Bantu bebungi mu nsenga ishima abakumina’shi Nowele musangeelo w’efuku dya kutandjikwa kwa Yesu Kidishitu. Byabya, tobandile kutaluula bwa kuuka su bena Kidishitu ba mu siekele a kumpala, abo abadi pamune na Yesu, abadi abasankila Nowele su? Na dingi tobandile kwiyipusha bwa kuuka akyakula Bible pabitale kusankila kw’efuku dya kudandjikwa? Ngaluulo ya ku ino nkonko ngilombene kwitukwasha bwatudya kuuka su Nowele mmusangeelo wa bena Kidishitu.

Kya kumpala, Bible ta mutemune musango su ngumune kusankila kw’efuku dya kutandjikwa kwa Yesu sunga kwa ungi mufubi a Efile Mukulu sha lulamato. Mu Bible mbakule nka penda bwa musangeelo wa mafuku a kutandjikwa kwa bantu babidi bashi balangwidi ba Yehowa, Efile Mukulu sha Bible. Na dingi, mu misangeelo ya mafuku aabo a kutandjikwa, mubadi mukitshikye nka myanda ibubi. (Kibangilo 40:20; Maako 6:21) Muyile abilesha mukanda wa myanda ya kala wa Encyclopædia Britannica, bena Kidishitu ba kumpala abadi bashikwe “bipikwa bya misangeelo y’efuku dya kutandjikwa.”

Bible ta muleshe efuku dibatandjikilwe Yesu nya. Mukanda wa McClintock and Strong’s Cyclopedia aulesha’shi: “Ta twi balombene kushinkamisha kalolo efuku dibatandjikilwe Yesu, sunga twatala mu Kilombeno kipya, sunga mu ungi mukanda ooso.” Kushi mpaka, su Yesu bakuminyine bwa’shi balondji baye bekale abasankila efuku dyaye dya kutandjikwa, badya kwibalungula kalolo bwa’shi baukye efuku dyaye dya kutandjikwa.

Kya kabidi, Bible talesha mbalo su ngimune’shi Yesu sunga umune a ku balongi baye badi asankila Nowele. Muyile abyakula mukanda wa New Catholic Encyclopedia, kusankila Nowele abadi bekutemune bwa musango wa kumpala “mu calendrier ka mu latin ka Philocalus, kabadi mu ungi mukanda wa mu Looma ubabadi bafunde pangi mu kipwa kya 336 [B.B.].” Abimweneka kalolo’shi, uno mukanda ubatukile kunyima kwa’bo kupudisha kufunda Bible, siekele ibungi kunyima kwa Yesu kukatuka pa nsenga. Ngi bwakinyi mukanda wa McClintock and Strong aulesha’shi “musangeelo wa Nowele taubadi mu mpàngo y’Efile Mukulu nya, na ta wi mu bifundwe bya kumpala bya Kilombeno kipya.” *

Bu byadi mulongyeshi mukata, Yesu badi muleshe patoka myanda ibadi akumina’shi balondji baye bekale abakitshi, na ino myanda mbeyifunde mu Bible. Anka, kusankila Nowele, ta ngumune wa ku myanda ibadi Yesu mukumine bwa’shi balongi baye bekale abakitshi nya. Nka bu bish’abikuminaa mulongyeshi a ku kalasa’shi balongi baye bekale abakitshi myanda yashi mwibape matalwa a kukita, Yesu namu takumina’shi balondji baye ‘basambukye mudyanyino wabadi bele kwi bifundwe’ bi selele nya.​—1 Beena-Kodinda 4:6, EEM.

Ku lungi lupese, kwi mwanda umune wi na muulo ubabadi abakitshi kwi bena Kidishitu ba kumpala—kitentekyesho kya lufu lwa Yesu. Yesu nabene balungwile balongi baye mafuku a kutentekyesha lufu lwaye, na dingi bebalesheshe mushindo wabadi balombene kwikikita. Ano mayi a kulonda, mpa n’efuku dya mweshi dya lufu lwaye, mbebifunde byoso mu Bible.—Luka 22:19; 1 Beena-Kodinda 11:25.

Nka bu bibatukatuka mu kumona, Nowele nyi musangeelo w’efuku dya kutandjikwa, anka, bena Kidishitu ba kumpala tababadi abakitshi kino kipikwa kya ba mpangango nya. Na dingi, Bible ta mutemune mbalo su ngimune’shi Yesu sunga ungi mulongi aaye badi musankile Nowele. Pa mwanda wa bino byoso bibatupusha, bena Kidishitu midiyo na midiyo be mu nsenga ishima mbaate kitshibilo kya kwamba’shi Nowele ta musangeelo wa bena Kidishitu nya.