1-2. Mushindo kinyi watudi balombene kutumikila elango di mu Nkindji 4:25? Tusha kileshesho.

BANDA kunangushena ku bino bileshesho bisatu. Mukwetu mukashi bapu kukula atentekyesha mafuku e buwa abadi mukishe ku bu nsongwa. Sunga ekala na nkalakashi binobino kwete akitshi mwaye moso bwa kufubila Yehowa. (1 Kod. 15:58) Efuku dyoso emonaa na bakwabo badi mufule mu nsenga ipya. Ungi mukwetu mukashi atentekyesha bibadi ungi mukwetu mukashi mu kakongye mumutape kwishimba, anka batshile kitshibilo kya kwibilwankana. (Kol. 3:13) Mukwetu mulume atentekyesha milwisho ibadi mukite, anka akitshi mwaye moso bwa kushala mulamate kwi Yehowa binobino.​—Mis. 51:12.

² Mwanda kinyi wi mumune ukite bano bakwetu basatu? Oso akwabadi atentenkyesha myanda ya kala, anka t’abatumu binangu byabo ku yanka nya. Kadi meso abo ‘ngatadile kalolo kumpala.’​—Badika Nkindji 4:25.

3. Bwakinyi abitungu ‘meso etu atadile kalolo kumpala’?

³ Bwakinyi bi na muulo bwa’shi ‘meso etu atadile kalolo kumpala’? Nka bubi’shi bilombene muntu atala kunyima kwenda kumpala kalolo, n’atwe namu takwi balombene kufubila Yehowa su atunangushena nsaa yoso ku myanda ipwe kukila.​—Luk. 9:62.

4. Nkinyi kyatutaluula mu uno mwisambo?

⁴ Mu uno mwisambo, atutaluula myanda isatu yatudya kudimukila, mwanda’shi ngilombene kwitutakula bwa kunangushena nka ku myanda ipwe kukila: (1) kukumiina’shi nshalelo etu ekale nka bibadi, (2) kulama ngo, na (3) kwitopeka bwa milwisho yetu ikile. Mu mwanda oso, atumono abitukwasha mayi a kulonda a mu Bible, bwa ‘kuluba bii ku mongo’ na ‘kwenda . . . batadiile kumpala.’​—Fid. 3:13.

5. Muyile Mulungudi 7:10, nkinyi kyatusha kukita?

⁵ Badika Mulungudi 7:10. Lamiina’shi verse t’amba’shi bi bubi kwiipusha’shi: “A mafuku akala kyaadi buwa nkinyi?” Mwanda kutentekyesha nyi kya buntu kya Yehowa. Kadi verse amba’shi: “Ta bi buwa kwipusha’shi: ‘A mafuku akala kyaadi akile alelo buwa nkinyi?’” Nyi bwakinyi abitungu tudimukile muteo wa kwamba’shi, nshalelo abatudi naye badi mukile buwa, na’shi atudi naye binobino mmukile bubi.

6. Bwakinyi ta bi buwa kunangushena’shi nshalelo abatudi naye badi mukile buwa? Tusha kileshesho.

⁶ Bwakinyi ta bi buwa kunangushena nsaa yoso’shi nshalelo atubadi naye badi mukile buwa? Mwanda bino bilombene kwitutakula nka penda ku myanda i buwa ya kala. Na kuluba nkalakashi yatubadi bapete. Banda kutala kileshesho kya bena Isaleele. Kunyima kwabo kutuka mu Ejiipitu, abadi balube bukidibukidi nshalelo e bubi ababadi naye mwanka. Anka abo nkutuma binangu byabo penda ku byakudya bi buwa. Babadi abamba’shi: “Tubatentekyesha bya kudya byetu bya tubedîlanga buntu mu Eshipitu: mishipa na makâka na melô na pwalo na tutungulu mpâ na ai.” (Mb. 11:5, EEM) Binyibinyi shi ‘abebidîlanga buntu?’ Nya. Bena Isaleele abadi abakyengye ngofu; ingi nsaa abadi abebakyengyesha mu Ejiipitu mwanda’shi abadi ba mpika. (Efi. 1:13, 14; 3:6-9) Anka, abadi bayilwankane ino yoso nkalakashi, na abo nkubanga kulakila myanda ya kala. Abadi basangule bwa kutuma binangu byabo ku myanda ya kala ibadi ayibasankisha, pamutw’a ku nangushena ku myanda ibadi Yehowa mu katukye mu kwibakitshina. Yehowa ta badi musangale bwa uno mweneno abo nya.​—Mb. 11:10.

7. Nkinyi kibadi kikwashe mukwetu mukashi bwa’shi tanangushenaga’shi nshalelo abadi naye badi buwa bukile?

⁷ Twi kudimukila muteo wa kupwandikisha’shi nshalelo atudi naye ekale nka bu atubadi naye naminyi? Tala kileshesho kya mukwetu mukashi babangile kufuba ku Betele a mu Brooklyn mu kipwa kya 1945. Kunyima kwa bipwa, abamwibakile kwi mungi mwina  Betele na abo kutungunuka na kufuba munda a bipwa bi bungi. Byabya mu kipwa kya 1976, mulume aye badi mukumbe. Amba’shi pabamwene mulume aye’shi lufu lwaye alwifubwila peepi, bamupele elango di buwa dibadya ku mukwasha kunyima kya lufu lwaye. Bamulungwile’shi: “Twi bapete eyibakishi dya muloo, dish’adipete bantu be bungi.” Bamulungwile dingi’shi: “Toyilwa myanda yoso i buwa ya tukitanga nya, anka tonangushenanga nsaa yoso ku yanka. Apende mafuku na kukila, kinyongwa kyobe akipele. Tokumanga kubofula kwishimba na kwinyongola pa mwanda wa bi bakufikila. Ekala na muulo bwa nsaa yatudi bakishe boso mu kufubila Yehowa. . . . Ngobesha ya kutentekyesha myanda ikile nyi kya buntu kya Yehowa.” Tomono’shi dino dibadi elango di buwa su?

8. Myabi kinyi ipete mukwetu mukashi p’aye ku nangushena ku myanda ayifiki kumpala?

⁸ Mukwetu mukashi badi mulonde elango dya mulum’aye. Aye nkufubila Yehowa na lulamato loso mpa na ku lufu lwaye, aye na bipwa 92. Bipwa bipela kumpala kwa’shi afwe bakwile’shi: “Pantentekyesha bipwa 63 byandi mukite mu mudimo wa nsaa yoso, ne kwamba’shi ne mukishe nshalelo a muloo.” Bwakinyi? Apatuula’shi: “Twi na muloo mwanda twi mu kifuko kya bakwetu balume na bakashi na atukulupila nkekala nabo mu mpaladiso pa nsenga, atufubila Mupangi etu Mukata Yehowa, Efile a binyibinyi bwa loso.” * Twi kulonga bi bungi kwi uno mukwetu mukashi badi anangushena nka ku milayilo ya Yehowa!

9. Nka bu byabadi bebileshe mu Beena-Levi 19:18, nsaa kinyi yabidi bilombene kwitwikela bukopo bwa kufwila muntu betutapa kwishimba lusa?

⁹ Badika Beena-Levi 19:18. Ingi nsaa bi kwitwikela bukopo bwa kufwila mwina kakongye, kuuku, sunga mwina kifuko kyetu betutapa kwishimba lusa. Bu kileshesho, ungi mukwetu mukashi badi mudimbile ungi’shi, bamwibi  makuta. Kunyima, batundwile’shi, bamudimbila na aye nkumuteka lusa. Anka uno mukwetu mukashi ababadi badimbile, batungunukile nka na kumufitshila munda na kunangushena pa wawa mwanda. Tobodi nobe namu mupushe byabya su? Sunga’shi tatwafumankene na luno lukalakashi, bakwetu be bungi mbalombene kupwandjikisha’shi, tatwi balombene kufwila muntu betutapa kweshimba lusa.

10. Nkinyi kilombene kwitukwasha bwa kupela kulama ngo?

¹⁰ Nkinyi kilombene kwitukwasha bwa kupela kulama ngo? Tutentekyeshe’shi Yehowa auku myanda yoso yatupete. Bu kileshesho, nsaa y’abetukitshina myanda na kukutwa kululama. (Eb. 4:13) Apusha bi bubi nsaa ya tukyengye. (Yesh. 63:9) Na etulaa bwa nketukatwisha myanda yoso ya kukutwa kululama y’abetukitshina.​—Kibaf. 21:3, 4.

11. Myabi kinyi y’atupete su tubata kitshibilo kya kupela kulama ngo?

¹¹ Tutentekyeshe dingi’shi nsaa y’atufwila bangi lusa, atwipusha kalolo. Ngi kibatundwile yawa mukwetu mukashi ababadi badimbile. Mwenda mafuku, badi mobeshe kufwila yawa mukwetu bamudimbidile’shi, mmwibe makuta lusa. Badi mutundule’shi nsaa y’atufwila bangi lusa, Yehowa namu etufwila lwanka. (Mat. 6:14) Badi auku’shi byabya bibadi bimukitshine yawa kukwetu mukashi bibadi bubi, anka batshile kitshibilo kya kupela kulama ngo. Nyi bwakinyi badi na muloo wi bungi na badi mobeshe kutula binangu byaye ku mudimo wa Yehowa.

12. Mukanda wa 1 Yowano 3:19, 20, ubetulongyesha kinyi?

¹² Badika 1 Yowano 3:19, 20. Ingi nsaa atwitopekaa bwa milwisho yatubadi bakite. Bu kileshesho, bangi abetopekaa bwa milwisho ibabadi bakite kumpala kwa kulonga bya binyibinyi. Bangi namu abetopekaa bwa milwisho yabadi bakite kunyima kwa lubatshisho. Bantu boso abepushaa nka bino. (Lom. 3:23) Eyondo, atukumiinaa kukita bi buwa. Anka “atukokolaa atwe booso mu bipaso bi bungi.” (Shak. 3:2, Kilombeeno kipya 2014; Lom. 7:21-23) Sunga t’atukumiinaa kwitopeka bwa milwisho ibatudi bakite, kwibikita a kwitukwasha. Mushindo kinyi? Akwitukwasha bwa kushintuula nshalelo etu, na kwata kitshibilo kya kupela kukita dingi yaya milwisho.​—Eb. 12:12, 13.

13. Bwakinyi t’abitungu tutungunukye na kwitopeka bikilekile bwa milwisho yetu ya kala?

¹³ Ku lungi lupese, twi balombene kwitopeka bikishekishe bwa milwisho yatubadi bakite, bino bikutungunuka mpa na kunyima kwa Yehowa kwitufwila lusa, atwe bapwe kwilanga. Kwitopeka kwa mu uno mushindo kwi masaku. (Mis. 31:11; 38:4, 5) Bwakinyi? Tutaluule kileshesho kya ungi mukwetu mukashi, badi mutungunukye nka na kwitopeka bwa milwisho yaye ya kala. Amba’shi: “Bibadi abingyelela bukopo bwa kufubila Yehowa ngofu, mwanda pangi ntankapashibwa.” Be bungi ba kwatudi be kwipusha nka bu uno mukwetu mukashi. Ndjo bwakinyi abitungu tudimukile kwitopeka kukilekile bwa milwisho ikile. Banda kupwandjikisha muloo wi kwikala nao Satana su twaleka kufubila Yehowa​—sunga Yehowa ekala mupwe kwitufwila lusa!​—Pwandjikisha na 2 Beena-Kodinda 2:5-7, 11.

14. Nkinyi akitushinkamisha’shi Yehowa akumiina kwitufwila lusa?

¹⁴ Anka twi kwiyipusha’shi, ‘Nkinyi akishinkamisha’shi Yehowa mupwe kunfwila lusa?’ Su weyele luno lukonko, abilesha’shi Yehowa e nkufwila lusa. Bipwa bi bungi kumpala, kingi Kitenta kya Mulami kibakwile’shi:  “Twi kutungunuka na kukita nka yaya milwisho imune na bikumweneka’shi ta twibobeshe kwiyikambila. . . . Anka, tatubofulanga. Topwandjikishanga’shi we mukite mulwisho ushi ulombene Yehowa nkufwila lusa. Nyi akikyebe Satana’shi onangushene. Bodi mwinyongole nsaa ibodi mukite uno mulwisho, bino abilesha’shi twe nka muntu e bubi na’shi Yehowa e nkufwila lusa. Shala mwiyishe na otungunukye na kuteka Yehowa’shi akufwile lusa, na akukwashe opete dingi kondo k’eshimba katokane. Efubwile kwi Yehowa nka abyenda mwana kwi nshaye nsaa yadi na lukalakashi, na sunga apeta mwanda umune misango i bungi, enda nka kwi nshaye bwa kumuteka bukwashi. Byabya, tungunuka na kuteka Yehowa bukwashi na akukwasha mwanda wa buntu bwaye.” *

15-16. Bangi abapushaa naminyi nsaa y’abatundula’shi Yehowa akumiina kwibafwila lusa?

¹⁵ Bafubi ba Yehowa be bungi mbanyingishibwe pa kuuka’shi Yehowa mmwibafwile lusa. Bu kileshesho, takudi bipwa bi bungi, ungi mukwetu mulume badi munyingishibwe na mwanda wa ungi mulungudi, wi mu misambo ayamba’shi: “Bible kwete kushintula nshalelo a bantu.” Mu wawa mwisambo, mukwetu mukashi ashinkamisha’shi, pa mwanda wa milwisho yaye ya kala, bibadi abimwelela bukopo bwa kushinkamisha’shi Yehowa mumufule. Mmulwe na bino binangu munda mwa bipwa bi bungi kunyima kwaye kubatshishibwa. Anka, p’aye kunangushena ku mulambu wa nkulo, babangile kumona myanda mu ungi mushindo. *

¹⁶ Mwanda waye ubadi ukwashe mukwetu mulume naminyi? Yawa mukwetu mulume bafundjile’shi: “Nadi natala pornografi ngofu, na bibadi bingyele bukopo bwa kuleka. Bipwa bishale’bi nadi mubanguule dingi kumutala. Nadi mutekye bukwashi kwi bakulu, na ami nkwikitshisha bwa kukambila uno mwanda. Bakulu abankwashishe bwa kushinkamisha’shi Yehowa munfule na akumiina kunfwila lusa. Sunga mbyabya, natungunukile nka na kwipusha bu’mi shi na muulo na’shi Yehowa ta mulombene nkufula. Kubadika mwanda  wa uno mukwetu mukashi, kubadi kunkwashe ngofu. Binobino, natundula’shi nsaa yangyele binangu’shi Efile Mukulu ta mulombene kunfwila lusa, bi’nka bu’mi akumiina’shi mulambu wa Mwan’aye, ta ngulombane bwa kubwikila milwisho yande. Nadi mutshibe wawa mwisambo bwa’shi nekale neubadika nsaa ayinfwila binangu bya’shi Yehowa ta munfule.”

17. Mushindo kinyi ubadi Mpoolo mudimukile muteo wa kwitopeka bikilekile bwa milwisho yaye ya kala?

¹⁷ Misambo bu ino ayitutentekyesha Mpoolo mutumiibwa. Kumpala kwadya kufika mwina Kidishitu, badi mukite milwisho i bungi. Mpoolo baadi atentekyesha bibadi mukite, anka tabadi ebitentekyesha nsaa yoso nya. (1 Tim. 1:12-15) Badi amono’shi mulambu wa nkulo nyi kya buntu kimupebwe. (Nga. 2:20) Mpoolo badi mudimukile muteo wa kupela kwitopeka kukilekile pabitale milwisho yaye ya kala, kadi aye nkutuma binangu byaye mu kufubila Yehowa.

18. Nkinyi kibatulongo mu uno mwisambo?

¹⁸ Miteo ibatutalula mu uno mwisambo ibetulongyesha kinyi? (1) Kutentekyesha myanda ikile nyi kya buntu kya Yehowa; anka sunga tubadi na nshalelo e buwa bwi naminyi, atukekala naye mu nsenga ipya akekala buwa bukilekile. (2) Bangi mbalombene kwitutapa kwishimba, kadi su twata kitshibilo kya kwibafwila lusa, atutumu binangu byetu mu kufubila Yehowa. (3) Kwitopeka kukilekile pabitale milwisho yetu ya kala, nkulombene kwitukutshisha kufubila Yehowa na muloo. Anka bu Mpoolo, abitungu tushinkamishe’shi Yehowa mwitufwile lusa.

19. Atuuku naminyi’shi mu nsenga ipya t’atukatentekyesha dingi myanda ibadi ayitwinyongosha?

¹⁹ Twi na lukulupilo lwa kwikala na muwa wa loso. Patukekala mu nsenga ipya, t’atukatentekyesha dingi kintu akitwinyongosha. Pabitale aa mafuku, Bible amba’shi: “Bantu taabakatentekyesha dingi myanda ya-kala.” (Yesh. 65:17) Banda kunangushena, be bungi ba kwatudi mbanunupile mu mudimo wa Yehowa, anka mu nsenga ipya, abakela dingi ba nsongwa. (Yob. 33:25) Byabya, twateyi kitshibilo kya kupela kutula binangu byetu ku myanda ipwe kukila. Anka twimone mu nsenga ipya na tukite kyoso akitungu bwa nkemutwela!