1. Muyile Beena-Kolose 2:4, 8, Satana kwete kutompa kukwata binangu byetu ku bupika naminyi?

SATANA akumiina’shi tulekye kufula Yehowa. Bwa kulombasha mpàngo yaye, kwete kutompa kwitutakula mu kushintuula binangu byetu bwa’shi, etukwate ku bupika na tunangushene bu’ye. Kwete kutompa kwitukuminyisha sunga kwitudimba bwashi tumulonde pa kufuba na malaka eetu a mbidi.—Badika Beena-Kolose 2:4, 8.

2-3. (a) Bwakinyi abitungu tuteemeshe mayi a kudimusha e mu Beena-Kolose 2:8? (b) Nkinyi kyatukyebe kutaluula mu uno mwisambo?

² Twi mu masaku akata a kudimbibwa na Satana su? Oolo, twi mu masaku! Tentekyesha’shi, Mpoolo tabaadi mufunde ano mayi a kudimusha e mu Beena-Kolose 2:8 bwa bantu bashii bena Kidishitu nya. Baadi mwiafundjile bena Kidishitu abaadi bedibwe mwimu ku bukwashi bwa kikudi kiselele. (Kol. 1:2, 5) Mu aa mafuku, bena Kidishitu abaadi mu masaku a kudimbibwa, mpa n’atwe namu lelo uno, twi mu masaku akata a kudimbibwa. (1 Kod. 10:12) Bwakinyi? Mwanda Satana mbamusumbule pa nsenga, na kwete kukita mwaye moso bwa kudimba bafubi b’Efile Mukulu basha lulamato. (Kibaf. 12:9, 12, 17) Kukatusha byabya, twi mu kipungo ki bantu babi na ba nsesa “abaiididiila mu bubi.”—2 Tim. 3:1, 13.

³ Mu uno mwisambo, atukyebe kwisambila kipaso kikwete kufubisha Satana “madimi aatukila ku byubishi bya bantu” bwa kupima kulubisha binangu byetu. Atukyebe kutundula “bibembo” byaye bisatu sunga miteo yaaye. (Ef. 6:11) Akupu, mu mwisambo aulondo, atukataluula kipaso kyatudya kukambila bukitshishi  boso bwibubi bulombene kwikala mu binangu byetu. Kya kumpala, tubande kutaluula kyatudi balombene kulongyela ku kipaso kibadi Satana mudimbe bena Isaleele kunyima kwa’bo kutwela mu Nsenga ya Mulayilo.

4-6. Muyile Miiya Ikituulwe 11:10-15, mayele kinyi apya a kudima abaadi bena Isaleele na kya kulonga pababadi mu Nsenga ya mulayilo?

⁴ Satana baadi mutompe bena Isaleele na budimu boso bwabadya kulangwila ma nkishi. Baadi mwibikite naminyi? Baadi auku’shi be na lukalo lwa kupeta bidibwa, aye nkufuba na lwalwa lukalo bwa kwibatakula mu kukita kyakumiina. Pabaadi bena Isaleele batwele mu Nsenga ya mulayilo, abaadi na kya kulonga mushindo upya wa kukusha bidibwa. Pababadi mu Ejiipitu, bena Isaleele abaadi abakitshi mikola bwa kukaka mema a mwela wa Nile mu mafuba aabo. Anka, mu Nsenga ya mulayilo tabaadi na kya kubundula mikola bwa kukaka mema nya, kadi mema abaadi aafiki mu bipungo bya mpeshi, na ku lume. (Badika Miiya Ikituulwe 11:10-15; Yesh. 18:4, 5) Dingi, bena Isaleele abadi na kya kulonga mayele apya a kudima. Tabibaadi bibofule nya, mwanda bena Isaleele boso abaadi abauku kudima, abafwile mu kabaaka.

⁵ Yehowa baadi mwibapatulwile’shi, nshalelo aabo bashintuluka. Akupu, baadi mulombashe ano mayi a kwibadimusha abaadi aamweka bu ashi epushene na myanda ya kudima, bebalungwile’shi: “Elameyi kalolo tala benulubisha mu mashimba eenu, bee kwinupambula beenukakila mu kulangwila bangi beefile na kwiyela paashi kumpala kwabo.” (Miy. 11:16, 17) Bwakinyi Yehowa baadi ebadimusha pabitale kulangwila b’efile ba madimi, aku namu baadi akula myanda itale kulonga mayele apya a kudima?

⁶ Yehowa baadi auku’shi, bena Isaleele abakyebe kwenda kwi ba mpangano bebefunyishe  bwa kulonga mishindo ya kudima. Eyendo, baaba ba mpangano abaadi abauku kudima kalolo kukila bena Isaleele, na mwilo w’Efile Mukulu ubaadi na kya kulonga mishindo ya kudima kwabadi, kadi kubaadi masaku akata. Binangu bya ba bidime ba mu Kanaana bibadi abikunkushibwa na lulangwilo lwa Baale. Abaadi abakumiina’shi Baale nyi sh’eyilu na’shi aye nyi anokyeshaa mpeshi. Yehowa tabaadi akumiina’shi badimbe mwilo waye na yaya nkumiino ya madimi nya. Kadi, misusa ibungi bena Isaleele abadi abalangwila Baale. (Mb. 25:3, 5; Bans. 2:13; 1 Baf. 18:18) Binobino tutaleyi, bibaadi Satana mukwate bena Isaleele ku bupika.

7. Lukumiino lwa bena Isaleele lubadi lutompiibwe naminyi pababadi batwele mu Nsenga ya Mulayilo?

⁷ Mayele a kumpala, Satana badi mufube na malaka ebuwa a shi mpeshi anokye bwa kutopesha nsenga. Mu Nsenga ya Mulayilo mubadi amunoko penda tupeshi tupeela dya ku nfudiilo kwa mweshi wa Kananka na ku wa Kitema ku kipwa kyoso. Bena Isaleele abadi abashala biiya pabaadi apabanga kunoka mpeshi pangi mu mweshi w’ Ekumi. Satana badi mudimbe bena Isaleele bwa kukumiina’shi, abadi na kya kulonda bipikwa bya ba mpangano bebefunyishe bwabadya kwikala biiya. Baba abadi bebefunyishe abadi abakumiina’shi bibadi abitungu kukita bingi bipikwa bya lulangwilo lwa b’efile baabo bwa’shi banokyeshe mpeshi. Baba abadi bakutwe lukumiino mwi Yehowa abadi bakumiine’shi, uno ubadi penda mushindo umune wa kutshibisha munanga, nyi abo nkubanga kukita bipikwa bya ba mpangano pa kulangwila Baale efile a madimi.

8. Mayele kinyi a kabidi abadi afubishe Satana? Patuula.

⁸ Satana badi mufubishe mayele a kabidi kwi bena Isaleele. Baadi mufube na malaka a kukita myanda i butete. Bisamba bya ba mpangano bibadi abilangwila b’efile baabo pa kwipaana mu kukita myanda i butete. Mu lulangwilo lwi butete mubadi mpa na kutambuka kwa lusandji mu ntempelo. Tababadi penda batadiile kutambuka kwa balume na balume, bakashi na bakashi na ingi mishindo ya mwikelo wi butete nya, anka abadi dingi abebimono bu bilombane! (Miy. 23:17, 18; 1 Baf. 14:24) Ba mpangano abadi abakumiina’shi bino bipikwa bibadi abitakula b’efile baabo bwabadya kwikasha nsenga bufukye bwibungi. Bena Isaleele bebungi abalondele bipikwa bya ba mpangano bya kutambuka lusandji na abo nkusangula bwa kulangwila b’efile ba madimi. Abadi bakwatshibwe binyibinyi ku bupika bwa Satana.

9. Mu kwipushena na Osea 2:16, 17, mbikunyi bibaadi Satana mubulakashe mweneno a bena Isaleele pabitale Yehowa?

⁹ Satana baadi mufube na mayele a kasatu. Baadi mubulakashe mweneno a bena Isaleele pabitale Yehowa. Mu mafuku a mutemuki Yeelemiya, Yehowa bakwile’shi batemuki ba madimi abaadi batakule mwilo Waye bwa kuluba eshina Dyaye “mwanda wa Baale.” (Yel. 23:27) Abimweneka’shi, mwilo w’Efile Mukulu ubalekyele kufubisha eshina dya Yehowa, na ubaadi widipyanyishe n’eshina dya Baale, adipatuula “Sha bintu” sunga “Nfumu.” Bino bibaadi bibulakashe bena Isaleele bwa kutundula kwilekena kwi pankatshi pa Yehowa na Baale, abo nkusanga bipikwa bya mu lulangwilo lwa Baale na lulangwilo lwa Yehowa.—Badika Osea 2:16, 17.

10. Satana kwete kufuba na mayele kinyi lelo uno?

¹⁰ Satana kwete kufubisha aa mayele amune lelo uno. Kwete kukwata bantu ku bupika pa kwibakuminyisha’shi kutambuka lusandji kwibuwa, na kwibalubisha mweneno a Yehowa. Tubandeyi kutaluula ano mayele a nfudiilo.

11. Satana baadi mubulakashe mweneno a bantu pabitale Yehowa naminyi?

¹¹ Satana kwete kubulakasha mweneno a bantu  pabitale Yehowa. Kunyima kwa lufu lwa balongi ba Yesu, bantu abaadi abeamba bu bena Kidishitu ababangile kulongyesha myanda ya madimi. (Bik. 20:29, 30; 2 Tes. 2:3) Bano bantu basumbule lukumiino, ababangile kubulakasha mweneno a bantu pabitale Efile Mukulu a binyibinyi. Bu kileshesho, abalekyele kufubisha eshina dy’Efile Mukulu mu ma Bible aabo, na kwidipyanyisha na mwasu wa bu “Mwanana” sunga ingi myasu. Pa kukatusha eshina dy’Efile Mukulu na kwidipyanyisha na mwasu wa bu “Mwanana,” bibekele bukopo bwa muntu abadika Bible kumona kwilekena kwi pankatshi pa Yehowa na bangi ba “mwanana” babadi batemune mu Bifundwe. (1 Kod. 8:5) Abaadi bafubishe uno mwasu umune wa bu “Mwanana” kwi Yehowa na kwi Yesu, na byabya bibelele bukopo bwa kushinguula’shi Yehowa na Mwan’aye mbantu babidi be na midimo ilekene. (Yo. 17:3) Kano kabulakanyi nkatakule bantu mu kukwatshishena dilongyesha dya busatu bwiselele bushii mu Eyi dy’ Efile Mukulu. Pa mwanda wa byabya, bantu bebungi bakwete kumona’shi bi bukopo bwa kuuka Efile Mukulu. Aku namu mmadimi akata!—Bik. 17:27.

12. Muyile byabadi baleshe mu Beena-Looma 1:28-31, lulangwilo lwa madimi ndukwatshishene mwikelo kinyi na mbipeta kinyi bitukye?

¹² Satana kwete kufuba na malaka a kukita myanda i butete. Mu mafuku a Isaleele a kala, Satana baadi mufubishe lulangwilo lwa madimi bwa kukwatshishena myanda i butete. Lelo uno, kwete kukita nka byabya. Mu lulangwilo lwa madimi bakwete kutadiila na kukwatshishena mwikelo wi butete. Bantu bebungi bakwete kwiamba’shi mbafubi b’Efile Mukulu, tabakwete kukokyela miiya yaye itale mwikelo wibuwa. Mpoolo mutumibwa balesheshe bipeta abitukila ku wawa mwikelo mu mukanda ubaadi mutumine bena Looma. (Badika Beena-Looma 1:28-31.) Mu “myanda ishii mwishinda” mwi mishindo yoso ya myanda i butete, mpa na kutambuka kwa balume na balume sunga bakashi na bakashi. (Lom. 1:24-27, 32; Kibaf. 2:20) Bi na muulo ukata bwatudya kukookyela ku malongyesha a binyibinyi a mu Bible!

13. Satana kwete kufubisha angi mayele kinyi?

¹³ Satana afubaa na nkalo yetu ya ku mbidi. Twi bantadjikwe na lukalo lwa kulonga mudimo ulombene kwitukwasha bwa kulombasha  nkalo yetu na ya kifuko kyetu. (1 Tim. 5:8) Twi balombene kuuka wawa mudimo pa kutwela mu kalasa na kwikala balongi be na kishima. Anka abitungu twikale na budimu. Mu maumbo ebungi, bilongyelo bikwete kulongyesha balongi kushii penda mudimo nya, kadi bikwete kwibalongyesha dingi binangu bya bantu. Bu kileshesho, bakwete kunyingisha balongi bwa kupela kukumiina’shi Efile Mukulu e kwanka na kubepuula Bible. Abalungula balongi shi muntu ooso e na kinangu akumiina’shi bintu mbiitukile. (Lom. 1:21-23) Aa malongyesha ta e mu kwipushena na “binangu by’Efile Mukulu.”—1 Kod. 1:19-21; 3:18-20.

14. Binangu bya bantu bikwete kutakula bantu ku kinyi?

¹⁴ Binangu bya bantu abipele miiya ya Yehowa na kwiyitombokyela. T’abikwasha muntu bwa kwikala na kikuba kya kikudi ky’ Efile Mukulu nya, anka abitakula muntu ku “mifubo ya mbidi.” (Nga. 5:19-23) Abitakula bantu mu kwitatula na bino abibetakula bwabadya kwikala “bekumiine’bo banabene.” (2 Tim. 3:2-4, Kilombeno kipya 2014) Ino ngikashi ngikutwene na kikudi kya kwiyisha kyabatekye bafubi b’Efile Mukulu bwabadya kwikala nakyo. (2 Sam. 22:28) Bangi bena Kidishitu batwele ku bilongyelo bikata mbafikye mu kwikala na ngyelelo a binangu a pa nsenga kushii bu a Efile Mukulu. Tubande kutalula penda kileshesho kimune pabitale kilombene kukitshika su twaluba masaku a bilongyelo bikata.

15-16. Bolongo kinyi ku mwanda ubadi ufikile uno mukwetu mukashi?

¹⁵ Ungi mukwetu mukashi e mu mudimo wa nsaa yooso takudi bipwa 15 akula’shi: “Bu byandji Temwe mupwe kubatshishibwa, naadi mubadikye na kupusha myanda ibungi pabitale masaku a kwenda ku bilongyelo bikata, kadi ntshinaadi mwate kwakwa kudimusha na  muulo nya. Naadi nanangushena’shi aa malango ta ngantale nya.” Nkalakashi kinyi ibaadi mufumankane nayo? Akula’shi: “Kwilongyela mikanda ibungi kubadi akwata nsaa na bukome bwibungi mu kipaso kinakutshilwe na nsaa ya kuteka Yehowa bu binadi nakitshi kumpala, mwanda ntshinadi na muloo wa kwisambila myanda ya mu Bible na bangi na nadi nakooko mpa na bwa kwilumbuula kalolo bwa bisangilo. Bibadi mwanda wa muloo mwanda nadi mutundule’shi kwipaana mu bilongyelo bikata kubadi akulwisha kipwano kyande na Yehowa, naukanga’shi nekala na kya kuleka. Ami nkwimika.”

¹⁶ Kulonga tulasa tukata kubaadi na bukitshishi kinyi kwadi? Aluula’shi: “Nkwete kupusha mpa na bufu bwa kwakula’shi kulonga tulasa tukata kubaadi kuntakule mu kumona penda bilubilo bya bangi, bikishekishe bilubilo bya bakwetu balume na bakashi, na kukulupila’shi bakite bibungi kukila ngobesha yabo, na kukumiina kwitola pa bupenka bwande. Bibadi bingate mafuku e bungi bwa kuleka kunangushena mu uno mushindo. Uno mwanda ubandesheshe masaku e kwitufikila su twakutwa kulonda byabetudimusha kwi Nshetu e mwiyilu kubukwashi bwa ndumbulwilo aaye. Yehowa anguuku kalolo kunkila’mi nabeene. Naadya’nka kumupushiisha!”

17. (a) Abitungu twikale na kitshibilo kinyi? (b) Atukesambila kinyi mu mwisambo aulondo?

¹⁷ Ikala na kitshibilo kya kupela kukwatshibwa ku bupika bwa “madimi aatukila ku byuubishi bya bantu” ba mu ndumbulwilo a Satana. T’okumanga kutadiila Satana bwadya nkudimba. (1 Kod. 3:18; 2 Kod. 2:11) T’otadilanga Satana bwadya kubulakasha mmweneno oobe bwa Yehowa. Ikala na nshalelo mwipushene na miiya ya Yehowa. Akupu t’otadilanga Satana bwadya nkulubisha bwa kukutwa kukookyela miiya ya Yehowa. Kadi nkinyi kyodya kukita su otundula’shi, we mupwe kwikala na binangu bya uno ndumbulwilo? Mwisambo aulondo aukyebe kulesha kipaso kilombene kwitukwasha Eyi dy’Efile Mukulu bwa kuponesha nangunangu “ishimate ngofu” na biubishi byatudi nabyo.—2 Kod. 10:4, 5, NWT.