LUKUMIINO alwitupaa bukome. Bu kileshesho, sunga’shi Satana akyebe kwitwipaa mu kikudi, lukumiino lwi na ngobesha ya “kushima kaalo ka mikyetwe ya mubi.” (Ef. 6:16) Su twina lukumiino, twibalombene kukambila lukalakashi lukilekile bukata. Yesu balungwile balongi baye’shi: “Su nubadia kwikala na lukumiino bu lutete lwa mutalande, nubadia kwamba uno mwengye’shi: ‘Tentuluka pano wende’kwa,’ na ubadia kutentuluka.” (Mat. 17:20) Bu bikale’shi lukumiino lwi na muulo bwa kunyingisha kipwano kyetu na Yehowa, abitungu tutaluule ino nkonko: Lukumiino nkinyi? Eshimba dyetu ndilombene kwikala na bukitshishi kinyi ku lukumiino lwetu? Twikunyingisha lukumiino lwetu naminyi? Na mwi nanyi mwatudya kwikala na lukumiino?—Lom. 4:3.

Lukumiino nta penda kukumiina a kyamba Bible nya, mwanda mpa na ‘ba demon abakumiina [shi Efile Mukulu ekwanka] dingi abasuusu na moo.’ (Shak. 2:19) Su mbyabya, lukumiino kinyi?

Bible alesha kwikala na lukumiino mu mishindo ibidi. Wa kumpala, “lukumiino nyi nkishinkamiisho kia bintu abikulupilwa.” (Eb. 11:1a, Kilombeeno Kipya 2014) Su we na lukumiino, wekala mushinkamishe’shi kyoso akyakula Yehowa nkya binyi na akikakumbana. Bu kileshesho, Yehowa balungwile bena Isalele’shi: “Su nwatshiba kilombeno kyandi mudye na kaanya mpa na bufuku mu kipaso kya’shi kaanya na bufuku byakutwa kufika mu nguba aabyo, mpa na kilombeno kyande na mufubi aande Daavide akitshibika namu.” (Yel. 33:20, 21) Tobopushishe moo wa’shi nguba mulombene kupela kutunduka na kukamina mwiyilu, bilombene kukita’shi bufuku na kanya bikutwe kutuuka? Su twe na mpaka pabitale miiya ayikunkusha nsenga bwayidya kwifunya ayo inabene na kwifunya nguba, we kwelesha mpaka pabitale kulombana kwa milayilo ya Mupangi a yaya miiya su? Nya!—Yesh. 55:10, 11; Mat. 5:18.

Wa kabidi, lukumiino nyi “kuleshiibwa kwa patooka biabia bishabimwekwa.” Abalesha’shi lukumiino nyi ‘kuleshiibwa kwa patooka,’ kwa bintu bish’abimweka ku meso kadi bikale bya binyibinyi. (Eb. 11:1b, Kilombeeno Kipya 2014) Mu kipaso kinyi? Banda kunangushena, su mwana mukinga akwipusha’shi nkinyi akikushinkamiisha’shi lupapi lwi kwanka?’ Sunga’shi tobandile kumona lupapi, we kukwasha mwana bwadya kunangushena ku bishinkamiisho abilesha’shi lupapi lwi kwanka—bu kupuwa, abikitshika nsaa ayipuku lupapi, na bingi bishinkamiisho. Su mwana bamono byabya bishinkamiisho, akumiina’shi lupapi lwi kwanka sunga’shi takwete kwilumona. Mu mushindo umune, lukumiino ndwimene pa bishinkamiisho bya binyibinyi.—Lom. 1:20.

Bu byabidi’shi lukumiino ndwimene pa bishinkamiisho, bwa’shi muntu apete lukumiino abitungu abande kupeta “kyuukilo kya biinyibiinyi.” (1 Tim. 2:4) Kadi ta nkupwe nya. Mpoolo bafundile’shi : “Mwishimba ngi mwabakuminyina.” (Lom. 10:10, Kilombeeno kipya  2014) Tabitungu penda kukumiina bya binyibinyi nya, kadi abitungu kwibyata na muulo. Paapa ngi palombene muntu kulesha lukumiino, kwamba’shi, kwikala na nshalelo mwipushene na bya binyibinyi. (Shak. 2:20) Muntu shii na lutumbu bwa bya binyibinyi e kupela kukumiina bishinkamiisho, mwanda takumiina kushintuula mwikelo waye na akumiina penda kulombasha malaka aaye a mbidi. (2 Mp. 3:3, 4; Yu. 18) Nyi bwakinyi, mu mafuku a kala, ta mbantu boso abadi bamone bilengyeleshi abaadi na lukumiino nya. (Mb. 14:11; Yo. 12:37) Kikudi ky’Efile Mukulu akipeya penda bantu bafule bya binyibinyi lukumiino.—Nga. 5:22; 2 Tes. 2:10, 11.

Mu baaba abaadi na lukumiino lunyingye mwi Nfumu Daavide. (Eb. 11:32, 33) Aku namu takubaadi muntu su ngumune a mu kifuko kya Daavide baadi na lukumiino lunyingye byabya nya. Kileshesho, ungi mususa Elyabe tutu a Daavide, baadi mukutwe lukumiino pabaadi musashile Daavide pabafikile mu kwipusha pabitale Golyate. (1 Sam. 17:26-28) Takwi muntu mutandikwe na lukumiino nya sunga mwilupyane kwi baledi baye, byabya Daavide nabene nyi baadi mu kipwano kibuwa n’Efile Mukulu.

Mu Misambo 27, Daavide alesha bibapetele lwalwa lukumiino. (Mu verse 1) Daavide baadi munangushene ku myanda ibaadi mufumankane nayo na mushindo ubaadi Yehowa mumukwashe kwi balwishi baye. (Mu verse 2, 3) Baadi muleshe lutumbu lukata bwa mpàngo ya Yehowa pabitale lulangwilo. (Mu verse 4) Baadi alangwila Efile Mukulu pamune na bakwabo bena kukumiina mu nshibo ya Yehowa. (Mu verse 6) Baadi mukimbe Yehowa n’eshimba dyoso mu luteko. (Mu verse 7, 8) Daavide baadi dingi akumiina’shi Efile Mukulu amulongyeshe mashinda aaye. (Mu verse 11) Dino eyikashi dibaadi na muulo ukata kwi Daavide mu kipaso kibaadi mwiyipushe’shi: “Nkunyi kunadya kwikala su naadi mukutwe lukumiino?”—Mu verse 13.

Su wambula binangu byabadi baleshe mu Misambo 27, okapete lukumiino nka bu Daavide. Su lukumiino lobe ndwimene pa kyukilo kya bya binyibinyi, nsaa yotungunuka na kulonga Bible na mikanda ya mpika, okekala na mushindo wa kutuusha kikuba kya kikudi ky’Efile Mukulu. (Mis. 1:2, 3) Ata nsaa ya kunangushena nsaa ywelongyela. Su atunangushena ku byatulongo, lutumbu lwetu bwa Yehowa alutama ngofu. (Eb. 10:23-25) Dingi, atulesha’shi twi na lukumiino nsaa yatutungunuka na “kuteka kushi kukôka.” (Luk. 18:1-8, EEM) Byabya, ‘teka kushi kukôka,’ mukulupile’shi Yehowa ‘kwete nkupasukila.’ (1 Tes. 5:17; 1 Mp. 5:7) Lukumiino alwitutakula ku bikitshino, na bikitshino namu abinyigisha lukumiino lwetu.—Shak. 2:22.

Mu bufuku bwa muladilo wa lufu lwaye, Yesu balungwile balongi baye’shi: “Kulupilayi mwi  Efile Mukulu, nukupile mpâ na mwandji’mi.” (Yo. 14:1, EEM) Byabya, abitungu tuleshe lukumiino penda mwi Yehowa na mwi Yesu. Mbikunyi byodya kulesha lukumiino mwi Yesu? Tutaluuleyi mishindo isatu.

Wa kumpala, mona mulambu wa nkuulo bu kya buntu kyabadi bakutumine kwi Efile Mukulu. Mpoolo mutumibwa bambile’shi: “Muuwa wandji nawo binobino mu mbidi yande, nee nawo bwa lukumiino lwande mwi Mwan’Efile Mukulu munfule, aye mwipaane bwa mwanda wande.” (Nga. 2:20) Pobodi mukumiine mwi Yesu, bokumiinyine’shi mmukutushile mulambu, bwa nkubwikiila milwisho yobe, na nkupa muwa wa loso, na bibaadi bikushinkamishe’shi Efile Mukulu mmukufule. (Lom. 8:32, 38, 39; Ef. 1:7) Byabya abikunyingisha bwa kupela kwitopeka na kwiyelela binangu bibubi.—2 Tes. 2:16, 17.

Wa kabidi, efubwile peepi na Yehowa mu luteko lwele ku bukwashi bwa mulambu wa Yesu. Ku bukwashi bwa mulambu, twi kuteka Yehowa “biatudia kutambula lusa na kupeta buuntu bwa kukwashiibwa pa kipindji kikumbane.” (Eb. 4:15, 16; 10:19-22, Kilombeeno kipya 2014) Luteko alunyingisha kitshibilo kyetu kya kukambila kitompwanga kya kukita mulwisho.—Luk. 22:40.

Wa kasatu, kokyela Yesu. Yowano mutumibwa bafundjile’shi: “Akumiina Mwana ee na muuwa wa iikalaika; apele kukumiina mwana, taapete muuwa, anka nsungu y’Efile Mukulu ayishaala paadi.” (Yo. 3:36, Kilombeeno kipya 2014) Yowano alesha kwilekena kwi pankatshi pa lukumiino na kukutwa kwa kukokyela. Byabya, bwa kwikala na lukumiino mwi Yesu, abitungu kumukokyela. Bwa kukokyela Yesu abitungu kutumikila “mwiya wa Kidishitu,” kwamba’shi, myanda yoso ibaadi mulongyeshe. (Nga. 6:2) Bwa kukokyela Yesu, abitungu dingi kulonda bukunkushi bwatuusha ku bukwashi bwa ‘Mpika a kishima na mupatulukye.’ (Mat. 24:45) Nsaa yokokyela Yesu, opete bukome bwa kukambila nkalakashi ikile bukopo.—Luk. 6:47, 48.

Ungi muntu balungwile Yesu’shi: “Naakumiina! Fika onkwashe mu lukumiino lwande lulobele!” (Mak. 9:24) Uno muntu baadi na lukumiino lupeela, kadi batundwile na kwiyisha koso’shi abitungu atamishe lukumiino lwaye. Nka bu uno muntu, ingi nsaa atwe namu atufumankanaa na myanda ayitungu’shi tutamishe lukumiino lwetu. Na atwe boso twi balombene kutamisha lukumiino lwetu binobino. Nka bu byatumonanga kunundu, atunyingisha lukumiino lwetu nsaa yatulongo Eyi dy’Efile Mukulu na kwidinangushena, na byabya abitamisha lutumbu lwetu bwa Yehowa. Lukumiino lwetu alutama nsaa—yatwibungu na bakwetu bena Kidishitu—yatulangwila Yehowa, yatulungula mukandu wibuwa, na yatutungunuka na kuteka. Dingi, nsaa yatutamisha lukumiino lwetu, atupete efuto dikile bukata. Eyi dy’Efile Mukulu aditutekye’shi: ‘Anka’nwe, bafudiibwe kifulo, enyingisheyi anwe banabeene pa lukumiino lwenu lwi selele . . . elameeyi mu kifulo ki’Efile Mukulu.’—Yu. 20, 21.