ANO mayi nga binyibinyi! Muwa wa bantu pano pa nsenga nguule na “kufwambuka na kwinyongola.” Pangi tobweyipwishe bino shi: ‘Kwi mushindo wa kwikala na muloo wa binyibinyi lelo uno su?’

Tubande kwata kileshesho kya Maria. Baadi na bukome bwa kwenda kooso kwakumina, kadi binobino, e na bipwa 84, te na dingi mushindo wa kwibwa bwa kwenda ku mbalo kampanda nya. Binangu byaaye bikya bitumika kalolo, kadi mbidi tayi dingi na bukome nya. Mushindo kinyi wadi mulombeene kwamba shi e na muloo mu nshalelo aaye?

Kadi obe namu? Pangi tobweyipwishe ingi nsaa su we kwikala na muloo mu nshalelo oobe. Mbilombeene kwikala shi, okwete kukita mudimo umune efuku dyooso, wawa mudimo ukwete nkukokyesha, sunga nkupa epampa. Pangi bantu bebungi tabauku mushindo okwete kwitatshisha bwa kwiukita nya. Sunga byekala shi okwete kobesha kwiukita, we mulombeene kwikala na moo pabitale mafuku e kumpala. Ingi nsaa we mulombeene kumona bu’be e bupenka sunga bu’be mukutwe lukulupilo. Pangi mu kifuko kyoobe ta mwi kwipushena nya. Bi kwikala shi we mufwishe muntu oodi mufule. Ungi muntu abetamina bu André baadi nsaa yooso na nshaye, mususa umune nshaye baadi mukumbe aye nkufwa. André tabaadi amono wawa mwanda bu wa binyibinyi nya, lwalwa lufu ndumulekye na bushiye bushii bulombeene kupwa.

Sunga twekala na kufwambuka kwi naminyi, kwi kintu kyatudi na lukalo lwa kuuka: Muntu mmulombeene kwikala na muloo mu nshalelo aaye su? Twi balombeene kupeta lwalulo kwi Yesu Kidishitu, muntu baadi pano pa nsenga takudi bipwa bikile 2 000. Sunga mbibaadi mupete nkalakasho ibungi, Yesu baadi binyibinyi na muloo mu nshalelo aaye. Byabya, su twalonda kileshesho kyaye twi balombeene kwikala na muloo mu nshalelo etu.