MWISAMBO WA KULONGA 21
Yehowa akupa bukome
“Pandji mubofule, paapa ngi pandji na bukome.”—2 KOD. 12:10.
LOONO 73 Etupe namu mashimba anyingye
KY’ABAKWILA MWANKA *
1-2. Ba Temwe ba Yehowa be bungi abapetaa nkalakashi kinyi?
MPOOLO mutumibwa badi munyingishe Timote, mpa na bena Kidishitu boso bwabadya kukumbasha mudimo wabo kalolo. (2 Tim. 4:5) Oso akwatudi aata elango dya Mpoolo na muulo. Anka kwi nkalakashi. Bwa bakwetu balume na bakashi be bungi, abibatungu eshimba dinyingye bwa kulungula mukandu wibuwa. (2 Tim. 4:2) Bu kileshesho, banda kunangushena bakwetu bashale mu maumbo mwabadi bapele ingi midimo yetu sunga kukandjika yoso. Bakwete kulungula mukandu wibuwa sunga abauku’shi be kwibela mu lukano!
2 Mwilo wa Yehowa ukwete aupete nkalakashi ilombene kwibabofusha. Bu kileshesho, be bungi bakwete abafubu ngofu bwa kulombasha nkalo ya bifuko byabo. Abakumina kukita bi bungi mu bulungudi, anka ku nfudilo a lubingo, mbakokye. Bangi, ta be bya kukita bi bungi mwanda wa mukumbo usha’upu sunga bununu; pangi, bangi be nka mu mashibo aabo ta be bya kutuka. Bangi namu abepusha nka bu bashi na muulo ku meso kwa Yehowa. Mary, * mukwetu mukashi mushale mu Moyen-Orient amba’shi: “Nakitaa mwande moso bwa kukambila binangu bi bubi, mwanda abimbofushaa. Na netopeka mwanda abingataa nsaa na bukome bwa kukita bulungudi.”
3. Nkinyi ky’atutalula mu uno mwisambo?
3 Sunga twekala na myanda inaminyi, Yehowa mulombene kwitupa bukome bwatudi nabo lukalo bwakutungunuka na kumufubila. Kumpala kwa kutalula mushindo ulombene kwitukwasha Yehowa, tubande kutalula mushindo ubadi munyingishe Mpoolo na Timote, bwabadya kukumbasha mudimo wabo sunga bibabadi na nkalakashi.
YEHOWA KWETE ETUPA BUKOME BWA KUTUNGUNUKA NA KULUNGULA MUKANDU WIBUWA
4. Nkalakashi kinyi ibadi Mpoolo mupete?
4 Mpoolo badi mupete nkalakashi i bungi. Badi na lukalo lwa bukwashi bwa Yehowa, bikishekishe pababadi bamukupile, bamwase mabwe na bamwele mu lukano. (2 Kod. 11:23-25) Mpoolo badi mwakule patoka’shi ingi nsaa badi alu na binangu bi bubi. (Lom. 7:18, 19, 24) Badi na mukumbo ubadi bu ‘mulobo umutungye mu mbidi’ ubadi akulupila’shi Efile Mukulu eukashe.—2 Kod. 12:7, 8, EEM.
Nkinyi kibadi kipe Mpoolo bukome bwa kukumbasha mudimo waye? (Tala kikoso 5-6) *
5. Mmyanda kinyi ibadi ikite Mpoolo sunga bibadi mu nkalakashi?
5 Yehowa badi mupe Mpoolo bukome, bwakutungunuka na kumufubila sunga bibadi mupete nkalakashi i bungi. Banda kutala myanda ibadi Mpoolo mukite. Bu kileshesho, badi mulungule bantu be bungi mukandu wibuwa na kisumi mpa na pangi bakata ba mbulamatadi. (Bik. 28:17; Fid. 4:21, 22) Badi dingi mulungule Balami ba lukano, na baba boso abadi abafiki mu kumutala mukandu wi buwa. (Bik. 28:30, 31; Fid. 1:13) Nka mu aa mafuku amune, Mpoolo badi mufunde mikanda iyokyelwe ikwete kukwasha bena Kidishitu mpa na lelo uno. Na kileshesho kya Mpoolo, kibadi kinyingishe kakongye ka bena Loma, mwanda kibadi kibakwashe bwa’shi ‘kukankamana kwâbo kutame, na babànga kulungula mukandu w’Efile Mukulu kushi mô.’ (Fid. 1:14, EEM) Sunga ingi nsaa Mpoolo ta badi na bya kukita bi bungi bu bibadi akumina, badi mukite kibadi mulombene kukita, na bino bibadi ‘biyiishe mukandu wibuuwa kumpala.’—Fid. 1:12.
6. Muyile 2 Bena-Kodinda 12:9, 10, nkinyi kibadi kikwashe Mpoolo bwa kukumbasha mudimo waye.
6 Mpoolo badi auku’shi byoso bibadi mukite mu mudimo wa Yehowa, badi mwibikite ku bukome bw’Efile Mukulu, kushi bwaye’ye nabene. Badi mwakule’shi bukome bw’Efile Mukulu “abwileesha mu kubofula.” (Badika 2 Bena-Kodinda 12:9, 10.) Ku bukwashi bwa kikudi kyaye kiselele, Yehowa badi mupe Mpoolo bukome bwa kukumbasha kalolo mudimo waye—sunga bibabadi bamubingyebingye, bamwele mu lukano na ingi nkalakashi ibadi mupete.
Nkinyi kibadi kipe Timote bukome bwa kukumbasha mudimo waye? (Tala kikoso 7) *
7. Nkalakashi kinyi ibadi ayitungu’shi Timote anyingile bwa kukumbasha mudimo waye?
7 Timote mwina mufubo naye na Mpoolo, badi na kya kukulupila mu bukome bw’Efile 1 Kod. 4:17) Timote badi pangi epusha bu shi mulombane. Pangi mwanda wa bibadi Mpoolo mumulungule’shi: “Muntu su ngumune takupeeshanga bwa bukinga bwobe.” (1 Tim. 4:12) Na mu aa mafuku, Timote badi na waye mulobo umutungye mu mbidi—“kukumba’nka kapindji kapindji.” (1 Tim. 5:23) Anka, Timote badi auku’shi kikudi kya Yehowa nkilombene kumupa bukome bwadi nabo lukalo bwa kulungula mukandu wibuwa na kufubila bakwabo.—2 Tim. 1:7.
Mukulu bwa kukumbasha mudimo waye. Badi mushindjikile Mpoolo mu ngyendo ila ya bu misionere. Na Mpoolo badi amutumu mu ingi ngyendo bwa kukunka na kunyingisha tukongye. (YEHOWA KWETE ETUPA BUKOME BWA’SHI TUSHAALE NA LULAMATO SUNGA TWAPETA NKALAKASHI
8. Mushindo kinyi ukwete Yehowa kunyingisha mwilo waye lelo uno?
8 Lelo uno, Yehowa kwete apa bafubi baye “bukome bushii bwa kupwandjikisha nabo kintu,” bwa’shi batungunukye na kumufubila na lulamato. (2 Kod. 4:7) Tutaluleyi bintu binanka bitupe Yehowa bwa kwitunyingisha na kwitukwasha bwa’shi tushaale na lulamato kwadi: Luteko, Bible, bakwetu bena Kidishitu na bulungudi.
Yehowa etunyingishaa ku bukwashi bwa luteko (Tala kikoso 9)
9. Luteko lwi kwitukwasha naminyi?
9 Tukwete kunyingishibwa ku bukwashi bwa luteko. Mu Bena-Efeso 6:18, Mpoolo etunyingisha bwatudya ‘kuteka misusa yoso.’ Yehowa alula nteko yetu pa kwitukwasha. Jonnie mushale mu Bolivie, badi mumone buno bukwashi nsaa ibadi mupete bitompwanga bi bungi. Mu kipungo kimune, mukashi aye, nshaye na nyin’aye abadi boso na mikumbo i bukopo. Bibadi abimwelela bukopo bwa kulombasha nkalo ya boso basatu. Nyin’aye bafwile, na bibadi byate mafuku e bungi bwa’shi mukashi aye na nshaye bapande. P’atentekyesha aa mafuku e bukopo, Jonnie amba’shi: “Nsaa inadi mukalakashwe ngofu, kibadi akinkwasha, nkuteka Yehowa na kumulungula byoso byanepusha.” Yehowa badi mupe Jonnie bukome bubadi nabo lukalo bwa kunyingila. Ronald ungi mukulu a mu Bolivie, baukile’shi nyin’aye ena mukumbo wa cancer. Kunyima kwa mweshi, nyin’aye bafwile. Nkinyi kibamukwashishe bwa kunyingila? Amba’shi: “Nafungwilaa Yehowa eshimba dyande na kumulungula byoso byanepusha. Nauku’shi aye ampusha kukila ungi muntu oso, mpa n’ami nabene.” Ingi nsaa atupusha’shi, myanda ibetukidi na t’atuku kya kwakula mu nteko. Anka, Yehowa amba’shi, tumutekye sunga byetwelela bukopo bwa kupatula by’atwipusha.—Lom. 8:26, 27.
Yehowa etunyingishaa ku bukwashi bwa Bible (Tala kikoso 10)
10. Nka bu byabebilesha mu Bena-Ebelu 4:12, bwakinyi kubadika Bible na kunangushena kwi na muulo?
10 Tukwete kunyingishibwa ku bukwashi bwa Bible. Anka bu bibadi Mpoolo mukulupile mu bifundwe bwa kupeta bukome na kusambibwa, natwe namu twi kukita nka bu’ye. (Lom. 15:4) P’atubadika Eyi dy’Efile Mukulu na kwidinangushena, Yehowa mulombene kwitukwasha bwa kwidipusha kalolo na kumona by’aditukwasha. (Badika Bena-Ebelu 4:12.) Ronald atatupwile kutemuna amba’shi: “Ne na muloo mwanda ne mukite mwande moso bwa kupeta kyubishi kya kubadika Bible bufuku boso. Na nangushena ngofu pa nyikashi ya Yehowa na mushindo wapasukilaa mwilo waye na kifulo kyoso. Bino abinkwashaa bwa kupetula bukome.”
11. Mushindo kinyi ubadi Bible munyingishe mukwetu mukashi badi mu kinyongwa?
11 Nsaa y’atubadika Eyi dy’Efile Mukulu na kwidinangushena, abitukwasha bwa kwikala na mweneno e buwa pabitale nkalakashi yetu. Tala mushindo ubadi Bible mukwashe
mukashi a mu lufwila. Ungi mukulu bamulungwile’shi, mulombene kupeta bukwashi su abadika malongyesha e mu mukanda wa Yoobo. Pabebikitshine, musango umune babangile kutopeka Yoobo bwa binangu byaye bi bubi. Mu binangu byabye badi alungula Yoobo’shi: “Yoobo! Twekalanga nk’onangushena pabitale myanda yobe!” Anka kunyima batundwile’shi, n’aye enka na binangu bu bya Yoobo. Bino bibamukwashishe bwa kulumbula mweneno aye na kunyingila kinyongwa kya lufu lwa mulume aye.Yehowa etunyingishaa ku bukwashi bwa bakwetu bena Kidishitu (Tala kikoso 12)
12. Yehowa etunyingishaa naminyi ku bukwashi bwa bakwetu balume na bakashi?
12 Atunyingishibwa ku bukwashi bwa bakwetu bena Kidishitu. Ungi mushindo ukwete Yehowa kwitunyingisha, nyi ku bukwashi bwa bakwetu bena Kidishitu. Mpoolo bafundjile’shi, badi na lukalo lwi bukopo lwa “kwinyingishena” na bakwabo balume na bakashi. (Lom. 1:11, 12) Mary atatutemwine, mufule kwikala pamune na bakwetu balume na bakashi. Amba’shi: “Yehowa afubishaa bakwetu balume na bakashi bash’abauku sunga bi mwanda wande. Ingi nsaa abakulaa myanda anyingisha sunga kuntumina mikanda, na nyi byanyikalanga nabyo lukalo. Bino abinkwashaa bwa kwisamba na bangi bakwetu bakashi bapete nkalakashi imumune na yande na kulongyela ku nkalakashi yabo. Na bakulu abakitaa mwabo moso bwa’shi nepushe bu ena muulo mu kakongye.”
13. Mushindo kinyi watudya kwinyingishena ku bisangilo?
13 Imune ya ku ma mbalo e buwa y’atwinyingishenaa na bakwetu balume na bakashi, nyi ku bisangilo bya kakongye. Nsaa ywende ku bisangilo, we kunyingisha bangi pakwibalungula’shi we mwibafule na wena lutumbu bwa byabakwete kukita. Bu kileshesho, kunyima kwa bingi bisangilo, ungi mukulu abetaminaa bu Peter badi mulungule ungi mukwetu mukashi sha mulume shi Temwe a Yehowa’shi: “Abitunyingishaa ngofu p’atukumono ku bisangilo. Wekalaa nka na bana bobe basamombo bafwale kalolo na anwikalaa belumbule kalolo bwa kutusha myalulo.” Uno mukwetu mukashi badi musankye ngofu, aye nkwalula’shi: “Mayi obe abansankisha.”
Yehowa etunyingishaa ku bukwashi bwa mudimo wa bulungudi (Tala kikoso 14)
14. Mudimo wa bulungudi wi kwitukwasha naminyi?
14 Tukwete kunyingishabwa ku bukwashi bwa bulungudi. Nsaa y’atulungula bangi bya binyibinyi bi mu Bible, atwipusha kalolo na atupetula bukome sunga bantu bakumina mukandu wetu sunga beupela. (Nki. 11:25) Ungi mukwetu mukashi abetaminaa bu Stacy, mumone mushindo w’atunyingishibwa na bulungudi. Nsaa ibadi itushibwe mwina kifuko naye mu kakongye, badi mwipushe bi bubi na kutungunuka na kwiyipusha’shi, ‘Nekukita kintu kampanda bwa kumukwasha su?’ Bibadi byelele Stacy bukopo bwa kuleka kutungunuka na kunangushena pa wawa mwanda. Nkinyi kibadi kimukwashe bwa kunyingila? Mbulungudi! Nsaa yadi mu bulungudi, atumaa binangu byaye kwi bantu be na lukalo lwa bukwashi bwaye. Amba’shi: “Mu aa mafuku, Yehowa badi mumpe mulongi a Bible badi ele matabula lubilobilo. Bino bibadi binyingishe ngofu. Kintu kinkwashe ngofu, mudimo wa bulungudi.”
15. Nkinyi kibolongyela ku mayi a Mary?
15 Pa mwanda wa nkalakashi, bangi mbalombene kwiipusha’shi ta be byakukita bi bungi mu mudimo wa bulungudi. Su nyi by’okwete kwiipusha, tentekyesha’shi Yehowa asangalaa nsaa ywetatshisha. Tala dingi kileshesho kya Mary. Nsaa ibadi mwende ingi mbalo y’abakulaa lungi ludjimi, badi epusha’shi ta mulombene kukita bi bungi mu bulungudi. Amba’shi: “Ingi nsaa, kyoso kinadi mulombene kukita, nkwakula mayi apela, kubadi kifundwe, sunga
kupa muntu trakte.” Bino bibamutakwile bwa kwiipusha’shi, ta kwete akitshi bi bungi p’epwandjikisha na balungudi abakula lwalwa ludjimi kalolo. Anka, badi mushintule mweneno aaye. Babangile kutundula’shi, Yehowa mulombene kumufubisha sunga byash’auku lwalwa ludjimi kalolo. Amba’shi: “Bya binyibinyi bikwete kupasha bantu, mbipelepele ngofu na abyo nyi bikwete kushintula bantu.”16. Nkinyi kilombene kukwasha baba ba shi bya kutuka ku mashibo aabo, kadi abakumina kulungula mukandu wibuwa?
16 Yehowa kwete amono na asankila lukalo lwetu lwa kulungula mukandu wibuwa sunga twekala ku mashibo etu t’atutuku. Mmulombene kwitukwasha bwa kulungula baba boso abafiki mu kwitupasukila sunga ba minganga mukandu wibuwa. Su atupwandjikisha mudimo wetu watukitshi binobino na bibatudi bakite kala, twi balombene kubofula ku mashimba. Anka, su twatundula mushindo ukwete kwitukwasha Yehowa binobino, atupete bukome bwatudi nabo lukalo bwa kunyingila lukalakashi loso lwalwa na muloo.
17. Muyile Mulungudi 11:6, bwakinyi abitungu tutungunukye na kulungula mukandu wibuwa sunga t’atumono bipeta bukidibukidi?
17 T’atuuku’shi, ndutete kinyi lwa bya binyibinyi lw’atukunu alumene na alukulu. (Badika Mulungudi 11:6.) Bu kileshesho, Barbara mukwetu mukashi tadi na bipwa bikile pa 80, alungulaa mukandu wibuwa ku telefone na kufunda mikanda. Mu umune wa ku mikanda yaye, badi mwimwele Kitenta kya Mulami kya 1/3/2014, ki na mutwe wa mwanda awamba’shi: “Kyabadi bakukitshine kwi Efile Mukulu.” Ta badi auku’shi mukanda, mwiutumine mulume na mukashi batushibwe mu kakongye. Abadi bekibadikye misango i bungi. Mulume badi mwipushe nka bu’shi, Yehowa nyi kwete kwisamba naye. Abo nkubanga kutwela dingi mu bisangilo kunyima kwabo kukita bipwa bikile pa 27. Na abo nkufika dingi ba Temwe ba Yehowa. Banda kunangushena mushindo ubadi Barbara munyingishibwe pa kumona bipeta bya umune wa ku mikanda yaye!
Yehowa etunyingishaa ku bukwashi bwa (1) luteko, (2) Bible, (3) bakwetu bena Kidishitu, na (4) mudimo wa bulungudi (Tala kikoso 9, 10, 12, 14)
18. Nkinyi akitungu’shi tukite bwa’shi Efile Mukulu etunyingishe?
18 Yehowa mwitupe bintu bi bungi abitupa bukome, bu luteko, Bible, bakwetu balume na bakashi, na mudimo wa bulungudi. Nsaa y’atufubisha bino bintu, atulesha’shi atukulupila mu bukwashi bwaye, na atukumina kwibikita. Byabya, tukulupileyi mwi Nshetu e mwiyilu Yehowa, aye kwete kunyingisha “bano batuule lukulupilo lwabo mwadi.”—2 Mya. 16:9.
LOONO 61 Anwe ba Temwe ndayi nka kumpala!
^ par. 5 Twi mu mafuku e bukopo bukile, anka Yehowa kwete etukwasha bwa kunyingila. Mu uno mwisambo, atutalula mushindo ubadi Yehowa mukwashe Mpoolo mutumibwa na Timote, bwabadya kutungunuka na kumufubila sunga bibabadi na nkalakashi. Atutalula dingi bintu binanka bitupe Yehowa bwatudya kutungunuka na kumufubila lelo uno.
^ par. 2 Angi mashina mbeashintule.