1-2. Yesu badi mukalakashwe bwakinyi?

MWIFUKU dyaye dya nfudiilo pano pa nsenga, Yesu badi mukalakashwe. Kubadi kushale nsaa ipela bwadya kukyengeshibwa na kwipayibwa ku maasa a ba ntomboshi. Kadi Yesu tabadi ekalakasha penda mwanda wa lufu lwaye nya. Badi mufule Nshaye ngofu na badi akumina kumusangasha. Yesu badi muukye’shi su bashaala na lulamato mu bitompwanga abimufwila, akalwila eshina dya Yehowa. Yesu badi mufule dingi bantu, na badi auku’shi, twi balombene kukulupila muwa wa looso anka su tubashaala na lulamato kwi Yehowa mpa na ku lufu.

² Sunga mbibaadi Yesu mukalakashwe ngofu, badi na butaale. Balungwile batumibwa baye’shi “neenupa butaale.” (Yo. 14:27) Baadi na “butaale bw’Efile Mukulu,” butaale abutukila ku kipwano kibuwa kinakyo muntu na Yehowa. Bwabwa butaale bubaadi bukwashe Yesu bwa kupela kutshina.—Fid. 4:6, 7.

3. Nkinyi kyatukyebe kutaluula mu uno mwisambo?

³ Takwi muntu sunga ngumune a kwatudi mulombene kufumankana na makyenga bu abaadi apete Yesu, kadi yawa oso alondo Yesu apete nkalakashi. (Mat. 16:24, 25; Yo. 15:20) Na anka bu Yesu, atukakalakashwa. Nkinyi kyatudi balombene kukita bwashi tulekye kwinyongola bikishekishe na kushimisha butaale mbinangu byetu? Tutaluleyi myanda isatu ibaadi Yesu mukite mu mufubo waaye pabaadi pano pa nsenga na, tumone byatudi balombene kumwambula nsaa yatufumankana na nkalakashi.

4. Muyile bi mu 1 Beena-Tesalonika 5:17, tusha bileshesho abilesha’shi Yesu batekyele misusa ibungi mwifuku dyaye dya nfudiilo pano pa nsenga?

⁴ Badika 1 Beena-Tesalonika 5:17. Yesu batekyele misusa ibungi mwifuku dyaye dya nfudiilo dya muwa pa nsenga. Nsaa ibadi muleshe balondji baye mushindo wa kukita Kitentekyesho kya lufu lwaye, belele luteko bwa mukate na nfinyo. (1 Kod. 11:23-25) Kumpala kwa kukatuka mbalo ibadi mukitshine Pasaka, belele luteko na balondji baye. (Yo. 17:1-26) Nsaa ibafikile na balondji baye ku Mwenye wa Olive bwabwa bufuku, belele nteko misusa ibungi. (Mat. 26:36-39, 42, 44) Bishima bya nfudiilo bibakwile Yesu kumpala kwa kufwa nyi nduteko lubelele. (Luk. 23:46) Yesu badi mutekye Yehowa pabitale myanda yoso ibadi imufikile mwifuku dyaye dya nfudiilo..

5. Bwakinyi kunyinga kwa batumibwa kubabofwile?

⁵ Kabingilo kamune akalesha bwakinyi Yesu badi munyingiile kitompwanga, mpa mwanda badi mukulupile mwi Nshaye na ela nteko kwadi. Aku namu batumibwa abakutshilwe kunyingiila mu nteko bwabwa bufuku. Pa mwanda wa byabya, kunyinga kwabo kubabofwile nsaa ibafikile kitompwanga. (Mat. 26:40, 41, 43, 45, 56, Esambi dipya 2015) Nsaa yatudi kumpala kwa bitompwanga, atushala na lulamato nka su atulondo kileshesho kya Yesu na ‘kuteka . . . na katshintshi.’ Abitungu tutekye kinyi?

6. Mushindo kinyi ukumbene kwitukwasha lukumino bwa kushaala mu butaale?

⁶ Twi bakumbene kuteka Yehowa bwa ‘kutamisha lukumino lwetu.’ (Luk. 17:5; Yo. 14:1) Twi na lukalo lwa lukumino mwanda Satana akatompo muntu oso alondo Yesu. (Luk. 22:31) Mushindo kinyi ulombene kwitukwasha lukulupilo bwa kushala mu butaale sunga patudi  na nkalakashi ilekenelekene? Su tubapu kukita kyakya kyatudi balombene kukita bwa kukambila bitompwanga, lukumino alwitukwasha bwa kutula myanda yoso mu masa mwa Yehowa. Mwanda twi bakulupile’shi mmukumbene kupudisha myanda kwitukila, twi na kufukama mu binangu na mu mashimba.—1 Mp. 5:6, 7.

7. Mayi a Robert abakulongyesha kinyi?

⁷ Luteko alwitukwasha bwa kulama butaale bwa mwishimba sunga twekala na nkalakashi i naminyi. Banda kutala kileshesho kya Robert, mukulu sha lulamato taadi binobino na bipwa 80. Amba’shi: “Elango dya mu Beena-Fidipe 4:6, 7 ndinkwashe bwa kumona bya kukila na nkalakashi ya mu nshalelo ande. Ne mupete nkalakashi ya kukutwa makuta. Na, nadi mushimishe mashito ande a bu mukulu mu kakongye munda mwa mafuku.” Nkinyi kibadi kikwashe Robert bwa kulama butaale bwa mwishimba? Amba’shi: “Natekaa nsaa yoso yambanga kupusha kenyongoshi, nashinguula’shi nsaa yoso yantekye ngofu, napete butaale bwa mwishimba.”

8. Muyile bi mu Yowano 8:29, nkabingilo kinyi dingi akalesha bwakinyi Yesu badi na butaale bwa mwishimba?

⁸ Badika Yowano 8:29. Sunga nsaa ibadi abingwabingwa, Yesu badi na butaale bwa mwishimba mwanda badi auku’shi kwete kusangasha Nshaaye. Badi mushaale na kukokyela nsaa yabibadi bukopo bwadya kukookyela. Badi mufule Nshaaye aye nkutuula kufubila Yehowa pa mbalo ya kumpala mu muwa waye. Kumpala kwa kufika pa nsenga, badi bu “mukwashi” a Efile Mukulu. (Nki. 8:30) Na pabadi  pa nsenga, badi alungula bangi na katshintshi kooso pabitale Nshaaye. (Mat. 6:9; Yo. 5:17) Wawa mudimo ubadi upe Yesu muloo wibungi.—Yo. 4:34-36.

9. Mushindo kinyi wi kwikala bepane ngofu mu bulungudi akwitukwasha bwa kulama butaale bwa mwishimba?

⁹ Twi balombene kwambula Yesu pa kukokyela Yehowa na “kufwimisha [nsaa yooso] mufubo wa Nfumu.” (1 Kod. 15:58) Nsaa yatudi “bepaane ngofu” mu mudimo wa bulungudi, atupete mushindo wa kwikala na mweneno ebuwa a myanda yetu. (Bik. 18:5) Kileshesho, baba batufumankana nabo mu bulungudi bakwete kupeta myanda ikile mpa na yetu. Anka, nsaa yabalongo bya kufula Yehowa na kutumikila elango dyaye, nshalelo abo alumbuluka na abapete muloo wibungi. Nsaa yoso yatumono byabya, atushinkamisha’shi Yehowa etupasukila. Na kuuka kwa byabya akwitukwasha bwa kulama butaale bwa mwishimba. Mungi mukwetu mukashi mukalakashwe ngofu munda mwa muwa waye oso na mukumbo wa mu binangu na kwimonanga bu shii na muulo. Amba’shi: “Nsaa yandi mwipane ngofu mu bulungudi napusha’shi ne na binangu bifukame. Namono’shi mpa mwanda nsaa yandi mu bulungudi nepusha pepi ngofu na Yehowa.”

10. Mayi a Brenda abakulongyesha kinyi?

¹⁰ Banda kutala kileshesho kya mungi mukwetu mukashi abetamina bu Brenda. Aye na mwana aye mukashi mbakwatshibwe na mukumbo wa mu bongo wabetamina bu slerose. Brenda atambukilaa mu ka nkinga na te na bukome bwa kutambuka na mikoolo. Alungulaa ku nshibo na nshibo paadi na mushindo, anka afundilaa bantu mikanda bwa kwibalungula mukandu wibuwa. Amba’shi: “Mwanda nauku’shi mukumbo wande ta ngulombene kupwa mu uno ndumbulwilo, nepana ngofu mu mudimo wa bulungudi. Bulungudi, abukatusha binangu byande ku kenyongoshi kandi nako. Abuntakula mu kutula binangu byande mu kukwasha bantu banesamba nabo; ku nshibo na nshibo mu teritware a kakongye ketu. Na abunkwasha bwa kunangushena ku lukulupilo lwandi nalo bwa myanda ikumpala.”

11-13. (a) Batumibwa na bangi bantu babadi bakite kinyi kibadi kileshe’shi mba kuuku ba Yesu bebuwa? (b) Ba kuuku ba Yesu babadi na bukitshishi kinyi kwadi?

¹¹ Mu mafuku oso abadi Yesu alungula, batumibwa basha lulamato abamwekyele’shi, mba kuuku ba Yesu ba binyibinyi. Babadi bano ba kuuku babadi batemune mu Bible’shi: “Kwi kuuku akulamata kukila mukwenu.” (Nki. 18:24) Baba ba kuuku babadi na muulo ku meso a Yesu. Mu mudimo waye wa bulungudi, takwi muntu su ngumune a ku bakwabo ba ku mbidi badi mutule lukulupilo mwadi. (Yo. 7:3-5) Ungi mususa, bakwabo babadi banangushene’shi bakumbu mutwe. (Mak. 3:21) Anka, Yesu balungwile batumibwa baye mu bufuku bwa muladilo wa lufu lwaye’shi: “Anwe nwi bantu bashaale bwimane naami na kunyinga mu bitompwanga byande.”—Luk. 22:28.

¹² Ingi nsaa batumibwa babadi balwishishe Yesu, kadi tabadi mutale bilubilo byabo, anka bamwene’shi be na lukumino mwadi. (Mat. 26:40; Mak. 10:13, 14; Yo. 6:66-69) Pabadi nabo bufuku kumpala kwa’shi bamwipee, Yesu balungwile bano batumibwa basha lulamato’shi: “Neenwitaanyina bu baa kuuku mwanda kyandi mupushe kwi Nshaami nee mwinwiukishe kyanka.” (Yo. 15:15) Kushi mpaka, ba kuuku ba Yesu babadi bamunyingishe ngofu. Bukwashi bubabadi bamupe pa kumukwatshishena mu bulungudi, bubadi busangashe eshimba dya Yesu ngofu.—Luk. 10:17, 21.

¹³ Kukatusha batumibwa, Yesu badi na bangi ba kuuku, balume na bakashi babadi abamukwasha mu mudimo wa bulungudi na mu ingi myanda ina muulo. Bangi babadi  abamwitamina ku mashibo aabo mu kudya. (Luk. 10:38-42; Yo. 12:1, 2) Bangi namu babadi abende naye na kumupa bintu bibabadi nabyo. (Luk. 8:3) Yesu badi na ba kuuku bebuwa mwanda aye namu badi kuuku ebuwa kwabadi. Badi mwibakitshine myanda ibuwa na, tabadi ebatekye’shi bakite bikile ngobesha yabo nya. Yesu badi mupwidikye, kadi badi akumina bukwashi bwa ba kuuku baye bashibaadi bapwidikye. Kushi mpaka, babadi bamukwashe bwa kulama butaale mwishimba.

14-15. Mushindo kinyi watudi balombene kupeta ba kuuku bebuwa, na mbalombene kwitukwasha naminyi?

¹⁴ Ba kuuku bebuwa abetukwasha bwa kwikala na lulamato kwi Yehowa. Mushindo ukile buwa wa kupeta ba kuuku bebuwa nkwikala obe nabene kuuku ebuwa. (Mat. 7:12) Kileshesho, Bible etunyingisha bwa kwata nsaa na bukome bwetu bwa kukwasha bangi, bikishekishe ‘be mu dikyenga.’ (Ef. 4:28) Otentekyesha muntu kampanda a mu kakongye kenu odya kukwasha su? We mulombene kukwasha muntu shi na mushindo wa kutuuka mu nshibo bwa nkaula bintu mwanda wa bununu sunga mukumbo su? We mukumbene kukwasha kifuko kishi na mushindo wa kupeta ekuta dibungi na kya kudya su? Su ouku bya kufuba na site a jw.org^® mpa na JW Library^®, we mukumbene kukwasha bangi ba mu kakongye kenu bwabadya kuuka bya kufuba naye su? Nsaa yatwipana mu kukwasha bangi atupete muloo wa binyibinyi.—Bik. 20:35.

¹⁵ Ba kuuku betu abetukwasha patudi na nkalakashi mpa na kwitukwasha bwa kulama butaale mwishimba. Anka bu bibakitshine Eliwu badi muteemeshe Yoobo pabadi akula pabitale bitompwanga byaye, ba kuuku betu  abetukwasha nsaa yabetuteemesha na lwishinko looso p’atwibalungula byatupusha. (Yob. 32:4) Tatwi balombene kukulupila’shi ba kuuku betu abetwatshila bitshibilo nya, anka bibuwa tuteemeshe nsaa yabetupa malango aabo aatukila mu Bible. (Nki. 15:22) Anka bu bibadi Nfumu Daavide mukumine bukwashi bwa ba kuuku baaye na kwiyisha kooso, tatwi balombene kwikala na kwitatula nsaa yabetukwasha kwi ba kuuku betu patudi na lukalo lwa bukwashi. (2 Sam. 17:27-29) Eyendo, bano ba kuuku bebuwa nyi nkya buntu kya Yehowa.—Shak. 1:17.

16. Muyile Beena-Fidipe 4:6, 7, mmushindo kinyi penda umune watudi balombene kupeta butaale? Patuula.

¹⁶ Badika Beena-Fidipe 4:6, 7. Bwakinyi Yehowa etulungula’shi twi balombene kupeta butaale abutukila kwadi “munda mwa Kidishitu Yesu”? Mwanda twi balombene kulama butaale mwishimba na mu binangu nka su atupusha na twi na lukumino mu mudimo wi nao Yesu mu mpàngo ya Yehowa. Kileshesho, ku bukwashi bwa mulambu wa nkuulo wa Yesu, milwisho yetu yoso ngilombene kushimishibwa. (1 Yo. 2:12) Nsaa yatunangushena ku uno mwanda atunyingishibwa ngofu! Bu byadi Nfumu a Bufumu bw’Efile Mukulu akakatusha kafutakanyi koso ketufwishile ndumbulwilo a Satana. (Yesh. 65:17; 1 Yo. 3:8; Kibaf. 21:3, 4) Bino abitupa lukulupilo lukile buwa! Na sunga Yesu mmwitupe mudimo wibukopo, enetu, etukwasha mu ano mafuku a ku nfudiilo kwa uno ndumbulwilo. (Mat. 28:19, 20) Byabya abitunyingisha ngofu! Kusambibwa, lukulupilo, na kunyinga—nyi mbintu byatudi nabyo lukalo bwa kwikala na butaale.

17. (a) Mwina Kidishitu mukumbene kulama butaale bwa mwishimba naminyi? (b) Muyile mulayilo wi mu Yowano 16:33, atwikala na mushindo wa kukita kinyi?

¹⁷ Mushindo kinyi dingi odya kulama butaale mu binangu nsaa yodi mukalakashwe na bitompwanga? We kwibikita nsaa ywambula myanda ibakitshine Yesu. Wa kumpala, ela luteko na otungunukye na kuteka. Wa kabidi, kookyela Yehowa, na olungule na kisumi sunga nsaa yabikwikela bukopo bwa kwibikita. Na wa kasatu, kulupila mwi ba kuuku bobe balombene nkukwasha poodi mu bitompwanga. Paapa, butaale bw’Efile Mukulu abulama binangu n’eshimba dyobe. Anka bu Yesu, okambila bitompwanga byoso.—Badika Yowano 16:33.