NSHALELO A MUNTU
Tubapetele “ebwe dya muulo wibukopo”
WINSTON na Pamela (Pam) Payne bakwete kufuba ku Betele a mu Australie. Mbapete muloo mu nshalelo aabo anka, mbapete namu nkalakashi. Ingi ya ku yaya nkalakashi ngitale kushintuula bipikwa bya mbalo yabebatumu na babaadi na kinyongwa kya, kushimisha mwana batandjikilwe mufwile munda. Sunga mbyabya mbalame kifulo kyabo bwa Yehowa na mwilo waye mpa na muloo wabo mu mudimo. Mu ino nkonko yatwibele, atwibatekye bwabadya kwitulungula myanda yabadi bamone.
Winston, etulungule namu bibobangile kukimba Efile Mukulu.
Ne mukule mu kifuko kya bantu bashibaadi abalangwila, ku ntshiamba, mu kisangi kya Queensland, mu Australie. Bu bibatudi kula na bantu, ntshinaadi nauku ungi muntu nka penda bena kifuko kyande. Panalombeshe bipwa 12, nabangile kukimba Efile Mukulu. Namutekyele bwashi ankwashe ngukye bya binyibinyi pabimutale. Nakatukile ku ntshiamba na, ami nkupeta mudimo mu Adelaide, mu Australie-Méridionale. Panalombeshe bipwa 21, nafumankene na Pam mu Sydney, panaadi mu konje, aye nkundungula pabitale kisaka kya kipwilo kyabetamina bu mouvement religieux britannique israël akyamba’shi, bena Grande-Bretagne mbekulu ba bisamba bishimine bya Isaleele a kala. Na’shi, bino bisamba, nyi bisamba ekumi bya bufumu bwa kutunduka nguba bibasukile mu siekele a mwanda K.B.B. Byabya, panalukile ku Adelaide, nabushile wawa mwisambo na ungi mwina mudimo nami baadi alongo Bible na ba Temwe ba Yehowa. Kunyima kwa kwisamba naye munda mwa nsaa ipeela—Namwene’shi, luteko lwande lwa ku bukinga lubapete lwaluulo. Nadi nalongo bya binyibinyi pabitale Mupangi ande na Bufumu bwaye! Napetele “ebwe dya muulo wibukopo.”—Mat. 13:45, 46.
Pam, nobe namu bobangile kukimba dino ebwe dya muulo obe ki mukinga. Bwedipetele naminyi?
Ne mukudile mu kifuko kya balangwidi mu kibundji kya Coffs Harbour, mu mbalo yabetamina bu Nouvelle-Galles du Sud. Baledi bande na ba nkambwa bande babadi abakumina malongyesha a kisaka kyabetamina bu mouvement religieux britannique israël. Ami na mwin’ande mulume, na taata ande, mbetukushe na lukumino lwa’shi Efile Mukulu akuminaa bantu basha ba nkambwa babo ba mu Grande-Bretagne. Ntshinaadi nka mwibikumine nya; nadi na nsala ya mu kikudi. Panadi na bipwa 14, nayile mu bipwilo bikile bungi, mpa na mu bena Anglican, ba Batiste, na mu kipwilo kyabetamina bu adventistes du septième jour. Anka ta mbinkwashe bwa kuuka Efile Mukulu nya.
Kunyima kwa mafuku kifuko kyande kibayile mu Sydney, kunadi mu kemonene na Winston, bafikile kwanka mu kwikisha. Anka byambanga, pa mwanda wa miisambo yetu itale myanda ya mu kipwilo, tubabangile kulonga na ba Temwe. Akupu, mikanda ibadi antumina ibadi iwule na ma verse! Ne kwamba’shi, bwa mususa wa kumpala nadi mukanye—nafiita mpa na munda. Byabya namwene ku kapelakapela’shi bino bibadi anfundjila nyi mbya binyibinyi pabitale Efile Mukulu.
Mu 1992, nayile ku Adelaide bwandya kwikala pepi na Winston. Batshile mpàngo ya’shi nshale kwa mungi mulume na mukashi Thomas na Janice Sloman ba Temwe—babadi ba misionere mu Papouasie-Nouvelle-Guinée. Babadi bandeshe kalolo kakile; nadi penda na bipwa 18, abankwashile bikata bwandya kuwuka Yehowa. Ami namu nkutunguluka’nyi naa kulonga Eyi dy’Efile Mukulu, munda mwa mafuku apeela nashinkamiishe’shi napete bya binyibinyi. Kunyima kwa’twe kwiyibakishena na Winston, tubabangile musango umune nshalelo ebuwa mu mufubo wa Yehowa—mwanka, sunga mbyakubadi nkalakashi, ngwitukwashe bwatudya kwata dino ebwe dya muulo na kinemo kikata.
Winston, etulungule pabitale bipwa byobe bya mbangilo mu mudimo wa Yehowa.
A. Karte akalesha munadi nende bu mukunkushi a kifunda
B. Makuta a mu bingi bisangi bya mema. Mu kisangi kya Kiribati na mu Tuvalu bibabadi abetamina bu bisangi bya Gilbert na Ellice
C. Kisangi kibuwa ki na bikala mabwe kya Funafuti mu Tuvalu. Kimune kya mu bisangi bibungi bibatuyile mu kutala kumpala kwa’shi ba misionere bende mwanka
Mafuku apeela kunyima kwa’twe kwinyibakishena na Pam, Yehowa babangile kwitupa midimo ipabwayo ya kumufubila. (1 Kod. 16:9) Kibelo kya kumpala kibaadi kitufungukile nku bukwashi bwa mukwetu Jack Porter, badi afiki mu kutala kakongye ketu kapela bu mukunkushi a kifunda. (Tukwete kufuba naye binobino mu Komite a filiale a mu Australie.) Jack na mukashi aye Roslyn, babadi betunyingishe bwa kukita mudimo wa bu mbala-mashinda a myeshi yoso—tubadi bafube wawa mudimo munda mwa bipwa bitano. Panadi na bipwa 29, babadi betutekye na Pam bwatudya kubanga mudimo wa kukunsha kifunda mu kisangi kya Pacifique du sud, mwanka tubadi ku bukunkushi bwa filiale a Fiji. Tubadi atwende mu bisangi bya Samoa Américaines, Samoa, Kiribati, Nauru, Niue, Tokelau, Tonga, Tuvalu na Vanuatu.
Mu aa mafuku, bantu ba mu bingi bisangi bi kula tababadi na binangu bibuwa pabitale ba Temwe nya, nyi bwakinyi bibadi abitungu’shi twikale na mayele na budimu. (Mat. 10:16) Tukongye tubadi tupeela, na mu tungi tababadi na mushindo wa kwitupetela mbalo ya kulala. Tubatekyele bantu ba mu kibundji bwa’shi tushale kwabo, na babadi abetulesha kalolo.
Winston, we mulame lukalo lobe lwa kufuba mufubo wa kwaluula mikanda. Opushaa naminyi pabitale uno mwanda?
Mu Samoa, nkwete kukunkusha kalasa ka bakulu
Patubabangile kufuba mu kisangi kya Tonga, bakwetu babadi penda na ndambo ya ma trakte na tu mikanda mu ludimi lwa Tonga—ludimi lwa mu Polinesie. Mu bulungudi, babadi abalongo na bantu mukanda wa La vérité qui conduit à la vie éternelle mu Anglais. Mu kalasa ka bakulu ka mbingo inanka, bakulu basatu babakuminyine bwa kwalula mukanda wa La vérité mu ludimi lwa Tonga, sunga mbyabashibadi abauku Anglais kalolo. Pam badi afundu mikanda, atwe namu atwiyitumu mu filiale a États-Unis bwabadya nkeyitusha. Mudimo oso ubadi ukite mbingo mwanda. Sunga bibabadi baluule tabibadi bikambe buwa, wawa mukanda ubadi ukwashe bantu abakula ludimi lwa Tonga bwa kulonga bya binyibinyi. Ami na Pam tatwi baluudi nya, anka uno mwanda ubetutakwile bwa kutuula binangu byetu ngofu ku uno mudimo.
Pam, nshalelo obodi naye mu bisangi badi mwilekene na a mu Australie naminyi?
Imune ya ku mashibo etu pabatudi mu mudimo wa kifunda
Bibadi bilekene! Mu angi ma mbalo tumwe tubadi atwitusumu, kibobo na kiteleesha ki bukopo, makoswe, mikumbo, na ingi nsaa kukutwa kwa byakudya. Ku lungi lupese, kyolwa kyoso pa kupona kwa nguba kubadi akwitusangasha ngofu p’atutadila Ocean mu tu ma fale [tu mitala]—eshina dya mu Samoa dyabetamina tushibo twa mu Polinesie twi na misaka ya nsonyi tushi na bimano. Bufuku apabaluka mweshi, mabo a cocotier abaadi aamweneka kalolo, na mweshi ubadi aulesha bi Ocean kalolo. Yaya nsaa ibuwa ibadi ayitukwasha bwa kunangushena na kwela nteko, bibadi bitukwashe bwa kupela kutula binangu byetu ku myanda ibubi na kwibitula ku myanda ibuwa.
Tubadi bafule bana ngofu, babadi abetusangasha na babadi abakanya pa kwitumona twi basungu benyi. Patubayile mukutala kibundji kya Niue, kangi nka nsongwalume kabakwatshile mboko ya Winston ibwaa bwibungi kamulungula’shi: “Nswaa yobe ibuwa byabya.” Eyendo’shi, tabadi mubande kumona mboko ibwaa bwi bungi kumpala na tabadi auku bya kwibiwitamina nya!
Bibadi abitwinyongosha pa kumona bulanda bubadi nabo bantu na bibadi nshalelo abo. Babadi bashale mbalo ibuwa anka kushi mushindo wibuwa wa kwibukisha be na dikyenga dya kupeta mema a kutoma. Sunga mbyabya, bakwetu tababaadi abamweneka bu bakalakashwe nya. Uno nyi nshalelo badi mulombane kwabadi. Babaadi na muloo wa kwikala pamune na bifuko byabo, na mbalo ya kwibungila bwa kulangwila na kinemo kya kutumbisha Yehowa. Kileshesho kyabo kibadi kitukwashe bwa kutula binangu byetu mu kwikala na nshalelo mupelepele.
Pam, ingi nsaa, bodi otapa mema na kuteeka kya kudya kyobe, nshalelo oshii mubiile. Mbikunyi bibodi moobeshe kukita bino?
Mu Tonga, Pam kwete kutumpa bilamba byetu
Natumbula Papa bikata. Mmundongyeshe myanda ibungi ibuwa, bu kutembesha kaalo na kutekyela kwanka mpa na bya kusangala na byatudi nabyo. Pabatuyile ungi mususa mu kisangi kya Kiribati, tubadi bashale mu kashibo kapela ke na musaka wa nsonyi, mwi bintu bi bu bikala mabwe, na kabadi bebakye na mabungu. Bwa kuteeka ka kudya, nadi nabundula bwina mu nsenga bwa kukita kidiba kya kubungila kaalo nemwele bipusu bya mundji a coco bu nteete ya kuteeka nayo. Bwa kupeta mema, nadi nele mulongo na bakashi ba mu kibundji bwa kutapa mema. Bwa kutuusha mema mu bwina, babadi abata mutshi wi bula bwa metre abidi wabadi banye ka mbekyeshi ku nsongo, nka abikalaa mutshi wa ndobo. Kadi pamutwe pa kwanya ndobo ku nsongo kwa moshi, abadi abanya ka bidon. Tubaadi atulondo mulongo, muntu oso baadi ele mboko bwa kukaka mooshi pa waye mususa. Ka bidon kabaadi akealuula na kuula mema. Naadi namono shi mbibofule. Pabibafikile pa wande mususa, ami nkukaka mooshi misusa ibungi, kadi ka bidon kabaadi akashaala penda panundu pa mema! Nsaa ibalekyele bantu boso kunsepa, umune a kwabadi bafikile bwa kunkwasha. Bantu ba kwakwa abaadi abetukwasha misusa yoso na abaadi na kalolo.
Anwe boso nubadi bafule mudimo wenu mu bisangi bya mema. Nwi kwitulungula ingi myanda ibuwa yanutentekyesha?
Winston: Bibadi bitwate mafuku ebungi bwa kulonga bingi bipikwa. Kileshesho, nsaa ibabadi abetupa byakudya kwi bakwetu, babadi abetupa byoso byabadi nabyo. Bwa musango wa kumpala tatubadi atuuku’shi abitungu twibalekyele ndambo nya. Byabya tubadi abadi byoso byabadi betupe! Eyendo’shi, patubatundwile bibadi mwanda, tubebalekyele bidibwa. Bakwetu babadi abetupushisha, sunga mbyatubadi atukitshi bilubilo. Na babadi na muloo wa kwitumona kunyima kwa myeshi isamombo yoso sunga pabatudi atufiki mu kwibatala mu mudimo wa kifunda. Kukatusha bakwetu ba mwiumbo, nka penda atwe nyi babadi bangi ba Temwe mu aa mafuku.
Mu kisangi kya Niue, nende na kisaka kya bantu mu bulungudi
Kufika kwetu kubadi kutushe bu kamonyi kwi bantu ba mu yaaya mbalo. Be na kibundji boso babadi abamono’shi kipwilo kya bakwetu nyi nkintu kyabadi bapwandikishe nka byabya. Anka nsaa ibafikile misionere na mukashi aye mu kutala bakwetu, bantu babashinkamishe’shi nkipwilo kya binyibinyi.
Pam: Kintu kimune akisangasha kyantentekyesha kibadi kikitshikye mu kisangi kya Kiribati, kubadi kangi kakongye kabadi penda na bakwetu balume na bakashi bapela. Mukwetu Itinikai Matera badi mukulu mu kakongye penda umune, bakitshine mwaye moso bwa kwitupasukila. Bafikile dingi efuku na kaseele kadi mwele eyi. Bambile’shi: “Ndjenu.” Eyi dya nsoolo dibadi bu kintu kipya kwatudi mu aa mafuku. Kyakya kintu kipela kadi akilesha kalolo kibadi kitukume ku mashimba.
Bipwa bipeela kunyima, Pam, bodi mutande mwana obe kadi atuuka mufwe. Mbukwashi kinyi bubopetele bwa kunyingiila lwalwa lukalakashi?
Napetele eyimi mu 1973 patubaadi na Winston mu Pacifique du sud. Tubatshile kitshibilo kya kwaluka mu Australie, myeshi inanka kunyima natanda mwana mufwile munda. Winston baadi n’aye mwinyongole ngofu; bwa mwan’aye. Kinyongwa kyande kibaadi kipeele mwenda kukila kwa mafuku, kadi takibaadi kipwe nya, mpa na pabatupetele Kitenta kya mulami kya 15/4/2009. Mwisambo wa, “Nkonko ya bantu ababadikaa” ubaadi awipusha shi: “Si un bébé meurt dans le ventre de sa mère, peut-on espérer qu’il ressuscite ?” Mwisambo ubaadi witushinkamiishe shi mwanda wi mu maasa a Yehowa aye akitaa nka myanda ilulame. Akakatusha malwa oso atudi bapete mu uno ndumbulwilo ebubi, nsaa yalungula Mwana aye na kifulo kyoso bwa ‘kutuuta mifubo ya Kafilefile.’ (1 Yo. 3:8) Mwisambo ubadi witukwashe dingi bwa kusangeela ngofu “ebwe dya muulo” dyatudi nadyo bu bantu ba Yehowa! Tubadya kwikala naminyi su tatwi na lukulupilo lwa Bufumu?
Kunyima kwa kushimisha mwana etu, tubabangulwile mudimo wetu wa nsaa yooso. Tubafubile munda mwa myeshi ipela ku Betele a mu Australie na atwe nkubanguula mudimo wa kifunda. Mu 1981, kunyima kwa kufuba munda mwa bipwa binanka mu tuwumbo twa mu Nouvelle-Galles du Sud na mu Sydney, babadi betwitamine bwa kufuba ku Betele a mu Australie, bu bibaabadi abamwitamina aa mafuku, na twi kwanka mpa na binobino.
Winston, nshelelo oobe mu bisangi bya mu Pacifique Sud badi mukukwashe mu mudimo oobe wa bu umune a mu komite a filiale a mu Australie su?
Oolo, mu mishindo ibungi. Kya kumpala abadi batekye filiale a mu Australie bwadya kukunkusha mudimo wa mu Samoa Américaine na wa mu Samoa. Akupu, mbabungye filiale a mu Nouvelle-Zeland na a mu Australie pamune. Binobino, teritware a filiale a mu Australie e na Samoa Américaine na Samoa, bisangi bya Cook, Nouvelle-Zeland, Niue, Timor-Leste, Tokelau, na Tonga—mwatudi bapete kinemo kya kwenda mukutala bu muntu alesha mpala ya Betele. Kufuba kwande na bano bakwetu balume na bakashi abauku myanda ibungi mu bisangi bya mema nkunkwashe bikata pano pankwete kufuba mu biro bya filiale.
Winston na Pam ku betele a mu Australie
Bwa kufudiisha, nakumina kulesha’shi munda mwa bipwa bibungi ami na Pam twi basangane’shi ta mpenda bantu bakulu abakimbaa Efile Mukulu nya. Twi bamone uno mwanda kwatudi’twe banabene. Ba nsongwa namu abakimbi “ebwe dya muulo ukata”—sunga nsaa i bangi be na bifuko tabakumina bya binyibinyi. (2 Bf. 5:2, 3; 2 Mya. 34:1-3) Bwa kwakula kalolo, Yehowa nyi Efile Mukulu sha kifulo mukumine bantu booso, bakulu na bakinga bwa’shi bapete muwa!
Nami na Pam pabatubangile kukimba Efile Mukulu takudi bipwa 50, tatubadi atuuku kulombene kwitufisha kwakwa kukimbuula nya. Bya binyibinyi bya Bufumu, kushi mpaka nyi ebwe dya muulo ukata! Twi na kitshibilo kya kushaala balamate ku dino ebwe na bukome bwetu booso!
