Akyakula bantu pabitale luteko
“Nsaa ya nkitshi luteko napushaa nka bu Efile Mukulu e kulupese lwande, munkwate kumboko andudika nsaa yanepusha bu’mi mushimine.”—MARÍA.
“Bipwa 13 kunyima kwatwe kwiyibakishena, mukashi ande bafwile na maladi a cancer. Natentekyesha binaadi natekye Efile Mukulu efuku dyoso, na naadi napusha’shi baadi antemesha mu mpombo yaade. Dingi naadi napusha butale.”—RAÚL.
“Luteko nyi kyabuntu kikile buwa kyabadi bape bantu kwi Efile Mukulu.”—ARNE.
Bwa María, Raúl, Arne, na bangi bantu bebungi, luteko nyi kyambuntu kya pa bwakyo. Abapusha’shi kukiila ku luteko be kwisamba n’Efile Mukulu, kumutumbula na kumuteka bukwashi. Mbashinkamishe bino abyakula Bible pabitale kuteka Efile Mukulu’shi: “Taalayi lukulupilo lwatudi nalo kumpala kwaye, su twamuteka kintu muyile kukumiina kwaye, aye eetuteemesha.”—1 Yowano 5:14.
Ku lungi lupese, bantu bebungi tabakumiina akyamba Bible pabitale luteko nya. Steve alesha byapushaa pabitale luteko, amba’shi: “Panadi na bipwa 17, ba kuuku bande basatu abafwile ku masaku abidi elekene. umune bafwile ku masaku a motoka na bangi babidi abafwile mu mema.” Kadi Steve bakitshine kinyi? Amba’shi: “Natekyele Efile Mukulu bwa’shi angaluule bwakinyi bino byoso mbikitshikye, anka ntshi napetele lwalulo su ndumune. Byabya nadi neyipusha’shi: ‘Ne kuteka bwakinyi?’” Kukutwa ngalulo ku nteko nkutakule bantu bebungi mu kwiyipusha’su kwela nteko kwi nka na muulo binyibinyi.
Kwi tungi tubingilo tufikishe bantu mu kwiyipusha su kwela ntenko kukii’nka na muulo. Bangi abamba’shi Efile auku myanda yoso, abadilaa kuka kyatudi na kyo lukalo na nkalakashi yetu, byabya tabii na muulo bwa kumulungula byanka.
Bangi abamba’shi Efile Mukulu tateemeshaa nteko yabo mwanda wa milwisho yabo ya kala. Jenny amba’shi: “Mwanda wande ukata nguno, nepushaa bu’mi shii na muulo. Ne mukite myanda impe kinyongwa, ne mushinkamishe ami nabene’shi Efile Mukulu te bya kupusha nteko yande.”
Wepushaa naminyi nsaa ywele luteko? Su wepushaa noobe mu uno mushindo sunga’shi we na mpaka pabitale luteko, we kunyingishibwa nsaa yopete ngalulo ibuwa ayitukila mu Bible. Twi kukulupila akyakula Bible pabitale luteko; * Bible mulombene kwitukwasha bwa kupeta ngalulo ku nkonko bu ino:
-
Mbinyibinyi’shi Efile apushaa nteko yetu?
-
Bwakinyi Efile Mukulu tapushaa ingi nteko?
-
We kuteka naminyi bwa’shi Efile Mukulu akupushe?
-
Luteko ndulombene nkukwasha naminyi?
^ par. 9 Mu Bible mwi nteko ibungi ya bafubi b’Efile Mukulu mpa na ya Yesu Nkidishitu. Mu Bifundwe bya kina Ebelu byabetaminaa bu Kilombeno Kikulu mwi nteko ikile pa 150.
