Byatudya kuleesha muntu neetu kifulo
Bu byatudi boso bekulu ba muntu a kumpala Adame, twi kifuko kimune. Sunga byekala’shi abitungu beena kifuko bekale befulene na kwinemekyeshena, tabikwete kukamba kumweneka kano kabidi nya. Na bino tabisangasha Efile eetu sha kifulo.
ABYAKULA BIFUNDWE BISELELE PABITALE KIFULO
“Byabya mbyoodya kufula muntu noobe buu’be nabeene.”—BEENA-LEVI 19:18.
“Fulaayi beeshikwanyi neenu.”—MATEO 5:44.
AKILESHA KUFULA MUNTU NEETU
Tala abilesha Efile Mukulu pabitale kifulo mu Eyi dyaye mu mukanda wa 1 Beena-Kodinda 13:4-7:
“Kifulo kii na lwishinko, kifulo akikwashanaa.”
Banda kunangushena: Opushaa naminyi su bangi abakulesha kalolo na lwishinko nsaa yofiitshi munda sunga nsaa yokitshi bilubilo?
“Kifulo takii na mukao.”
Banda kunangushena: Opushaa naminyi su bangi abakwelela binangu bibi sunga nkukwatshila mukao?
Kifulo “t’akikimbaa mwabi wa bupenka.”
Banda kunangushena: Opushaa naminyi su bangi abaneemekaa mweneno oobe a myanda na kupela kukamba kwimeena nka pa mweneno aabo?
Kifulo “t’akilamaa ngoo.”
Banda kunangushena: Efile Mukulu afwilaa bantu abakitshi mulwisho lusa su abelanga ku mashimba. “T’etukitshinaa muyile milwisho yeetu, t’etunyokaa muyile bito byetu.” (Misambo 103:9) Atupusha muloo su muntu atudi balwishishe betufwila lusa. Nyi bwakinyi abitungu twikale namu na bukidi bwa kufwila bangi lusa nsaa yabetulwishisha.—Misambo 86:5.
Kifulo “t’akisangalaa mu myanda ibi.”
Banda kunangushena: Su mwanda wi bubi wetukwata, tatukuminaa bangi basangala na makyenga eetu nya. Nyi bwakinyi t’atupushaa muloo su bangi abapetekyelwa na myanda ibubi sunga byekala’shi bekele betukitshine bibubi.
Bwa kupeta myabi y’Efile Mukulu, abitungu tufule bangi mu uno mushindo kushii kutala bipwa, kabila sunga kipwilo kyabo nya. Umune wa ku mishindo yatudya kwibikita ngwa kukwasha bangi be mu lukalo na bukwashi.
