“Lupuna-nsulu lubaadi lutuule mwiyilu, muntu kampanda baadi mushikame pa lupuna-nsulu. Baadi mushikame pa lupuna-nsulu na lukyebo lubaadi alupenyapenya bu ebwe dya jaspe na dya sardwane. Ntumbo ibaadi ifunyishe lupuna-nsulu naa emeroode.”​—Kibafumbwilwe 4:2, 3.

“Kibaadi buu lukyebukilo lwa nkòngolo mwikumbi nguba a mpeshi: byaabya ngi bibaadi lukyebukilo lw’etaata dibaadi mpese yooso. Kibaadi lukyebukilo, kifwatulo kya ntumbo ya Yehowa.”​—Esekyele 1:27, 28.

Bino bimonwa, bibaabadi baleeshe Yowano mutumiibwa na mutemuki Esekyele, abituleesha bi ntumbo y’Efile Mukulu Mukile bukata a mwiyilu, Yehowa ku bukwashi bwa bintu byatudi balombeene kumona bu​—ebwe dya jaspe, nkongolo, na lupuna-nsulu lwa ntumbo. Abitulongyesha’shi Yehowa e buwa abwitukaanyisha, e na kalolo, na butaale.

Uno mushindo wabaleesha Efile Mukulu ngwipusheene na mayi a mufundji a misambo bafundjile’shi: “Yehowa mmukata, sha-nkumo ikata, a-kutshina, ee kunundw’a beefile booso. Beefile booso ba miilo mbintu bya bisumanga. Yehowa mmupangye eyilu. Ebaakanyi n’etaata bi kumpala kwaye, bukome na kineemo bi mu mbalo yaaye i selele.”—Misambo 96:4-6.

Sunga Yehowa ekala kunundu kwa byooso, etwitanyina bwatudya kwifubwila peepi naye mu luteko na kwitushinkamisha’shi ateemesha nteko yetu. (Misambo 65:2) Efile Mukulu mmwitufule na etupasukilaa ngofu, ngi bwakinyi Yowano mutumiibwa bafundjile’shi: “Efile Mukulu nyi nkifulo.”​—1 Yowano 4:8.

“[Pabaadi Etshyene mulongi a Kidishitu], muule na bukome bwa kikudi kiselele, bashimikile meeso mwiyilu; aye nkumona ntumbo y’Efile Mukulu, na Yesu mwimane ku mboko ilume y’Efile Mukulu. Aye nkwamba’shi: ‘Ngiiwu’mi kwete kubandjila eyilu dishitukye na Mwan’a muntu mmwimane ku mboko ilume y’Efile Mukulu.’”​—Bikitshino 7:55, 56.

Mafuku apeela kumpala kwa’shi Etshyene amone kino kimonwa, Yesu baadi mwipayibwe ku matalwa a bakata ba beena Yuuda benyi babaadi abesamba na Etshyene. Kino kimonwa kibaadi akishinkamisha’shi Yesu e na muwa na’shi musangudiibwe ku bafwe na e pa mbalo ya kineemo. Pa uno mwanda, Mpoolo mutumiibwa bafundile’shi: “[Yehowa] baabushishe [Yesu] ku bafwe, na amushaadika ku mboko ilume yaaye mwiyilu, kuunundu kwa ooso makata, matalwa, makome malopwe, na kwa dingi eshina dyooso dilombeene kuteemunwa, kushii penda mu byaa-pano’pa anka dimo mu bikyaabifiki.”​—Beena-Efeso 1:20, 21.

Kunyima kwa kulesha byadi na mbalo ikaamine, Bifundwe abileesha’shi Yesu apasukilaa bantu ngofu nka bu Yehowa. Mu mudimo waye wa pano pa  nsenga, Yesu baadi mupaashe be na mikumbo, be na bilema, na kubuusha bafwe. Ku bukwashi bwa lufu lwaye lwa nkuulo, baadi muleshe’shi aye n’Efile Mukulu mbafule bantu bikata. (Beena-Efeso 2:4, 5) Bu byadi mwimane ku mboko ilume y’Efile Mukulu, Yesu akyebe kufuba na matalwa aaye bwa kutwadila bantu ba pa nsenga ishima be na kukookyela myabi ibungi.

Ami mutemuki Ndanyele “namwene mpuna-nsulu ituule na [mukulu a mafuku, EEM] [Yehowa] mushaale. . . . Binunu na binunu bibamufubilanga, na binunu [ekumi misuusa] binunu [ekumi] bibaayimananga kumpala kwaye.”​—Ndanyele 7:9, 10.

Mu kino kimonwa kya mwiyilu, Ndanyele tamumone penda mwikeyilu umune, anka bamwene bisaka. Kino kimonwa kibaadi kya kukaanya! Ba mwikeyilu nyi mbantu ba mu kikudi be na ntumbo, kiukilo na bukome. Mu milongo yabo mwi ba serafime na ba kerubime. Mu Bible mbateemune ba mwikeyilu misango ikile pa 250.

Ba mwikeyilu ta mbantu ba kala babaadi pa nsenga nya. Efile Mukulu bapangile ba mwikeyilu mafuku ebungi kumpala kwa kupanga bantu pa nsenga. Nsaa ibabapangile nsenga, ba mwikeyilu babaadi ababandjila na kwela nkasa.​—Yoobo 38:4-7.

Umune wa ku mishindo yabafubila Efile Mukulu kwi ba mwikeyilu nyi nkukwatshisheena mudimo wi na muulo kukila midimo yooso pa nsenga aukitshika lelo uno—kulungulwa kwa mukandu wibuwa wa Bufumu bw’Efile Mukulu. (Mateo 24:14) Kukwatshisheena kwabo kwa uno mudimo mbekuleeshe mu kimonwa kya Yowano mutumiibwa. Bafundjile’shi: “Namwene ungi mwikeyilu baadi apapama [mwiyilu] baadi na mukandu wibuwa wa looso wa kuukisha kwi bano bashaale pa nsenga: kwi eumbo dyooso, kisamba, mwakulo na mwilo ooso.” (Kibafumbwilwe 14:6) Sunga byekala’shi ba mwikeyilu tabakulaa na bantu bibaabadi abakula ingi misango mu mafuku a kala, bakwete kukunkusha baaba abalungula mukandu wibuwa kwi bantu be na mashimba ebuwa.

“Kubakitshikile ngoshi mwiyilu: Mikaele [Yesu Kidishitu] na miikeyilu yaaye babalwile na nyoka. Nyoka namu, pamune na mikeeyilu yaaye, baadi alu ngoshi, anka tabaatshokwele’ye; takubayikeele dimo mbalo yaabo mwiyilu nya. Anka abasumbwile nyonka mukata, nyoka a kala, abayitanyina bu Diabulu na bu Satana, mulendwishi a baa-pano booso; abamusumbwile pa nsenga na miikeyilu yaye pamune naye.”​—Kibafumbwilwe 12:7-9.

Kumpala, mwiyilu tamubaadi butaale nya. Kumbangilo kwa myanda ya bantu, mwikeyilu umune baadi mutombokyele Yehowa pa mwanda wa lwabi lwa’shi bantu bekale abamulangwila, aye nkufika Satana, eshina adipushisha’shi “Mwishikwanyi.” Kunyima bangi ba mwikeyilu abalondele bu ntomboshi bwaye abo nkufika ba demo. Pa mwanda wa bu ntomboshi bwabo, mbatombokyele Yehowa na bakwete kulendwisha bantu bebungi na kwibakatusha mu bukunkushi bwibuwa bwa Yehowa.

Satana na ba demo baaye be na bukitekite na bu ntomboshi. Mbashikwe bantu na mbatuushe makyenga ebungi e pa nsenga. Bu kileshesho, Satana bayipayile nyema na bafubi ba Yoobo muntu sha lukumiino. Kunyima bayipayile bana ba Yoobo booso ekumi pa kwibwesha “kipapi kikata” bwakidya kuponesha nshibo ibaabadi. Akupu, Satana baadi mwase Yoobo maladi a “[byulwa] kubanga muushy’a ngwa nyaa na ku nsongo a mutwe.”—Yoobo 1:7-19; 2:7.

Byabya, kubashaala mafuku apeela bwa’shi babutule Satana. Kubanga pabaabadi bamusumbule ku bukunkula bwa nsenga, auku kalolo’shi “kubamushadila mafuku apeela.” (Kibafumbwilwe 12:12) Satana mbamutshibile kibawe kya lufu, na uno nyi mukandu wibuwa kwatudi!

“[Obe Yesu] we muudile Efile Mukulu ku mase oobe bantu ba kisamba kyooso, na edimi dyooso, na mwilo, n’eumbo dyooso; na bwebekasha bu ba nfumu na bu ba-tshiite mwakwidi b’Efile Mukulu eetu, na abakamunana pa nsenga.”​—Kibafumbwilwe 5:9, 10.

Nka bu bibasangwilwe Yesu pa nsenga bwa kwenda mwiyilu ngi abikasanguka namu bangi. Yesu balungwile batumiibwa baaye ba lulamato’shi: “Nende mu kwinulumbulwila mbalo yanudya kwikeela. . . . Nakaaluka mu kwinwata bwa’shi kwandji nukeekale namu.”​—Yowano 14:2, 3.

Bantu abende mwiyiu abemwende bwa kepatshila kampanda. Abo na Yesu, abakakitshi Bufumu abukamunu bantu booso bashaale pa nsenga na kwibatwadila myabi. Buno ngi Bufumu bubaadi Yesu mulungule balondji baaye bwabadya kuteka mu luteko lwa kileshesho. Bambile’shi: “Yaay’etu ee mwiyilu, eshina dyoobe dyende ntumbo. Bufumu boobe bufikye. Kyokyebe kikitshikye pa nsenga mumune na mwiyilu.”—Mateo 6:9, 10.

Ami mutumiibwa Yowano “napushiishe eyi diibukopo adifiki ku lupuna[-nsulu], dibambanga’shi: ‘Talayi kishaleelo ky’ Efile Mukulu na bantu. . . . Akumuna mpolo yooso ku meeso aabo. Lufu taalwikala kwanka dimo. Taakwiikala dimo sunga maalo, sunga kwidila, sunga mukumbo, mwanda byaapano bya kala bibaashimina.’”​—Kibafumbwilwe 21:3, 4.

Kino kimonwa kya butemuki akileesha mafuku aakafiki Bufumu bw’Efile Mukulu bwabakunkusha kwi Yesu na bantu abakasanguka pa nsenga na kwenda mwiyilu, na abukafudiisha mafumu ooos a Satana na kwikasha nsenga mpaladiiso. Myanda ikwete kukyengyesha bantu na kwibadidisha lelo uno tayikekala dingi kwanka nya. Mpa na lufu alukakatushibwa.

Byabya, twi kwakula naminyi bwa bantu midiyo na midiyo bafwe bashi’abakasanguka bwa kwenda mwiyilu? Mu mafuku aafiki, abakebasangula bwabadya kwikala na muwa wa ikalaika mu mpaladiiso pa nsenga.​—Luka 23:43.