1-2. Bwakinyi na mushindo kinyi witupe Yehowa kipaso kya kutwela mu kifuko kyaaye?

YEHOWA mwitwitamine bwa kwikala mu kifuko kya balangwidi baaye. Nyi ndwitamino lukile buwa! Mu kino kifuko mwi bantu belambule kwi Efile Mukulu be na lukumiino mu mulambu wa nkuulo wa Mwan’aye. Twi kifuko ki na muloo. Twi na nshalelo ebuwa binobino, na twi na muloo mwanda twibakulupile’shi atukekala na muwa wa looso byabikala mwiyilu, sunga mu Mpaladiiso pa nsenga.

² Yehowa bakitshine bya’shi twikale mu kifuko kyaye mwanda wa kifulo kyadi mwitufule ngofu. Anka bwa kwibikita badi mutushe kintu kikile bukata. (Yo. 3:16) Mbetuwule ku “muulo wi bukopo.” (1 Kod. 6:20) Ku bukwashi bwa nkuulo, Yehowa mwitupe mushindo wa kwikala mu kipwano kibuwa naaye. Twi na kineemo kya kwitamina Muntu mukile bantu boso mwiyilu na pa nsenga bu Nshetu. Na, anka byatwikele balongye mu mwisambo ushaale, Yehowa nyi Nshe-bana ebuwa.

3. Pantunangushena ku byoso bitukitshine Yehowa, nkonko kinyi yatudi balombeene kwiyipusha? (Tala dingi kashibo akamba’shi: “ Yehowa anguuku su?”)

³ Anka bu bibadi byambe ungi mufundji a Bible, twi kwipusha’shi: “A kinyi kyankâlwisha Yehowa ku byabya byoso bi buwa byadi munkitshîne?” (Mis. 116:12, EEM) Lwalulo lwi’shi tatwi balombene kwalwisha Nshetu e mwiyilu kintu. Anka, kifulo kyadi mwitufule akitutakula mu kumufula namu. Mpoolo mutumibwa bafundjile’shi: “Atwe twi nee kifulo, mwanda  aye ngi baabadidiile kwitufula.” (1 Yo. 4:19) Mmu mishindo kinyi mwatudya kulesha Nshetu e mwiyilu’shi twi bamufule?

4. Muyiile Shake 4:8, bwakinyi abitungu twitatshishe bwa kudya bu kuuku na Yehowa?

⁴ Yehowa akumiina’shi twifubwile pepi naaye na kwisamba naaye. (Badika Shake 4:8.) Etunyingisha bwatudya ‘kuteka na mufwaka,’ na aye etuteemeshaa. (Lom. 12:12) T’akutwaa nsaa sunga kukooka mu mushindo wa’shi mukumbene kwituteemesha nya. Atumupushaa nsaa y’atubadika Eyi dyaaye Bible, mpa na mikanda ayitukwasha bwa kumupusha. Atumuteemesha nsaa y’atulondesha bisangilo bya bena Kidishitu kalolo. Anka abifubwilaa bana peepi na baledi baabo nsaa yabesamba, kwisamba nsaa yoso na Yehowa akwitukwasha bwatudya kwikala peepi naaye.

5. Mushindo kinyi watudya kulongamisha nteko yetu?

⁵ Banda kunangushena ku abikalaa nteko yobe kwi Efile Mukulu. Yehowa akumiina’shi tumulungule byoso bi mu binangu na mu mashimba etu mu luteko. (Mis. 62:10) Abitungu twiyipushe bino: ‘Nteko yande ayipushikaa bu ya kinundunundu, bu myanda yandji mutentule kwisaki, su ayipushika bu mukanda wandji mufunde n’eshimba dyande dyoso? Kushi mpaka we mufule Yehowa ngofu, na okumiina kulama kipwano kyobe naye. Bwa kwibikita abitungu’shi wekale wesamba naaye nsaa yoso. Mulungule myanda yodi nayo. Mulungule akikupa muloo na akikwinyongosha. Shinkamisha’shi kyoso kyodya kumuteka akupa kyanka.

6. Abitungu’shi tukite kinyi bwa kwikala pepi na Nshetu e mwiyilu?

⁶ Bwa kushaala pepi na Nshetu e mwiyilu, abitungu twikale na lutumbu kwadi. Atushinkamisha mayi a mufundji a misambo bafundjile’shi: “Mbyabidi bukata bino, Yehowa Efile Mukulu ande, mpàngo na bipaso byoodi mukite pa mwanda wetu! Twe na lùkàsa-noobe. Naakyebe kwibyuukisha, anka mbikile bungi, tabii kubadikwa.” (Mis. 40:6) T’atwimena penda pa kwakula’shi twi na lutumbu; atuleesha lutumbu lwetu kwi Yehowa mu ngakwilo na mu bikitshino byetu. Bino abilesha’shi twi belekene na bantu bebungi lelo uno. Twi mu nsenga mwi bantu bashi na lutumbu bwa byoso abibakitshina Efile Mukulu. Byabya kitundwilo kimune akilesha’shi twi mu “mafuku a nfudiilo,” nkumona bantu bashi na lutumbu. (2 Tim. 3:1, 2) Tatukumanga kwikala na bino binangu nya!

7. Nkinyi akikumiina Yehowa’shi tukite, na mbwakinyi?

⁷ Baledi t’abakumiinaa’shi bana babo bekale abalu nya, anka abakumiinaa’shi bekale ba kuuku. Mpa na Yehowa namu akumiina’shi bana baye bekale mu kwipushena munkatshi mwabo. Byabya, kifulo kyatudi befulene akilesha’shi twi bena Kidishitu ba binyibinyi. (Yo. 13:35) Atushinkamisha mayi a mufundji a misambo bafundjile’shi: “Mmulô kinyi wina bantu p’abashâla na bakwabo mu buumune! Bi buwa bwi mô!” (Mis. 133:1, EEM) Nsaa y’atufulu bakwetu bena Kidishitu, atulesha Yehowa’shi twi bamufule. (1 Yo. 4:20) Nyi mwanda wa muloo pa kwikala mu kifuko kya bakwetu be na ‘kalolo ku muntu na mutu, basha lusa’!​—Ef. 4:32.

8. Muyiile 1 Yowano 5:3, nkabingilo kinyi kakata katudi nako ka kukookyela Yehowa?

⁸ Yehowa akumiina’shi bana bakookyele baledi baabo, etutekye namu bwatudya kumukookyela. (Ef. 6:1) Aye nyi atudya kukookyela mwanda nyi Mupangi etu, Mulami a muwa wetu na muledi sha binangu kukila  baledi boso. Byabya, kabingilo ka kumpala katukookyela Yehowa, mpa mwanda mwitufule. (Badika 1 Yowano 5:3.) Sunga kwekala tubingilo twibungi twa kukookyela Yehowa, aye tetutakulaa bwa kumukookyela pa bukopo nya. Yehowa mmwitupe bulungantu bwa kwisangwila, aye e na muloo wa kwitumona atwata kitshibilo kya kumukookyela mwanda twi bamufule.

9-10. Bwakinyi kuuka miiya y’Efile Mukulu na kwiyitumikila kwi na muulo?

⁹ Baledi abakumiinaa’shi bana babo bekale mu kwiyikela. Nyi bwakinyi abelelaa bana miiya ya mu nshalelo bwa buwa bwa bana babo. Nsaa i bana abakookyela ku yaaya miiya, abalesha’shi mbakulupile mwi baledi babo na abebanemeka. Bi na muulo ukata bwa’shi tuukye na tukookyele miiya ya Nshetu e mwiyilu. Su tubakitshi byabya, atulesha’shi twi bafule Yehowa na atumunemeka; bino abikala bwa buwa bwetu. (Yesh. 48:17, 18) Anka, boso abapele Yehowa na kulonda miiya yaaye abekakilaa malwa.​—Nga. 6:7, 8.

¹⁰ Patudi na nshalelo asangasha Yehowa, atwikalwila ku bintu bikumbene kwitulwisha ku mbidi, mu binangu na mu kikudi. Yehowa auku kyakya kibuwa bwetu. Aurora, mushalele mu États-Unis amba’shi: “Nashinguula’shi nsaa y’atukookyela Yehowa, nshalelo etu alumbulukaa.” Uno mwanda ngwa binyibinyi kwatudi’twe boso. We mupete bukwashi kinyi pa kukookyela bukunkushi bwa kifulo bwa Yehowa?

11. Luteko alwitukwashaa bwa kukita kinyi?

 ¹¹ Luteko alwitukwashaa bwa kukookyela, sunga pabidi bukopo bwa kwibikita. Ingi nsaa bi kwitwikeela bukopo bwa kukookyela Yehowa, anka abitungu twitatshishe bwa kukambila byabya binangu. Mufundji a misambo batekyele’shi: “Mpe namu eshimba dilamate’nka kodi.” (Mis. 51:12, EEM) Denise, mbala-mashinda a nsaa yoso amba’shi: “Su namono’shi kukookyela mwiya wa Yehowa kwi bukopo, natekaa bwa kupeta bukome bwa kukita bibuwa.” Twi balombene kushinkamisha’shi alulaa ku nteko i byabya.​—Luk. 11:9-13.

12. Muyiile Beena-Efeso 5:1, abitungu tukite kinyi?

¹² Badika Beena-Efeso 5:1. Bu byatudi “baana [ba Yehowa] baadi mufule,” atukitshi mwetu mooso bwa kumwambula. Atwambula ngikashi yaaye pa kwikala na kifulo, kalolo, na kufwila bangi lusa. Nsaa i bangi bash’abauku Efile Mukulu abamono mwikelo wetu wibuwa, mbilombene kwibatakula mu kulonga bya kumwiuka ngofu. (1 Mp. 2:12) Baledi bena Kidishitu abitungu bakitshine bana babo myanda mu mushindo wabetukitshinaa myanda kwi Yehowa. Su abakitshi byabya, bana namu mbalombene kukumiina kudya bu kuuku na Nshetu sha kifuko.

13. Abitungu tukite kinyi bwa kunyinga mashimba?

¹³ Mwana mukinga asankilaa nshaaye na apushaa buwa kwisamba naaye. Bi mumune, atusankilaa Nshetu e mwiyilu Yehowa, na atukumiinaa’shi  bangi bamwiukye. Atupushaa mu mashimba etu nka bibadi bipushe Nfumu Daavide, bafundjile’shi: “Naketumbîsha mwadi [Yehowa.]” (Mis. 34:3, EEM) Mbilombene kwikala naminyi su atwikalaa na buufu? Twi kunying’eshimba naminyi? Atunyingi mashimba nsaa y’atwiuku’shi Yehowa asankaa p’atulongyesha bangi bwa kumwiuka. Yehowa etupa bukome bwatudi nabo lukalo. Badi mukwashe bakwetu ba mu siekele a kumpala bwabadya kwikala na mashimba anyingye, etukwasha dingi n’atwe.​—1 Tes. 2:2.

14. Ntubingilo kinyi atwitutakula bwa kukita mudimo wa kufwisha bantu bu balondji?

¹⁴ Yehowa te na ntondo, apushaa muloo nsaa y’etumono atufulu bangi, sunga bekala abatukila mbalo kinyi. (Bik. 10:34, 35) Mushindo umune ukile buwa watudya kulesha bangi kifulo, nkwibalungula mukandu wibuwa. (Mat. 28:19, 20) Uno mudimo ngulombene kukita kinyi? Boso abetuteemesha mbalombene kulongamisha nshalelo aabo kubanga binobino, na kupeta lukulupilo lwa kwikala na muwa wa loso mu mafuku e kumpala.​—1 Tim. 4:16.

15-16. Twi na tubingilo kinyi twa kwikala na muloo?

¹⁵ Yehowa nyi Nshetu sha kifulo, akumiina’shi kifuko kyaaye kikale na muloo. (Yesh. 65:14) Twi na tubingilo twibungi twa kwikala na muloo binobino, sunga twekala na nkalakashi. Kileshesho, twi bashinkamishe’shi Nshetu e mwiyilu mwitufule ngofu. Twi na kyukilo kya binyibinyi ky’Eyi dy’Efile Mukulu, Bible. (Yel. 15:16) Na twi mu kifuko ki na bantu bafule Yehowa, bafule miiya yaaye, na befulene.​—Mis. 106:4, 5.

¹⁶ Twi balombene kushala na muloo mwanda atwiuku’shi nshalelo akalongama mu mafuku e kumpala. Atushinguula’shi kubashala mafuku apeela, bwa’shi Yehowa akatushe bubi boso na’shi ku bukunkushi bwa Bufumu bwaye, nsenga ayikalukiila Mpaladiiso. Twi na dingi lukulupilo lwibuwa lwa’shi boso bafwe abakasanguka bwa’shi bakekale pamune na bakwabo bebafule. (Yo. 5:28, 29) Abikekala mwanda wa muloo! Na kii na muulo ukata, twibashinkamishe’shi, kubashala mafuku apela bwa’shi boso be mwiyilu, na be pa nsenga bape Nshetu sha kifulo kineemo, ntumbo na lulangwilo bimulombene.