1, 2. (a) Leesha bwakinyi kubatshishibwa nyi etabula dikata. (b) Myanda kinyi ayitungu’shi muntu ashinguule kalolo kumpala kwa kubatshishibwa, na bwakinyi?

TOODI nsongwa akimbi kutambula su? Su bi byabya, uka’shi kubatshishibwa nyi nkineemo kikata kyodi mulombeene kupeta. Nka bu byatwibimwene mu mwisambo ushale, kubatshishibwa nkitshibilo kikata. Akileesha’shi bwelambula kwi Yehowa, kwamba’shi, bwetshipi kwadi bwa kumufubila bwa looso na’shi kukita kikyebe ky’eshimba dyaaye ngi mwanda wi na muulo ukata mu muwa oobe. Bu bikale’shi uno mmutshipo ukata kumpala kw’Efile Mukulu, we mulombeene kubatshishibwa nka su bopu kunyinga, su obe nabeene we na luno lukalo, na su bopusha kalolo akileesha kwilambula kwi Efile Mukulu.

² Pangi we kupusha’shi tobandjile kwikala peepi bwa kubatshishibwa nya. Sunga kupusha’shi toodi pepi kadi baledi boobe abamono’shi abitungu obande kutengyela okule kapindji na kumona ingi myanda mu nshaleelo oobe. Nkinyi kyoodi mulombeene kukita? Tobofulanga nya. Anka, fuba na ino nsaa bwa kwenda kumpala bwa’shi olombashe myanda itekiibwe bwa  kubatshishibwa. P’okwete kutengyela, we kwiatshila bitshibilo bya kwenda kumpala mu ino myanda isatu: (1) nkumiino yoobe, (2) bikitshiino byobe na (3) lutumbu loobe.

3, 4. Bansongwa mbalombeene kulongyela kinyi ku kileshesho kya Timote?

³ Banda kwela binangu byodi mulombeene kwaluula ku ino nkonko: Bwakinyi ne mukumiine’shi Efile Mukulu e kwanka? Bwakinyi nemushinkamishe’shi Bible mmufikye kwi Efile Mukulu? Bwakinyi natumikilaa miya y’Efile Mukulu pamutwe pa kulonda malango a mu uno ndumbulwilo? Ino nkonko i nkukwasha bwa kulonda dino elango dya Mpoolo mutumiibwa: ‘Elambuleyi anwe baanabeene bu mulambu wiselele, ulongamine Efile Mukulu.’ (Beena-Looma 12:2) Bwakinyi abitungu okite bino?

⁴ Kileshesho kya Timote nkilombeene nkukwasha. Baadi auku Bifundwe kalolo mwanda nyinaaye na nyinaaye-kulu abaadi bamulongyeshe Bifundwe. Kadi Mpoolo balungwile Timote’shi: “Shaala munyingiile mu byoodi muyiye wekale mwibishinkamishe.” (2 Timote 3:14, 15) Mu uno verse, kishima “mwibishinkamishe” akileesha “kwikala mukumiine na kushinkamisha kooso’shi mwanda kampanda ngwa binyibinyi.” Byabya Timote baadi mushinkamishe’shi bya binyibinyi bibaadi nka mu Bifundwe. Tabaadi mwibikumine mwanda’shi babamulongyeshe byanka kwi nyinaaye na kwi nyinaaye-kulu nya, anka baadi mwibikumiine mwanda baadi munangusheene pa myanda ibaadi mulongye na baadi mwiyishinkamishe.​—Badika Beena-Looma 12:1.

5, 6. Bwakinyi bi na muulo bwa’shi olongye bya ‘kufuba na binangu’ pokii mukinga?

⁵ Kadi obe namu? Pangi boopu kulonga bya binyibinyi takudi mafuku ebungi. Su bi byabya, eatshile kitshibilo kya kunangusheena pa tubingilo twa nkumiino yobe. Kukita bino akukukwasha bwa kunyingisha lukumiino na kupela kwata bitshibilo bibubi pa mwanda wa moo wa bantu, binangu bya mu uno ndumbulwilo, sunga pa mwanda wa lwabi loobe’be nabeene.

⁶ Su bolongo bya ‘kufuba na binangu’ nsaa yokii mukinga, okapete bya kwaluula benoobe kalolo ku nkonko bu ino: ‘Nkinyi akikushinkamiisha’shi Efile Mukulu e kwanka? Su Efile Mukulu mmwitufule, bwakinyi atadilaa myanda ibubi  ayikitshika? Efile mukulu mmulombeene kwikala shii na mbangilo na nfudiilo naminyi?’ Su we mwilumbuule, ino nkonko tayikatwesha mpaka moodi nya, kadi ayikakutakula mu kwilongyela Bible.

7-9. Leesha bwakinyi myanda ya kulonga i mu jw.org ayamba’shi Qu’enseigne réellement la Bible? ngilombeene nkukwasha bwa kunyingisha lukumiino loobe.

⁷ Kwilongyela Bible kalolo kwi nkukwasha bwa kwaluula nkonko kalolo, kukatusha mpaka, na kunyingisha lukumiino loobe. (Bikitshino 17:11) Twi na mikanda ibungi ilombeene nkukwasha bwa kwibikita. Bebungi mbamone’shi bi buwa kulonga broshire a Cinq questions à se poser sur l’origine de la vie na mukanda wa Y a-t-il un Créateur qui se soucie de vous? Na dingi, ba nsogwa bebungi abakuminaa na mbapete muloo mu myanda ya kulonga i mu jw.org. Ayamba’shi “Qu’enseigne réellement la Bible?” twela pa mbalo ifunde’shi LA BIBLE ET VOUS. Mwanda wa kulonga ooso wi na mwisambo ulombeene nkukwasha bwa kunyingisha lukumiino loobe mu myanda ya mu Bible.

⁸ We mulongi a Bible, nyi bwakinyi abitungu obadiile kuuka ngaluulo ku imo nkonko i mu myanda ya kulonga. Anka, abitungu wekale mushinkamishe’shi ngaluulo yobe ngya binbyibinyi. Ino myanda ya kulonga ayikakukwasha bwa kunangusheena pa maverse ebungi na akupu ayikunyingisha bwa kufunda bwakinyi wemukumiine myanda kampanda. Abikakukwasha dingi bwa kuleesha bi lukumiino lobe kwi bangi. Su botwele pa miisambo ayakula’shi, “Qu’enseigne réellement la Bible?” we bya kwiyifubisha mu kulonga koobe bwa kunyingisha lukumiino loobe.

⁹ Abitungu oshinguule obe nabeene bya binyibinyi. Bino abikakukwasha bodya kwilumbuula bwa kubatshishibwa. Ungi mukwetu mukashi e mu bipwa ekumi bakwile’shi: “Kumpala naadi mwate kitshibilo kya kubatshishibwa, ami nkulonga Bible na kumona dingi’shi nyi ndulangwilo lwa binyibinyi. Kwifuku dyooso lukumiino lwande lukwete kunyinga.”

10. Bwakinyi abitungu’shi mwina kidishitu mutambule ekale na bikitshino bipusheene na lukumiino lwaye?

¹⁰ Bible akula’shi: “Lukumiino lushii na bikitshino ndufwe looso.” (Shake 2:17) Su we na lukumiino lunyingye, abimweneka ku bikitshino byoobe. Okekala na “mwikeelo wiselele na bwina Efile” bu abileesha Bible.​—Badika 2 Mpyeele 3:11.

11. Patuula akileesha kwikala na “mwikeelo wiselele.”

¹¹ “Mwikeelo wiselele” auleesha kinyi? Su bikitshino byobe biselele, mwikelo oobe wibuwa. Bu kileshesho, banda kunangusheena myeshi isamombo ishaale. Nsaa ywekele mu kitompwa kya kukita mwanda wibubi, wekele munangusheene bikata pabitale kibuwa na kibubi su? (Beena-Ebelu 5:14) Otentekyesha musango kampanda uboodi mukabile kitompwa sunga kupela kusukumiibwa na bakuuku boobe su? Wekadikaa kileshesho kibuwa kwi beena kalasa noobe? Oshalaa na lulamato kwi Yehowa su okimbaa kwikala bi beena kalasa noobe kupela bakusepa? (1 Mpyeele 4:3, 4) Takwi muntu mupwidikye nya. Ingi nsaa, mpa na bantu bapwe kufubila Yehowa munda mwa bipwa bibungi be kupusha buufu na kumona’shi bi bukopo bwa kulungula bangi. Kadi bwa muntu mwilambule kwi Yehowa e na nfyedi ya kwikala Temwe a Yehowa na ebileesha mu mwikeelo waye wiselele.

12. Nkinyi akilesha kwikala na bikitshino bya “bwina Efile” na abitungu kwibimona naminyi?

¹² Nkinyi akilesha kwikala na bikitshino bya “bwina Efile”? Mu bino bikitshino mwi midimo yobe yooso ya mu kakongye bu kwenda mu bisangilo na mu bulungudi. Mwi dingi midimo yokitshi yabashabamono kwi bangi bu kwela nteko ya pa bupenka kwi Yehowa na kwilongyela. Muntu mwilambule kwi Yehowa ta mulombeene kumona ino midimo bu bushito bumutentekwe nya. Apusha nka bibapushiishe Nfumu Daavide pabayimbile’shi: “Efile Mukulu ande, naakyebe kukita akikulongamina dingi miiya yoobe i mwishimba dyande.”​—Misambo 40:9.

13, 14. Nkinyi kilombeene nkukwasha bwa kulumbuula bikitshino byobe bya “bwina Efile”? Bangi ba nsongwa mbapete bukwashi naminyi?

 ¹³ Bwa nkukwasha bwa kwiatshila bitshibilo, we kutala mu kashibo ke mwisaki dya 308 na 309 dya mukanda wa Les jeunes s’interrogent. Réponses pratiques, volime 2. Mu kaaka kashibo we kwaluulo ku ino nkonko: “Otekaa myanda kinyi, na mushindo kinyi wayileesha kifulo kyobe bwa Yehowa?” “Myanda kinyi yokambaa kulonga pa bupenka?” “Wendaa mu bulungudi sunga pashapende bakutande su?” Mu kaaka kashibo, opete dingi mbalo yodya kufunda bitshibilo byodi mulombeene kwata pabitale nteko yoobe, kwilongyela na bulungudi.

¹⁴ Ba nsongwa bebungi abakimbi kutambula mbafikye mu kumona’shi kano kashibo ke na bukwashi bukata. Ungi nsongwakashi abetamina bu Tilda bambile’shi: “Naadi mufubishe kano kashibo bwa kwata bitshibilo. Naadi mwibilombashe kimune ku kimune, akupu naadi mulombane bwa kubatshishibwa kunyima kwa kipwa kishima.” Ungi nsongwalume abetamina bu Patrick baadi mupete bukwashi bwi mumune. Bambile’shi: “Naadi mupwe kuuka bi bitshibilo byande, kadi kwibifunda kubankwashile bwa kwitatshisha bikata bwandya kwibilombasha.”

15. Patuula bwakinyi abitungu kwiatshila kitshibilo kya kubatshishibwa.

¹⁵ Lumune lwa ku nkonko i mu kaaka kashibo alwamba’shi: “We kufubila Yehowa sunga bakutande na ba kuuku boobe baleka kumufubila su?” Nsaa yolambula muwa oobe kwi Yehowa na kubatshishibwa, we mu kipwano kya pa bupenka naaye. Nyi bwakinyi byoso byodi mulombeene kukita bwa Yehowa, twebikitshi bwa kusankisha ba kutande sunga ungi muntu nya. Mwikeelo oobe wiselele na bikitshino byobe bya bwina Efile abileesha byodi mushinkamishe’shi we na bya binyibinyi na okumiina kulonda miiya y’Efile Mukulu. Su bokitshi byabya, olombasha myanda itekibwe bwa kubatshishibwa.

16, 17. (a) Nkinyi kilombeene kutakula muntu bwa kufika mwina Kidishitu? (b) Nkileshesho kinyi akileesha byatudi balombeene kwikala na lutumbu bwa mulambu wa nkuulo?

¹⁶ Ungi muntu baadi auku Miiya ya Moyiise baadi mwipushe Yesu dingi efuku’shi: “Eyi kinyi dikile mayi ooso mu mukanda wa Miiya?” Yesu baadi mumwaluule’shi: “Ofule Efile Mukulu oobe n’eshimba dyoobe dyooso, na kikudi kyoobe kyooso, mpa na kinangu kyoobe kyooso.” (Mateo 22:35-37) Yesu baadi mumupushishe’shi kifulo bwa Yehowa nyi kabingilo kamune kalombeene kutakula muntu bwa kubatshishibwa na kufika mwina Kidishitu. Kipaso kimune kyodi mulombeene kunyingisha kifulo kyobe bwa Yehowa nkya kunangusheena bikata pabitale mulambu wa nkuulo, kya buntu kikata ky’Efile Mukulu bwa bantu. (Badika 2 Beena-Kodinda 5:14, 15; 1 Yowano 4:9, 19.) Nsaa yokitshi byabya, okakumiina kuleesha lutumbu loobe bwa kyakya kya buntu kya kukaanya.

¹⁷ Twi kupatuula lutumbu loobe bwa mulambu wa nkuulo na kino kileshesho: Banda kupwandjikisha’shi wekeele mu meema bobanga kutoma tupulu, kadi kubatuuku muntu bakupaasha. Okatuka bisumanga walukiile ku nshibo na kuluba bibakukitshina yawa muntu su? Nya! Wekala na lutumbu lukata bwa yawa muntu bapaasha muwa oobe! Mu kipaso kimune, abitungu twikale na lutumbu lukata kwi Yehowa na Yesu bwa nkuulo. Nyi bwakinyi atwibalambula muwa wetu! Mwanda mbetupashe ku mulwisho na ku lufu. Pa mwanda wa kifulo kyabo, binobino twi na lukulupilo lwa kwikala na muwa wa ikalaika mu Mpaladiiso pa nsenga!

18, 19. (a) Bwakinyi twe mulombeene kutshina kwilambula kwi Yehowa? (b) Kufubila Yehowa akulumbuula nshalelo oobe naminyi?

¹⁸ We na lutumbu bwa byoso bikukitshine Yehowa su? Su we na lutumbu, we kwiluleesha p’obe kwilambula na kubatshishibwa. Kwilambula koobe akuleesha’shi bwetshipi kwi Efile  Mukulu bwa kukita byakumiina bwa looso. Abitungu wekale na moo wa kwitshipa bino su? Nya! Mwanda Yehowa akumiina’shi omukitshine bibuwa, akupu akafutu booso abakitshi byakumiina. (Beena-Ebelu 11:6) Nsaa yolambula muwa oobe kwi Yehowa na kubatshishibwa, nshalelo oobe talwika nya akalumbuluka bikata! Ungi mukwetu e na bipwa 24 baadi mubatshishibwe pabaadi ki ka nsongwalume akula’shi: “Nadya kwikala na mpushisho mukamine su nadya kwikala muntu mukulu, kadi kwata kitshibilo kya kulambula muwa wande kwi Yehowa nkunkalwile bwa kupela kulonda myanda ya mu uno ndumbulwilo.”

¹⁹ Yehowa akimbi buwa boobe. Anka Satana namu akimbi buwa bwaye’ye nabeene kushi kwikalakasha boobe. Ta mulombeene nkupa kintu kibuwa su bomulondo. E nkupa kintu kya’shi nakyo naminyi? Te na mukandu wibuwa, akupu te na lukulupilo nya. Mulombeene nkupa penda lukulupilo lwi bubi mwanda nyi lwakwete kutengyela!​—Kibafumbwilwe 20:10.

20. Nkinyi kilombeene kukita ba nsongwa bwabadya kwenda kumpala bwashi belambule na kubatshibwa? (Tala dingi kashibo akamba’shi: “ Miisambo i bya nkukwasha bwa kwenda kumpala.”)

²⁰ Kulambula muwa oobe kwi Yehowa nyi nkitshibilo kikile buwa kyodi mulombeene kwata. We mwilumbuule bwa kubatshishibwa su? Su mbyabya, totshinanga bwa kwibikita. Kadi su opusha’shi twe mwilumbuule bwa kubatshishibwa, tumikila malango e mu uno mwisambo bodya kutungunuka na kwenda kumpala. Mpoolo baadi mulungule bakwabo ba mu Fidipe bwabadya kutungunuka na kwenda kumpala. (Beena-Fidipe 3:16) Su olondo dyadya elango, okakumiina kulambula muwa oobe kwi Yehowa na kubatshishibwa.