1. Kifulo ky’Efile Mukulu akikukwasha bwa kwipusha naminyi?

YOWANO mutumiibwa bafundjile’shi “Efile Mukulu nyi nkifulo.” (1 Yo. 4:8) Penda ano mayi aetutentekyesha bya binyibinyi bi na muulo. Aetutentekyesha’shi Efile Mukulu nsulo ya muwa, mwikale dingi nsulo ya kifulo. Yehowa mmwitufule! Kifulo kyaye akitukwasha bwatudya kwipusha mu kukalwilwa na be na muloo.

2. Muyile Mateo 22:37-40, miiya kinyi ibidi ikata i mwanka, na bwakinyi bi kwitwelela bukopo bwa kukokyela wa kabidi?

² Bena Kidishitu, ta mbalombene kusangula abadya kufula na’shi akufula, mwanda kufula nyi mwiya. (Badika Mateo 22:37-40.) Nsaa y’atuuku Yehowa kalolo, mbilombene kwikala bibofule bwa kukokyela mwiya wa kumpala. Mwanda’shi Yehowa mmupwidjikye, etupasukilaa na etukitshinaa myanda na kalolo. Anka bi kwitwikyela bukopo bwa kukokyela mwiya wa kabidi. Bwakinyi? Mwanda bakwetu balume na bakashi mbakutwe kupwidjika. Ingi nsaa mbalombene kwakula sunga kwitukitshina myanda ishi buwa. Yehowa auku’shi mbilombene kwitwikyela bukopo bwa kukokyela uno mwiya, nyi bwakinyi badi muyokyele bangi bafundji ba Bible bwabadya kwitulongyesha bwakinyi abitungu twifulene na mushindo watudya kwifulena. Mu bano bafundji mwi Yowano.​—1 Yo. 3:11, 12.

3. Yowano badi mushimikye kasele pa kinyi?

³ Mu mikanda yaye, Yowano ashimika kasele’shi; abitungu bena Kidishitu befulene. Mu mukanda wadi mulonde nshalelo a Yesu, Yowano mmufubishe kishima “kufula” na “kifulo”  misango ibungi kukila mu angi ma evanjile asatu. Yowano tabadi alombasha bipwa lukama nsaa ibafundjile evanjile a Yowano, na ingi mikanda yaye isatu. Ino mikanda ayilesha’shi abitungu kifulo kikale na bukitshishi mu byoso abikitshi bena Kidishitu. (1 Yo. 4:10, 11) Sunga byabya, bibadi byate mafuku e bungi bwa’shi Yowano alongye dino dilongyesha.

4. Yowano badi alesha kifulo nsaa yoso su?

⁴ Sunga pabadi mupwe kukila kipungo kya bu nsongwa, Yowano tabadi alesha kifulo nsaa yoso nya. Bu kileshesho, ungi musango, Yesu na balongi baye abadi abakatuka ku Yelusaleme, abende ku Samariya. Anka bantu ba mu kangi ka kibundji ka mu Samariya t’abadi bebakukile nya. Yowano bakitshine kinyi? Aye na mukwabo Shake abalungwile Yesu su abatekye bwa’shi kaalo ka mwiyilu, kafikye kabutule ka kibundji kashima! (Luk. 9:52-56) Ungi musango, Yowano badi mukutwe kulesha bakwabo batumiibwa kifulo. Aye na mukwabo Shake, abadi batume nyinabo bwadya nkebatekyela mbalo i na muulo mu Bufumu bwa Yesu. Nsaa ibadi bangi batumiibwa baukye kibadi Shake na Yowano bakite, abadi bafiite munda! (Mat. 20:20, 21, 24) Sunga bibadi Yowano mukite bino byoso bilubilo, Yesu badi mumufule.​—Yo. 21:7.

5. Nkinyi ky’atutaluula mu uno mwisambo?

⁵ Mu uno mwisambo, atutaluula kileshesho kya Yowano na ingi myanda ibadi mufunde pabitale kifulo. Atulongo mushindo watudya kulesha bakwetu balume na bakashi kifulo. Atulongo dingi pabitale mushindo wi na muulo autungu’shi mfumu oso a kifuko aleshe’shi, mmufule kifuko kyaye.

6. Nkinyi kibadi Yehowa mukite bwa kulesha’shi mmwitufule?

⁶ Kebungi atupwandjikisha’shi, bwa kufula bantu abitungu twikale na mweneno e buwa pabibatale, sunga kwibakula myanda i buwa. Anka bwa’shi kifulo kikale kya binyibinyi, abitungu dingi twikileshe ku bikitshino. (Pwandjikisha na Shake 2:17, 26.) Bu kileshesho, Yehowa mmwitufule. (1 Yo. 4:19) Na alesha’shi mwitufule mu mayi e buwa atusangana mu Bible. (Mis. 25:10; Lom. 8:38, 39) Anka, twibashinkamishe’shi, Yehowa mwitufule kushi penda mu byakula, anka mpa na mu bya kwete kukita. Yowano bafundjile’shi: “Talaayi bibaaleesheeshe Efile Mukulu kifulo kyaaye, baatumine Mwan’aye eeleka pa nsenga, bwa’shi twikale na muuwa mwadi.” (1 Yo. 4:9) Yehowa badi mutadile Mwan’aye adi mufule bwa’shi akyengye na etufwile. (Yo. 3:16) Bino abitushinkamisha’shi Yehowa mmwitufule binyibinyi.

7. Nkinyi kibadi Yesu mukite bwa kulesha’shi mwitufule?

 ⁷ Yesu badi mushinkamiishe balongi baye’shi mwibafule. (Yo. 13:1; 15:15) Badi muleshe bukata bwa kino kifulo, kushi penda mu byakula kadi na mu bikitshino. Yesu bakwile’shi: “Takwi ee na kifulo kikata kikile kya yaawa apaana muuwa waye bwa baadi mufule.” (Yo. 15:13) Nsaa y’atunangushena pabitale bitukitshine Yehowa na Yesu, abitutakula mu kukita kinyi?

8. Nkinyi akitungu’shi tukite muyile 1 Yowano 3:18?

⁸ Atulesha’shi twibafule Yehowa na Yesu pa kwibakokyela. (Yo. 14:15; 1 Yo. 5:3) Na dingi, Yesu mmwitwelele mwiya wa kwifulena. (Yo. 13:34, 35) T’abitungu tulungule penda bakwetu balume na bakashi’shi twibebafule, anka abitungu twibileshe mu byatukitshi. (Badika 1 Yowano 3:18.) Byabya, nkinyi kyatudya kukita bwa kwibalesha’shi twibebafule?

9. Kifulo kibadi kitakule Yowano bwa kukita kinyi?

⁹ Yowano badya kushala na nshaye, bwa kupeta makuta mu mudimo wabo wa kuloba. Kadi badi mulekye nshaye bwa kwipana mu kukwasha bangi bwa’shi balongye bya binyibinyi pabitale Yehowa na Yesu. Nshalelo badi Yowano musangule, ta badi mubofule nya. Badi mukyengye ngofu mwanda wa kubingwabingwa na abadi ba mubingye peepi na nfudilo a siekele a kumpala, aku namu tabadi mununu. (Bik. 3:1; 4:1-3; 5:18; Kibaf. 1:9) Sunga pabadi mu lukano mwanda wa kulungula mukandu wibuwa pabitale Yesu, Yowano badi muleshe’shi mufule bakwabo bena Kidishitu. Bu kileshesho, pabadi mu kisangisangi kya Patmose, bafundjile mukanda wa Kibafumbwilwe, na aye nkwiutumina tukongye bwa’shi tuukye “byabya abitungu kufika binobino.” (Kibaf. 1:1, EEM) Abimweka’shi nsaa ibabadi bamufungule ku Patmose, Yowano badi mufunde evanjile aye alondo nshalelo a Yesu na mudimo waye. Badi dingi mufunde mikanda isatu bwa kunyingisha bakwabo balume na bakashi. Mushindo kinyi odya kwambula kwipana kwa Yowano?

10. Mushindo kinyi odya kulesha’shi we mufule bantu?

¹⁰ Bintu byosangula bwa kukita mu nshalelo, mbilombene kulesha’shi we mufule bantu. Ndumbulwilo a Satana akumiina’shi okishe nsaa yobe yoso na otushe bukome bobe penda mu kwikimbila makuta na kukimba nkumo. Anka balungudi ba Bufumu ba mu nsenga ishima, bakwete kukisha nsaa yabo bwa kulungula mukandu wibuwa na kukwasha bantu bwabadya kwifubwila peepi na Yehowa. Bangi be mpa na mushindo wa kulungula na kulongyesha nsaa yoso.

11. Mushindo kinyi ukwete kulesha balungudi be bungi basha lulamato’shi mbafule Yehowa na bakwabo balume na bakashi?

¹¹ Bena Kidishitu be bungi basha lulamato, abitungu bafube ngofu bwa’shi bamone bya kwikwasha na kukwasha bifuko byabo. Sunga mbyabya, bano balungudi basha lulamato bakwete kukwatshishena ndumbulwilo a Efile Mukulu mu mushindo oso wabadi balombene kwibikita. Bu kileshesho, bangi bakwete kukwasha mbalo ayituku masaku, bangi mu lwibako, na muntu oso e bya kutusha bya buntu byaye bwa kukwatshishena mudimo wa mu nsenga ishima. Abakitshi bino byoso mwanda mbafule Efile Mukulu na bantu nabo. Lubingo loso, atulesha’shi twibafule bakwetu balume na bakashi pa kutwela mu bisangilo na kwimutusha myalulo. Sunga twekala bakookye, bi buwa twende ku bisangilo. Sunga twekala bakalakashwe, bi buwa tutushe myaluulo. Na sunga twekala na myanda yetu’twe  banabene, atunyingisha bangi kumpala sunga kunyima kwa bisangilo. (Eb. 10:24, 25) Twi na lutumbu lukata bwa mudimo wa bakwete kukita kwi bakwetu balume na bakashi!

12. Ungi mushindo kinyi ubadi Yowano muleshe’shi mufule bakwabo balume na bakashi?

¹² Yowano badi muleshe’shi mmufule bakwabo balume na bakashi kushi penda pa kwibatumbula, anka mpa na pa kwibapa malango. Bu kileshesho, mu mikanda yaye, Yowano ebatumbula bwa lukumiino lwabo na midimo yabo i buwa, anka ebapa dingi malango pabitale mulwisho. (1 Yo. 1:8–2:1, 13, 14) Mu mushindo umune, abitungu tutumbule bakwetu balume na bakashi bwa myanda i buwa ya bakwete kukita. Anka su twamona’shi muntu babanga kwikala na kyubishi sunga mwikyelo wi bubi, abitungu tumuleshe kifulo pa kumupa malango na mayele oso. Abikyebe kunying’eshimba bwa kupa kuuku elango, mwanda Bible amba’shi ba kuuku ba binyibinyi abepeshenaa malango.​—Nki. 27:17.

13. T’abitungu tukite kinyi?

¹³ Ingi nsaa atulesha’shi twibafule bakwetu balume na bakashi, pa kupela kukita ingi myanda. Bu kilesheho, t’atufiitshi munda bukidibukidi pabitale by’abakula. Banda kunangushena pabibadi bikitshikile Yesu ku nfudilo kwa muwa waye pa nsenga. Balungwile balongi baye’shi, bwa kupeta muwa abitungu badye mbidi na kutoma mase aye. (Yo. 6:53-57) Uno ngakwilo badi mukalakashe balongi be bungi, abo nkuleka Yesu. Anka ba kuuku baye ba binyibinyi t’abadi bamulekye​—mpa na Yowano. Abadi bashale bamulamate. Kadi, bano balongi t’abadi bapushe kibadi akikyebe kwakula Yesu na abadi bakanye pa kwibipusha. Anka ba kuuku ba Yesu basha lulamato, t’abadi bapwandjikishe’shi byabya bibakula bi bubi na kumufiitshila munda nya. Anka, abadi bamukulupile baukye’shi bakula bya binyibinyi. (Yo. 6:60, 66-69) Kupela kufiita munda bukidibukidi pabitale bibakula ba kuuku betu, kwi na muulo ngofu! Pamutwe pa kufiita munda, twibalekye betupatulwile kyabakyebe kwakula.​—Nki. 18:13; Mul. 7:9.

14. Bwakinyi t’abitungu tushikwe bakwetu balume na bakashi?

¹⁴ Yowano etutosha bwa kupela kushikwa bakwetu balume na bakashi. Su twakutwa kukokyela dingo elango, atwikala ku matalwa a Satana. (1 Yo. 2:11; 3:15) Bino bibadi bikitshikile bangi ku nfudilo kwa siekele a kumpala B.B. Satana badi mukite mwaye moso  bwa’shi kwikale mushikwa na kwiabulushena munkastshi a mwilo w’Efile Mukulu. Mu mafuku abadi Yowano mufunde uno mukanda, mu kakongye mu badi mupwe kwikala bangi bantu abalesha kikudi kya Satana. Bu kileshesho, Dyotrefese badi atwesha kwiabulushena mu kakongye. (3 Yo. 9, 10) Ta badi anemeka bakulu bababadi abatumu kwi kasaka ka bakunkushi-bakulu. Badi mpa na akyebe kubinga boso abadi abakukila bantu babadi mushikwe. Kuno nyi kwitatula kwi kashaa! Satana kwete akitshi mwaye moso lelo uno bwa’shi abuule mwilo w’Efile Mukulu. Tatukumanga kushikwa bakwetu balume na bakashi na kuleka kwibakwasha.

15. Nkinyi akitungu’shi mfumu a kifuko atentekyeshe?

¹⁵ Mwanda wi na muulo aulesha mfumu a kifuko’shi mufule kifuko kyaye, nyi kulombasha nkalo yabo ya ku mbidi. (1 Tim. 5:8) Anka, abitungu atentekyeshe’shi kintu ki na muulo ngofu, nyi kukwasha kifuko kyaye bwakidya kwikala mu kipwano ki buwa na Yehowa. (Mat. 5:3) Tala kileshesho kibadi Yesu mulekyele ba mfumu ba bifuko. Evanjile a Yowano alesha’shi sunga pabadi Yesu ku mutshi wa makyenga, badi nka anangushena pabitale kifuko kyabo. Yowano badi mwimane peepi na Mariya nyinaye na Yesu, mbalo ibabadi bepayile Yesu. Sunga bi tabadi pa kufwa, Yesu badi mulungule Yowano bwadya kupasukila Mariya. (Yo. 19:26, 27) Yesu badi na bakwabo balume na bakashi abadi balombene kupwa nkalo ya Mariya ya ku mbidi, anka abimweka’shi su ngumune a kwabadi tabadi mubande kwikala mulongi aye. Nyi bwakinyi Yesu badi akyebe kushinkamisha’shi, kwi muntu apasukila Mariya ku mbidi na mu kikudi.

16. Yowano badi na mashito kinyi?

¹⁶ Yowano badi na mashito e bungi. Bu bibadi mutumiibwa, bibadi abitungu’shi ekale na kisumi mu mudimo wa bulungudi. Abimweka’shi badi mwibakile, nyi bwakinyi bibadi abimutungu’shi ekale na nkatshinkatshi pabitale kulombasha nkalo ya ku mbidi na ya mu kikudi ya kifuko kyaye. (1 Kod. 9:5) Bino abilongyesha ba mfumu ba bifuko kinyi?

17. Bwakinyi abitungu’shi mfumu a kifuko apasukile nkalo ya mu kikudi ya kifuko kyaye?

¹⁷ Mfumu a kifuko mulombene kwikala na mashito e bungi. Bu kileshesho, e kwikala na kisumi ku mudimo waye wa ku mbidi, na bino abitumbisha Yehowa. (Ef. 6:5, 6; Tt. 2:9, 10)  Na mulombene kwikala dingi na mashito e bungi mu kakongye bu: kwenda mu kunyingisha na kupasukila bakwetu bena Kidishitu, na kwikala na kisumi mu bulungudi. Na dingi bi na muulo bwa’shi ekale alongo Bible na kifuko kyaye. Kifuko kyaye akikala na lutumbu lwi bungi bwa byoso bya kwete kukita bwa’shi bekale na mbidi bukome na muloo, mpa na kulama kipwano kyabo na Yehowa.​—Ef. 5:28, 29; 6:4.

18. Yowano badi mushinkamishe kinyi?

¹⁸ Yowano mmushale bipwa bi bungi na mupete myanda i bungi i buwa. Mupete dingi nkalakashi ibadya kubofusha lukumiino lwaye. Anka nsaa yoso, Yowano badi akitshi mwaye moso bwa kukokyela miiya ya Yesu mpa na wa kufula bakwabo balume na bakashi. Nyi bwakinyi Yowano badi mushinkamishe’shi Yehowa na Yesu mbamufule, na bino bibadi abimunyingisha bwa kukambila lukalakashi loso lubadi apete. (Yo. 14:15-17; 15:10; 1 Yo. 4:16) Satana na ndumbulwilo aye, ta babadi balombene kwimika Yowano bwadya kufula bakwabo balume na bakashi na kwibalesha mu ngakwilo na mu bikitshino byaye’shi mwibafule.

19. Mukanda wa 1 Yowano 4:7 awitunyingisha bwa kukita kinyi na bwakinyi?

¹⁹ Nka bu Yowano, twibashale mu nsenga y’abakunkusha kwi Satana, shi mufule muntu su ngumune. (1 Yo. 3:1, 10) Sunga by’akumiina’shi tulekye kufula bakwetu balume na bakashi, te na ngobesha ya kwibikita, nka su twamulekyela. Byabya, twikaleyi na kitshibilo kya kufula bakwetu balume na bakashi, na kwibalesha’shi twibebafule mu byatwakula na byatukitshi. Paapa, atwikala na muloo wa kwikala mu kifuko kya Yehowa. Atwikala na muloo wi bungi.​—Badika 1 Yowano 4:7.