1. Nkinyi akitungu’shi bena Kidishitu babatshishibwe batungunukye na kukita?

WE MUPWE kubatshishibwa su? Su mbyabya, we muleshe patoka’shi we na lukumiino mwi Yehowa na okumiina kufuba pamune na ndumbulwilo aye. * Byabya, abitungu lukumiino lobe mwi Yehowa lunyishe kunyinga. Na abitungu onyingishe lukumiino lobe’shi Yehowa kwet’akunkusha ndumbulwilo aye lelo uno.

2-3. Yehowa kwet’akunkusha ndumbulwilo aye lelo uno mushindo kinyi, na ngikashi kinyi ayibilesha?

² Lelo uno, Yehowa kwete akunkusha ndumbulwilo aye mu mushindo aulesha ngikashi yaye, mpángo na miiya yaye. Tutaluuleyi ngikashi isatu ya Yehowa ayimweneka mu ndumbulwilo aye.

³ Kya kumpala, “Efile Mukulu tee na ntondo.” (Bik. 10:34) Kifulo kibaadi kitakule Yehowa bwa kutusha Mwan’aye bu “nkuulo ku mwanda wa bantu booso.” (1 Tim. 2:6, Kilombeeno kipya 2014; Yo. 3:16) Yehowa kwet’afubu na mwilo waye bwa kulungula mukandu wibuwa kwi baba abakumiina kwiuteemesha. Mu wawa mushindo, akwasha bantu boso bwabadya kupeta myabi ya nkuulo. Kya kabidi, Yehowa t’Efile Mukulu akafutakanyi, anka nga butaale. (1 Kod. 14:33, 40) Nyi bwakinyi, tukwete kumona bafubi baye abamufubila kushii kafutakanyi, kadi mu butaale. Kya kasatu, Yehowa nyi “Mulongyeshi mukata.” (Yesh. 30:20, 21, NWT) Nyi bwakinyi, ndumbulwilo aye kwete ekitshisha bwa kulongyesha bantu Bible byabikala mu kakongye sunga mu bulungudi. Bena Kidishitu ba kumpala abaadi bambule ino ngikashi isatu naminyi? Mu mushindo kinyi mukwete kwiyambula bafubi ba Yehowa lelo uno? Na mushindo kinyi awitukwasha kikudi kiselele bwa kufuba pamune na ndumbulwilo a Yehowa lelo uno?

4. Muyile Bikitshino 1:8, Yesu balungwile balongi baye bwabadya kukita kinyi, na mbukwashi kinyi bubabadya kupeta?

⁴ Mu siekele a kumpala. Mukandu ubaadi Yesu alungula, ubaadi aupa bantu boso lukulupilo. (Luk. 4:43) Baadi mulungule balongi baye bwabadya kutungunuka na kukita uno mudimo “mpaa na kufudiile nsenga.” (Badika Bikitshino 1:8.) Binyibinyi’shi, t’abaadi balombene kukita uno mudimo na bukome bwabo’bo banabene. Abaadi na lukalo na “mukwashi”​—kwamba’shi kikudi kiselele kibaadi Yesu mwibalee.​—Yo. 14:26; Sek. 4:6.

5-6. Mu mishindo kinyi mu baadi kikudi kiselele kikwashe balongi ba Yesu?

⁵ Balongi ba Yesu abaadi bapete kikudi kiselele mwifuku dya Pentekote a kipwa kya 33 B.B. Na bukwashi bwa kyakya kikudi, ababangile nka paapa kulungula mukandu wibuwa, na mu mafuku apela bantu binunu abaadi bakumiine mukandu wibuwa. (Bik. 2:41; 4:4) Nsaa ibababangile kwibabingabinga, balongi t’abaadi bakookye nya, anka abaadi batekye Yehowa bukwashi. Abatekyele’shi: ‘Pa bafubi boobe bukome bwa kuukisha Eyi dyoobe na mashimba anyingye.’ Ku bukwashi bwa kikudi kiselele, abatungunukile na ‘kuukisha na mashimba anyingye Eyi dy’Efile Mukulu.’​—Bik. 4:18-20, 29, 31.

⁶ Balongi ba Yesu abafumankene na ingi nkalakashi. Bu kileshesho, mifungofungo ya bifundwe tayibaadi ibungi nya. Ta kubaadi mikanda ayipatuula Bible bu byatudi nayo lelo uno nya. Na balongi abaadi abalambukisha bantu abakula ndimi ilekene. Sunga bibaabadi bafumanakane na ino yoso nkalakashi, bano balongi ba sha kisumi, abaadi bakite kintu kibaadi akimweka bu kishaa kukitshika. Mund’a bipwa 30, abaadi balungule mukandu wibuwa “munkatshi abipangwa byoso bii mushi mu’eyilu.”​—Kol. 1:6, 23, Esambi dipya 2015.

7. Sunga takudi kupwe kukila bipwa 100, mushindo kinyi ubaadi uukye bafubi ba Yehowa ky’ebatekye, na abakitshine kinyi?

⁷ Lelo uno. Yehowa kyatungunuka na kukunkusha mwilo waye na kwiupa bukome bwa kukita kikyebe ky’eshimba dyaye. Bwabwa bunkunkushi, abukambaa kutukila Mwiyi dyaye diyokyelwe. Mwanka, atupete mudimo wa Yesu na mudimo ubaadi mutumine balongi baye eyi’shi batungunukye na kukita. (Mat. 28:19, 20) Kitenta kya Mulami kya mweshi wa 7/1881, kibaadi akyamba’shi: “Yehowa ta mwitusangule bwatudya kupeta kineemo kwi bantu, sunga kwikala ba mpeta, kadi bwa kufuba na kyoso kyatudi nakyo bwa kulungula mukandu wibuwa.” Broshire a Nnanyi abadi bape uno mufubo (mu Anglais) baadi mutukye mu 1919, baadi amba’shi: “Mudimo wi bungi, anka nyi mudimo wa mwanana na etupa bukome bwa kwiukita.” Binyibinyi, nka bu bena Kidishitu ba kumpala, bano bakwetu abaadi bepaane mu mudimo, bashinkamishe’shi kikudi kiselele akibakwasha bwadya kulungula uno mukandu wibuwa kwi bantu boso. Natwe namu twi bashinkamishe’shi kikudi kiselele akitukwasha lelo uno.

8-9. Mishindo kinyi ifubishe ndumbulwilo a Yehowa bwa kupalakasha mukandu wibuwa?

⁸ Ndumbulwilo a Yehowa mmufubishe bina mudimo bi buwa bwa kupalakasha mukandu wibuwa. Mu bino bina mudimo, mwi mikanda, “Photo drame de la création” ma phonographes, myotoka i na bikolo, bisashi, na binobino tukwete kufubisha ma ordinatere na Internete. Ndumbulwilo a Yehowa kwete kukita mudimo ukile bukata wa kwaluula mikanda mu ndimi ikile bungi byabisha’kitshikile dingi! Bwakinyi? Bwa’shi bantu boso bapushe mukandu wibuwa mu ludimi lwabo lwa butandwa. Yehowa te na ntondo nya; baadi mupwe kutemuka’shi, uno mukandu wibuwa aukalungulwa “kwi eumbo dyoso, kisamba, mwakulo na mwilo ooso.” (Kibaf. 14:6, 7) Akumiina’shi muntu oso, apushe mukandu wibuwa wa Bufumu.

 ⁹ Twi kwamba naminyi bwa bantu batusha tulungula mukandu wibuwa mwanda bakwete kwibalama? Bwa kulungula bano bantu mukandu wibuwa, Yehowa mmukwashe ndumbulwilo aye bwa kubanga kufubisha mishindo ilekene ya kulungula mukandu wibuwa mbalo i bantu be bungi. Bu kileshesho, mu 2001 Kasaka ka Bakunkushi-Bakulu, kabaadi kakumiine bwa’shi babangye kufubisha tutempu twa mikanda na ingi mishindo ayilesha mikanda yetu mu France, kunyima mu angi ma mbalo bakwetu ababangile kufubisha aa mayele. Bipeta bibaadi bibuwa. Mu 2011, programe mupya baadi mubangye mu États-Unis pa mbalo i bantu be bungi mu eumbo dya New York. Mu kipwa kya kumpala kya uno programe mupya kubanga, abaadi baabe mikanda 102 129 na ma jurnale 68 911. Na bantu 4 701 abaadi batekye bwa’shi balongye nabo Bible. Atumono patoka’shi, Yehowa baadi mufubishe kikudi kyaye bwa kukwatshishena uno mudimo. Nyi bwakinyi Kasaka ka Bakunkushi-Bakulu kabaadi kakumiine’shi, bakwetu balume na bakashi bafubishe ano mayele mu nsenga ishima.

10. Nkinyi kyatudi balombene kukita bwa kwikala balongyeshi be buwa?

¹⁰ Kyodya kukita. Kita mobe moso bwa kufubisha mayele akwete kwitulongyesha Yehowa mu bisangilo. Ikala olungula pamune na kasaka kobe ka bulungudi. Mwamwa, bakwetu balume na bakashi abakukwasha bwodya kwikala mulungudi na mulongyeshi e buwa, na kileshesho kyabo ki buwa akikunyingisha. Tungunuka na kulungula sunga opeta nkalakashi. Nka bu abibilesha kifundwe kya mutwe wa mwanda, tukwete kukumbasha kikyebe ky’eshimba dy’Efile Mukulu, kushii mu bukome bwetu, kadi ku bukwashi bwa kikudi kyaye. (Sek. 4:6) Atushinkamisha’shi Yehowa etupa bukome mwanda tukwete kukita mudimo waye.

11. Mushindo kinyi ubaadi kasaka ka bakunkushi-bakulu ka mu siekele a kumpala kafube mu buumune bwa kupela kafutakanyi munkatsh’a mwilo wa Yehowa?

¹¹ Mu siekele a kumpala. Kasaka ka bakunkushi-bakulu kabaadi ku Yeelusaleme, kabaadi akafubu mu buumune bwa’shi ta kwikalanga kafutakanyi munkatshi mwa mwilo wa Yehowa, kadi mwikale butaale. (Bik. 2:42) Bu kileshesho, pabaadi patukye mwanda wa kusadibwa pangi mu kipya kya 49 B.B., kasaka ka  bakunkushi-bakulu kabaadi kataluule uno mwanda ku bukwashi bwa kikudi kiselele. Su kakongye kabaadya kutungunuka na kwikala ketshibuule, mudimo wa kulungula mukandu wibuwa ta ubadya kwenda kalolo nya. Sunga byabaadi bena Yunda, batumiibwa na bakulu t’abaadi batadile bipikwa byabo bya bwina Yunda by’ebatakula bwa kwata bitshibilo nya. Anka abaadi bakimbuule Mwiyi dy’Efile Mukulu na kuteka bukwashi bwa kikudi kiselele bwa’shi baate kitshibilo ki buwa. (Bik. 15:1, 2, 5-20, 28) Mbipeta kinyi bibatukile? Yehowa baadi mwelele kitshibilo kyabo mwabi, kakongye nkutungunuka na kushala mu butaale na mu buumune, na mudimo wa kulungula mukandu wibuwa wayididila kumpala.​—Bik. 15:30, 31; 16:4, 5.

12. Nkinyi akilesha’shi myanda i mu mulongo na mu butaale mu ndumbulwilo a Yehowa lelo uno?

¹² Lelo uno. Ndumbulwilo a Yehowa kwete akitshi mwaye moso bwa’shi kwikale butaale, kushi kafutakanyi mu mwilo wa Yehowa. Kubanga kala, Kitenta kya Mulami a siyoona na mukendji wa kwikala kwa Kidishitu kya 15/11/1895 kibaadi na mutwe wa mwanda awamba’shi: “Myanda ikitshikye mu kalolo na kwilondena mu mulongo,” wimene mu mukanda wa 1 Beena-Kodinda 14:40. Mwisambo ubaadi aulesha’shi: “Batumiibwa abaadi bafundjile kakongye ka kumpala myanda ibungi pabitale kukita myanda mu kwilonde mu mulongo . . . Bi na muulo ukata kutungunuka na kukookyela ‘byooso bibabafundjile kala bwa kwitulambukisha.’” (Lom. 15:4, Kilombeeno kipya 2014) Ndumbulwilo a Yehowa kwete kufuba ngofu lelo uno bwa’shi tukongye twa bena Kidishitu twikale mu butaale kushii mu kafutakanyi nka bibaadi bena Kidishitu ba mu siekele a kumpala. Bu kileshesho, su okatwela mu kangi kakongye bwa kulonda kulonga kwa Kitenta kya Mulami​—byabikala mwiumbo dyobe sunga mu dingi eumbo, ouku mushindo wabe kikunkusha na mwisambo wa kulonga lwalwa lubingo. Yaya nsaa wepusha nka bu e mu kakongye kenu! Nka penda kikudi ky’Efile Mukulu nyi kilombene kwikasha buno buumune!​—Sef. 3:9.

13. Mukanda wa Shake 3:17, awitutakula mu kwiyipusha nkonko kinyi?

¹³ Kyodya kukita. Yehowa akumiina’shi bafubi baye ‘beefumbakashe bwa kulama buumune bwa kikudi abwibabungu pamune mu butaale.’ (Ef. 4:1-3) Binobino eyipushe’shi: ‘Nakwatshishenaa buumune na butaale bwa kakongye su? Nakookyelaa baba bakwete kwikakunkusha?  Bangi mbalombene kunkulupila, bikishekishe su ne na mashito mu kakongye? Nekadikaa pa nsaa, kukwasha bangi, na kwikala na bukidi bwa kufuba su?’ (Badika Shake 3:17.) Su omono’shi kwi mbalo yodi mulombene kulumbuula, teka bukwashi bwa kikudi kiselele. P’onyisha kutadila kikudi kiselele bwakidya kwikala na bukitshishi mu nshalelo na mu bikitshino byobe, bakwetu balume na bakashi abanyisha nkufula na nkwata na muulo.

14. Muyile Beena-Kolose 1:9, 10, mushindo kinyi ubaadi Yehowa alongyesha mwilo waye mu siekele a kumpala?

¹⁴ Mu siekele a kumpala. Yehowa ekalaa na muloo wi bungi wa kulongyesha mwilo waye. (Mis. 32:8) Akumiina’shi bamwiukye, ba mufule, na bekale na muwa wa loso bu bana baye ba kifulo. Bino byoso nta mbilombene kukitashika su ta kwete kwibalongyesha. (Yo. 17:3) Yehowa baadi mufubishe kakongye ka bena Kidishitu ka mu siekele a kumpala bwa kulongyesha mwilo waye. (Badika Beena-Kolose 1:9, 10.) Kikudi kiselele, akyo kikale bu “mukwashi”​—kibalayile Yesu, kibaadi dingi kikwashe balongi bikata. (Yo. 14:16) Kikudi kiselele kibakwashile balongi bwabadya kupusha Eyi dy’Efile Mukulu, na kutentekyesha myanda yoso ibambile na ibakitshine Yesu, ibabaadi bafunde kunyima mu ma Evanjile. Kino kiukilo kibaadi kinyingishe lukumiino lwa bena Kidishitu ba kumpala pamune na kifulo kyabo bw’Efile Mukulu, bwa Mwan’aye na kwifulena munkatshi mwabo.

15. Okwete kumona bikwete kulombasha Yehowa mulayilo waye wi mu Yeeshaya 2:2, 3 mu mishindo kinyi?

¹⁵ Lelo uno. Yehowa baadi mutemukye’shi “mu mafuku a ku nfudîlo,” bantu ba bisamba byoso abakafiki ku mwengye waye wa mu kifwanyi bwa’shi ebalongyeshe mashinda aye. (Badika Yeeshaya 2:2, 3.) Tukwete kumona kulombana kwa bwawa butemuki. Lulangwilo lwa binyibinyi lwi kunuundu kula kukila ndangwilo yoso ya madimi. Na Yehowa kwete kupa bafubi baye byakudya bya mu kikudi! (Yesh. 25:6) Ku bukwashi  bwa “mpika a lulamato na mudimukye,” kwete kwitupa byakudya bi bungi mu mishindo ilekenelekene. Bu kileshesho, twi kubadika myanda mu mikanda yetu, kuteemesha miisambo na kutala ma video. (Mat. 24:45) Atwipusha nka bu Eliwu kuuku a Yoobo bambile’shi: “Nnanyi eûku kulambukisha bu [Efile Mukulu]?”​—Yob. 36:22, EEM.

16. We kukita kinyi bwa kunyinga mu kikudi?

¹⁶ Kyodya kukita. Kikudi ky’Efile Mukulu akikukwasha bwodya kufubila byokwete kubadika na kulonga Mwiyi dyaye. Teka nka bu mufundji a misambo’shi: ‘Yehowa ndamukishe eshinda dyoobe, bwashi ntambukile mu biinyibiinyi byoobe. Fukamisha eshimba dyande bwa’shi ditshine eshina dyoobe.’ (Mis. 86:11) Byabya, tungunuka na kubadika na kulonga Bible na ingi mikanda yoso ikwete kutusha ndumbulwilo a Yehowa. Kabingilo kobe t’akekalanga penda ka kupeta kiukilo nya. Kekale ka kushinkamisha’shi we na bya binyibinyi na kwibifubila mu nshalelo obe. Kikudi kya Yehowa nkilombene nkukwasha bodya kwibikita. Na dingi abitungu wekale onyingisha bakwetu balume na bakashi. (Eb. 10:24, 25) Bwakinyi? Mwanda bena kifuko kyobe ba mu kikudi. Teka bwa’shi kikudi ky’Efile Mukulu kikwashe bodya kwikala otusha ngaluulo ayitukila kwishimba mu bisangilo na bwa kukita mobe moso midimo yabakupa. P’okitshi byabya, olesha Yehowa na Mwan’aye’shi we mufule “mikooko” yabo i na muulo.​—Yo. 21:15-17.

17. Mu mishindo kinyi modi mulombene kulesha’shi okwete kukwatshishena na lulamato ndumbulwilo a Yehowa?

¹⁷ Binobino, akukashala nka penda ndumbulwilo umune akunkushibwa na kikudi ky’Efile Mukulu pa nsenga. Byabya, fuba na kisumi pamune na ndumbulwilo a Yehowa. Lesha’shi we mufule bantu boso nka bu bibafule Efile Mukulu p’obe kulungula mukandu wibuwa kwi bantu boso bofumankana nabo. Ambula kifulo kyaye bwa kukita myanda mu mulongo na kwikala mu butaale pa kukwatshishena buumune bwa kakongye. Na teemesha Mulongyeshi obe mukata pobe kulonga myanda yoso ya kwete kutusha. Paapa, nsaa ayikafudila ndumbwilo a Satana, tokekala na moo nya. Anka okekala n’eshimba dinyingye na kwikala munkatshi mwa baba bakwete kufuba na lulamato pamune na ndumbulwilo a Yehowa.