1, 2. (a) Batemwe ba Yehowa abapushaa naminyi pabitale Bible? (b) Nkipindji kya mu Bible kinyi kyoodi mufule ngofu?

ATWE Batemwe ba Yehowa, twi bafule Bible ngofu. Etukankamikaa, etupa lukulupilo, na kwitulongyesha myanda yatudi balombeene kukulupila. (Beena-Looma 15:4) Atuuku’shi Bible ta mukanda wa bana ba bantu nya kadi nyi “Eyi dy’Efile Mukulu.”​—1 Beena-Tesalonika 2:13.

² Muntu ooso a kwatudi, e na kyaaye kipindji kya Bible kyaadi mukumiine ngofu. Bamo mbakumiine ma Evanjile mwanda aetuleesha bi kalolo na bumuntu bwa Yehowa kukiila kwi Yesu. (Yowano 14:9) Bangi mbakumiine mikanda ya butemuki bu Kibafumbwilwe, mwanda awituleesha “bintu abituungu kufika binobino.” (Kibafumbwilwe 1:1, Kilombeeno kipya 2014) Bangi namu abanyingishibwa nsaa yababadika mukanda wa Misambo, aku namu bamo abasankilaa kubadika milango ya binangu i mu mukanda wa Nkindji. Bino abileesha kalolo’shi, Bible nyi munkanda utale muntu ooso.

3, 4. (a) Atupushaa naminyi bwa mikanda yeetu? (b) Mmikanda kinyi yatupetaa itale kisaka kya bantu kampanda?

³ Bu byatudi bafule Bible, twi bafule mpa na mikanda yeetu imeene mu Eyi dy’Efile Mukulu. Mikanda, ma broshire, ma jurnale, na ingi mikanda yeetu yatupetaa nyi mbyakudya abitupa Yehowa. Na  abitukwasha bwa kwikala peepi naaye na kulama lukumiino lwetu lunyingye.​—Tite 2:2.

⁴ Mikanda yeetu ibungi ngifundibwe bwa Batemwe ba Yehowa booso. Anka, kwi ingi mikanda ifundibwe bwa kisaka kya bantu kampanda, bu ba nsongwa na ba nambutwile. Miisambo na ma video ebungi e mu site eetu a Internete mbebifunde bikishekishe bwa bantu bashii Batemwe ba Yehowa. Bino bidiibwa byooso bilekeenelekeene abileesha’shi Yehowa kwete kulombasha mulayilo waye wa kutuusha byakudya bibungi bwa bantu booso.​—Yeeshaya 25:6.

5. Abitungu tuukye’shi Yehowa asangelaa kinyi?

⁵ Abitungu’shi ooso a kwatudi akimbe nsaa ya kubadika Bible na mikanda yeetu. Kadi booso bwetu ta twi balombeene kwikala na bungi bwa nsaa bwi mumune bwa kulonga mukanda ooso autuuku nya. Byabya tuukyeyi’shi Yehowa asangalaa ngofu p’etumono atufubu kalolo na nsaa yeetu bwa kubadika na kwilongyela Bible na mikanda yeetu. (Beena-Efeso 5:15, 16) Anka kwi masaku akata aatungu’shi twiadimukile. Masaku kinyi?

6. Nkinyi kilombeene kwitukutshishwa bingi bidiibwa abitupa Yehowa?

⁶ Su ta twi badimukye, twi kunangusheena’shi bingi bipindji bya Bible sunga ingi mukanda yeetu ta ngitutale. Kileshesho, mbilombeene kwikala naminyi su kipindji kampanda kya Bible akimweneka bu kishii kipusheene na mwanda watudi nao? Sunga’shi bi kwikala naminyi su twamona’shi ta twi mu kisaka kya bantu kitale mukanda kampanda? Atubadikaa wawa mukanda kinundu nundu sunga kupela kwiubadika? Su mbyabya, twi kukisha myanda ibungi ilombeene kwitukwasha. Twi balombeene kusuuka ano masaku naminyi? Abikyebe twiukye’shi myanda yooso yatupusha ayifikaa kwi Yehowa. Atubadika bino mu Bible: “Nnaami Yehowa Efile Mukulu oobe, akupa bulambukishi abukukwasha.” (Yeeshaya 48:17) Mu uno mwisambo, atukyebe kwisambila malango asatu aaketukwasha bwa kudya bidiibwa byooso byabetupa kwi Yehowa.

7. Bwakinyi abitungu’shi tubadikye Bible na binangu bibuwa?

⁷ Badika na binangu bibuwa. Eyendo, bingi bipindji bya Bible bibaadi bifundjibwe bwa muntu sunga kisaka kya bantu kampanda. Anka Bible akula kalolo’shi: “Kifundwe kioso nkiyokyelwe kwi Efile Mukulu na nkipwandjikiile.” (2 Timote 3:16) Nyi bwakinyi abitungu twikale na binangu bibuwa nsaa yatubadika Bible. Ungi mukwetu atentekyesha’shi mulombeene kulonga myanda ibungi mu mwanda umune wa mu Bible. Bino abimukwshaa bwa kupeta malongyesha afwame mwanka. Byabya kumpala kwa’shi tubadikye Bible, abitungu tutekye Yehowa etupe binangu bibuwa bwa’shi tupushe malongyesha atukyebe kulonga.​—Esela 7:10; badika Shake 1:5.

8, 9. (a) Nsaa yatubadika Bible, nkonko kinyi yatudya kwiyela? (b) Ngikashi atungu’shi bakulu beena Kidishitu bekale nayo ayitulongyesha kinyi pabitale Yehowa?

⁸ Eyipushe nkonko. Nsaa yobadika Bible, banda kwimana kapindji weyipushe ino nkonko: ‘Uno mwanda aundongyesha kinyi pabitale Yehowa? Ne kutumikila uno mwanda mu nshaleelo ande naminyi? Ne kukwasha bangi bantu na uno mwanda naminyi?’ Su tubanangusheena ku ino nkonko, atukapete masanka ebungi mu kubadika kwetu kwa Bible. Tubandeyi kwata kino kileshesho. Bible aleesha ngikashi kampanda ayitungu’shi bakulu beena Kidishitu bekale naayo. (Badika 1 Timote 3:2-7.) Kadi bebungi ba kwatudi ta mbakulu nya, byabya twi balombeene kwela binangu’shi ino myanda ta ngitutale na ta ngilombeene kwitukwasha nya. Anka, tubandeyi kufubisha ino nkonko isatu ibatuteemuna kunundu bwa kumona mushindo ulombeene kwitukwasha ino ngikashi.

⁹ “Uno mwanda aundongyesha kinyi pabitale Yehowa?” Yehowa mmutuushe mulongo wa  ngikashi ayitungu’shi bakulu bekale naayo. E na miiya ayitungu’shi bantu abakunkusha kakongye beyifubile. Bino abileesha’shi kakongye ke na muulo ku meeso kwa Yehowa. Bible akula’shi baadi mwikaule “ku mase a Mwan’aye.” (Bikitshino 20:28, Kilombeeno kipya 2014) Nyi bwakinyi Yehowa atekye’shi bakulu bekale bileshesho bibuwa, na abakamulubwila mushindo wabakwete kukitshina beena kakongye myanda. Akumina’shi twikale mu bulungantu mu bukunkushi bwabo. (Yeeshaya 32:1, 2) Nsaa yatubadika ino ngikashi, atulongo mushindo ukwete kwitupasukila Yehowa.

10, 11. (a) Nsaa yatubadika ngikashi yabadi batekye bakulu, twi kutumikila ino myanda mu nshaleelo eetu naminyi? (b) Twi kukwasha bangi bantu na ino myanda naminyi?

¹⁰ “Ne kutumikila uno mwanda mu nshaleelo ande naminyi?” Su we mukulu mu kakongye, abitungu wekale otaluula ino myanda nsaa na nsaa na kwitatshisha bwa kwiyitumikila. Su we “muntu akimbi kwikala bu mukulu,” abitungu wekitshishe bwa kulombasha ino myanda muyiile ngobesha yoobe. (1 Timote 3:1) Kadi beena Kidishitu booso mbalombeene kulonga ino ngikashi. Kileshesho, Yehowa atekye ooso a kwatudi bwa kwikala na ngyelelo a binangu ebuwa na kululama. (Beena-Fidipe 4:5; 1 Mpyeele 4:7) Su bakulu bekala “kileshesho [kibuwa] kwi kakongye” twi balombeene kulongyela kwabadi na ‘kwambula lukumino lwabo.’​—1 Mpyeele 5:3; Beena-Ebelu 13:7.

¹¹ “Ne kukwasha bangi bantu na uno mwanda naminyi?” Twi balombeene kufuba na ino ngikashi itekiibwe kwi bakulu beena Kidishitu bwa kukwasha balongi beetu ba Bible na bakuuku beetu bwa’shi bapushe bilekeene bakulu na bakata ba bipwilo. Ino ngikashi ngilombeene kwitukwasha dingi bwa kutentekyesha bukata bwa mudimo aufubu bakulu mu kakongye. Na bino abiketutakula bwa kwikala atuneemeka bano bakwetu. (1 Beena-Tesalonika 5:12) Su tubanyiisha kwibaneemeka, abakanyiisha kusankila mudimo wabo.​—Beena-Ebelu 13:17.

12, 13. (a) Ku bukwashi bwa mikanda yatudi naayo, mmyanda kinyi yatudi balomeene kukimbuula? (b) Tuusha kileshesho akileesha byatudi balombeene kupeta malongyesha afwame ku bukwashi bwa mafuku, muntu na mwanda ubakitshikile pabaabadi bafunde uno mukanda.

¹² Kimbuula ingi myanda. Nsaa yatwilongyela Bible, twi kukimba ngaluulo ku ino nkonko:

• Nnanyi bafundile uno mukanda wa mu Bible?

• Baadi mwiufunde mbalo kinyi na mu mafuku kinyi?

• Mmyanda ikata kinyi ibaadi ayikitshika mu mafuku abaabadi bafunde uno mukanda?

Ino myanda i kwitukwasha bwa kupeta malongyesha afwame.

¹³ Tubande kwata kino kileshesho, mukanda wa Esekyele 14:13, 14, (EEM) awamba’shi: “Eumbo dikampanda ndilombeene ndyandwishisha pa kukutwanga kishima mwandji. Ami namu ne mulombeene kwidimwesha malwa, ne difwishisha kipupa kya nsala pa kwimukutshishwa bya kudya, kyakya kipupa kyatûtshisha bantu bâmo na nyema yâbo. Byabya sunga mu dyadya eumbo mwekala bano bantu basatu, Nowa na Ndanyele mpâ na Yobo, ank’abo banabêne nyi abakapanda pa mwanda wa kunkokyêlanga, ami Yehowa Nfumu.” Su twakimbuula ingi myanda, atusangana’shi Esekyele bafundile ano mayi bipwa 612 kumpala kwa Kidishitu. Nowa na Yoobo babaadi bapwe kufwa bipwa nkama kumpala, kadi Yeowa kyatentekyesha lulamato lwabo. Ndanyele namu baadi ki na muwa. Abimweneka’shi tabaadi na bipwa 20 nsaa ibambile Yehowa’shi baadi na kululama nka bu Nowa na Yoobo. Uno mwanda awitulongyesha kinyi? Awitulongyesha’shi Yehowa amonaa na ataa na muulo bafubi baaye booso baasha lulamato, bakulu mpa na bakinga.​—Misambo 148:12-14.

14. Mikanda yabadi batuushe bwa ba nsongwa ayibakwasha naminkyi, na ngilombeene kukwasha namu bangi bantu naminyi? (Tala kifwatulo ki kumbangilo.)

¹⁴ Mikanda itale ba nsongwa. Tubakatuka mu kulonga’shi twi balombeene kubadika mikanda yooso ya mu Bible. Mu mushindo umune, twi balombeene kubadika mikanda yeetu yooso. Twateyi bino bileshesho bipeela. Mu bipwa bishaale, Yehowa mmwitupe byakudya bibungi bitale ba nsongwa. ^[1] (Tala mayi e kunfudiilo.) Ino mikanda ayibakwasha bwa kukambila nkalakashi yabafumankana nayo ku kalasa nsaa yabakwete kukula. Kadi booso bwetu twi kupetela myabi ku ino miisambo na ino mikanda naminyi? Patubadika ino myanda, atuuku myanda ikwete kufumankana na ba nsongwa na atupete mushindo wa kwibakwasha na kwibakankamika.

15. Bwakinyi abitungu’shi beena Kidishitu batabadi bantu bakulu babadikye myanda yabadi bafunde bwa ba nsongwa?

¹⁵ Beena Kidishitu babaapu kukula ta mbalombeene kupusha bukopo bwa kubadika ino miisambo itale ba nsongwa nya. Myanda ibungi i mwanka ngitale beena Kidishitu booso. Kileshesho, booso bwetu twi na lukalo lwa kukalwila lulangwilo lwetu bwa kuleesha’shi ndwa binyibinyi, kukambila binangu bibubi, kupela pabetutakula mu kukita bubi, na kupela bakuuku bebubi na kukisha kapapi na bintu bibubi. Byabya, sunga ino mikanda ngifundibwe bwa ba nsongwa, myanda i mwanka ngya mu Bible na beena Kidishitu booso mbalombeene kwiyibadika.

16. Mikanda yeetu ayikwasha ba nsongwa bwa kukita dingi kinyi?

¹⁶ Mikanda yabadi bafundile ba nsongwa ayibakwasha dingi bwa kunyingisha bukuuku bwabo na Yehowa. (Badika Mulungudi 12:1, 13.) Na bantu bakulu namu mbalombeene kwiyibadika. Bu kileshesho, Réveillez-vous! a mu mweshi wa Kananka 2009 mwi mwisambo awamba’shi “Les jeunes s’interrogent . . . Comment trouver du plaisir à lire la Bible?” Mu uno mwisambo mwi malango ebuwa na dingi mwi kashibo ka kutshiba na kulama bwa kwilongyela. Bantu bakulu babapetele muloo wa kubadika uno mwisambo su? Ungi nyina baana bambile’shi kubadika Bible akumukambilaa. Kadi baadi mufubishe malango e mu uno mwisambo na binobino kwete kutungunuka na kubadika Bible. Akula’shi e na muloo wa kumona bilondeene mikanda ya mu Bible na bino abimupa mushindo wa kumona myanda yaadi mukulupile mu binangu. Akula dingi’shi: “Tampushile dingi uno muloo bwa kubadika Bible nya.”

17, 18. Twi balombeene kupeta myabi mu kubadika mikanda yabadi batuushe bwa bantu booso naminyi? Tuusha kileshesho.

¹⁷ Mikanda ya bantu booso. Kubanga mu 2008 tukwete kupeta Kitenta kya Mulami kya kulonga. Kino Kitenta kya Mulami mbekifunde penda bwa Batemwe ba Yehowa, kadi tukwete kupeta ungi jurnale abadi batuushe bwa bantu booso. Mushindo kinyi watudi balombeene kupetela miloo ayituukila ku ino jurnale yooso ibidi?  Tubandeyi kwata kileshesho. Nsaa yatwitanyina muntu ku Nshibo ya Bufumu, apafiki yawa muntu, atupushaa muloo wibungi. Nsaa yabakwete kukita mwisambo, onangusheena bwa yawa muntu mwenyi. Weyipusha byakwete kupusha pabitale myanda yateemesha na bilombeene ino myanda kumushintuula. Bu kipeta, wawa mwisambo aukukumu kwishimba na wekala na muloo wibungi bwa wawa mwisambo.

¹⁸ Mbilombeene kwikala nka byabya nsaa yatubadika mikanda yabadi bafundile bantu booso. Kileshesho, Kitenta kya Mulami kya bantu booso na miisambo i mu jw.org ayipatuula myanda ya mu Bible mu ngakwilo mupeelepeele. Nsaa yatubadika ino myanda atutamisha mpushisho eetu na kifulo kyeetu kya bya binyibinyi bya mu Bible byatudi babadiile kuuka. Na dingi, twi balombeene kuuka ingi mishindo ya kupatuula malongyesha a mu Bible mu bulungudi. Mu mushindo umune, jurnale a Réveillez-vous! anyingisha lukumiino lwetu mwi Mupangi. Etukwasha bwa kuuka byatudya kulungula bantu bi lulangwilo lwetu.​—Badika 1 Mpyeele 3:15.

19. Twi kuleesha lutumbu lwetu kwi Yehowa bwa bidiibwa byakwete kwitupa naminyi?

¹⁹ Ino myanda yooso ayileesha’shi Yehowa mmwitupe malango na mayi a kulonda ebungi bwa buwa bwetu. (Mateo 5:3) Tuyididiileyi na kubadika mpa na kutumikila myanda yooso yaadi mwitupe. Su tubakitshi byabya, atukapete miloo ibungi na kuleesha Yehowa lutumbu lwetu bwa byakudya byooso byakwete kwitupa.​—Yeeshaya 48:17.