Mutemuki Moyiise bakwile’shi su atukokyela miiya y’Efile Mukulu, etwelela myabi. (Miiya Ikituulwe 10:13; 11:27) T’atukokyelaa Efile Mukulu mwanda wa kutshina’shi tala etunyoka nya. Ngikashi ibuwa y’Efile Mukulu nyi ayitutakulaa bwa kumukokyela mwanda’shi twi bamufule na atupelaa kukita kintu akimwinyongosha. “Mwanda kifulo ky’Efile Mukulu kii bino: tulame miiya yaaye.”​—1 Yowano 5:3.

Kadi kukokyela Efile Mukulu akwitupeteshaa myabi mushindo kinyi? Mu ino mishindo ibidi:

“Nnaami Yehowa, Efile Mukulu oobe, akupa bulambukishi abukukwasha, akukunkusha mwishinda dyoobe.”​—YEESHAYA 48:17.

Yehowa byadi Mupangi eetu, etwiuku kalolo na etupa buludiki bwatudi nabo lukalo. Su atukimbi’shi malongyesha aaye etukwashe bwa kwata bitshibilo na binangu, abitungu tulongye Bifundwe biselele bwa kuuka abikumina Efile Mukulu na kwibifubila mu nshalelo eetu.

“Baba abapusha eyi dy’Efile Mukulu na abedilama ngi baasha muloo.”​—LUKA 11:28, Kilombeeno kipya 2014.

Lelo uno, midiyo ya bantu bakwete kupusha Eyi dy’Efile Mukulu be na muloo wa binyibinyi. Bu kileshesho, banda kutala bibadi ungi muntu a mu Espagne badi bukyelo kwi bangi mpa na kwi mukashi aaye. Dingi efuku babadikile mu bifundwe bya mutemuki Moyiise pabitale eyikashi dya butaale dya Yosefe mwana Yakobo. Abadi baudishe Yosefe mu bupika na abo nkumwela mu lukano kushii kabingilo; anka, bashadile nka mwiyishe na mwishinkye mpa na kufwila bakwabo lusa. (Kibangilo, shapitre 37-45) Uno muntu a mu Espagne bakwile’shi: “Kunangushena ku kileshesho kya Yosefe, kubadi kuntakule bwa kwikala na kupopeela, kalolo na kwikanda. Pa mwanda wa byabya, ne na nshalelo a muloo.”

Bifundwe biselele abitupa buludiki mu kipaso kyatudya kukitshina bangi myanda. We kubadika bibungi mu mwisambo aulondo.