1. Mufubo w’Efile Mukulu ubaadi aukitshika naminyi ku mbangilo?

YEHOWA na Yesu be mu buumune kubanga ku mbangilo kwa kupanga. Yehowa bapangile Yesu kumpala kwa bintu byoso. Yesu baadi afubu naaye akupu baadi “peepi naaye bu mukwashi.” (Nkindji 8:30) Bafubi ba Yehowa namu abafubaa pamune na bangi mu mudimo wabadi nao. Bu kileshesho, Nowa na kifuko kyaye babaadi bakite bwato. Kunyima beena Isaleele babafubile booso bwa kwibaka tabernakele, kutwala bipindji byaye na kumutentulusha mu ma mbalo elekeene. Mu ntempelo, babaadi abayimbi ngono na byombwanga bwa kutumbisha Yehowa na mizike ibuwa. Bafubi ba Yehowa abaadi na ngobesha ya kukita bino byoso mwanda babaadi abafubu pamune na bangi.—Kibangilo 6:14-16, 22; Mbadiko 4:4-32; 1 Myanda 25:1-8.

2. (a) Nkinyi kibaadi kya kukaanya pabitale kakongye ka beena Kidishitu ba kumpala? (b) Nkonko kinyi yatukyebe kutaluula?

² Beena Kidishitu ba mu siekele a kumpala abaadi abafubu dingi mu buumune. Mpoolo mutumibwa baadi mupatuule’shi sunga beekala na ngobesha ilekeene na midimo ilekeene, babaadi mu buumune. Booso  babalondele kileshesho kya Nfumwabo Yesu Kidishitu. Mpoolo baadi mwibapwandjikishe na mbidi i na bipindji bilekeene abifubu mu buumune. (Badika 1 Beena-Kodinda 12:4-6, 12.) Kadi twi kwamba naminyi bwetu lelo uno? Twi kufuba naminyi mu buumune na bangi mu bulungudi, mu kakongye na mu kifuko?

3. Nkimonwa kinyi kibamwene Yowano mutumibwa?

³ Mu siekele a kumpala, Yowano mutumibwa bamwene kimonwa kya miikeyilu musambo ibaadi ayele mpungi. Pabaadi mwikeyilu a katano mwele mpungi, Yowano bamwene “lwenyeenye lubakatukile mwiyilu, lwapona pa nsenga.” Lwalwa “lwenyeenye” lubafubiishe lufungula bwa kufungula kibelo kya bwina bula na bwi mufito. Kya kumpala, kubatuukile mwishi mu bwabwa bwina, akupu kisaka kya mpasu kibalondele wawa mwishi. Pamutwe pa kulwisha mitshi sunga lubishi, ino mpasu ibakwatshile “bantu bashii na kitampi ky’Efile pa mpala.” (Kibafumbwilwe 9:1-4) Yowano bamwene’shi kisaka kya mpasu ki kutusha masaku akata, bu byayibakitshine mu Ejiipitu mu mafuku a Moyiise. (Efilu 10:12-15) Ino mpasu ibamwene Yowano, ayileesha beena Kidishitu bediibwe mwimu bakwete kulungula mukandu wi na bukome pabitale bipwilo bya madimi. Na bantu midiyo be na lukulupilo lwa muwa wa ikalaika pa nsenga bakwete kwibakwashishena. Booso bwabo be mu buumune mu uno mudimo wa bulungudi. Uno mudimo ngukwashe bantu bebungi bwabadya kukatuka ku lulangwilo lwa madimi na ku bupika bwa Satana.

4. Mmudimo kinyi ukwete kukita bafubi ba Yehowa lelo, na be kwiobesha nka penda pabadi naminyi?

⁴ Twi na mudimo wa kulungula “mukandu wibuuwa” kwi bantu booso mu nsenga kumpala kwa’shi nfudiilo ifikye. Uno nyi mudimo ukata wa kukita! (Mateo 24:14; 28:19, 20) Abitungu twitamine booso be “na nyoota” bwabadya kutoma “meema a muuwa”; kwamba’shi abitungu tulongyeshe bya binyibinyi bya mu Bible kwi booso abakumiina kwibipusha. (Kibafumbwilwe 22:17) Twi balombeene kukita bino byoso nka penda su twi “mu kwilonga na kwilunga” na kufuba mu buumune na bangi mu kakongye.—Beena-Efeso 4:16.

5, 6. Twi mu buumune patulungula mukandu wibuwa naminyi?

⁵ Bwa kulungula bantu bebungi kalolo, abitungu twikale belumbuule mu mudimo wetu wa bulungudi. Buludiki bwatukwete kupeta mu tukongye twetu nyi abwitukwasha bwa kwibikita. Kunyima kwa’twe kwibunga mu kisangilo kya mudimo wa bulungudi, atwendaa mu kulungula bantu pabitale mukandu wibuwa wa Bufumu. Atwibapaa dingi mikanda ayisambila Bible. Nyi bwakinyi twi baabile midiyo ya ku ino mikanda mu senga ishima. Ingi nsaa atutumaa ba mbala-mashinda ba nsaa yooso bwabadya kulungula mukandu wibuwa mu angi ma mbalo. Su okitshi uno mudimo, okwete kufuba mu buumune na midiyo ya bakwetu bakwete kulungula wawa mukandu umune mu nsenga ishima! Okwete kufuba dingi na ba miikeyilu, abo bakwete kukwasha bafubi b’Efile Mukulu bwabadya kulungula mukandu wibuwa.—Kibafumbwilwe 14:6.

⁶ Twi na muloo ukata wa kubadika bipeta bibuwa bya mu mudimo wa bulungudi mu nsenga ishima mu Annuaire! Banda kunangushena pabitale buumune bwetu mu nsenga, nsaa yatwitamina bantu ku bikongeno byetu. Kwanka atukateemesha booso myanda imune. Atupushaa miisambo, ma drame na bileshesho abitunyingisha bwa kupa Yehowa bintu byetu bya muulo. Atwikalaa dingi mu buumune na bakwetu balume na bakashi mu nsenga ishima nsaa yatukitaa Kitentekyesho kya lufu lwa Yesu ku kipwa kyoso. (1 Beena-Kodinda 11:23-26) Atwibungaa mwifuku dimune dya 14 Nisane kunyima kwa nguba kupona bwa kuleesha’shi twi na lutumbu lukata bwa bitukitshine Yehowa na kukookyela mwiya wa Yesu. Akupu mbingo ipeela kumpala kwa Kitentekyesho, atufubaa mu buumune bwa  kwitamina bantu bebungi bwabadya kutwela neetu mu kino kikongeeno kikata.

7. Patufubu mu buumune twi na ngobesha ya kukita kinyi?

⁷ Mpasu umune ta mulombeene kulwisha bintu bibungi nya. Atwe namu muntu umune ta mulombeene kulungula bupenka bantu booso nya. Kadi bu byatukwete kufuba pamune, twi na ngobesha ya kulungula bantu midiyo pabitale Yehowa na kukwasha bangi bwabadya kumutumbisha na kumupa kineemo.

8, 9. (a) Mpoolo baadi mufube na kileshesho kinyi bwa kulongyesha beena Kidishitu bwabadya kwikala mu buumune? (b) Twi kufuba mu buumune mu kakongye naminyi?

⁸ Mpoolo baadi mupatulwile beena Efeso mushindo ulumbuulwe kakongye p’aye kwakula’shi abitungu muntu ooso mu kakongye ‘atame mu myanda yooso.’ (Badika Beena-Efeso 4:15, 16.) Mpoolo baadi mufubishe kileshesho kya mbidi bwa kupatuula’shi mwina Kidishitu ooso mmulombeene kukwasha bwa’shi kakongye kekale mu buumune na kulonda Yesu aye mwikale Nfumu a kakongye. Bambile’shi bipindji byoso bya mbidi abifubu mu buumune ku bukwashi bwa “binyungwa byooso abiiyifubila.” Byabya byatwikala bakulu sunga bakinga, be na mbidi bukome sunga abakumbu, nkinyi kilombeene kukita ooso a kwatudi?

⁹ Yesu mmusangule bakulu bwabadya kukunkusha kakongye, akupu akumiina’shi twibanemekye na kulonda buludiki bwabetupa. (Beena-Ebelu 13:7, 17) Kukita bino t’akwikalaa kupeelepeele nsaa yooso nya. Anka twi balombeene kuteka bukwashi bwa Yehowa. Kikudi kyaye kiselele nkilombeene kwitukwasha bwa kukookyela buludiki abwitupa bakulu. Banda kunangushena byatudi balombeene kukwasha kakongye keetu su twi na kwiyisha na kufuba mu buumune na bakulu. Su atukitshi byabya, kakongye keetu akeekala mu buumune na kifulo kyetu akinyiisha kunyinga.

10. Bafubi ba midimo abakwashaa kakongye bwakadya kwikala mu buumune naminyi? (Tala kifwatulo ki kumbangilo.)

¹⁰ Bafubi ba midimo abakwasha dingi bwa’shi kakongye kekale mu buumune. Abafubaa ngofu bwa kukwasha bakulu, nyi bwakinyi atwikalaa na lutumbu lukata bwa byooso byabakwete kukita. Bu kileshesho, bafubi ba midimo abafubaa ku mikanda ilombeene kwitukwasha mu bulungudi, na kukuukila bantu abafikaa mu kwibunga neetu mu bisangilo. Abafubaa dingi bibukopo bwa kulumbuula Nshibo ya Bufumu na kwiyilama na mankenda. Nsaa yatufubu pamune na bano bakwetu, twi mu buumune na kufubila Yehowa mu mushindo wibuwa.—Pwandjikisha na Bikitshino 6:3-6.

11. Ba nsongwa mbalombeene kukita kinyi bwa kukwasha kakongye bwakadya kwikala mu buumune?

¹¹ Bangi bakulu mbafube bikata mu kakongye munda mwa bipwa bibungi. Pangi ta mbalombeene kukita bibungi bu bibaabadi abakitshi mwanda wa kukula kwabo. Ba nsogwalume be kwibakwasha. Su bebalongyesha, mbalombeene kutwala angi mashito mu kakongye. Akupu, nsaa i mufubi a midimo afubu bibukopo, mulombeene kufuba bu mukulu kunyima kwa mafuku. (1 Timote 3:1, 10) Bangi ba nsongwalume mbafikye bakulu na mbanyiishe kwenda kumpala. Bakwete kufuba bu bakunkushi ba bifunda na kukwasha bakwetu balume na bakashi mu tukongye twibungi. Twi na lutumbu lukata pa kumona ba nsongwalume abakumiina kukwasha bakwetu balume na bakashi.—Badika Misambo 110:3; Mulungudi 12:1.

12, 13. Nkinyi kilombeene kukwasha beena kifuko booso bwa kwikala mu buumune?

¹² Twi kukwasha beena kifuko neetu naminyi bwa kufuba mu buumune? Kukita lulangwilo lwa mu kifuko pa kyubishi nkulombeene kwitukwasha. Apakisha baledi na bana nsaa pamune bwa kulonga pabitale Yehowa, kifulo munkatshi mwabo akinyingi. Mu yaya nsaa, be kwambuula  byabadi balombeene nkakula mu bulungudi, na bino abikwasha muntu ooso bwadya kwilumbuula kalolo. Akupu, pabakwete kwisamba booso munkatshi mwabo pabitale bya binyibinyi na kumona muntu ooso mu kifuko kyabo mmufule Yehowa na kukumiina kumusangasha, abanyisha kwikala mu kipwano.

¹³ Mukashi na mulume mbalombeene kwikala mu buumune naminyi? (Mateo 19:6) Nsaa yabadi bafule Yehowa na kumufubila pamune, abekala na muloo na abanyingisha eyibakishi dyabo. Abitungu dingi bekale na kifulo munkatshi mwabo nka bu bibaadi Abrahame na Sara, Isake na Rebeka na bibaadi Elkena na Ana. (Kibangilo 26:8; 1 Samwele 1:5, 8; 1 Mpyeele 3:5, 6) Nsaa ayikitshi ba mulume na mukashi bino, abekala mu buumune na kwifubwila peepi na Yehowa.—Badika Mulungudi 4:12.

14. Su mwina dibaka noobe akutwa kwikala Temwe a Yehowa, we kukita kinyi bwa kinyingisha eyibakishi dyenu?

¹⁴ Bible aleesha patooka’shi tatwi balombeene kwiyibakishena na muntu shafubila Yehowa. (2 Beena-Kodinda 6:14) Anka, kwi bakwetu balume na bakashi beyibakishene na muntu shi Temwe a Yehowa. Kwi baukye bya binyibinyi kunyima kwa’bo kwiyibakishena, kadi mwina dibaka naabo akutwa kwikala Temwe a Yehowa. Bangi namu mbeyibakishene na mufubi a Yehowa, kadi mwina dibaka nabo atushibwa mu kakongye. Mu ino myanda i bino, mwina Kidishitu akitshi mwaye mooso bwa kulama buumu mwiyibakishi dyabo pa kulonda malango a mu Bible. Kukita bino takwikalaa kubofule nya. Bu kileshesho, Mary na mulume aaye David babaadi abafubila Yehowa pamune. Akupu, David bayimikile kwenda mu bisangilo. Kadi Mary bashadile akitshi mwaye mooso bwa kwikala bu mukashi ebuwa na kuleesha ngikashi ya bwina Kidishitu. Aye nkulongyesha dingi bana baaye basamombo pabitale Yehowa na kuyididila na kwenda mu bisangilo na ku bikongeeno. Kunyima kwa bipwa, bana baye abakudile abo nkukatuka ku nshibo, kadi Mary baadi muyididile na kufubila Yehowa sunga mbyabibaadi abimwelela bukopo. Anka David babangile kubadika mikanda ibaadi ayimulekyela Mary. Mwenda mafuku, babangile dingi kwenda mu bisangilo. Mwikulu aaye e na bipwa bisamombo baadi nka amulamina mbalo mu bisangilo, akupu su David tamufikye, yawa mwikulu aaye baadi amulungula’shi: “Yaaya-kulu, ntshi mukumone mu bisangilo nya.” David baalukile kwi Yehowa kunyima kwa bipwa 25, aye na mukashi aaye be na muloo wa kufubila dingi Yehowa mu buumune.

15. Beena eyibakishi babapu kukita mafuku ebungi be kukwasha bashakitshine mafuku ebungi naminyi?

 ¹⁵ Satana kwete kulwisha bifuko ngoshi lelo uno. Nyi bwakinyi abitungu mulume na mukashi abafubila Yehowa bekale mu buumune. Sunga nwekala bapwe kwiyibakisheena munda mwa bipwa bibungi, nangushena pabitale byodi mulombeene kwakula sunga kukita bwa kunyingisha eyibakishi dyenu. Su nubaapu kukula mwiyibakishi, nwi balombeene kwikala kileshesho kibuwa kwi baaba bashakitshiine mafuku ebungi mwiyibakishi. Pangi nwi balombeene kwitamina bano baki mafuku apeela mwiyibakishi bwabadya kupetekyelwa mu lulangwilo lwenu lwa mu kifuko. Mbalombeene kumona mushindo wanudi na kifulo na kwikala mu buumune sunga mbyanudi bapwe kukita mafuku ebungi.—Tite 2:3-7.

16, 17. Nkinyi akitengyela bafubi b’Efile Mukulu be mu buumune?

¹⁶ Pabaadi apende beena Isaleele ku musangeelo mu Yeelusaleme, babaadi booso mu buumune. Babaadi abalumbuula bintu byooso bibaabadi nabyo lukalo mu lwendo lwabo. Akupu, abaadi abatambuka pamune na kwikwashena. Mu ntempelo, babaadi abatumbisha na kulangwila booso Yehowa pamune. (Luuka 2:41-44) Lelo uno, bu byatukwete kwilumbuula bwa nshalelo a mu ndumbulwilo mupya, abitungu twikale mu buumune na kukita kyooso kyatudi balombeene kukita bwatudya kufuba na bangi mu buumune. We kunangushena bipaso byodi mulombeene kunyisha kwibikita su?

¹⁷ Mu nsenga na bushima, bantu bakwete kwilwisheena ngoshi na kwiyipayisheena bwa bintu bibungi. Anka, twi na lutumbu bu bikwete kwitukwasha Yehowa bwatudya kwikala na butaale na kupusha bya binyibinyi! Mwilo waye mu nsenga ishima ukwete kumulangwila mu mushindo wakumiina. Bikishekishe mu ano mafuku a ku nfudiilo, bafubi ba Yehowa be mu buumune ngofu. Nka bu bibaadi bitemukye Yeeshaya na Mika, atwe booso tukwete kukaamina “ku mwengye wa Yehowa.” (Yeeshaya 2:2-4; badika Mika 4:2-4.) Atukeekala na muloo ukata apakeekala bantu booso mu nsenga “mu kwilonga na kwilunga kalolo” na kufuba na bangi mu buumune bwa kulangwila Yehowa!