1. Ntubingilo kinyi twi pa bwato atwitutakula bwa kwikala na muloo?

TWI na muloo wibungi wa kupusha’shi bafubi b’Efile Mukulu bakwete kumunyika etaata dyabo! Mu kipwa kishale, ba Temwe ba Yehowa mbalongye Bible na bantu bakile pa 10 000 000. Bantu midiyo abakumina kwituteemesha mbafikye ku Kitentekyesho kya lufu lwa Yesu na mbalongye myanda ibungi pabitale mulambu wa nkuulo wabadi betupe bu kya buntu kya kifulo kwi Yehowa.​—1 Yowano 4:9.

2, 3. (a) Mmyanda kinyi ishi ilombene kwitwimika mu kumunyika etaata dyetu bu “bimunyi by’etaata”? (b) Mu uno mwisambo atukyebe kwisambila myanda kinyi?

² Mu nsenga ishima, ba Temwe ba Yehowa abakula ndimi ilekene. Anka, bino tabitukutshishwa kutumbisha Yehowa bu mwilo wi mu buumune nya. (Kibafumbwilwe 7:9) Sunga twekala atwakula ludimi kinyi na bashale mu mbalo kinyi, twi balombene kumunyika etaata dyetu bu “bimunyi by’etaata pano pa nsenga.”​—Beena-Fidipe 2:15.

³ Mudimo wetu wa bulungudi, buumune bwetu bwa bena Kidishitu, na binangu byetu bya kufuba bukidibukidi, ino myanda yoso ayitumbisha Yehowa. Twi kumunyika etaata dyetu mu ino myanda isatu naminyi?​—Badika Mateo 5:14-16.

4, 5. (a) Kukatusha mudimo wa bulungudi, twi kumunyika etaata dyetu naminyi? (b) Mbipeta kinyi bi buwa byatudi balombene kupeta su tubekala na kalolo? (Tala kifwatulo ki ku mbangilo.)

⁴ Kulungula mukandu wibuwa na kwikasha bantu bu balongi nyi mushindo ukile buwa watudi balombene kumunyika etaata dyetu. (Mateo 28:19, 20) Mu kipwa kya 1925, mubadi mwisambo wi na mutwe wa mwanda awamba’shi: “Etaata mu mufito” ubadi awamba’shi mu mafuku a ku nfudilo, muntu su ngumune ta mulombene kwikala na lulamato kwi Mwanana su ta mukimbe “mushindo wa kumunyika etaata dyaye.” Ubambile dingi’shi: “Mulombene kukita bino pa kulungula mukandu wibuwa kwi bantu be pa nsenga, na kwikala na nshalelo mwipushena na dino etaata.” (Kitenta kya Mulami, kya mu 1/6/1925, mu Anglais) Kukatusha mudimo wetu wa kulungula mukandu wibuwa, mwikelo wetu autumbisha Yehowa. Bantu bebungi abetumonaa nsaa yatulungula mukandu wibuwa. Nsaa yatusepe nabo na kwibasema na muloo, abibakwasha bwabadya kwikala na binangu bibuwa pa mwanda wetu na bw’Efile Mukulu atulangwila.

⁵ Yesu balungwile balongi baye’shi: “Panutwele mu shibo nwibayimune.” (Mateo 10:12, Kilombeeno kipya 2014) Mu ma mbalo moso mubabadi balungule mukandu wibuwa kwi Yesu, bantu babadi na kipikwa kya kukuukila bantu benyi ku mashibo aabo. Lelo uno, mu ma mbalo e bungi bantu ta be na kino kipikwa nya. Bantu be nka na nsungu sunga bafiite munda nsaa yabamono muntu mwenyi bafiki kwabo ku nshibo. Anka su twi na kalolo na kusepa na bantu, mbalombene kukatusha ino nsungu. Nsaa yolungula mukandu wibuwa mu ma mbalo mwi bantu bebungi ku bukwashi bwa ma mesa a kutudila mikanda, we mupwe kumona’shi su bosepe na kusema bantu na muloo, abasankila kufika mu kwata mikanda su? Mbalombene mpa na kukumina kubanga kwisamba netu!

6. Nkinyi kibakwashishe ungi mulume na mukashi batabadi banunu bwabadya kutungunuka na kulungula mukandu wibuwa?

⁶ Ungi mulume na mukashi batabadi bantu banunu ba mu Angleterre ta be na ngobesha ya kulungula dingi mukandu wibuwa ku nshibo na nshibo mu mushindo ubabadi abakitshi ku mpala pa mwanda wa kukumba nya. Ngi bwakinyi babadi abatuulu mesa a mikanda kumpala kwa nshibo yabo. Mbashale pepi na kalasa, ngi bwakinyi babadi abatuulu mikanda ilombene kukwasha ba nambutwile babadi abafiki mu kwata bana babo. Bamo ba nambutwile abatshile ino mikanda, mpa na mukanda wa Les jeunes s’interrogent — Réponses pratiques, volume 1 na 2. Misusa ibungi ungi mukwetu mukashi mbala-mashinda badi afiki mu kufuba na uno mulume na mukashi. Bano ba nambutwile abadi bamone’shi uno mukwetu mukashi e na mwikelo wibuwa na’shi uno mulume na mukashi be na lukalo lwa kukwasha bangi. Ungi nambutwile babangile mpa na kulonga Bible.

7. We kukwasha bantu basukile mu teritware eenu naminyi?

⁷ Mu mafuku ashale, bantu bebungi abekalanga basuukye mu maumbo aabo na binobino mbashale mu maumbo mwabadi basuukile. We kukita naminyi bwa kukwasha bano bantu basuukye be mu teritware eenu bwabadya kulonga bwa kuuka Yehowa? Kya kumpala, abitungu olongye bya kwibeela moyo mu ludimi lwabo. Na dingi, ku bukwashi bwa application a JW Language, we kulonga myaku ipeela ilombene kwibatakula bwa kukumina kwisamba nobe. Kunyima we kwibalesha ma video na mikanda i mu ludimi lwabo mu jw.org.—Miiya Ikituulwe 10:19.

8, 9. (a) Bisangilo byetu bya munkatshi mwa lubingo abitukwashaa naminyi? (b) Ba nambutwile be kukwasha bana babo bwabadya kulumbula myanda yabadya kwaluula mu bisangilo naminyi?

⁸ Yehowa sha kifulo mmwitupe bintu byoso byatudi nabyo lukalo bwatudya kulungula mukandu wibuwa. Bu keleshesho, myanda yatulongo  mu kisangilo kya Bwina Kidishitu na Mudimo wetu ayitukwasha bwatudya kukatusha moo nsaa yatwalukila mu kutala bantu na kubanga kulonga nabo Bible.

⁹ Apafiki bantu benyi mu bisangilo byetu, misusa ibungi abakemaa nsaa yabapusha bana bakinga abaluula mu bisangilo. We mulombene kulongyesha bana bobe bwabadya kwikala abaluula mu bisangilo mu bishima byabo’bo banabene. Bangi bantu mbakakibwe mu bya binyibinyi nsaa ibabadi bapushe bana bakinga abaluula mu bisangilo mu bishima bipelepele na abituukila mu mashimba aabo.​—1 Beena-Kodinda 14:25.

10. Lulangwilo lwa mu kifuko lwi kukwasha bwa’shi bifuko bikale mu buumune naminyi?

¹⁰ Nsaa yatwikitshisha ngofu bwa kulongyesha bantu ba mu kifuko kyetu bwabadya kufuba pamune mu buumune na mu butaale, atutumbisha Yehowa. Bu kileshesho, su we nambutwile, ata mpango ya kutwesha lulangwilo lwa mu kifuko ku lubingo loso. Bena bifuko bebungi ababandilaa, Televizion a JW pamune, akupu abesambila mushindo wabadi balombene kufubisha myanda ibabalongo. Tentekyesha’shi bukunkushi abutungu kupa mwana mukinga mbwilekene na abutungu kupa mwana tadi mu bipwa ekumi na bungi. Ekitshishe na mobe moso bodya kukwasha muntu oso e mu kifuko kyobe bwadya kupeta myanda ayimukwasha mu lulangwilo lwa mu kifuko.​—Misambo 148:12, 13.

11-13. Twi kukwasha kakongye ketu bwakadya kunyisha kwikala mu buumune naminyi?

¹¹ Sunga wekala nsongwa, we kukita bya’shi muntu oso e mu kakongye apushe’shi mbamufule. Umune wa ku mishindo ya kukita bino nkudya bu kuuku na bakwetu balume na bakashi bapwe kununupa. Ebayipushe kibadi kibakwashe bwabadya kutungunuka na kufubila Yehowa munda mwa bipwa bibungi. Be nkupa malongyesha e bungi e na muulo. Bino abibakankamika, bikukankamikye mpa n’obe! Na dingi boso bwetu, byatwikala bakulu sunga bakinga, twi balombene kukwasha bantu benyi abafiki ku Nshibo yetu ya Bufumu bwa’shi bepushe bu be kwabo. Kintu ki na muulo akitungu’shi okite nkwibasema, kwibasepesha, kwibakwasha bwabadya kupeta mbalo ya kushala, na kwibalesha bangi bantu. Ebakwashe bwa’shi bepushe bu be kwabo.

¹² Nsaa yabakupa bwa kukunkusha kisangilo kya bulungudi, we mulombene kukwasha bantu bakulu bwabadya kutungunuka na kumunyika etaata dyabo. Ebape teritware mwibapwandikile.  Ebabile bwa’shi bafube pamune na ba nsongwa. Bakwetu bapwe kununupa na be na lukalakashi lwa mbidi abapushaa kutshoboloka pa mwanda wa’shi ta be na ngobesha ya kulungula bu bibabadi abalungula kumpala. Anka mbalombene kupusha buwa ngofu nsaa yabamono’shi okwete kwibapasukila na kwibakitshina myanda muyile nshalelo aabo. Sunga bekala bapwe kukula naminyi na bapwe kukita mafuku e bungi mu bya binyibinyi, kalolo kobe kwebakitshina nkalombene kwibakankamika bwabadya kutungunuka na kulungula mukandu wibuwa na katshintshi.—Beena-Levi 19:32.

¹³ Bena Isaleele abadi na muloo wa kulangwila Yehowa pamune. Mufundji a misambo bafundile’shi: “Nyi mmulòo kinyi na mmwabi kinyi wa kushaala pamune buu beena-kifuko!” (Badika Misambo 133:1, 2.) Badi mupwandikishe buumune na mwimu wa malashi aupongoloka, aubofusha kikoba na kutusha eshiko dibuwa. Mu mushindo umune, twi kutaadisha mashimba a bakwetu balume na bakashi pa kwikala na muloo na kalolo. Bino abinyisha kutwesha buumune mu kakongye. We kwikitshisha bwa kuuka bakwetu ba mu kakongye kenu kalolo su?​—2 Beena-Kodinda 6:11-13.

14. Mmushindo kinyi oodi mulombene kulekyela etaata dyobe adimunyika mu mbalo yoso yoodi mushale?

¹⁴ Etaata dyenu ndilombene kumunyika mbalo yoso yanudi. Mwikelo oobe wi buwa ngulombene kutakula bena mutumba nobe bwabadya kulonga myanda ibungi pabitale Yehowa. Eyipushe obe nabene’shi: ‘Bena mutumba nami bakwete kunangushena naminyi pa mwanda wande? Nshibo yande ngitokye na kulumbuulwa kalolo su? Ngilombene kumweneka bibuwa kwi bena mutumba su? Nankwashaa namu bankungishanyi nami su?’ Ipusha bangi ba Temwe mushindo ubadi wikale kalolo kaabo na kileshesho kyabo kibuwa na bukitshishi kwi bakwabo, bankungishanyi, bena mudimo sunga bena kalasa naabo.​—Beena-Efeso 5:9.

15. Bwakinyi abitungu tushale bapasukye?

¹⁵ Su atukyebe’shi etaata dyetu dikale adimuka ngofu, abitungu tushinguule mafuku atudi kalolo. Misusa ibungi, Yesu balungwile balongi baye’shi: “Ikalai bapasukye.” (Mateo 24:42; 25:13; 26:41, EEM) Su tubamono’shi “mpombo ikata” iki kula, tatukashala bapasukye bwa kukimba mushindo watudi balombene kulungula bangi bantu pabitale Yehowa nya. (Mateo 24:21) Pamutwe pa kumunyika etaata dyetu ngofu, etaata dyetu adibanga kumwemweeta kapelakapela pangi dikafikye mpa na mu kushima.

16, 17. We kukita kinyi bwa kulama binangu byobe bya kukita myanda lubilolubilo?

¹⁶ Abitungu twikale bapasukye binobino kukila byatwikalanga bapasukye kumpala. Myanda ya mu uno ndumbulwilo ikwete kwenda na kunyisha kulwila. Anka atuuku’shi nfudilo ayikafiki pa nsaa yabadi bapwe kutshiba kwi Yehowa. (Mateo 24:42-44) Patuki’atutengyela, abitungu twikale na lwishinko na kutula binangu byetu ku myanda yatutengyela. Ikala obadika Bible efuku dyoso, kushi kwimika kuteka Yehowa. (1 Mpyeele 4:7) Longyela ku bileshesho bya bakwetu balume na bakashi abapu kufubila Yehowa munda mwa bipwa bibungi. Bu kileshesho, we kubadika miisambo ya nshalelo a bantu, bu mwisambo awamba’shi: “Cramponné depuis 70 ans au pan du vêtement d’un Juif” ubatukile mu Kitenta kya Mulami kya mu 15/4/2012, esaki 18-21.

¹⁷ Ikala na myanda ibungi ya kukita mu mudimo wa Yehowa. Kitshina bangi myanda ya kalolo, na wekale oshala pamune na bakwenu balume na bakashi. Su bokitshi byabya, okekala na muloo, na okamono’shi nsaa ikwete kukila lubilolubilo. (Beena-Efeso 5:16) Bafubi ba Yehowa mbakite myanda ikata ibungi mu bipwa lukama bibashala. Na dingi, lelo uno twi na myanda ibungi ya kukita. Mudimo wa Yehowa ngwende na kutama ngofu kukila byatupwandikishanga. Etaata dyetu dikwete kumunyika ngofu!

18, 19. Bakulu mbalombene kwitukwasha bwatudya kufubila Yehowa na katshintshi naminyi? Tuusha kileshesho.

 ¹⁸ Sunga twakita bilubilo bibungi, Yehowa etupa mushindo wa kutungunuka na kumufubila. Bwa kwitukwasha, mmwitupe “bantu [bekale] bya buntu,” bakulu mu kakongye. (Badika Beena-Efeso 4:8, 11, 12.) Byabya, nsaa yabafiki mu nkutala kwi bakulu, kimba mushindo odi mulombene kufuba na ino nsaa bwa kupeta malongyesha ku binangu na ku elango dyabakupa.

¹⁹ Bu kileshesho, ungi mulume na mukashi ba mu Angleterre abadi na nkalakashi mu eyibakishi dyabo, abo nkuteka bakulu babidi bwa’shi bebakwashe. Mukashi badi apusha’shi mulume tabadi amukunkusha bwadya kufubila Yehowa. Mulume namu badi apusha’shi ta mwikale mulongyeshi e buwa na badi mukumine’shi tabadi aata mpàngo ya kutwesha lulangwilo lwa mu kifuko lubingo loso. Bakulu abakwashishe uno mulume na mukashi bwabadya kunangushena ku keleshesho kya Yesu. Abadi bakankamikye mulume bwadya kwambula mushindo ubadi Yesu apasukila balongi baye. Abadi bakankamikye mukashi bwadya kwikala na lwishinko kwi mulum’aye. Abadi baleshe dingi uno mulume na mukashi mishindo yabadi balombene kutwesha lulangwilo lwa mu kifuko pamune na bana babo. (Beena-Efeso 5:2”1-29) Mulume badi mwikitshishe ngofu bwadya kwikala nfumu a kifuko e buwa. Bakulu abadi bamukankamikye’shi tabofulanga bwadya kutungunuka na kukulupila kikudi kya Yehowa. Kifulo na kalolo bibabadi bamuleshe kwi bakulu bibadi bikwashe kifuko kyaye ngofu!

20. Mbipeta kinyi byatudi balombene kupeta nsaa yatumunyika etaata dyetu?

²⁰ “Baba boso abanêmekâ Yehowa na kukitanga akikyebe eshimba dyê, be na mulô!” (Misambo 128:1, EEM) Okekala na muloo nsaa yomunyika etaata dyobe. Byabya longyesha bangi myanda y’Efile Mukulu, ekitshishe na mobe moso bwa kukwasha kifuko kyobe na kakongye bwakadya kwikala mu buumune, na otungunukye na kwikala mupasukye. Bangi bantu abakamono kileshesho kyobe kibuwa abakakumina kutumbisha Nshetu, Yehowa.​—Mateo 5:16.