanda ya madimi bwa kupushisha bwakinyi mu mashama mubadi bisumanga.—Mat. 28:11-15.
14. Nkinyi kibadi kipwe kutemuka Bifundwe pabitale lufu lwa Mesiya?
14 Bifundwe abyakula kinyi? Sunga bena Yuda be bungi ba mu mafuku a Yesu t’abadi abatengyela’shi, Mesiya e na kya kufwa, tala bibadi bitemukye Bifundwe: ‘Badi mwipaane’ye nabeene mpaa na ku lufu, aye nkwitula mu mulongo wa baa-sha-milwisho; mwanda baadi musemune bito bya bibumbu, dingi nkwakwila baa-sha-milwisho.’ (Yesh. 53:12) Sunga bibabadi bafude Yesu’shi mukite milwisho na abo nkumwipa, bena Yuda t’abadi na kabingilo ka kukokola.
15. Mmyanda kinyi ya bakwete kudimbila ba Temwe ba Yehowa, ikwete ayitakula bangi bwa kupela kwitutemesha?
15 Okwete kumona uno mwanda lelo uno su? Oolo! Yesu abadi bamudimbile, na abo nkumutshibila kiimu. Lelo uno, bantu bakwete kukitshina ba Temwe ba Yehowa myanda mu uno mushindo. Bu kileshesho, mu États-Unis; munkatshi mwa bipwa 1930 na ku 1950, twibasambe bilumbu bi bungi bwa kupeta bulungantu bwa kulangwila Yehowa Efile Mukulu. Kushi bufu, bangi ba nsushi abadi betuponeshe bilumbu. Mu Québec, mu Canada, bipwilo mbifube pamune na mbulamatadi bwa kwimika mudimo wetu. Balungudi be bungi mbedibwe mu nkano nka penda mwanda wa’shi, abalungula bantu nabo mukandu wa Bufumu bw’Efile Mukulu. Mu Allemagne, mbulamatadi a bena Nazi, badi mwipee bakwetu ba nsongwa be bungi. Na mu bino bipwa, bakwetu be bungi ba mu Russie mbebatshibile biimu na kwibela mu nkano pa mwanda wa’shi mbalungule mukandu wibuwa, na uno mudimo, bakata ba mbulamatadi abewitamina bu wa ba “ntomboshi.” Mpa na Traduction du monde nouveau a mu ludjimi lwa Russe mbamukandjikye na abamwamba bu “mukanda w’etombo,” mwanda mwi eshina Yehowa.
16. Muyile 1 Yowano 4:1, bwakinyi t’abitungu tudimbibwe na myanda ya madimi y’abakula pabitale mwilo wa Yehowa?
16 Twi kukita kinyi bwa kupela kukokola? Uuka bi mwanda kalolo. Mu mwisambo waye wa pa mwengye, Yesu badi mudimushe bantu abadi abamutemesha’shi bangi bantu ‘abakenudimbila myanda ii bubi iilekeene.’ (Mat. 5:11) Nsulo ya ano oso madimi nyi Satana. Kwete atakula bantu betushikwe bwabadya kupalakasha myanda ya madimi pabitale boso bafule bya binyibinyi. (Kibaf. 12:9, 10) Abitungu tupele kutemesha myanda ya madimi y’abakula kwi bantu betushikwe. Tatutadila ano madimi bwa adya kwitutshinyisha sunga kubofusha lukumino lwetu.—Badika 1 Yowano 4:1.
(4) YESU ABADI BAMUPANE NA KUMUSUMBUSHENA
Be bungi abadi bakokole mwanda Yesu badi mupanyibwe na Yudase. Ino myanda ngilombene kukokosha bamo lelo uno naminyi? (Tala kikoso 17-18) *
17. Myanda ibadi ikitshikye kumpala kwa lufu lwa Yesu, ibadi ilombene kukokosha bangi naminyi?
17 Kumpala kwa’shi Yesu afwe, abadi bamupane kwi umune a ku batumibwa baye 12. Ungi mutumibwa badi mumupele misango isatu, na boso batumibwa abadi bamulekye mu bufumu bwa lufu lwaye. (Mat. 26:14-16, 47, 56, 75) Bino, ta bibadi bikanyishe Yesu nya. Badi mpa na mutemukye’shi bino nyi abikakitshika. (Yo. 6:64; 13:21, 26, 38; 16:32) Pakumona bino, bangi abadi balombene kukokola pa kupwandjikisha’shi, ‘Su batumibwa baye be na mwikelo wi bino, ntakumina kwikala mu kisaka kyabo!’
18. Myanda kinyi ibadi ikitshikye kumpala kwa lufu lwa Yesu ibadi ilombashe matemuki?
18 Bifundwe abyakula kinyi? Bipwa nkama Sek. 11:12, 13) Na muntu akapana Yesu, akekala umune a ku ba kuuku baye. (Mis. 41:9) Mutemuki Sekadya bafundjile’shi: ‘Kupila mulami a mikooko, mikooko ipalakane.’ (Sek. 13:7) Pamutwe pa kukokola bwa ino myanda, bantu ba sha mashimba alulame mbalombene kunyingishibwa p’abo kumona ano matekumi aalombena Yesu.
kumpala, Yehowa badi muleshe Mwiyi dyaye’shi, Mesiya akapanyibwa ku fwalanga 30. (19. Bantu ba sha mashimba alulame abauku kinyi?
19 Okwete kumona uno mwanda lelo uno su? Oolo. Bangi ba Temwe ba Yehowa abaukibwa kalolo, mbalekye kufubila Yehowa, basumbula lukumino na bakwete kukita mwabo moso bwa kukaka bangi kwabadi. Bakwete kupalakasha myanda ya madimi pabitale ba Temwe ba Yehowa ku bisashi, na ku Internete. Anka bantu ba sha mashimba alulame ta bakwete kudimbibwa. Kadi, abaukushi Bible badi mupwe kutemuka’shi ino myanda aikakitshika.—Mat. 24:24; 2 Mp. 2:18-22.
20. Twi kukita kinyi bwa kupela kukokola? (2 Timote 4:4, 5)
20 Twi kukita kinyi bwa kupela kukokola? Abitungu tutungunukye na kulama lukumino lwetu lunyingye pa kwilongyela efuku dyoso, kuteka kushi kukoka, na pa kutungunuka na kukita mudimo wabadi betupe kwi Yehowa. (Badika 2 Timote 4:4, 5.) Su twina lukumino, t’atukatshinyi nsaa y’atukapusha myanda ya madimi pabitale ba Temwe ba Yehowa. (Yesh. 28:16) Kifulo kyetu bwa Yehowa, bw’Eyi dyaye na bwa bakwetu, abitukwasha bwa kupela kukokola pa mwanda wa baba balekye kufubila Yehowa.
21. Sunga bantu be bungi ba kwete kupela kutemesha mukandu wetu, nkinyi akitungu’shi tushinkamishe?
21 Mu siekele a kumpala, be bungi abadi bakokole, na abo nkupela kutemesha Yesu. Anka bangi’nyi be bungi abadi bakumine kumutemesha. Munkatshi mwabo mubadi umune a ku bena Sanedrine mpa na “baa-tshite-mwakwidi be bungi.” (Bik. 6:7; Mat. 27:57-60; Mak. 15:43) Lelo uno, midiyo ya bantu ikwete ayilondo Yesu. Bwakinyi? Mwanda abauku na mbafule bya binyibinyi bi mu Bifundwe. Eyi dy’Efile Mukulu adyamba’shi: “Bafule Miiya yoobe bee mu butaale: bw’abo, takwi kikokoshi.”—Mis. 119:165.
LOONO 124 Twikale na lulamato
^ par. 5 Mu mwisambo ushale, tumwene myanda inanka ibadi itakule bantu be bungi ba mu mafuku a Yesu bwa kupela kumutemesha na bwakinyi bantu lelo uno abapele kutemesha balongi baye. Mu uno mwisambo, atukyebe kutalula ingi myanda inanka. Atutalula dingi bwakinyi bantu bafule Yehowa, t’abatadila kintu su nkimune bwakidya kwibakokosha.