MIISAMBO YA MBANGILO | BIMONWA BYA BANTU BE MWIYILU
Nkonko itale bantu be mwiyilu
Toodi namu mwiyipushe pabitale myanda ya mwiyilu na booso bemushale su? Su lwalulo lwi’shi oolo, twe bupenka nya. Takudi bipwa binunu bantu bebungi bakwete kwenda na kwiyipusha nka pabitale uno mwanda. Bebungi abakumina’shi ba nkambwa beetu be mwiyilu na twi balombeene kwibaneemeka. Bangi abapwandjikisha’shi bashale mwiyilu be mu butaale na kumatwi talala, mbefunyishwe na ba mwikeeyilu na bantu bebuwa babafwile. Bangi namu abamono mwiyilu bu mu nshibo ya b’efile binunu kama na nkama.
Bantu bebungi abakula’shi tatwi balombeene kuuka kintu su nkimune pabitale bi mwiyilu, mwanda ta kwi muntu afiki mwiyilu mumone na meso bi mwanka bwadya kwitulungula byamudi nya. Anka, kunangusheena bino ta kwibuwa nya. Yesu Kidishitu baadi mwiyilu na mbidi ya mu kikudi kumpala kwa kufika pa nsenga. Balungwile bakata ba bipwilo ba musiekele a kumpala pabutoka’shi: “Ntshi mwikye mwiyilu bwa kukita kyankyebe’mi nya, anka akikyebe muntume.” Na dingi Yesu baadi muleeshe myanda yooso pa butooka nsaa ibalungwile batumiibwa baye’shi: “Mu nshibo ya Yaaya, mwi bishaaleelo biibungi.”—Yowano 6:38; 14:2.
Kushi mpaka, Nshaye na Yesu nyi Efile Mukulu, eshina dyaye mbu Yehowa, na “nshibo” Yaye mmwiyilu. (Misambo 83:18) Byabya, muntu su ngumune ta mulombeene kwitulungula myanda ya mwiyilu kukila Yehowa Efile Mukulu na Yesu Kidishitu nya. Yehowa na Yesu mbetupatulwile myanda ya mwiyilu ku bukwashi bwa bimonwa bibaabadi baleeshe bantu basha lukumiino.
Mwisambo aulondo awisambila bwa bipindji bya mu Bible abitupatulwila myanda ibabamwene kwi bantu mu bimonwa. Nsaa yotaluula bino bimonwa, tentekyesha’shi mwiyilu mwi bintu bya mu kikudi, byatushii balombeene kumona na kukuma. Na dingi, pamutwe pa kwitupatulwila ino myanda mu ngakwilo a mu kikudi, atushii balombeene kupusha, Efile Mukulu baadi mufube na bimonwa bwadya kwitupushisha myanda ya mu kikudi mu bishima byatudi balombeene kupusha. Bino bimonwa abitukwasha bwa kupusha bi bantu be mwiyilu “mwi bishaaleelo biibungi.”
