ATWE booso atuwuku’shi Yehowa nyi kwete kukunkusha mwilo waye mu kikudi mu ano “mafuku a nfudiilo.” (2 Tim. 3:1) Byabya, abitungu atwe boso tukookyele Yehowa. Twi kupwandjikisha nshalelo eetu na a bena Isaleele mu kabaaka. Bibaadi abitungu’shi betabe musaase wa mpungi.

Yehowa balungwile Moyiise bwadya kukita mpungi ibidi ya kyamo ky’ebakanyi bwa “kwitaanyina kakongye naa bwa kwibaukisha nguba a kukatuka mu lupata.” (Mb. 10:2) Bibaadi abitungu’shi ba tshiite-mwakwidi beele mpungi mu mpese ilekene bwa kulesha kibaadi akitungu’shi mwilo ukite. (Mb. 10:3-8) Lelo uno, mwilo w’Efile Mukulu ukwete kupeta malango mu mishindo ilekene. Mu uno mwisambo, atukyebe kutaluula mishindo isatu yatukwete kupeta malongyesha na kwiapwandikisha na musaase wa mpungi ya bena Isaleele a kala. Mwilo w’Efile Mukulu lelo uno ukwete kwitaminyibwa ku bikongeno bikata, bakulu abapeta malongyesha, na bukunkushi bwa teokrasi bwi kwanka bwa tukongye bwabakwete kulongamisha na kulumbuula.

Nsaa ibaadi Yehowa ayitamina “kakongye kooso,” bwa kwibungila pa kibelo kya ku lupese lwa kutunduka lwa tabernakele, ba tshiite-mwakwidi boso abaadi abeele mpungi. (Mb. 10:3) Bisamba byoso, bibaadi bishaale peepi na tabernakele mu bisaka binanka, bibaadi abipusha wawa musaase. Baaba babaadi kipeepi na kibelo babaadi bakumbene kufika munda mwa minite ipeela. Bangi babaadi kula bibaadi abitungu nsaa ibungi mpa na kwitatshisha ngofu bwa kufika. Sunga byekala naminyi, Yehowa badi na lukalo lwa’shi booso bebungye bwa kupusha malongyesha.

Lelo uno, tatukwete kwibunga mu tabernakele nya, anka tukwete kwitaminyibwa ku bikongeno bya mwilo w’Efile Mukulu. Mu byanka mwi bikongeno bya mafuku asatu na bingi bisangilo bi pabwabyo, mwanka tukwete kupeta malongyesha na bukunkushi bwi na muulo. Mu nsenga ishima, mwilo wa Yehowa wi na programe e mumune. Byabya, boso abakumiina lwalwa lwitamino lwa kutwela mu bino bisangilo be munkatshi mwa kisaka kikata ki na muloo. Bangi abatambukaa kipindji kila kukila bangi. Sunga mbyabya, baba abakumiina lwitamino abashinguula’shi abitungu kwitatshisha ngofu.

Twi kwamba naminyi bwa bano be mu bisaka bi kula na bikongeno bikata? Ku bukwashi bwa myanda ya teknoloji, bebungi ba kwabadi be na mushindo wa kupeta malongyesha amune sunga kutwela mu bikongeno bikata. Bu kileshesho, pabafikile muntu alesha mpala ya biro byetu bikata, mu filiale a mu Benin abaadi bakite bya’shi bantu be ku Arlit mu Niger, ka kibundji ka mu kabaaka ka Sahara, balondeshe myanda ya bakwete kulongyesha mu Benin. Bakwetu makumi abidi na umune, na bantu babaabadi  betamine abafikile mu kisangilo. Sunga mbibaabadi kula, babaadi abepusha bu be pamune na bakwabo 44 131 be mu kisangilo. Mungi mukwetu bafundjile’shi: “Atwinutumbula na mashimba etu ooso pa kukisha ano malongyesha ku nshinga. Bibetulesha ngofu byanudi betwate na muulo mu mashimba enu.”

Pabaadi ba tshiite-mwakwidi ba mu Isaleele abele mpungi mususa umune, mpenda ‘mbakata na bamfumu ba binunu,’ abaadi na kya kufika ku mbalo ya kwibungila. (Mb. 10:4) Kwakwa nyi kubabadi abapete kupeta malongyesha aabebapa kwi Moyiise. Abaadi alombene kwibakwasha bwa kutwala mashito a bisamba byabo. Su bodya kwikala umune a ku baaba bakata, tobodya kukita moobe mooso bwa kwenda mu kupeta aa malongyesha su?

Lelo uno, bakulu mu tukongye ta “mbakata;” sunga bu ba nfumu ba loombe lw’Efile Mukulu lwabadi nalo nya. (1 Mp. 5:1-3) Anka bakwete kukita mwabo mooso bwa kulama loombe. Byabya, abetabaa lubilo ku musaase wa kwenda mu kulongyeshibwa, bu mu Kalasa ka mudimo wa Bufumu. Mu kano kalasa, bakulu abalongo mushindo wabadya kukunkusha myanda mu kakongye. Ano malongyesha, aakwasha bakulu bwabadya kupasukila kakongye na kwikakwasha bwa kwifubwila pepi na Yehowa. Sunga byekala’shi twe mutwele mu tuno tulasa, okwete nka kupeta bukwashi bwato kwi bano abekalanga bemutwele.

Ba tshiite-mwakwidi ba mu Isaleele babadi abeele mpungi ya mu ungi mushindo. Bino bibaadi abilungula bantu booso’shi Yehowa akumina’shi bakatukye pa yaaya mbalo. (Mb. 10:5, 6) Nsaa ibaadi mwilo aushintuula mbalo ya kushaala, babaadi abeukitshi mu mushindo ulumbuulwe kalolo, anka bibaadi abitekye mudimo wibungi kwi muntu ooso. Bangi babaadi balombene kwikala na lotoolo pa kukatuka. Bwakinyi?

Pangi abaadi abapwandikisha’shi musaase wa kutentuluka ubaadi aufiki misuusa ibungi mu kimpulunkamba. “Ingi misuusa, ekumbi dibaashalanga’nka ku kyoolwa na kunamashika.” Mu ingi misusa namu “mafuku abidi, mweshi umune, sunga bikile paapa” bwa kutentuluka. (Mb. 9:21, 22) Bantu babaadi abatentuluka misusa bungi kinyi? Mukanda wa Mbadiko shapitre 33 aulesha ma mbalo pepi na 40 abaadi ashaale bena Isaleele.

Ingi nsaa, bangi babaadi balombene kumona’shi mbalo ibabashaala imutaala. Ino mbalo ibino ibadi buwa mwamwa mu “kabaaka kakata na ke moo.” (Miy. 1:19) Anka, bibaadi bilombene kwibatuula mu kitompwanga kya kupwandikisha’shi kutentuluka nyi mwanda ukile bubi.

Pabaadi bisamba abibanga kukatuka, bibaadi abitungu’shi bingi bitengyele kumpala kwa kukatuka. Booso abaadi abapusha musaase wa mpungi ayididi kushii kwimana, anka ta mbooso babaadi balombene kukatuka musango umune nya. Musaase wa yaaya mpungi ubaadi aulesha’shi bisamba byende bitadiile kutunduka, bu kisamba kya Yuuda, Isakare, na Zebulone. (Mb. 2:3-7; 10:5, 6) Kunyima kwa kukatuka, ba tshiite-mwakwidi babaadi abele ingi mpungi ibukopo musango wa kabidi bwa kulesha’shi bisamba bisatu bya lupese lwa kuushi bibangye lwendo. Ba tshiite mwakwidi abatungunukile na kukita bino mpa na nsaa ayikatuka bantu booso.

Pangi mbikwelele bukopo bwa kukumiina myanda ishintulukye mu ndumbulwilo etu. Obe nkupwandikisha pangi’shi kubashintuluka myanda ikile pa bungi. Sunga’shi boodi mukumiine myanda ibaadi kumpala na tokuminanga’shi ishintulukye nya. Bwa tuno tooso tubingilo, we mumone pangi’shi bi bukopo bodya kwiubidishena na kuno kushintuluka. Anka, su twetatshisha bwa kukumiina kwakwa kushintuluka, atukamono’shi kwibuwa na Yehowa asangala netu.

Mu mafuku a Moyiise, Yehowa badi mukunkushe bantu midiyo, balume, bakashi na bana mu kabaaka. Su takubaadi bukunkushi na bulami bwa uno mushindo, takwi muntu badya kupanda nya. Lelo uno, Yehowa kwete kwitukunkusha mu ano mafuku e bukopo. Etukwasha bwatudya kwikala peepi naaye na kulama lukumiino lwetu lunyingye. Byabya, oso a kwatudi ekale na kitshibilo kya kukookyela bu beena Isaleele basha lulamato ku misaase ilekeene ya mpungi!