Blessing * bayiile mu Europe na lukulupilo lwa kupeta mudimo wa kulumbuula nyene ubabadi bamulee. Pabafikile, ababangile kumukupila, na kumukyengyesha kwi bakwabo munda mwa mafuku ekumi. Kunyima kwa paapa abamutwesheshe pabukopo mu mudimo wa kindumba.

Abaadi batshibile Blessing’shi ku bufuku booso ekalanga afutu nfwalanga ya mu Europe 200 sunga 300 bwadya kufuta dibasa dya nfwalanga ya mu Europe 40 000 dibabaadi baate kwi sha nshibo ibaadi mushale. * Blessing akula’shi: “Nadi napusha bya kusuuka, anka nadi napusha moo mwanda ntshinaadi nauku kyabadi balombene kukita kifuko kyande nya. Nadi mwinyongole ngofu.” Uno mwanda waye ngwipushene na wa bantu midiyo inanka be mu bupika bwa bantu be mu ndumbulwilo e mu nsenga ishima akitaa myanda ya bifwanyi bya bantu be muswa.

Kubapu kukila bipwa 4 000, mungi songwalume a betanyina bu Yoosefe, abaadi bamuudishe kwi bakwabo balume. Abo kumwela mu lukano lwa mu Ejiipitu. Mu kwilekena na Blessing, Yoosefe tababadi abamukyengyesha kwi nfumwaye nya. Abaadi bamwele mu lukano kunyima abamwelele mu lungi lukano lwa bilonda.​—Kibangilo 39:1-20; Misambo 105:17, 18.

Yoosefe badi mu bupika mu mafuku a kala; Blessing namu ayikalanga mu bupika mu ano mafuku eetu. Anka boso bwabo mbapete makyenga aatuukila ku busunga bwa bantu, mudimo wa kufubisha bantu bu byamo bwa kupeta makuta.

Bantu bebungi mbamone’shi ngoshi nyi mushindo ubofule wa kukwata bantu mu bupika. Thoutmosis III nfumu a bena Ejiipitu bakwile’shi baadi mukwate bantu 90 000 musango umune mu lukano kunyima kwa kwenda mu ngoshi mu Kanaana.

 Mu Ampire a bena Looma, abaadi bakwate bantu bebungi mu bupika ku bukwashi bwa ngoshi, na dingi pabaatekyele bapika bulungantu, bibaadi bitushe ngoshi. Muyiile abipwandikisha bantu, mu siekele a kumpala, kya pankatshi kya bantu abaadi mu Looma abaadi bapika. Bantu bebungi abaadi mu bupika mu Ejiipitu na mu Looma abaadi abebafubisha ngofu. Bu kileshesho, bapika babaadi abafubu mu ma mbalo abashulaa mabwe a muulo mu Looma abaadi abakitshi penda bipwa makumi 30 na muwa akupu abafu.

Kunyima kwa mafuku, bupika tabubaadinyi buwa nya. Kubanga mu siekele a 16 na ku a 19, kukwata bantu ba mu Afrique mu bupika na kwibaudisha mu Amérique bubaadi musunga bukile bukata pa nsenga. Rapore ya ndumbulwilo abetanyina bu UNESCO ayilesha’shi: ‘Abapwandikisha’shi midiyo 25 sunga midiyo 30 ya bantu balume, bakashi, na bana abaadi bakwatshibwe mu bupika na kuudishibwa.’ Abalesha’shi bantu binunu na binunu abafwile pa kusabuka kishiba kya Atlantique. Ungi mpika ababaadi abetanyina bu Olaudah bapandjile, badi muleshe’shi: “Tukuwa twa bana bakashi, na nkalo ya bantu abaadi pa kufwa, bibaadi abinyongosha ngofu; ta bi su mushindo wa kwibyakula nya.”

Mwanda wa malwa, kukwata kwa bantu mu bupika nyi mwanda ukyengyeshe bantu ngofu. Ndumbulwilo a midimo mu nsenga ishima (Organisation Internationale du Travail) alesha’shi lelo uno, midiyo 21 ya bantu balume, bakashi, na bana bakwete kufuba bu bapika mu nkano, ku mifubo yabashi’abebafutu sunga yabebafutu makuta apeela. Bapika bebungi lelo uno bakwete kufuba mu ma mbalo abashulaa mabwe a muulo, abafubu midimo ibukopo, kubula matafwadi, mu mashibo amufubaa ba ndumba, na ku midimo ya bantu. Sunga byekala’shi mbulamatadi tamukumine ino mishindo ya bupika, ino myanda ikwete kwenda na kukaamina mu ano mafuku.

Kukyengyeshibwa kwabadi bapete, nkutakule bapika bebungi bwabadya kulwa ngoshi bwa’shi bapete bulungantu. Mu siekele a kumpala K.B.B. Spartacus ungi kipambe na bapika bafikye ku 10 0000 abaadi batombokyele bena Looma. Mu siekele a 18, bapika abaadi mu kisangi kya mema kya Caraïbes kyabetanyina bu Hispaniola mu Haïti, abaadi batombokyele ba nfumwabo. Dikyenga dibadi adipete bapika mu kukuna kwa mitshi ya nsukaadi dibaadi dibweshe ngoshi ibakitshine bipwa 13, ku nfudilo a byoso ino ngoshi ibatwesheshe kwiyikeela sunga bulungantu bwa mwilo wa beena Haïti mu kipwa kya 1804.

Kushii mpaka, kufiluka kwa bena Isaleele mu Ejiipitu, ngi mwanda wa kumpala wa bantu batushibwe mu bupika kalolo mu nsenga ishima. Bantu midiyo isatu—mwilo ushima—ubatuukile mu bupika mu Ejiipitu. Abaadi na matalwa akupeta buno bulungantu. Bible aleesha myanda ibungi pabitale nshalelo ababadi naye  mu Ejiipitu kipaso ky’“abebakyengyeshanga na kifita kyooso.” (Efilu 1:11-14) Nfumu Faraone batudile basalayi bwa kuuka mushindo ukwete kufima mwilo wa Isalele.​—Efilu 1:8-22.

Kufungushibwa kwa beena Isalele mu Ejiipitu mubabadi abebakyengyesha na kukutwa kwa kululama, kubadi kwilekeene na kungi kooso mwanda Efile Mukulu nabene ngi baadi mwibapashe. Efile Mukulu balungwile Moyiise’shi: “Naamono mpombo ya mwilo wande, nee mwikye bwa kwibapososha.” (Efilu 3:7, 8) Mu aa mafuku, bena Yuuda babaadi abasangeela Pasaka mbalo yooso ibabadi ku kipwa kyooso bwa kutentekyesha uno mwanda.—Efilu 12:14.

Bible amba’shi, “Yehowa Efile Mukulu eetu mushikwe ntondo,” na dingi etushinkamisha’shi Aye tashintulukaa. (2 Myanda 19:7; Malakii 3:6) Efile Mukulu batumine Yesu bwa ‘kuukisha bulungantu bwa bee mu lukano. . . ,na kufungusha baba [abamweshwa malwa NWT].’ (Luka 4:18) Byabya bano bantu babapetele bulungantu ku bupika bwa mishindo yooso su? Ta mbyabya nya. Babatumine Yesu bwa kufungusha bantu ku bupika bwa mulwisho na lufu. Ngi bwakinyi bakwile’shi: “Bya binyibinyi abinwikasha bantu balungantu.” (Yowano 8:32) Mpa na lelo uno, bya binyibinyi bibabalongyeshe kwi Yesu bikwete kufungusha bantu mu bipaso bibungi.​—Tala kashibo akamba’shi “ Ne mutushibwe mu bupika bwa ungi mushindo.”

Kumbi, Efile Mukulu bakwashishe Yoosefe na Blessing bwabadya kutuuka mu bupika mu mishindo ilekeene. We kupeta myanda ibungi ya kukaanya pabitale Yoosefe mu shapitre a 39 na ku a 41 a mukanda wa Kibangilo. Kufungushibwa kwa Blessing ta kwi bya kwitukanyisha su?

Kunyima kwabo kubinga Blessing mu Europe, bayiile mu Espagne. Kwakwa bakafumankene na ba Temwe ba Yehowa n’aye nkubanga kulonga nabo Bible. Batshile kitshibilo kya kulumbuula nshalelo aaye, na bapetele mudimo wibuwa, aye nkukimba bya kulungula mukata aaye bwa’shi apeeleshe efuto dyaye dya ku mweshi. Dingi efuku, yawa mwana mukashi baadi mukata a Blessing bamwitanyine ku telefone, baadi akyebe kulekyela ebasa dya Blessing na kumulungula’shi amufwile namu lusa. Nkinyi kibakitshikile? Yawa mwana mukashi namu babangile kulonga Bible na ba Temwe ba Yehowa! Blessing amba’shi: “Bya binyibinyi abikwikasha mu bulungantu mu myanda ibungi.”

Yehowa benyongwele ngofu pabitale myanda ibabadi abakitshi beena Isaleele kwi bena Ejiipitu; kwete kwinyongola nka wawa mushindo umune lelo uno pa kumona mushindo watukyengyeshibwa. Eyendo, nfudilo a byooso, akukekala kushintuluka kukata munkatshi a mwilo wa Yehowa. Anka, mulayilo w’Efile Mukulu wa kufwisha kululama aukalombana. “Muyiile mulayilo waye twibatengyele eyilu dipya na nsenga ipya, mwamwa amukabikala bululame.”​—2 Mpyeele 3:13.