1. Mukanda wa 2 Beena-Kodinda 3:1-3, awitukwasha naminyi bwatudya kwata na kineemo mwabi watudi nao wa kulonga na bantu mpa na ku lubatshisho? (Tala kifwatulo kya ku kipusu.)

OPUSHAA naminyi su umona mulongi a Bible a mu kakongye kenu abatshishibwa? Binyibinyi, wekalaa na muulo wi bungi! (Mat. 28:19) Bikishekishe su noobe alonganga na yawa muntu, wekala na muulo ngofu. (1 Tes. 2:19, 20) Mulongi mupya bakatuka mu kubatshishibwa e bu mukanda wibuwa ufundjibwe, kushii penda kwi yawa alonganga naye Bible, kadi kwi kakongye koso.​—Badika 2 Beena-Kodinda 3:1-3.

2. (a) Lukonko kinyi lwi na muulo alutungu’shi twiyipushe, na bwakinyi? (b) Kulonga Bible na muntu akupushisha kinyi? (Tala mayi e kushi kw’esaki.)

² Bi muloo pa kumona’shi, mu bipwa binanka bishale, twi balongye na bantu * 10 000 000 mweshi oso mu nsenga ishima. Nka mu byabya bipwa bimune, bantu 280 000 abaadi ababatshishibwa kipwa kyoso na kufika bu ba Temwe ba Yehowa na balongi bapya ba Yesu Kidishitu. Mushindo kinyi watudya kukwasha ino midiyo ya balongi ba Bible bwayidya kubatshishibwa? Paki’nka Yehowa na lwishinko na kupa bantu mushindo wa kwikala balongi ba Kidishitu, tukite mwetu moso bwa kwibakwasha bwashi babatshishibwe bukidibukidi. Nsaa ibashala ngipela!​—1 Kod. 7:29a; 1 Mp. 4:7.

3. Nkinyi kyatutaluula mu uno mwisambo pabitale kulonga Bible na bantu?

 ³ Bu byabidi’shi kwikasha bantu bu balongi kwi na muulo binobino, Kasaka ka Bakunkushi-Bakulu kabalungwile ma filiale kyatudi balombene kukita bwa kukwasha balongi ba Bible mpa na ku lubatshisho. Mu uno mwisambo na mu aulondo, atukyebe kumona kyatudi balombene kulongyela kwi ba mbala-mashinda, ba misionere na bakunkushi ba bifunda abauku kukita mudimo wa bulungudi kalolo. * (Nki. 11:14; 15:22) Abapushisha kilombene kukita mulongyeshi na mulongi aye a Bible bwa’shi kulonga kwabo kutushe bipeta bi buwa. Mu uno mwisambo atutaluula myanda itano ayitungu’shi mulongi a Bible akite bwa kushintula nshalelo aye na kubatshishibwa.

4. Nkinyi akitungu tushingule pabitale kulonga Bible na bantu bwimane bwa kapindji kapela?

⁴ Bangi bakwetu balume na bakashi, ababanga kulonga Bible na bantu bwimane nka’bo baky’abemonena nabo ku mashibo aabo. Sunga byabidi’shi uno nyi mushindo wibuwa wa kubanga kubusha lukalo lwa muntu bw’Eyi dy’Efile Mukulu, ke bungi ino miisambo ayikitshikaa mu kapindji kapela na bwa mafuku apela. Bwa kunyisha kunyingisha lukalo lwaye, bangi bakwetu bena Kidishitu abateka yawa muntu nimero bwa kumwitamina sunga kumufundjila kifundwe kumpala kwashi bemonene dingi. Ino miisambo i kutungunuka mund’a myeshi ibungi kushii bipeta bi kapu. Mulongi a Bible, mulombene kwilambula na kubatshishibwa su t’aata nsaa ibungi na kwipana bwa kulonga Bible su? Nya.

5. Mbikunyi byatudi balombene kufubisha mayi a Yesu e mu Luka 14:27-33, bwa kukwasha balongi betu ba Bible?

⁵ Yesu baadi mutushe kileshesho bwa kulesha kilombene kukita muntu akumiina kwikala mulongi aye. Baadi mwakule pabitale muntu akyebe kwibaka nshibo na mfumu akyebe kwenda mu ngoshi. Bwa muntu akyebe kwibaka, Yesu bakwile’shi: ‘Abaadila kushaala bwa kubadika mfwalanga aitungiibwa’ bwa kutala su mulombene kupudisha lwibako; na bwa mfumu bakwile’shi: ‘abanda kushaala bwa kushingula’ su e na kilwilo kya basalayi kilombene kulwa na kutshimuna. (Badika Luka 14:27-33.) Bi mumune, Yesu auku’shi muntu oso akyebe kwikala mulongi aye, abitungu etaluule bwa kuuka kalolo akipushisha kulonda Yesu. Bwa kano kabingilo, abitungu tunyingishe mulongi a Bible bwatudya  kulonga naye lubingo loso. Twikwibikita naminyi?

6. Nkinyi akitungu’shi tutompe kukita bwa kulonga Bible na bantu kalolo?

⁶ Banga kukisha kipindji kila na bantu abakumiina kulonga Bible bwimane ku mashibo aabo bwa musango wa kumpala. Pamutwe pa kumubadikila penda kifundwe kimune, we kumubadikila bibidi sunga bisatu musango oso wende mu nkamutala. Su yawa muntu bapu kubiila kwisamba nobe kipindji kila, we mulombene kumwipusha su kwi mbalo yanudi balombene kushala bwa kutungunuka na kwisamba. Lwaluulo lwaye alulesha mushindo wata na muulo kulonga kwa Bible. Bwa kumukwasha bwa’shi atame mu kikudi bukidibukidi, mwipushe su akumiina kulonga misuusa ibidi ku lubingo. Anka kwi myanda ibungi ayitungu kukita bwa kulonga dimune sunga kabidi ku lubingo.

7. Mushindo kinyi ulombene mulongyeshi kwilumbuula kalolo bwa kulonga koso?

⁷ Bu byodi Mulongyeshi, abitungu wekale welumbuula kalolo bwa kulonga koso. We mulombene kubanga kubadika mukanda wanukalongo na kukimbuula bifundwe kalolo. Uuka lwaluulo kalolo. Nangushena pabitale akyakwila mutwe wa mwanda, tumitwe twa mwanda, nkonko, bifundwe bya “kubadika,” bifwatulo na video yoso ilombene kupatuula mutwe wa mwanda kalolo. Akupu, nangushena pabitale mulongi oobe a Bible na mushindo odi mulombene kumupatulwila myanda mu mushindo utookane, upelepele bwa’shi eyipushe kalolo na eyitumikile.​—Ne. 8:8; Nki. 15:28a.

8. Mayi a Mpoolo e mu Beena-Kolose 1:9, 10, aetulongyesha kinyi pabitale kuteka bwa balongi betu ba Bible?

⁸ Nsaa yw’elumbuula, teka Yehowa pabitale mulongi obe a Bible na pabitale nkalo yaye. Teka Yehowa bwa’shi akukwashe olongyeshe Bible mu mushindo aukumu eshimba dya muntu. (Badika Beena-Kolose 1:9, 10.) Nangushena kumpala myanda ilombene kwikeela mulongi obe a Bible bukopo kupusha na ingi yashii pangi mulombene kukumiina. Uuka’shi kabingilo kobe nka kumukwasha bwa’shi abatshishibwe.

9. Mulongyeshi e kukwasha mulongi aye a Bible bwadya kwilumbuula naminyi? Patuula.

⁹ Atukulupila’shi kulonga na muntu Bible lubingo loso, akumukwasha bwadya kulesha lutumbu lwaye bwa byoso bikite Yehowa na Yesu na abimutakula bwadya kulonga bi bungi. (Mat. 5:3, 6) Bwa’shi byabya  byalongo bimukwashe, abitungu mulongi a Bible atume binangu kwanka. Bwa kumukwasha, mupatulwile bwakinyi bi na muulo bwadya kwilumbuula kumpala kwa kulonga na kunangushena ku mushindo wadya kwibitumikila mu nshalelo aye. Mulongyeshi aye e kumukwasha naminyi bwadya kwilumbuula? Lumbuula naye pamune bwa kumulesha mushindo wadya kwibikita. * Mupatulwile byadya kupeta ngaluulo ku nkonko ya bikoso na kumulesha byadya kwela tushonyi pa myanda ikata ilombene kumukwasha bwa kutentekyesha lwaluulo. Akupu, mulungule bwa kutusha lwaluulo mu mayi aye’ye nabene. Su akita byabya, mbilombene nkukwasha bwa kuuka su kwete apusha kalolo binyi byalongo. Kwi kingi kintu kyodya kunyingisha mulongi bwa kukita.

10. Bwakinyi kubadika Bible efuku dyoso kwi na muulo, na nkinyi akitungu’shi mulongi a Bible akite bwa’shi byabadika bimukwashe?

¹⁰ Kukatusha kulonga Bible lubingo loso na mulongyeshi aye, abitungu mulongi a Bible ekitshine ingi myanda. Abitungu ekale esamba na Yehowa. Naminyi? Pa kumuteemesha na pa kwisamba naye. Ateemesha Efile Mukulu pa kwibadikila Bible efuku dyoso. (Yos. 1:8; Mis. 1:1-3) Muleshe bya kufubisha “Programe a kubadika Bible ku masaki” e mu jw.org. * Byabya, bwa’shi byabadika bimukwashe, munyingishe bwadya kunangushena pa byabimulongyesha pabitale Yehowa na mushindo wadi mulombene kwibitumikila mu nshalelo aye.​—Bik. 17:11; Shak. 1:25.

11. Mushindo kinyi ulombene mulongi a Bible kulonga bya kuteka kalolo, na bwakinyi bi na muulo ekale atekye Yehowa nsaa yoso?

¹¹ Nyingisha mulongi obe a Bible bwa kwisamba na Yehowa pa kumuteka efuku dyoso. Ku mbangilo na ku nfudiilo kwa kulonga koso, ekala otekye n’eshimba dyobe dyoso na ekala otemuna mulongi obe a Bible mu yaya nteko. P’apusha nteko yobe, alongo byadya kwikala atekye Yehowa n’eshimba dyoso mwishina dya Yesu Kidishitu. (Mat. 6:9; Bik. 15:16) Banda kunangushena kubadika Bible efuku dyoso (kuteemesha Yehowa) na kuteka (kwisamba naye) byabidi bilombene kukwasha mulongi a Bible bwa kwifubwila peepi na Yehowa! (Shak. 4:8) Su akitshi bino efuku dyoso, mbilombene kumukwasha bwa kwela matabula alombene kumufikisha mu kwilambula na  kubatshishibwa. Nkinyi dingi kilombene kumukwasha?

12. Mushindo kinyi ulombene mulongyeshi kukwasha mulongi a Bible bwadya kunyingisha kipwano kyaye na Yehowa?

¹² Myanda ayilongo mulongi a Bible t’ayikumu penda mu binangu byaye nya, ayimukumu mpa na mwishimba dyaye. Bwakinyi? Mwanda eshimba dyetu​—adibungu nkalo yetu, byatwipusha na byatunangushena​—na aditutakula bwa kukita kintu kapanda. Yesu baadi alongyesha bantu myanda ibungi, na abaadi abakumiina kulongyela myanda kwadi. Nyi bwakinyi bantu abaadi abamulondo mwanda baadi akumu mashimba aabo. (Luk. 24:15, 27, 32) Abitungu mulongi obe a Bible amone Yehowa bu muntu a binyibinyi, na bu muntu akudya naye kipwano, amumone bu Nshaye, Efile aye na bu kuuku aye. (Mis. 25:4, 5) Nsaa yanulongo, shimika kasele pa ngikashi y’Efile Mukulu. (Efi. 34:5, 6; 1 Mp. 5:6, 7) Mu mitwe ya mwanda yoso yanulongo, shimika kasele pa bu muntu bwa Yehowa. Kwasha mulongi obe a Bible bwadya kusankila ngikashi ya Yehowa bu kifulo, kalolo na lusa. Yesu bambile’shi: “mwiiya ukata na wa kumpala” nyi ‘nkufula Yehowa Efile Mukulu oobe.’ (Mat. 22:37, 38, Kilombeeno kipya 2014) Kwasha mulongi obe a Bible bwadya kufula Yehowa n’eshimba dyaye dyoso.

13. Tusha kileshesho akilesha mushindo wakukwasha mulongi a Bible bwa kulonga ngikashi ya Yehowa.

¹³ Mu miisambo yobe na mulongi a Bible, mupatulwile bwakinyi we mufule Yehowa. Bino mbilombene kumukwasha bwakudya bu kuuku na Yehowa na kumufula. (Mis. 73:28) Bu kileshesho, kwi mulongo sunga kifundwe kampanda mu mukanda wanulongo, akilesha eyikashi kapanda pabitale Yehowa​—bu kifulo, kinangu, kululama sunga bukome​—akikumu eshimba dyobe su? Ekilungule mulongi obe a Bible na omupushishe’shi, kano nyi nkamune ka ku tubingilo kabaadi nkatakule bwa kufula Nshetu e mwiyilu. Kwi kingi kintu akitungu’shi mulongi oso a Bible akite bwadya kubatshishibwa.

14. Mayi e mu Beena-Ebelu 10:24, 25, aalesha kinyi pabitale bisangilo, ekukwasha mulongi a Bible bwa kweela matabula naminyi?

¹⁴ Atwe boso atukumiinaa’shi balongi betu ba Bible, bele matabula mpa na ku lubatshisho. Ungi mushindo wi na muulo watudya kwibakwasha, nyi kwibanyingisha bwabadya kutwela mu bisangilo. Balongyeshi be buwa  abamba’shi, balongi ba Bible ababanga kutwela mu bisangilo kushii kunyengakana, abelaa matabula bukidibukidi. (Mis. 111:1) Bangi balongyeshi abalungula balongi babo ba Bible’shi mbalombene kulonga myanda ibungi mu bisangilo kukila nsaa y’abalongo Bible ku nshibo. Badika Beena-Ebelu 10:24, 25 na mulongi obe a Bible na omupushishe bwakinyi bi buwa ekale afiki ku bisangilo. Muleshe video amba’shi: Nkinyi akikitshikaa ku Nshibo ya Bufumu? * Mukwashe bwa’shi aate kitshibilo kya kukutwa kupisha bisangilo.

15. Nkinyi kyatudya kukita bwa kunyingisha mulongi a Bible bwa’shi ekale atwele mu bisangilo lubingo loso?

¹⁵ We kukita kinyi su mulongi obe a Bible t’afikaa mu bisangilo, sunga’shi afikaa binyibyabya? Na muloo oso, mulungule mwanda wa nulongyele mu bisangilo binobino. Nsaa y’amono byw’epusha bwa bisangilo, abimupa malaka akufika kwanka. Mupe Kitenta kya Mulami sunga Programe a bisangilo bya bwina Kidishitu na mudimo wetu bya nukwete kulonga mu bisangilo. Muleshe myanda y’anukalongo mu bisangilo abilondo, na omwipushe kipindji kibamusankisha. Myanda y’amono na kupusha mu bisangilo byaye bya kumpala, ayimusankisha ngofu kukila bitaadi mupushe na mumone ku bingi bipwilo. (1 Kod. 14:24, 25) Akafumankana na bantu be buwa baadi mulombene kwambula na abamukwasha bwa kwela matabula mpa na ku lubatshisho.

16. Nkinyi akitungu kukita bwa kulonga Bible na muntu mpa na ku lubatshis

¹⁶ Mushindo kinyi watudi balombene kulonga Bible na bantu mpa na ku lubatshisho? Tukwashe mulongi oso a Bible bwadya kwata kulonga na muulo pa kumunyingisha bwadya kulonga lubingo loso, na kulumbuula kipindji kyoso kya kulonga. Abitungu tumuyingishe dingi bwadya kwikala atekye Yehowa na kunyingisha kipwano kyaye naye. Tunyingishe mulongi a Bible bwadya kwikala atwele mu bisangilo. (Tala kashibo: “ Kyakukita balongi ba Bible bwabadya kwela matabula mpa na ku lubatshisho.”) Mwisambo aulondo, aupatuula ingi myanda itano ya kukita balongyeshi bwa kukwasha balongi babo ba Bible mpa na ku lubatshisho.