1-2. Kwipushena kinyi kwi pankatshi pa Mulungudi 11:6 na mudimo wetu wa bulungudi?

MU ANGI maumbo, bantu bebungi abakuminaa kulonga bibungi nsaa yabapusha mukandu wibuwa. Abekala na muloo wa kulonga bya binyibinyi. Mu angi namu, bantu t’abeusankilaa. Bi naminyi mbalo yodi mushale? Sunga bantu beusankila sunga bapela kwiusankila, Yehowa akumina’shi tutungunukye na kwiulungula mpa na nsaa yakamba’shi kubapu.

² Apakalombana kipungo kitshibe Yehowa, mudimo wa bulungudi aukemana na kunyima “nfudîlo aikafiki.” (Mat. 24:14, 36, EEM) Kumpala kwa’shi bino bikitshikye, mushindo kinyi watudi balombene kukookyela eyi adyamba’shi: “Tolekanga eyaasa dyoobe adiikisha”? *​—Badika Mulungudi 11:6.

3. Nkinyi kyatwisambila mu uno mwisambo?

³ Mwisambo ushaale awisambilanga myanda inanka ayitungu’shi tukite bwa kwikala “bapiibwe [balobi] ba bantu” be buwa. (Mat. 4:19) Uno mwisambo awisambila mishindo isatu ayitukwasha bwa kunyingisha kitshibilo kyetu kya kulungula mukanda wibuwa sunga twapeta nkalakashi. Atulongo bwakinyi bi na muulo (1) bwatudya kutuula mudimo wa bulungudi pa mbalo ya kumpala mu muwa wetu, (2) bwa kwikala na lwishinko, na (3) bwa kulama lukumiino lunyingye.

4. Bwakinyi abitungu tutuule binangu byetu ku mudimo witupe Yehowa?

⁴ Yesu balungwile balongi baye abikekala bantu na abikakitshika mu mafuku a nfundiilo. Baadi auku’shi ino myanda ngilombene kukutshishwa balongi baye bwabadya kutuula mudimo wa bulungudi pa mbalo ya kumpala. Nyi bwakinyi, baadi mwibadimushe  bwabadya kwikala “bapasukye.” (Mat. 24:42, EEM) Mu mafuku a Nowa, kubaadi myanda ibungi ibaadi ikutshishe bantu kutemeesha kudimusha kwaye. Lelo uno, yaya myanda ngilombene kwituumbakasha. (Mat. 24:37-39; 2 Mp. 2:5) Nyi bwakinyi abitungu tutuule binangu byetu ku mudimo witupe Yehowa.

5. Muyile Bikitshino 1:6-8 mukandu wibuwa aukalungulwa mpa na mbalo kinyi?

⁵ Lelo uno, abitungu tutuule binangu byetu ku mudimo wa kulungula mukandu wibuwa wa Bufumu. Yesu baadi mutemukye’shi uno mudimo, balongi baye abakatungunuka na kwiukita kunyima kwa lufu lwaye kukila bibaadi mwiukite. (Yo. 14:12) Kunyima kwa lufu lwa Yesu, bangi ba ku balongi baye abalukile ku mudimo wabo wa kuloba. Aye basanguka, Yesu baadi mukite kilengyeleshi na aye nkunkwasha bamo ba ku balongi baye bwabadya kukwata mishipa ibungi. Kunyima kwaye kukita kyakya kilengyeleshi, Yesu baadi mushimikye kasele’shi mudimo wa kulungula na kwikasha bantu bu balongi wi na muulo kukila ingi midimo. (Yo. 21:15-17) Kumpala kwa’shi Yesu ende mwiyilu, balungwile balongi baye’shi wawa mudimo wa bu kamonyi ubababanga mu Isaleele, aukapalakana mpa na kufudile nsenga. (Badika Bikitshino 1:6-8.) Bipwa kunyima, Yesu baadi muleshe Yowano mutumiibwa mu kimonwa myanda aikakitshika “mwifuku dya Mwanaana.” * Mu yaya myanda, Yowano baabi mumone mwanda wa kukanya: Ku bukunkushi bwa mwikeyilu, “mukandu wibuuwa wa looso,” ubabangile kulungulwa kwi “eumbo dyooso, kisamba, mwakulo na mwilo ooso.” (Kibaf. 1:10; 14:6) Abimweka patoka’shi, Yehowa akumiina’shi tutungunukye na kulungula mukandu wibuwa mu nsenga ishima mpa na pa ukafudila.

6. Nkinyi kya kwitukwasha bwa kutungunuka na kutuula bulungudi pa mbalo ya kumpala mu muwa wetu?

⁶ Twi balombene kutuula mudimo wa bulungudi pa mbalo ya kumpala, nka su atunangushena pabitale kipaso kikwete Yehowa  kwitukwasha. Bu kileshesho, kwete kwitupa byakudya bya mu kikudi bibungi bi mu mikanda, bya kwela mu ma telefone sunga mu ma tablette etu, misambo, ma video na Televizion a JW. Banda kunangushena pabitale site etu mukata a jw.org, mbintu bi mwanka bi mu ndimi ikile pa 1 000! (Mat. 24:45-47) Mu nsenga ishima, bantu mbeabule mwanda abakwatshishena bisaka bya politike bilekene, be mu bipwilo bilekene, na mwanda bangi mbalanda, bangi namu mba mpeta. Anka mu nsenga ishima, bantu bakile pa midiyo Mwanda bakwete kufubila Yehowa mu buumune, na be na kifulo kya bu bana na bana. Bu kileshesho, ku bukwashi bwa video, ba Temwe ba Yehowa abaadi bebungye bwa kutaluula booso kifundwe kya mu dya Katano 19/4/2019. Kyakya kyolwa, kisaka kya bantu 20 919 041 kibaadi kibungye bwa Kutentekyesha lufu lwa Yesu. Nsaa yatunangushena pabitale kineemo kyatudi nakyo kya kumona na kukita uno mudimo wa kukanya, bino abitutakula bwa kunyisha kwiukita.

7. Kileshesho kya Yesu akitukwasha naminyi bwa kutuula mudimo wa bulungudi pa mbalo ya kumpala?

⁷ Ungi mushindo watudya kutuula mudimo wa bulungudi pa mbalo ya kumpala, nyi pa kwambula kileshesho kya Yesu. Tabaadi mutadile kintu su nkimune bwakidya kumukutshisha kulungula mukandu wibuwa. (Yo. 18:37) Tabaadi mukumine nsaa ibaadi Satana akyebe kumupa “mafumu ooso a pa nsenga ishima na ntumbo yaao,” sunga kukumiina nsaa ibaadi bangi abakyebe kumwikasha bu nfumu. (Mat. 4:8, 9; Yo. 6:15) Tabaadi mutadiile lwabi lwa kupeta bupeta bwi bungi sunga kubingwabingwa kwi bukopo bwakudya kumukutshishwa kulungula mukandu wibuwa. (Luk. 9:58; Yo. 8:59) Nsaa ayitompibwa lukumiino lwetu, bibuwa tutentekyeshe elango dya Mpoolo mutumiibwa. Baadi munyingishe bena Kidishitu bwabadya kwambula kileshesho kya Yesu bwa’shi ‘t’abakôkanga sunga kutshoboloka’!​—Eb. 12:3, EEM.

8. Lwishinko kinyi, na bwakinyi lwi na muulo bikishekishe binobino?

⁸ Lwishinko nyi ngobesha ya kutengyela mpa na apashintuluka myanda kapanda. Twi na lukalo lwa lwishinko mu myanda ilekene. Atukuminaa’shi mwanda kampanda wi bubi upwe sunga’shi tubapu kutengyela munda mwa mafuku ebungi kulombana kwa mwanda kapanda wi buwa. Mutemuki Abakuke baadi mutengyele munda mwa mafuku ebungi kufudila kwa bu ntomboshi bwa bena Yunda. (Aba. 1:2) Balongi ba Yesu abaadi abakulupila’shi Bufumu bw’Efile Mukulu abukyebe “kumweka binobino” bwabudya kwibekasha mu bulungatu ku bukunkushi bwa bena Looma. (Luk. 19:11) Atukumiina’shi Bufumu bw’Efile Mukulu bukatushe buntomboshi booso, na’shi buutule ndumbulwilo mupya a bantu abakookyela Efile Mukulu. (2 Mp. 3:13) Anka abitungu twikala na lwishinko bwa kutengyela mpa na efuku ditshibe Yehowa bwa kwibikita. Tala mishindo ikwete Yehowa kwitulongyesha bwa kwikala na lwishinko.

9. Mbileshesho kinyi abilesha’shi Yehowa e na lwishinko?

⁹ Yehowa nyi kileshesho kipwidikye kya lwishinko. Baadi mupe Nowa nsaa ibungi ya kupwa bwato na ya kwikala bu “mulungudi a kululama.” (2 Mp. 2:5, Kilombeeno kipya 2014; 1 Mp. 3:20) Yehowa baadi muteemeshe Abrahame nsaa ibaadi amweluula nkonko pabitale kitshibilo kyaye kya kubutula bantu bebubi abaadi mu Sodome na Gomoore. (Kib. 18:20-33) Munda mwa bipwa bibungi, Yehowa baadi muleshe mwilo wa Isaleele ubaadi ukutwe lulamato lwishinko mu mushindo wa kukanya. (Ne. 9:30, 31) Lelo uno, lwishinko lwa Yehowa lukwete kumweneka patoka nsaa ya kwete kupa booso abakumiina kwikala ba kuuku baye nsaa ilombane bwa’shi ‘bafikye mu kwilanga.’ (2 Mp. 3:9; Yo. 6:44; 1 Tim. 2:3, 4) Kileshesho kya Yehowa akitupa kabingilo ka kwikala na lwishinko  patutungunuka na kulungula mukandu wibuwa na kulongyesha. Etulongyesha dingi bya kwikala na lwishinko ku bukwashi bwa bileshesho bi Mwiyi dyaye.

10. Kileshesho kya mudimi kii mu Shake 5:7, 8, akitulongyesha kinyi?

¹⁰ Badika Shake 5:7, 8. Kileshesho kya mudimi atengyela byumbulwanga, akitulongyesha mushindo watudya kwikala na lwishinko. Eyondo’shi bingi byumbulwanga abikomaa bukidibukidi. Anka bingi namu, bikishekishe bino abipeyaa bikuba, abyateya nsaa ibungi bwabidya kukoma. Mu Isaleele, bikunwanga bibakitanga pangi myeshi isamombo kumpala kwa’shi bikome. Mudimi baadi akunu ntete mu mpeshi mbedi mu kipungo kya automne, kipungo kipushene na mweshi w’ekumi, na baadi ebikuula mu mpeshi a nfudilo mu kipungo kya printemps, kipungo kipushene na mweshi wa kananka. (Mak. 4:28) Atulesha’shi twi na binangu nsaa y’atwambula mudimi sha lwishinko. Anka bino nta bibofule nya.

11. Lwishinko alwitukwasha naminyi mu mudimo wa bulungudi?

¹¹ Bantu bakutwe kupwidika abakumiinaa kumona bipeta bya mudimo nka musango umune. Byabya, su atukumiina’shi bikunwanga byetu bitushe bipeta bi buwa, abitungu twibipasukile. Mudimo wa kwikasha bantu bu balongi autekye kwitatshisha ngofu. Abitutekye nsaa i bungi bwatudya kukwasha balongi betu ba Bible bwa’shi balekye ntondo, kadi bekale na kifulo. Lwishinko alwitukwasha bwatudya kupela kubofula kwishimba nsaa yabash’abetutemesha kwi bantu. Abitungu twikale na lwishinko nsaa ayikumiina bantu kwitutemesha na kulonga Bible. T’abitungu tukitshishe mulongi a Bible bwadya kunyingisha lukumiino lwaye. Ingi nsaa balongi ba Yesu ta babaadi abapusha byooso bibaadi alongyesha. (Yo. 14:9) Tutentekyesheyi’shi atwe atulungula mukandu wibuwa na kulongyesha, anka Efile Mukulu nyi akwasha bantu bwabadya kwikala na lukumiino.​—1 Kod. 3:6.

12. Mushindo kinyi watudi balombene kulesha lwishinko nsaa yatulambukisha bena kifuko kyetu bashii ba Temwe ba Yehowa?

 ¹² Mbilombene kwitwikeela bukopo bwa kwikala na lwishinko nsaa yatulambukisha bena kifuko netu bashi ba Temwe ba Yehowa. Mayi a kulonda e mu Mulungudi 3:1, 7 ngalombene kwitukwasha. Aamba’shi: “Kwi . . . kipungo bwa kuumiina na kipungo bwa kwakula.” Mwikeelo wetu wi buwa ngulombene kukwasha be na kifuko bwabadya kutemesha mukandu wetu. Abitungu dingi twikale belumbuule bwa kwibalungula pabitale Yehowa nsaa yooso yakudi mushindo. (1 Mp. 3:1, 2) Abitungu tulungule na kulongyesha mukandu wibuwa na kisumi. Anka abitungu twikale na lwishinko kwi bantu booso, mpa na kwi bena kifuko kyetu.

13-14. Mbileshesho kinyi bya lwishinko byatudi balombene kwambula?

¹³ Bileshesho bi mu Bible bya bantu ba sha lulamato na bya bantu ba lelo uno, mbilombene kwitulongyesha bya kwikala na lwishinko. Abakuke baadi akumiina’shi butomboshi bupwe, anka baadi muleshe lwishinko nsaa ibakwile’shi: “Neekala mushaale pa mbalo yande ya bu-nsààmò.” (Aba. 2:1) Mpoolo mutumiibwa bambile’shi akumiina “kulombasha” mudimo waye. Anka baadi mutungunukye na lwishinko looso “kutuula bukamoni ku mukandu wibuwa.”​—Bik. 20:24, Esambi dipya 2015.

¹⁴ Banda kutala kileshesho kya mulume na mukashi bababaadi batume kunyima kwa Galaade mwiumbo mushii baadi ba Temwe ba Yehowa bebungi, kadi mu baadi bantu bebungi bashibaadi balangwidi. Bantu bebungi t’abaadi abakumiina kulonga Bible. Anka balongi nabo ba ku kalasa ka Galaade, abaadi abafubila mu angi maumbo, abaadi abebalungula bungi bwa bantu babaabadi abalongo n’abo Bible, na bwa bantu baabadi bakwashe bwa kwikala ba Temwe ba Yehowa. Anka uno mulume na mukashi abaadi batungunukye na lwishinko looso pa kulungula mukandu wibuwa, sunga bibaadi bantu bebungi abapele kwibateemesha. Kunyima kwabo kulungula mukandu wibuwa munda mwa bipwa 8 mu yawa teritware, abaadi na muloo wa kumona umune a kubalongi baabo, babatshishibwa. Bino bileshesho bya mafuku a kala na bya kano kabidi abitulongyesha kinyi? Bano bantu ba sha lulamato, t’abaadi batadile eyaasa dyabo’shi dikishe, na Yehowa baadi mwibafute bwa lwishinko lwabo. Twambuleyi “baaba abakapiana kiakia kibalayilwe pa lukumiino na lwishinko [lwabo].”​—Eb. 6:10-12, Kilombeeno kipya 2014.

15. Mushindo kinyi wa kumpala awunyingisha kitshibilo kyetu kya kulungula mukandu wibuwa?

¹⁵ Twi na lukumiino mu mukandu watulungula, nyi bwakinyi atukumiina kwiulungula bantu bebungi. Twi bakulupile milayilo i Mwiyi dy’Efile Mukulu. (Mis. 119:42; Yesh. 40:8) Lelo uno, tukwete kumona mushindo aulombana matemuki a mu Bible. Tukwete kumona abilumbuluka nshalelo a bantu nsaa y’ababanga kutumikila malongo e mu Bible. Bino abitushinkamisha’shi mukandu wibuwa wa Bufumu, nyi mukandu autungu’shi muntu ooso apushe.

16. Muyile Misambo 46:2-4, lukumiino mwi Yehowa na mwi Yesu lwi kunyingisha kitshibilo kyetu kya kulungula mukandu wibuwa naminyi?

¹⁶ Twi na dingi lukulupilo mwi Yehowa, sha mukandu watukwete kulambukisha na mwi Yesu Nfumu a Bufumu bw’Efile Mukulu. (Yo. 14:1) Sunga twafumankana na lukalakashi kinyi, Yehowa ekala kwanka nsaa yooso bu kifwamino kyetu na bukome bwetu. (Badika Misambo 46:2-4.) Na dingi, twibashinkamishe’shi Yesu kwete kukunkusha mudimo wa bulungudi kukatukila mwiyilu, na kufubisha bukome na matalwa byabadi bamupe kwi Yehowa.​—Mat. 28:18-20.

17. Tusha kileshesho akilesha bwakinyi abitungu tutungunukye na kulungula mukandu wibuwa.

¹⁷ Lukumiino alwitukwasha bwa kushinkamisha’shi  Yehowa etwelela myabi bwa kwitatshisha kwetu mpa na mu mishindo yatush’atupwandikishanga. (Mul. 11:6) Bu kileshesho, efuku dyooso binunu bya bantu abimonaa mikanda yatudi batule ku tutempu. Uno mushindo, wibuwa wa kukita bulungudi su? Oolo! Mu Mudimo wetu wa Bufumu wa 11/2014, mwi mwanda wa nsongwakashi a ku kilongyelo kikata baadi musangule bwa kufunda [dissertation] pabitale ba Temwe ba Yehowa. Baadi mukimbe mbalo i Nshibo ya Bufumu, kadi kushi’ye kwiyipeta, anka baadi mumone mesa atule mikanda yetu ku kilongyelo kyabo, na aye nkupeta myanda ibaadi akyebe kufunda. Babangile kulonga Bible, kunyima aye nkubatshishibwa, lelo uno mbala-mashinda a nsaa yooso. Kino kileshesho akitunyingisha bwatudya kutungunuka na kulungula mukandu wibuwa, mwanda akilesha’shi kukii bangi bantu be na lukalo lwa kupusha mukandu wa Bufumu.

18. Bwakinyi twibashikamishe’shi mukandu wa Bufumu aukalombana pa nsaa itshibe Yehowa?

¹⁸ Tushinkamishe’shi, mudimo wa kulungula mukandu wa Bufumu aukapu pa nsaa ilombane. Tala kibaadi kikitshikye mu mafuku a Nowa. Yehowa baadi muleshe’shi akitaa myanda yooso pa nsaa ilombane. Bipwa peepi na 120 kumpala, Yehowa baadi mupwe kutshiba kipungo akikanoko mpeshi a kabutu. Bipwa bibungi kunyima, Yehowa baadi mulungule Nowa bwadya kupwa bwato. Pangi munda mwa bipwa 40 sunga 50 kumpala kwa’shi mpeshi a kabutu abangye, Nowa baadi nka atungunuka na kufuba ngofu. Sunga bishi’baadi bantu abamutemesha, batungunukile na kwibadimusha mpa na nsaa ibamulungwile Yehowa’shi, nsaa ibalombana ya kutwesha nyema mu bwato. Na pa nsaa ilombane, “Yehowa nkumukangila kiibi.”​—Kib. 6:3; 7:1, 2, 16.

19. Nkinyi kyatupete su tatwibalekye eyaasa dyetu adiikisha?

¹⁹ Mu mafuku apela’mu, Yehowa emika mudimo wa wa kulungula mukandu wa Bufumu. Paapa akabutula ndumbulwilo a Satana na kufwisha ndumbulwilo mupya a bantu abamukookyela. Kubanga binobino, twambuleyi Nowa, Abakuke na bangi bashii batadile’shi eyaasha dyabo dikishe. Tutuleyi mudimo wa bulungudi pa mbalo ya kumpala, twikale na lwishinko, na tulame lukumiino lunyingye mwi Yehowa na mu milayilo yaaye.