Mu ino miisambo, tubalongo myanda ayitukwasha bwa kwalula ku lukonko alwamba’shi, Efile Mukulu nnanyi? Tubakatuka mu kulonga mu Bible’shi, eshina dyaye nyi Yehowa, na’shi eyikashi dyaye dikata nyi nkifulo. Tubamono dingi myanda yadi mukite na yakakitshi bwa buwa bwa bipangwa byaye. Sunga kwekala bibungi bya kulonga pabitale Efile Mukulu, we mukumbene kwiyipusha su kwibiuka kwi na muulo.

Yehowa mmulee’shi, “su omukimba, omumono.” (1 Myanda 28:9) Nsaa yokimbuula bwa kuuka Efile Mukulu wekala na mushindo wa kupeta kintu ki na muulo kwamba’shi kwikala bu— “kuku a kifulo” a Yehowa! (Misambo 25:14, EEM) Buno bu kuuku abulesha kinyi koodi?

Muloo wa binyibinyi. Yehowa abamwitamina bu “Efile Mukulu a muloo.” (1 Timote 1:11, Kilombeeno kipya 2014) Kwifubwila pepi naaye na kwambula mashinda aaye akukupa muloo wa binyibinyi, aukukwasha mwishimba, mu binangu, na ku mbidi. (Misambo 33:12) Wekala na mushindo wa kupeta nshalelo a muloo pa kupela kulwisha mwikelo obe, wekale na byubishi bibuwa, na kulama kipwano kibuwa na bangi. Okakula nka bibakwile mufundji a misambo’shi: “Mwabi wande’mi nkwikala peepi n’Efile Mukulu.”—Misambo 73:28.

Kukwasha bantu na kwibapasukila. Yehowa balayile bafubi baye’shi: ‘Nakupa elango, nshale mukulame.’ (Misambo 32:8) Bino abilesha’shi Yehowa apasukilaa bafubi baye na kupa oso a kwabadi kyakya kyadi nakyo lukalo. (Misambo 139:1, 2) Nsaa yodi mu kipwano kibuwa na Yehowa, osangana’shi ekala nka kwanka boobe.

Muloo mu mafuku aafiki. Kukatusha nkukwasha bwashi wekale na muloo mu nshalelo obe binobino, Yehowa Efile Mukulu akukwasha bodya kwikala na muloo mu mafuku aafiki. (Yeeshaya 48:17, 18) Bible amba’shi: “Muuwa wa looso naamu ngi’shi bantu bakuwukye, obe buupeenka Efile aa biinyibiinyi, na yaawa obootumine, Yesu Kidishitu.” (Yowano 17:3) Mu ano mafuku e bukopo, lukulupilo alwitupa Efile Mukulu lwi kwikala nka bu kishimeto kyetu ‘akitwimika pe pô.’—Beena-Ebelu 6:19, EEM.

Ino nyi ndambo ya myanda ayitukwasha bwa kuuka Efile Mukulu kalolo na kutamisha kipwano kyetu naye. Atukutekye bodya kwisamba na Temwe a Yehowa oso yawa sunga kutwela mu jw.org bwa kuuka ingi myanda.