1, 2. (a) Mmwanda kinyi aupa bafubi ba Yehowa muloo lelo uno? (b) Ba nambutwile beena Kidishitu na bakulu mbalombeene kukwasha ba nsongwa bwa kupusha akileesha kubatshishibwa naminyi?

UNGI mukulu balungwile Christopher e na bipwa 12 shi: “Nakuuku kubanga ku butandwa, ne na muloo wa kupusha’shi tokyebe kutambula. Anka nakyebe kubanda nkwipusha bino, ‘Bwakinyi okyebe kutambula?’” Uno mukulu baadi na tubingilo twibuwa twa kwipusha luno lukonko. Abitupa muloo ukata pa kumona ba nsongwa bebungi abatambula ku kipwa kyooso. (Mulungudi 12:1) Kadi ba nambutwile beena Kidishitu na bakulu mu kakongye be na lukalo lwa kushinkamisha’shi ba nsongwa abo banabeene nyi bakwete kwiatshila kino kitshibilo na su abapusha kalolo akileesha kubatshishibwa.

² Bible etulongyesha’shi kwilambula na kubatshishibwa nyi nkubanga kwa nshaleelo mupya kwi mwina Kidishitu. Uno nshaleelo mupya etutwadila myabi ibungi ayifiki kwi Yehowa kadi etutwadila  dingi kubingwabingwa akufiki kwi Satana. (Nkindji 10:22; 1 Mpyeele 5:8) Nyi bwakinyi abitungu ba nambutwile beena Kidishitu baate nsaa ya kulongyesha bana baabo akipatuula kwikala mulongi a Kidishitu. Su ba nsongwalume na ba nsongwakashi ta be na baledi beena Kidishitu, bakulu mu kakongye abakimbi na kifulo kyooso bya kwibakwasha bwa’shi bapushe akileesha kwilambula na kubatshishibwa. (Badika Luuka 14:27-30.) Nka bu byabitungu kwilumbuula bwa kwibaka nshibo, abitungu ba nsongwa belumbuule kumpala kwa kubatshishibwa bwa’shi bamone bya kufubila Yehowa na lulamato mpa “na ku mfudiilo.” (Mateo 24:13) Nkinyi kilombeene kukwasha ba nsongwa bwa kwikala na kitshibilo kya kufubila Yehowa bwa looso? Tubandeyi kutaluula.

3. (a) Mayi a Yesu na a Mpyeele aetulongyesha kinyi pabitale muulo wa kubatshishibwa? (Mateo 28:19, 20; 1 Mpyeele 3:21) (b) Nkonko kinyi yatukyebe kwaluula, na bwakinyi?

³ We nsongwa akyebe kubatshishibwa su? Su mbyabya, we na kitshibilo kibuwa! Kubatshishibwa bu kamonyi ka Yehowa nyi nkineemo kikata. Nyi mmwanda autungu’shi mwina Kidishito ooso akite, na etabula dikata kwi baaba abakapanda ku mpombo ikata. (Mateo 28:19, 20; 1 Mpyeele 3:21) Nsaa yotambula, oleesha patooka’shi bwetshipi bwa kufubila Yehowa bwa ikalaika. Abitungu’shi olombashe mutshipo oobe, nyi bwakinyi ino nkonko ayilondo ayikukwasha bwa kuuka su boopu kulombana bwa kubatshishibwa: (1) Ntandji muntu munyingye mu kikudi bwa kwata bitshibilo su? (2) Nnami nabeene akumiina kubatshishiibwa su? (3) Nkwete kupusha akileesha kwilambula kwi Yehowa? Tubandeyi kutaluula ino nkonko.

4, 5. (a) Bwakinyi kubatshishibwa ta mwanda utale penda bantu bakulu? (b) Bwa mwina Kidishitu kunyinga akuleesha kinyi?

⁴ Bible taleesha’shi nka penda bantu bakulu ngofu sunga bapwe kulombasha bipwa bungi kampanda nyi balombeene kutambula nya. Mwanda mukanda wa Nkindji 20:11 auleesha’shi: “Abawukaa bii eikashi dya mwana ku bikitshiino byaaye, su biibuuwa na bilulame.” Sunga mwana mukinga e bya kupusha akileesha kukita kibuwa na kwilambula kwi Mupangi aaye. Kutambula nyi etabula dibuwa dilombeene nka penda ba nsongwa babaapu kunyinga na bapwe kwilambula kwi Yehowa.​—Nkindji 20:7.

⁵ Kwikala muntu munyingye akuleesha kinyi? Kwikala munyingye takuleesha bipwa bya muntu sunga kishiisa kyaye nya. Mwanda Bible akula’shi bantu banyingye mbapwe kupeta “kyuubishi kya kushinguula” bwa kuuka kwamuuna buwa na bubi. (Beena-Ebelu 5:14) Muntu munyingye auku kibuwa na aata kitshibilo mwishimba dyaaye kya kwikikita. Byabya ta mbalombeene kumukitshisha mwanda wibubi kwi bangi nya. Nsaa yooso te na lukalo lwa muntu a kumulungula bwa kukita myanda ibuwa nya. Twi bya kukulupila’shi nsongwa abatshishibwa eekala akitshi myanda ibuwa sunga te na baledi baaye sunga bangi bantu bakulu.​—Tala byabidi bipushene na Beena-Fidipe 2:12.

6, 7. (a) Leesha nkalakashi ibapetele Ndanyele pabaadi mu Babilone. (b) Ndanyele balesheeshe’shi mmunyingye naminyi?

⁶ Ba nsongwa be kuleesha’shi mbanyingye bino naminyi? Tubande kwata kileshesho kya Ndanyele. Abimweneka’shi baadi mu bipwa  ekumi pabakatukile kwi baledi baaye enda ku Babilone. Mususa umune, Ndanyele baadi munkatshi mwa bantu bashibaadi abanemeka miiya y’Efile Mukulu. Anka tubande kutaluula kalolo kibaadi kifikile Ndanyele. Abaadi abamwata na kineemo mu Babilone. Baadi munkatshi mwa bansongwalume babaadi basangulwe bwa kufubila nfumu. (Ndanyele 1:3-5, 13) Abimweneka kalolo’shi Ndanyele baadi na mwasu ukata mu Babilone washibadya kwikala nao mu Isaleele.

⁷ Byabya Ndanyele bakitshine naminyi? Baadi mutadiile bantu ba mu Babilone bamushintuule sunga kubofusha lukumiino lwaye su? Nya! Bible akula’shi pabaadi mu Babilone Ndanyele baatshile kitshibilo “kwishimba mwanda wa kuleka kwilwisha,” p’aye kwikala kula na bintu byoso bibaadya kumutwesha mu lulangwilo lwa madimi. (Ndanyele 1:8) Pa kukita bino balesheeshe binyibinyi’shi munyingye!

8. Kileshesho kya Ndanyele akitulongyesha kinyi?

⁸ Kileshesho kya Ndanyele akitulongyesha kinyi? Akitulongyesha’shi nsongwalume sunga nsongwakashi baapu kunyinga ashalaa mulamate ku byaadi mulongye, sunga ekala mu nshaleelo ebukopo. Tekalaa bu lufwamina, alushintuulaa elangi muyiile mbalo yaludi. Takitaa myanda bu kuuku a Efile Mukulu paadi ku Nshibo ya Bufumu kadi paadi ku kalasa akitshi myanda bu kuuku a beena nsenga nya. Anka, ashaala na lulamato mpa na kumpala kwa bitompwanga.​—Badika Beena-Efeso 4:14, 15.

9, 10. (a) Mmushindo kinyi ulombeene nsongwa kupeta bukwashi pa kunangushena ku byakitshine musango ushale wekeele mutompibwe? (b) Lubatshisho alupushisha kinyi?

⁹ Anka, takwi muntu mupwidikye nya. Atwe booso bakulu na bakinga atukitaa bilubilo. (Mulungudi 7:20) Kadi su okyebe kubatshishibwa, abitungu oukye su we na kitshibilo kya kushaala mulamate ku miiya ya Yehowa. Eyipushe’shi: ‘N’apu kukookyela Yehowa munda mwa mafuku?’ Tentekyesha byokitshine musango ushaale wikeele utompibwe lukumiino loobe. Opetele mushindo wa kwata kitshibilo kibuwa kya kukita? Nka bu Ndanyele, kwi bantu bakutakule bwa kufubisha ngobesha yoobe mu  myanda ya uno ndumbulwilo a Satana su? Apakufikila mwanda wi bino, omonaa bya kuuka kikyebe ky’eshimba dya Yehowa?​—Beena-Efeso 5:17.

¹⁰ Bwakinyi bi na muulo bwa kupeta ngaluulo ku ino nkonko? Mwanda ayikukwasha bwa kumona’shi lubatshisho ta mwanda wa bilele nya. Kubatshishibwa akuleesha’shi bwetshipi kwi Yehowa. Bomulaa’shi okashaala na lulamato kwadi na kumufubila n’eshimba dimune bwa looso. (Maako 12:30) Muntu ooso batambula abitungu ekale na kitshibilo kya kutumikila miiya ya Yehowa.​—Badika Mulungudi 5:4, 5.

11, 12. (a) Abitungu muntu akyebe kubatshishibwa aukye myanda kinyi? (b) Nkinyi kilombeene nkukwasha bwa kwikala na mweneno ebuwa pabitale mpàngo ya Yehowa ya lubatshisho?

¹¹ Bible akula’shi bafubi booso ba Yehowa, byabekala bakulu sunga bakinga abakamufubila abo “banabeene.” (Beena-Looma 12:1) Ngi bwakinyi muntu akyebe kubatshishibwa abitungu ashinkamishe’shi aye nabeene nyi e na luno lukalo. Bwa kuuka bino abitungu otaluule lukalo loobe kalolo, bikishekishe su mbakukushe kwi beena Kidishitu.

¹² Pokwete kwenda na kukula, we kwikala mumone bantu bebungi ababatshishibwa, pangi bakuuku boobe na beena kifuko. Abitungu odimukye tala obanga kupusha lukalo lwa kubatshishibwa penda pa mwanda boopu kulombasha kipimo kampanda sunga pa mwanda omono bangi bantu abatambula. Mbikunyi byoodi mulombeene kuuka’shi omonaa lubatshisho abilumonaa Yehowa? Ata nsaa ya kunangusheena bwa kuuka bwakinyi lubatshisho lwi na muulo. Mu uno mwisambo na mu aulondo, okapete tubingilo twibungi atuleesha bwakinyi lubatshisho lwi na muulo.

13. We kuuka naminyi’shi kitshibilo kya kubatshishibwa akituukila mwishimba dyoobe?

¹³ Umune wa ku mishindo ya kuuka su kitshibilo kya kubatshishibwa akituukila mwishimba dyoobe nkutaluula bi nteko yoobe. We na kyubishi kya kwela nteko su? Otekaa myanda kinyi? Ngaluulo ya ino nkonko ngilombeene kuleesha bukata bwa kipwano kyoobe na Yehowa. (Misambo 25:4) Misusa ibungi Yehowa kwete kwaluula ku nteko yeetu mu Bible. Ngi bwakinyi ungi mushindo wa kuuka’shi okyebe kwifubwila peepi na Yehowa na kumufubila n’eshimba dimune nkutaluula programe oobe a kwilongyela Bible. (Yooshwa 1:8) Eyipushe’shi: ‘Nelongyelaa Bible efuku dyooso su? Nakuminaa kutwela mu lulangwilo lwa mu kifuko su?’ Ngaluulo ya ku ino nkonko ayikakukwasha bwa kuuka su kitshibilo kya kubatshishibwa ndukalo loobe’be nabeene.

14. Leesha kwilekeena kwi pankatshi pa kwilambula na kubatshishibwa.

¹⁴ Bangi ba nsongwa mbalombeene kukutwa kuuka kalolo kwilekeena kwi pankatshi pa kwilambula na kubatshishibwa. Bangi mbapwandjikiile kwakula’shi mbapwe kulambula muwa wabo kwi Yehowa anka ta be peepi na kubatshishibwa. Bi kukitshika binyibinyi? Kwilambula nkulungula Yehowa mu luteko’shi bw’etshipi bwa kumufubila bwa ikalaika. Nsaa yobatshishibwa, oleesha bangi’shi we mupwe kwilambula kwi Yehowa. Byabya kumpala kwa kubatshishibwa, abitungu opushe kalolo akipushisha kwilambula koobe kwi Efile Mukulu.

15. Kwilambula akupushisha kinyi?

¹⁵ Nsaa yolambula muwa oobe kwi Yehowa, omulungula’shi bofiki muntu aaye. Omulaa’shi okatuulu mufubo waye pa mbalo ya kumpala mu muwa oobe. (Badika Mateo 16:24.) Uno mutshipo okitshi kumpala kw’Efile Mukulu ta mwanda wa kulenguula nya! (Mateo 5:33) We kuleesha naminyi byoshinguula’shi kubanga binobino twekunkusha obe nabeene kadi we ku matalwa a Yehowa?​—Beena-Looma 14:8.

16, 17. (a) Tusha kileshesho akipushisha kwipela. (b) Nsaa ayilambulaa muntu akulaa kinyi?

 ¹⁶ Tubandeyi kwata kileshesho. Pwandikisha’shi kuuku oobe bakupa mootoka. Bakutambika mikanda yooso ya mootoka na nkulungula’shi: “Uno mootoka ngoobe.” Akupu bakulungula’shi: “Nnami alama nfungula. Na dingi ami ngi ekala atambusha, obe tootambusha nya.” We kupusha naminyi bwa kino kya buntu? We kupusha naminyi bwa uno kuuku’obe bakupa uno mootoka?

¹⁷ Nsaa ayilambula muntu muwa waye kwi Yehowa, alungula Efile Mukulu’shi: “Nakupa muwa wande. Ne muntu oobe.” Yehowa e na matalwa a kuteka yawa muntu bwa kulombasha mutshipo waye. Kadi bi kwikala naminyi su yawa muntu babanga kupela kukookyela Yehowa pa kuyiila muntu shii mufubi a Efile Mukulu mu bufyefye? Sunga’shi Yehowa e kupusha naminyi su yawa muntu bakumiina mudimo aumukutshishwa nsaa ya kwenda mu bulungudi sunga ya kutwela mu bisangilo? Yaya nsaa yawa muntu talombasha mutshipo waye nya. Bi nka bu’ye balama nfungula ya mootoka. Nsaa yatulambula muwa wetu kwi Yehowa, atumulungula’shi: “Nakupa muwa wande, taukii wande nya.” Nyi bwakinyi abitungu tukookyele Yehowa nsaa yooso sunga etuteka bwa kukita myanda ish’ayitusankisha. Ngi bibakitshine Yesu. Twambuleyi Yesu bambile’shi: “Ntshi mwikye mwiyilu bwa kukita kyankyebe’mi nya, anka akikyebe muntume.”​—Yowano 6:38.

18, 19. (a) Mayi a Rose na a Christopher aaleesha naminyi’shi kubatshishibwa akutwala ku myabi? (b) Opusha naminyi pabitale mwabi wa kubatshishibwa?

¹⁸ Eyendo, kutambula nyi nkitshibilo kikata kya kwata. Kwilambula kwi Yehowa na kubatshishibwa nyi nkineemo kikata. Ba nsongwalume na ba nsongwakashi bafule Yehowa na abauku akileesha kwilambula tabealashenaa bwa kulambula muwa wabo kwi Efile Mukulu na kubatshishibwa nya. Tabetopekaa bwa kitshibilo kyaabo nya. Rose ungi nsongwakashi e mu bipwa ekumi akula’shi: “Ne mufule Yehowa, na kumufubila nyi mwanda ulombeene kumpa muloo wibungi. Kitshibilo kyande kya kubatshishibwa nyi nkitshibilo kikile myanda yooso.”

¹⁹ Twi kwamba naminyi bwa Christopher, abadi bakwile kumbangilo kwa mwisambo? Apushaa naminyi bwa kitshibilo kyaaye kya kubatshishibwa na bipwa 12? Akula’shi e na muloo wibungi p’aye kwata kino kitshibilo. Babangile mudimo wa bu mbala-mashinda na bipwa 17, aye nkufika bu mufubi a midimo mu kakongye na bipwa 18, na lelo uno kwete kufuba ku Betele. Akula’shi: “Kwata kitshibilo kya kubatshishibwa kwibuwa. Nkwete kufubila Yehowa na ndumbulwilo aaye midimo ayimpa muloo mu muwa wande.” Su we na lukalo lwa kubatshishibwa, we kwilumbuula naminyi? Atukaluula luno lukonko mu mwisambo aulondo.