INGI NSAA okumiinaa kukita mudimo kampanda mu kakongye, kadi tokwete kwiupeta nya? Pangi nyi mudimo wabadi nao kwi ungi mukwetu. Pangi nyi mudimo ubodi nao kala. Anka pa mwanda wa bununu, maladi, kukutwa kwekuta, sunga mashito a kifuko kyobe, tabikupa dingi mushindo wa kwiukita nya. Pangi abakutekye bwa kuleka kukita wawa mudimo mwanda wa kushintuluka kwa myanda mu ndumbulwilo. Pa mwanda wa tuno tubingilo, wekumona’shi tokwete kukita byokumiina kukita mu mufubo wa Yehowa. Pa mwanda wa byabya, we mulombene kutshoboloka. Su mbyabya, nkinyi kilombene nkukwasha bwa kupela kubofula kwishimba, kwinyongola sunga kwikala na nsungu? Mbikunyi byodi mulombene kulama muloo obe?

Kileshesho kya Yowano nkilombene kwitukwasha bwa kulama muloo wetu. Yowano baadi na mashito akata, anka pangi bibadi bikitshikye mu mudimo waye wa Yehowa, ta ndjo bibaadi apwandikisha nya. Tabaadi pangi apwandikisha’shi e kukisha mafuku ebungi mu lukano kukila abaadi mukishe mu mudimo waye wa bulundi. Sunga mbyabya, Yowano batungunukile na kwikala na muloo, na baadi mulame yawa mweneno mu muwa waye. Kinyi kibaadi kimukwashe? Na mbikunyi byatudya kulama muloo wetu nsaa yatupete nkalakashi?

Mu kipungo kya prentemps a mu kipwa kya 29 B.B., Yowano babangile mudimo ubabamupele kwi Yehowa, wa kulumbuula kufika kwa Mesiya. Baadi amba’shi: “Elangyeyi, mwanda bufumu bwa mwiulu bubesesela peepi.” (Mat. 3:2, Kilombeeno kipya 2014; Luk. 1:12-17) Bantu bebungi abelangile. Bantu abafikile ku ma mbalo e kula bwa kutemesha mukandu waye, bebungi abelangile na abo nkubatshishibwa. Yowano baadi dingi mudimushe bakata ba bipwilo n’eshimba dimune pabitale kiimu kikwete kwibatengyela su bapela kwilanga ku mashimba. (Mat. 3:5-12) Bamwene’shi mudimo waye ubafiki ku nfudiilo mu 29 B.B. pabaadi mubatshishe Yesu. Kubanga nka paapa, Yowano balungwile bantu bwabadya kulonda Yesu, Mesiya ababadi balee.—Yo. 1:32-37.

Yesu bakwile bwa mudimo wi pabwao ubaadi nao Yowano ’shi: “Munkatshi mwa booso batandwe kwi bakashi, tankutuukye mukile  Yowano.” (Mat. 11:11) Kushi mpaka, Yowano baadi musankye bwa myabi ibaadi mupete. Nka bu Yowano, lelo uno bebungi ba kwatudi mbapete myabi ibungi. Tutaluuleyi kileshesho kya mukwetu Terry. Aye na mukashi aye Sandra abaadi bakishe bipwa bikile pa 50 mu mudimo wa nsaa yoso. Terry amba’shi: “Nemupete myabi ikile bungi. Nemufube bu mbala-mashinda a myeshi yoso, bu mwina Betele, bu mbala-mashinda a nsaa yoso, bu mukunkushi a kifunda, bu mukunkushi a distrike, na binobino nkwete kufuba dingi bu mbala-mashinda a nsaa yoso.” Kupeta mashito a mu ndumbulwilo akutuusha muloo, kadi nka bu byatukyebe kwibimona mu kileshesho kya Yowano, bwa kulama wawa muloo abitungu kwitatshisha nsaa ayishintuluka nshalelo etu.

Kibadi kikwashe Yowano bwa kulama muloo waye nyi kwikala na lutumbu bwa mashito abaadi nao. Tutaluuleyi kileshesho. Kunyima kwa kubatshisha Yesu, mudimo wa Yowano ubabangile kwenda na kupeela, wa Yesu nkwenda na kukamiina. Balongi ba Yowano abaadi bakalakashwe, abo nkumulungula’shi: “Ngyawa [Yesu] kwete kubatshisha, na bantu boso bakwete kwenda kwadi.” (Yo. 3:26) Yowano nkwibaluula’shi: “Yawa sha mukashi nyi mulume; anka kuuku a mulume, apetekyelwa na amuteemesha, asepeela na muloo mwanda w’eyi dia mulume; biabia uno muloo wikale wande’mi, ubakuumbana.” (Yo. 3:29, Kilembeeno kipya 2014) Yowano tabaadi mwipikene na Yesu nya, dingi tabaadi munangushene’shi mudimo waye taukii dingi na muulo mwanda mudimo wa Yesu nyi ubakidi waye nya. Kadi Yowano bashele nka na muloo mwanda baadi aata mudimo waye wa bu “kuuku a mulume” na muulo.

Binangu bibuwa bya Yowano, bibaadi bimukwashe bwa kwikala nka na muloo sunga mbibadi na mudimo wi bukopo. Bu kileshesho, Yowano baadi munazi kubanga ku bukinga bwaye, na abaadi bamukandikye kutoma malwa. (Luk. 1:15) Yesu bakwile pabitale nshalelo mupelepele baadi naye Yowano’shi: “Yowano baadi mufikye kushii kudya sunga kutoma.” Kadi, Yesu na balongi baye tababadi bebakandikye kintu nya, abaadi na nshalelo nka bi a bantu boso. (Mat. 11:18, 19) Dingi, sunga Yowano tabaadi mukite bilengyeleshi, baadi auku’shi balongi ba Yesu mpa na bangi abaadi bu balongi baye, abapetele bukome bwa kukita bilengyeleshi. (Mat. 10:1; Yo. 10:41) Pamutwe pa kutuula binangu ku wawa mwanda, Yowano baadi mulamate ku mudimo ubabadi bamupe kwi Yehowa.

Su atwe namu twatula binangu byetu ku mudimo wa Yehowa, atulama muloo wetu. Terry atwisambilanga kunundu akula’shi: “Nadi natulu binangu byande ku mudimo oso ubabadi abampa.” Panangushena ku mudimo waye wa nsaa yoso, amba’shi: “Ntshina kenyongoshi su nkapela, kadi natentekyesha myanda ibuwa.”

Twibalombene kutamisha muloo wetu ku mudimo wa Yehowa patunangushena byoso byatudi bakite mu mudimo waye. Nyi nkinemo kikata kya ‘kufuba pamune n’Efile Mukulu.’ (1 Kod. 3:9) Anka abimwenekaa kintu kya muulo buwa su atwikilumbuula nsaa yoso, mu mushindo umune, atwikala na muloo su atutungunuka na kunangushena pabitale kinemo kya kufuba pamune na Yehowa. T’atupwandjikishanga byatukitshi na abikitshi bangi nya. Tatumonanga mudimo wetu bu ushadile kwi wa bangi.—Nga. 6:4.

Yowano baadi paangi auku’shi mudimo waye aukemana, anka, tabaadi auku’shi wi nkapwa mu kipaso ki bubi nya. (Yo. 3:30) Mu kipwa kya 30 B.B., myeshi isamombo kunyima kw’aye kubatshisha Yesu, Yowano abaadi bamwele mu lukano kwi Nfumu Erode. Kadi, Yowano batungunukile nka na kutusha bu kamonyi. (Mak. 6:17-20) Nkiyi kibaadi kimukwashe bwa kulama muloo sunga bibaadi nshalelo aye mushintulukye? Baadi mutule binangu byaye ku myanda ya mu kikudi.

Pabaadi mulukano, Yowano baadi apete mikandu pabitale kutama kwa mudimo wa Yesu. (Mat. 11:2; Luk. 7:18) Yowano baadi mushinkamishe’shi Yesu baadi Mesiya, anka baadi pangi eyipusha kipaso kibaadi Mesiya na kya kukumbasha milayilo yoso i mu bifundwe, ayisambila abikakitshi Mesiya. Bu bikale’shi Mesiya  akekala Nfumu, bikwikala’shi Yesu abanga kumunana binobino su? Antushisha mulukano binobino? Bwa kupusha kalolo akikitshi Yesu, Yowano batumine balongi baye babidi bwabadya kwipusha Yesu’shi: “Nnoobe winyi aatutengyelanga’nyi, twi naa kyakutengyela mungi?” (Luk. 7:19) Pababalukile, Yowano baadi atemesha kalolo bibabaadi abakula pabitale bilengyeleshi bya Yesu, na bibebatumine bwabadya kumulungula’shi: “Ba mpofu abamono, bishetshi abitambuka, basha kifwi abapaashiibwa, basha kitwi abapusha, bafwe abasanguka, mukandu wibuwa abeewukisha balanda.”—Luk. 7:20-22.

Mukandu ubafikile nao balongi ba Yowano ubaadi umunyingishe ngofu. Bibaadi bimushinkamishe’shi Yesu kwete kulombasha matemuki aakwila Mesiya. Sunga byekala’shi Yesu tabaadi mufungushe Yowano mu lukano, Yowano baadi auku’shi mudimo waye ntangwa bisumanga. Sunga mbibaadi mu nshalelo e bukopo, baadi na kabingilo ka kwikala na muloo.

Nka bu Yowano, su twatula binangu byetu ku mudimo wa Yehowa, atwikala na ngobesha ya ku nyingiila na muloo na lwishinko. (Kol. 1:9-11) Twibalombene kunyingiila pa kubadika Bible na kunangushena ku byatubadika, bino abitukwasha bwa kutentekyesha’shi mudimo wetu bwa Yehowa tangwa bisumanga. (1 Kod. 15:58) Sandra amba’shi: “Kubadika shapitre umune a mu Bible, nkunkwashe bwa kwifubwila peepi na Yehowa. Mbikwashe bwa kukulupila kwi Yehowa kushi kwikulupila.” Twibalombene kutula dingi binangu byetu ku rapore ya mudimo wetu wa Bufumu, byabya abitukwasha bwa kunangushena ku myanda ikwete kulombasha Yehowa. Sandra amba dingi’shi: “Kutala Televizion a JW^® nkwitukwashe bwa kwipusha peepi na ndumbulwilo na mbitukwashe bwa kulama muloo mu mudimo wetu.”

Mu mafuku apeela abaadi Yowano mukite mudimo wa bulungudi, balungwile na “kikudi na bukome bya Eliya,” dingi nka bu Eliya baadi “muntu nka bu’twe.” (Luk. 1:17; Shak. 5:17) Su twambula kileshesho kyaye kya kwikala na lutumbu na kutuula binangu byetu ku myanda ya mu kikudi, twi kulama muloo mu mudimo wetu wa Bufumu sunga twekala na myanda kinyi.