Nfwalasa i mu lubilo, na bipashi byayo bikwete kwela mikitshi i bukopo! Mwanda wa ino nfwalasa inanka i bukome, na bantu beyikaamine awitukumu mu binangu ngofu mu kipaso kyayimweneka nka bu’yo ikwete kwitumba mu masaki a Bible! Nfwalasa a kumpala mmutooka—na mumukaamine nyi nfumu mupya sha ntumbo, abadi bafwadikye lubango sunga kifulu kya ntumbo. Kunyima kwaye kwi nfwalasa mumongye pyaa bu kaalo, na mumukaamine kwete kwenda na kukatusha butaale pa nsenga ishima. Nfwalasa a kasatu kwete kumulonda mmongo, mufiita fututu, mumukaamine mmukwate kipimo mwiyasa akilesha mukandu wa bipupa bya nsala. Nfwalasa a kananka e na elangi ditookolokye, alesha bipupa bya mikumbo na bingi bintu abipanaa, na lufu lunabene ngi lukaamine pa uno nfwalasa. Mashama sunga kalunga nyembo, akwete kumulonda mu mongo, na akwete kwenda na kukongola bantu boso abafu!​—Kibafumbwilwe 6:1-8.

“Mususa wa kumpala unabadikile mwanda wa bano bantu bananka bakaamine pa nfwalasa, napushishe moo wibungi. Nadi namono’shi Efuku dya kiimu dikwete kufika, na bu byanshii mwilumbuule, ntamono bu’mi akapanda nya.”​—Crystal.

“Mwanda wa bantu bananka bakaamine pa nfwalasa ya malangi elekeene ubadi unkemeshe ngofu. Panaukile akipushisha kino kimonwa, napushishe bibuwa.”​—Ed.

Obe namu opushaa bino bibapushishe Crystal pa mwanda wa bano bantu bananka bakaamine pa nfwalasa babadi baleshe mu mukanda wa Kibafumbwilwe su? Su opushaa bino bibapushishe Ed? Sunga byekala byabya, mwanda wa bantu bananka bakaamine pa nfwalasa nyi ngumune wa ku myanda ibuwa yabadi baleshe mu mukanda wa Kibafumbwilwe, mukanda wa nfudiilo wa mu Bible. Ouku’shi we kupeta masanka ebungi su opusha kalolo akileesha kino kimonwa? Mu mushindo kinyi? Efile Mukulu alesha’shi we kupeta muloo wa binyibinyi su obadika, olonga na kutumikila myanda ifundibwe mu uno mukanda wa matemuki.​—Kibafumbwilwe 1:1-3.

Sunga byekala’shi bangi bantu abapusha moo pa mwanda wa kimonwa kya bantu bananka bakaamine pa nfwalasa, tambebifunde bwa nkutshinyisha nya. Anka, bantu bebungi mbasangane’shi kino kimonwa nkinyingishe lukumino lwabo na akibapa lukulupilo lwibuwa mu mafuku aafiki. N’obe namu nkilombene nkukwasha mu kino kipaso. Banda kubadika myanda i mu kino kimonwa.