Yesu—Kibaadi kimupe muloo mu nshalelo aaye
YESU baadi na muloo mu nshalelo aaye su? Tabaadi mukule mu bupeta nya, mu muwa waye tabaadi mupete bintu bibungi bya ku mbidi nya. Na dingi ‘tabaadi na pa kusayika mutwe.’ (Luuka 9:57, 58) Kukasha wawa mwanda, beshikwanyi naaye abaadi bamudimbiile myanda, mpa na kumwipa.
Pangi we kwamba shi, ‘Bu bibaadi mufumankane na ino myanda yooso, bi bukopo bwa kwamba shi baadi na nshalelo a muloo!’ Kadi kwi ingi myanda itale nshalelo a Yesu ayitungu shi tutaluule. Tubande kutaluula myanda inanka itale muwa waye.
1. YESU BAADI NA MPÀNGO YA KUKITA AKIKYEBE EFILE MUKULU.
“Bya kudya byande nkukita akikyebe eshimba dya yaawa bantumine.”—Yowano 4:34.
Mu ngakwilo na mu bikitshino byaaye, Yesu baadi akimbi kukita akikyebe Nshaye, Yehowa. * Yesu bapetele muloo ukata mu kukita kwa akikyebe Efile Mukulu. Nyi bwakinyi apwandikisha kukita kwa akikyebe Efile Mukulu na bya kudya, bu bibatumono mu uno verse. Tubande kutala kibaadi Yesu esambila pabakwile ano mayi.
Yesu baadi mwakule ano mayi pepi na midi. (Yowano 4:6) Kunyima kwa kutambuka mu Samariya ooso mushima, mu mabanda na mu ma ngulu, Yesu bapushishe nsala; balongi baaye abamulungwile shi: “Mulambukishi, dya namu kantu.” (Yowano 4:31) Pabalulwile, Yesu balesheshe shi baadi apusha bu mudishibwe na kunyingishibwa na mudimo w’Efile Mukulu. Ano mayi aalesha shi baadi na muloo mu nshalelo aaye.
2. YESU BAADI MUFULE NSHAYE NGOFU.
“Ne na Yaaya kifulo.”—Yowano 14:31.
Yesu baadi mu kipwano kikata na Nshaye a mwiyilu. Kifulo kikata kibaadi nakyo bw’Efile Mukulu kibaadi kimutume bwa kuwukisha Nshaye kwi bantu: eshina, mpàngo, na ngikashi Yaaye. Mu ngakwilo aaye, mu bikitshino byaaye, na mu nangunangu yaaye, Yesu baadi muleshe kalolo bi Nshaye. Byabya patubadika myanda itale Yesu, twi nka bu’twe abamono Nshaye. Nyi bwakinyi, pababamwipwishe kwi Fidipe shi: “Etuleshe Nshoobe,” Yesu balulwile shi: “Yawa bammono’mi baapu kumona Yaaya.”—Yowano 14:8, 9.
Yesu baadi mufule Nshaye ngofu, aye nkukumina kumukokyela mpa na ku lufu. (Beena-Fidipe 2:7, 8; 1 Yowano 5:3) Kino kifulo kikata kibaadi nakyo Yesu bwa Efile Mukulu, kibaadi kimupe muloo ukata.
3. YESU BAADI MUFULE BANTU.
“Kifulo kikile bukata kipwandikiile muntu kulesha, nkukumina kufwila bakuuku bê.”—Yowano 15:13, EEM.
Bu byatudi bantu bakutwe kupwidika, atumonaa bu bi bukopo kwikala na muwa mu mafuku aafiki. Bible alesha shi: “Milwisho ibatwelele pa nsenga pa mwanda wa muntu umune Adame, yaaya milwisho yafwisha lufu. Byabya lufu alukwata bantu booso mwanda booso mbalwishe.” (Beena-Looma 5:12) Atwe banabeene tatwi balombeene kusuuka lufu nya.—Beena-Looma 6:23.
Atutumbula Yehowa bu byaadi mupe bantu mushindo wa kupudisha luno lutato. Baadi mutadiile Mwana aaye mupwidikye shii na milwisho, Yesu, bwashi akyengye na afwe bwa kukuula bantu ku bupika bwa milwisho na bwa lufu. Pa mwanda wa kifulo kibaadi nakyo bwa Nshaaye na bwa bantu, Yesu baadi mukumiine kutuusha muwa waye upwidikye bwetu. (Beena-Looma 5:6-8) Kyakya kifulo kikata kibaadi kipe Yesu muloo mu nshalelo aaye. *
4. YESU BAADI AUKU SHI NSHAYE MUMUFULE NA MUMUKUMINE.
“Uno mMwan’ande, a kifulo, ne na muloo pa mwanda wee.”—Mateo 3:17.
Yehowa baadi mwakule ano mayi mwiyilu pa kubatshishibwa kwa Yesu. Byabya, Yehowa baadi muleshe patooka shi mufule na mukumine Mwana aaye, Yesu. Nyi bwakinyi Yesu bambile shi: “Yaya e na’mi kifulo”! (Yowano 10:17) Bu bibaadi auku shi Nshaye mumukumine na mumufule, Yesu baadi munyingye eshimba nsaa ibaabadi abamukyengyesha sunga kumupombesha. Baadi munyingye eshimba, kushi kukalakashwa mu binangu sunga kwishimba mpa na kumpala kwa lufu. (Yowano 10:18) Bu bibaadi auku shi Nshaye mumufule na mumukumine, Yesu baadi na muloo mu nshalelo aaye.
Kushi mpaka Yesu baadi na muloo mu nshalelo aaye. Eyendo, twi balombeene kulonga myanda ibungi pabitale mushindo wa kwikala na nshalelo a muloo. Mwisambo aulondo aukyebe kutaluula angi malango abaadi Yesu mupe balongi baaye pabitale mushindo wabadya kwikala na muloo mu nshalelo abo.
^ par. 6 Yehowa nyi eshina dy’Efile Mukulu dyabadi baleshe mu Bible.
^ par. 15 Bwa kuuka ingi myanda pabitale muulo wa lufu lubafwile Yesu bwa kwitukuula, tala shapitre 5 a mukanda wa A nkinyi akilongyesha namu Bible? wabadi batuushe kwi Batemwe ba Yehowa.
