NSHALELO A MUNTU
“Binobino, nemufule mudimo wa bulungudi!”
NE Mukudile mu ka kibundji ka Balclutha, Kuushi kwa kisangisangi kya Nouvelle-Zélande. Pa nadi nki mukinga, nadi mufule Yehowa na nadi nakumina kwikala Temwe aye. Nadi nasankila kwenda mu bisangilo, mwanda kwanka, nadi n’epusha mukukalwilwa na nadi na muloo. Sunga binadi na buufu, nadi nakumina kwenda mu bulungudi lubingo loso. Ntshinadi na moo wa kulambukisha bena kalasa nami sunga bangi bantu. Nadi na muulo wa kwikala Temwe a Yehowa, na panalombeshe bipwa 11, nalambwile muwa wande kwi Yehowa.
NASHIMISHA MULOO WANDE
Mwanda wa malwa, panakumbeshe bipwa 13, kipwano kyande na Yehowa kibabangile kubofula. Bena kalasa nami abadi abamweneka bu be na bulungantu, nyi bwakinyi nadi nakumina kwikala byabadi. Miya ya baledi bande, ya bwina Kidishitu na midimo ya mu kikudi, bibabangile kumweka bu bi bukopo. Nadi nakumina nka’shi Yehowa e kwanka, anka, ntshinadi nepusha pepi naye.
Kadi, tshinadi mulekye kulungula mukandu wibuwa. Anka, tanadi nebikitshi nka bwa kukumbasha kweyi. Panadi nende mu bulungudi, ntshinadi n’elumbula, byabya bibadi bingyelele bukopo bwa kubanga mwisambo sunga kutungunuka nao. Pa mwanda wa bino, mudimo wande wa bulungudi taubadi dingi autusha bipeta bi buwa na kumpa muloo, na bino bibanyishishishe kumbofusha. Nadi neyipusha’shi: ‘Nanyi e kutungunuka na kukita uno mudimo wi bukopo bwi bino?’
Panakumbeshe bipwa 17, nadi nakumina kwikitshina myanda. Nyi bwakinyi, nalongyele bintu byande, nenda mu kushala mu Australie. Bibadi bitape baledi bande ku mashimba, pababadi abamono nakatuka ku nshibo. Abadi bakalakashwe,
anka abadi abapwandjikisha’shi natungunuka na byubishi byande bya mu kikudi.Mu Australie, nanyishishe kubofula mu kikudi. Tanadi natwele mu bisangilo nka binyi byabya. Nadi mupete ba kuuku abadi abakumina nka bu’mi’shi, tutwele mu bisangilo, akupu atwende mu kutoma na mu kusha mbalo ya bakitaa bukitekite bufuku (boites de nuit). Namono’shi nadi mukolo umune mu bya binyibinyi, ungi mu myanda ya pa nsenga, na tshinadi nepusha kalolo mbalo su ngimune.
NEMUPETE DILONGYESHA DI NA MUULO MU MUSHINDO USHINADI NAPWANDJIKISHA
Kunyima kwa bipwa pepi bibidi, nadi mwimonene na ungi mukwetu mukashi badi munkwashe kushi kuuka bwa kunangushena pa nshalelo ande. Nadi mushale mu nshibo imune na bakwetu bakashi be bukupi batano, na tubadi bayitamine mukunkushi a kifunda na mukashi aye Tamara, bwabadya kushala netu munda mwa lubingo. Pabadi mulume aye akitshi myanda ya mu kakongye, Tamara badi akisha netu nsaa na kusepa netu pamune. Bino bibadi abinsankisha. Badi muntu e buwa na bibadi bibofule bwa kwisamba naye. Bibadi abinkanyisha pakumona muntu munyingye mu kikudi byabya, akisha netu nsaa na kusepa netu.
Tamara badi muntu musasakate. Kifulo kyaye bwa bya binyibinyi na bwa bulungudi, bibadi abitakula bangi bwa kumwambula. Badi na muulo wa kwipana mu mudimo wa Yehowa, aku namu’mi ntshinadi na muloo mwanda ntshinadi mwipane. Binangu byaye bi buwa na muloo wa binyibinyi ubadi nao bibadi na bukitshishi ku muwa wande. Kileshesho kyaye kibadi kintentekyeshe kifundwe ki na muulo: Yehowa akumina’shi boso abamufubila, bamufubile na “mulòo.”—Mis. 100:2.
BINADI MUBANGULE KUFULA BULUNGUDI
Nadi nakumina kwikala na muloo ubadi nao Tamara, anka bwa kwiupeta, bibadi abitungu nshintulukye ngofu. Bibadi byate mafuku, anka kapelakapela nabangile kushintuluka. Nabangile kwilumbula bwa mudimo wa bulungudi, na nsaa na nsaa nadi nakitshi mudimo wa bu mbala-mashinda mukwashi. Bino bibadi binkwashe bwa kupela kwikalakasha ngofu na nabangile kwipusha
kalolo. Bu bitanadi nakamba kufubisha Bible mu bulungudi ngofu, nadi mubangye kupeta muloo mwanka. Mafuku apela, nabangile bu mbala-mashinda mukwashi bwa myeshi i bungi.Nabangile kusangula ba kuuku ba bipwa bilekene, abadi abepana mu mudimo wa Yehowa na abadi na muloo mwanka. Kileshesho kyabo, kibadi kinkwashe bwa kutalula myanda i na muulo na kwalusha byubishi byande bya mu kikudi. Nabangile kupeta muloo wi bungi mu bulungudi na ami nkubanga mudimo wa bu mbala-mashinda a myeshi yoso. Bwa musango wa kumpala kunyima kwa bipwa, nemupetule dingi muloo na kwipusha kalolo mu kakongye.
NAPETE MULUME MBALA-MASHINDA A MYESHI YOSO
Kipwa kimune kunyima, nadi mwimonene na Alex, muntu e buwa, mululame, mufule Yehowa na mudimo wa bulungudi. Badi mufubi a midimo na tabadi mupwe kukita mudimo wa bu mbala-mashinda munda mwa bipwa bisamombo. Badi dingi ende mu kukwasha mu Malawi mubadi lukalo lwa balungudi. Kwakwa, badi akisha nsaa pamune na ba misionere abadi kileshesho ki buwa na abadi bamunyingishe bwa kutula mudimo wa Bufumu pa mbalo ya kumpala.
Mu kipwa kya 2003, tubadi beyibakishene, na atwe nkutungunuka na mudimo wa nsaa yoso. Twibalongye myanda i bungi i buwa, na Yehowa mwitwelele myabi mu mishindo ilekene.
YEHOWA BETWELELA MYABI IKILE BUNGI
Twi mu bulungudi mu ka kibundji ka Gleno, mu Timor-Oriental
Mu kipwa kya 2009, abadi betutume bwa nkafuba bu ba misionere mu Timor-Oriental, ka kibundji kapela ka mu archipelle a Indonésie. Bibadi bitukanyishe, bitupe muloo anka tubadi atutshinyi. Myeshi itano kunyima, tubafikile mwipata dya Dili.
Kuno kufiluka, kubadi kushintule myanda i bungi mu nshalelo etu. Bibadi abitungu’shi twiubidishene na bipikwa bipya, ludimi, ndilo na nshalelo a mwanka. Mu bulungudi, tubadi atupete nka bantu balanda, bashi balongye na basha twinyongoshi. *
Na tubadi bamone bantu be bungi bakalakashwe ku mbidi na mu binangu mwanda wa ngoshi na bu ntomboshi.Bantu abadi abakumina mukandu wibuwa! Bu kileshesho, nadi mupete ka nsongwakashi ka bipwa 13 kenyongole kabetamina bu Maria. * Nyinaye badi mufwe bipwa bipela kumpala na ta badi akamba kumona nshaye. Nka bu bana be bungi ba mulongo waye, Maria ta badi euku kya kukita mu muwa waye. Natentekyesha ungi musango ubadi mudile nsaa ibadi ampatulwila by’epusha. Anka, ntshinadi napusha bibadi akula kalolo, mwanda ntshinadi mubande kuuka ludimi lwabo kalolo. Nadi mutekye Yehowa bwa’shi ankwashe mmone bya kumunyingisha, akupu ami nkubanga kumubadikila bifundwe bwa kumunyingisha. Kunyima kwa bipwa bipela, nadi mumone bibadi bya binyibinyi bishintule mmwenekyelo aye na nshalelo aye oso. Badi mubatshishibwe na binobino kwete alongo na bantu Bible. Lelo uno, Maria ena kifuko kikata kya mu kikudi na epusha’shi mbamufule.
Yehowa kwete kwelela mudimo wa bulungudi mwabi mu ka kibundji ka Timor-Oriental. Sunga byabidi’shi balungudi be bungi mbabatshishibwe mu bipwa ekumi bishale, be bungi ba kwabadi bakwete abafubu bu ba mbala-mashinda, bafubi ba midimo sunga bu bakulu. Bangi bakwete abakwasha ku biro bya kwalula mikanda bwa kutusha bya kudya bya mu kikudi mu ludimi lwabo. Bikwete abinsakisha panebamono abayimbi mu bisangilo, be na muloo na abanyingi mu kikudi.
Ami na Alex, atukatuka mu ungi teritware, mwatwabilanga masaki a lwitamino a Kitentekyesho
NTSHINADI NAPWANDJIKISHA’SHI NEKUPETA MULOO WI BINO MU MUWA WANDE
Nshalelo a mu Timor-Oriental badi bukopo bukile kukila a mu Australie, anka nadi na muloo wi bungi. Ingi nsaa tubadi atutwele mu ka motaka kaule bantu, mwi mishipa yume, na mifuko ya bisakisaki abikatukila mu kisalwe. Angi mafuku, tubadi atulongo Bible na muntu mu kashibo kapela ke kibobo, butshafu, na nsolo ibadi ayifunyina nka paapa. Sunga’shi kubadi ino yoso nkalakashi, nadi namba’shi: ‘Ne na nshalelo e buwa!’
Atwende mu teritware etu
Pantentekyesha myanda ipwe kukila, natumbula baledi bande ngofu mwanda mbakite mwabo moso bwa kundongyesha mashinda a Yehowa, na kunkwatshishena sunga nsaa ibadi kipwano kyande na Yehowa kibofule. Mayi e mu Nkindji 22:6 ngakumbene. Papa na mama be na muloo wa kwitumona, ami na Alex atufubila Yehowa. Ku banga mu 2016, twi babangye kufuba mu mudimo wa kifunda mu teritware a filiale a Australasie.
Nalesha bana ba mu Timor, bena muloo wa kutala video a Caleb na Sophia
Bi bukopo kukumina’shi mu bipwa bishale, ntshinadi mukumine mudimo wa bulungudi. Binobino, nemufule mudimo wa bulungudi! Sunga twakita kinyi mu nshalelo etu, muloo wa binyibinyi autukila nka mu kufubila Yehowa n’eshimba dyetu dyoso. Mu bipwa 18 bishale byandi mufubile Yehowa pamune na Alex, bikele bya muloo mu nshalelo ande. Binobino, napusha kalolo mayi a Davide abalungwile Yehowa’shi: ‘Booso bakusangule buu kifwamino, basangale, basangale bwa looso. . . . Booso bafule eshina dyoobe, basankile moodi.’—Mis. 5:12.
Bi muloo kulonga Bible na bantu beyishe!