1. Atwe boso atukumiina’shi bena kifuko kyetu bakite kinyi?

UNGI mukwetu mukashi abetamina bu Pauline amba’shi: “Kasha nauka bya binyibinyi, nakumiina’shi tukatwele mu mpaladiiso na bena kifuko kyetu boso. * Naadi nakumiina’shi mulume ande Wayne na ka nsongwalume ketu bafubile Yehowa pamune naami.” Wena bena kifuko kyenu bashabandjile kwiuka na kufula Yehowa su? Nka bu Pauline, okumiina’shi bena kifuko kyenu bafubile Yehowa pamune nobe.

2. Nkonko kinyi yatukyebe kwisambila mu uno mwisambo?

² Tatwi balombene kukuminyisha bena kifuko netu mukandu wibuwa pa bukopo, anka twibalombene kwibakwasha bwabadya kufungula binangu na mashimba aabo ku mukandu wa mu Bible. (2 Tim. 3:14, 15) Bwakinyi abitungu tulambukishe bena kifuko kyetu? Bwakinyi abitungu twitule pa mbalo yabo? Nkinyi akitungu’shi tukite bwa kukwasha bena kifuko kyetu bwabadya kufula Yehowa bu’twe? Na bena Kakongye be kukita kinyi bwa kukwasha?

3. Muyile 2 Mpyeele 3:9, bwakinyi abitungu tulambukishe bena kifuko kyetu?

³ Binobino, Yehowa abutula uno ndubulwilo. Anka penda “booso . . . be na mashimba alombane bwa muuwa wa looso” nyi abakapashibwa. (Bik. 13:48, NWT) Bu byatukwete kukisha nsaa i bungi na kutusha bukome bwetu bwa kulambukisha bangi bantu,  atukumiinaa namu kulambukisha bena kifuko kyetu bwabadya kufubila Yehowa pamune netu. Nshetu sha kifulo Yehowa, “takumiina’shi kushimine muntu su ngumune, anka’shi boso bafikye mu kwilanga.”—Badika 2 Mpyeele 3:9.

4. Nkilema kinyi byatudi balombene kukita nsaa y’atulambukisha bena kifuko netu?

⁴ Abitungu tuukye’shi kwi mushindo wi buwa na wi bubi wa kulungula mukandu wa kipadjilo. Bu kileshesho, twi balombene kwisamba na ungi muntu kushi kumutapa kwishimba, kadi twi kwisamba na mwina kifuko kyetu mu kipaso akimutapa kwishimba.

5. Nkinyi akitungu’shi tutetenkyeshe kumpala kwa kwisamba pa bitale bya binyibinyi na bena kifuko betu?

⁵ Su twatentekyesha kipaso kibatudi balambukishe bena kifuko kyetu bwa mususa wa kumpala, bebungi ba kwatudi be kwitopeka na kukumiina’shi su bapeta dingi mushindo wa kwibalambukisha, be kwibikita mu mushindo wibuwa. Mpoolo mutumibwa baadi mupe bena Kidishitu dino elango: “Eyi dyenu diikale misusa yooso . . . ditobiibwe mungwa, byanudya kuwuuka bipwandjikiile kwaluula muntu oso.” (Kol. 4:5, 6, Esambi dipya 2015) Bibuwa tutentekyeshe dino elango nsaa yatwisamba na bena kifuko kyetu. Bisumanga, twikwibatapa ku mashimba pamutwe pa kwibakwasha.

6-7. Tusha kileshesho akilesha bwakinyi abitungu kwituula pa mbalo ya mwina dibaka nobe shii Temwe a Yehowa.

⁶ Etuule pa mbalo yabo. Pauline atwisambilanga kumbagilo amba’shi: “Kumpala, nadi nakumina kwisamba na mulume ande penda pabitale Yehowa na Bible. Tatubaadi atukamba kwisamba ‘ingi myanda’ nya.” Wayne,mulume a Pauline tabaadi auku myanda ibungi pabitale Bible nya, nyi bwakinyi tabaadi akamba  kupusha kibaadi akyakula Pauline. Bwaye, bibadi abimweka’shi kyoso kii na muulo kwi Pauline nyi mpenda myanda ya mu kipwilo kyaye. Baadi amono’shi mukashi aye e mu kipwilo ki bubi, na shi kwete kumudimba.

⁷ Pauline amba’shi munda mwa mafuku ebungi, baadi akisha nsaa yaye ibungi ku kyolwa na ku nfudiilo kwa mbingo nka na bakwabo bena Kidishitu, ku bisangilo, mu bulungudi na mu kukisha kapapi. Amba dingi’shi: “Ingi misusa pabadi Wayne aluka ku nshimbo, tabaadi asangana muntu nya, baadi epusha bu e bupenka.” Kushi mpaka, Wayne baadi akumiina kwikala na mukashi aye na mwana aye. Tabaadi auku bantu babaadi akisha nabo nsaa nya, na baadi amono’shi ba kuuku na ba lole ba mukashi aye, abaadi na muulo kumukila. Wayne babangile kukimba bya kutshiba dibaka na Pauline. Bomono bwakinyi abitunganga’shi Pauline etule pa mbalo ya bangi?

8. Muyile 1 Mpyeele 3:1, 2, nkinyi kilombene kutakula mwina kifuko kyetu bwa kukumiina mukandu wa mu Bible?

⁸ Ikala na mwikelo wibuwa. Misusa ibungi, mwina kifuko netu alaminaa byatukitshi pe byatwakula. (Badika 1 Mpyeele 3:1, 2.) Pauline baadi mutundule byanka. Nyi bwakinyi amba’shi: “Naukanga’shi Wayne mwitufule na takumiina’shi tutshibe dibaka nya. Anka, pabaadi mukyebe kutshiba dibaka, natundwile’shi abitungu ntumikile abyamba Yehowa pabitale dibaka. Pamutwe pa kwakula myanda ibungi, bibaadi abintungu kwikala kileshesho ki buwa mu bikitshino byande.” Pauline balekyele kwisamba na Wayne pabukopo myanda ya mu Bible, aye nkubanga kwisamba naye ingi myanda. Wayne badi mumone’shi mukashi aye banyisha kwikala muntu a butaale, na’shi mwana aye banyisha kwikala na kanemo na kukokyela ngofu. (Nki. 31:18, 27, 28) Nsaa ibamwene Wayne bukitshishi  bwibuwa bubaadi nabo mukandu wa mu Bible mu kifuko kyaye, bafungwile eshimba dyaye bwa kukumiina mukandu wa Mwiyi dy’Efile Mukulu.—1 Kod. 7:12-14, 16.

9. Bwakinyi abitungu tutungunukye na kukwasha bena kifuko kyetu?

⁹ Tungunuka na kukwasha bena kifuko nobe. Yehowa mwitulekyele kileshesho kibuwa. ‘Kushi kukooka,’ kwete kupa bantu boso mushindo wa kukumiina mukandu wibuwa bwa kupeta muwa. (Yel. 44:4) Mpoolo mutumibwa balungwile Timote bwadya kutungunuka na kukwasha bangi. Bwakinyi? Mwanda pa kukita byabya, epaasha aye nabene na bantu abamutemesha. (1 Tim. 4:16) Twibafule bena kifuko kyetu, byabya atukumiina’shi bewukye bya binyibinyi bi mu Eyi dy’Efile Mukulu. Ngakwilo a Pauline na bikitshino byaye bibaadi na bukitshishi bwibuwa mu kifuko kyaye. Binobino e na muloo wa kufubila Yehowa pamune na mulume aye. Boso bwabo mba mbala-mashinda ba myeshi yoso, na Wayne kwete kufuba bu mukulu mu kakongye.

10. Bwakinyi abitungu twikale na lwishinko?

¹⁰ Ikala na lwishinko. Nsaa yatwata kitshibilo kya kufubila Yehowa, atushintuula nshalelo na nkumiino yetu. Byabya bi kwikeela bena kifuko kyetu bukopo bwa kukumiina kwakwa kushintuluka. Kya kumpala, abamono’shi tatuky’atwisanga dingi nabo mu misangeelo ya bipwilo sunga kutwelakana mu myanda ya politike. Bangi bena kifuko netu mbalombene kwitufitshila munda. (Mat. 10:35, 36) Anka tatupwandjikishanga’shi tabe kushintuuluka. Su twapela kwibakwasha bwabadya kupusha nkumiino yetu, binka bu’shi atwibatshibila kiimu’shi tabe bya kupeta muwa wa ikalayika. Yehowa tamwitupe mudimo wa kutshibila bangi kiimu nya, mmwiupe Yesu. (Yo. 5:22) Su twekala na lwishinko, nfudilo a byoso bena kifuko kyetu mbalombene kukumiina mukandu wetu.—Tala kashibo akamba’shi: “Fubisha site etu bwa kulongyesha.”

11-13. Kileshesho kya Alice kibakulongyesha kinyi pabitale mushindo wadi mukitshine baledi baye myanda?

¹¹ Kita myanda n’eshimba dimune kadi na mayele. (Nki. 15:2) Tutaluleyi kileshesho kya Alice. Baadi mulongye pabitale Yehowa pabaadi mushale mbalo i kula na baledi baye, bashibaadi abakumiina mwi Efile Mukulu na abaadi bepaane ngofu mu myanda ya politike. Bamwene’shi, abitungu ebalungule myanda ibaadi alongo kushi kunyengakana. Alice amba’shi: “Su otengyela mafuku ebungi bwa kulungula kifuko kyobe pabitale lukumiino lobe lupya na byokitshi, abibakalakasha ngofu.” Baadi mukimbe mitwe ya myanda ibaadi ilombene kukaka binangu bya baledi baye, bu kifulo. Nyi aye nkwibafundjila mukanda aulesha akyamba Bible pabitale kifulo na kwibepusha mweneno abo. (1 Kod. 13:1-13) Baadi mutumbule baledi baye bwa byabadi bamukushe na kumupasukila, na baadi ebatumina bintu. Pabaadi aluka mu congé mukutala baledi baye, Alice baadi akitshi mwaye moso bwa kukwasha nyinaye na midimo ya mu nshibo. Kumpala, baledi ba Alice tababadi basankye bwa bibaadi mwibalungule pabitale nkumiino yaye ipya.

¹² Pabaadi Alice mwalukye ku nshibo bwa kushala na baledi baye, batungunukile na kwibadikila Bible efuku dyoso. Alice amba’shi: “Bino bibakwashishe mama bwa kumona bibaadi Bible na muulo kwandi.” Paapa, nshaye na Alice batshile kitshibilo kya kulonga Bible, bwa kuuka kibaadi kishintuule binangu bya mwan’aye, na bwa kupeta myanda yadi mulombene kutopeka nayo Bible. Alice amb’shi: “Namupele Bible munaadi mufunde tu ma note.” Nkinyi kibakitshikile? Nshaye na Alice tamupete kintu su nkimu kya kutopeka eyi dy’Efile Mukulu nya, anka bibaadi abadika bibaadi bimukume kwishimba bikata.

¹³ Abitungu twikale n’eshimba dimune kadi na mayele, sunga twanyingiila nkalakashi. (1 Kod. 4:12b) Bu kileshesho, Alice baadi  munyigiile bulwishi bwa nyinaye. Amba’shi: “Kunyima kwami kubatshibwa, mama baadi angitamina bu ‘mwana ebubi.’” Alice bakitshine kinyi? Amba dingi’shi: “Ntshinaadi mulekye kwisamba pabitale nkumiino yande ipya nya, anka na mayele oso, naadi nebapushisha’shi nta shintuula kithibilo kyande kya kwikala bu Temwe a Yehowa nya. Panadi mushinkamiishe mama’shi ne mumufule ngofu, mpolo ya muloo nkwitunoka, n’ami nkumuteekyela kidiibwa kibuwa. Kubanga nka paapa, mama babangile kumona’shi Bible mmungikashe mwana ebuwa.”

14. Bwakinyi tabitungu tulekye kifuko kyetu kishintuule kitshibilo kyetu kya kufubila Yehowa?

¹⁴ Mbilombene kwata mafuku ebungi bwa’shi bena kifuko netu bapushe kalolo bwakinyi kufubila Yehowa kwi na muulo ukata kwatudi. Bu kileshesho, pabaadi Alice mwate kitshibilo kya kwikala bu mbala-mashinda pe kutunguka na kilongyelo kikata bu bibaadi abikyebe baledi baye, nyinaye baadi dingi mudile. Kadi Alice, tabaadi mubofule nya. Amba’shi: “Su otaadiila’shi bena kifuko kyobe bashintuule kitshibilo kyobe mu mwanda umune, abakashintuula dingi mu ingi myanda. Anka, su wekala na bukalanga kadi n’eshimba dimune, bangi bena kifuko kyenu mbalombene nkupushisha.” Bino nyi bibaadi bikitshikile Alice. Binobino, baledi baye boso babidi, tabadi ba mbala-mashinda ba myeshi yoso, na nshaye taadi mukulu mu kakongye.

15. Muyile Mateo 5:14-16 na 1 Mpyeele 2:12, ‘bikitshino bibuwa’ bya bangi mbilombene kukwasha bena kifuko kyetu naminyi?

¹⁵ Yehowa kwete kukaka bantu ku bukwashi bwa ‘bikitshino bibuwa’ bya bena kakongye ka bena Kidishitu. (Badika Mateo 5:14-16;  1 Mpyeele 2:12.) Su mwina dibaka nobe ta Temwe a Yehowa, kwete kwimonena na bena kakongye kenu su? Pauline atutemunanga kumbangilo, baadi etamina bakwabo ba mu kakongye kabo, bwashi mulume aaye Wayne eukene nabo. Wayne atentekyesha bibaadi ungi mukwetu mumukwashe bwadya kwiuka ba Temwe kalolo. Amba’shi: “Batshile congé ku mudimo bwa’shi afikye tutale ndundo ku nshibo kwande. Bino bibaadi binkwashe bwa kumona’shi, ‘uno mukwetu tabaadi ampasukila penda mwanda wa kipwilo nya!’”

16. Bwakinyi abitungu twitamine bena kifuko netu ku bisangilo?

¹⁶ Mushindo wibuwa watudi balombene kukwasha bena kifuko netu, nkwibetamina mu bisangilo bya kakongye. (1 Kod. 14:24, 25) Bisangilo bya kumpala bibaadi Wayne mutwele, nyi Kitentekyesho kya lufu lwa Yesu, mwanda kibaadi kunyima kwa mudimo na kibaadi bwa kapindji kapeela. Amba’shi: “Ntshinadi mupushe mwisambo kalolo nya. Kadi kibaadi kinkanyishe nyi mwikelo wa bantu. Abafikile kwandi, abo nkungela moyo ku maboko na muloo. Ne kwamba’shi moyo ushi wa bu nsesa.” Bangi ba mulume na mukashi abaadi biya na Pauline, abaadi abamukwasha na mwanaye mu bisangilo na mu bulungudi. Byabya, nsaa ibaadi Wayne mwate kitshibilo kya kwiuka bibungi pabitale nkumiino ya Pauline, batekyele mulume bwadya kulonga naye Bible.

17. Tatwi balombene kwitopeka bwa myanda kinyi, na bwakinyi t’abitungu tunangushene’shi bena kifuko netu tabe kushintuluka?

¹⁷ Atukulupila’shi bena kifuko netu boso bafubile Yehowa pamune netu. Anka, twi kukita mwetu moso bwa kwibakwasha bwa’shi bafikye bafubi b’Efile Mukulu, kadi bakutwa kwibikala, tabitungu twikale atwitopeka mwanda wa kitshibilo kyabo. Na dingi, tatukitshisha muntu su ngumune pa bukopo bwa kukumiina bya binyibinyi nya. Sunga mbyabya, apakumono bena kifuno nobe’shi we na muloo mwanda okwete kufubila Yehowa, mbilombene kwikala na bukitshishi bukata kwabadi. Teka bwabo. Esambe nabo na mayele. Tolekanga kwibakwasha! (Bik. 20:20) Ikala mushinkamishe’shi Yehowa akwelela myabi. Su bena kifuko kyenu bakuteemesha, abakapashiibwa!