1, 2. Balondji ba Yesu abadi na kya kuuka butemuki kinyi butale mafuku a ku nfudiilo, na mbwakinyi?

MPYEELE, Jaake, Yowano na Andree abadi pa bupenka na Nfumwabo. Mwanda ubabadi bebalungule kwi Yesu pabitale kabutu ka ntempelo ubaadi wibakalakashe ngofu. (Mak. 13:1-4) Nyi bwakinyi abamwipwishe shi: “Etulungule namu apakakitshika yaaya myanda. Nkitundwilo kinyi namu akikalêsha’shi kufika kobe mu ntumbo, na nfudîlo ya nsenga, tábidi pepi?” (Mat. 24:1-3, EEM) Yesu babangile kwibalesha myanda ayikashintuula nshalelo a bantu na ayikalesha kitundwilo kya nfudiilo a uno ndumbulwilo ebubi a Satana. Balondji ba Yesu abaadi na lukalo lwa kumona kitundwilo kampanda. Kunyima kwa kwibalungula myanda ibaadi ibenyongoshe bu myanda ya ngoshi, bipupa bya nsala, na kufiima kwa bubi, Yesu batemukile kintu kimune kibuwa akikyebe nkakitshika mu mafuku a ku nfudiilo. Bakwile shi: “Uno mukandu wibuwa wa Bufumu aukalungulwa pa nsenga yooso ishadiibwe, bwa kulesha bu kamonyi kwi maumbo ooso na kunyima nfudiilo ayikafiki.”​—Mat. 24:7-14, Kilombeno kipya 2009.

² Balondji ba Yesu abadi na muloo wa kulungula mukandu wibuwa wa Bufumu pamune na Kidishitu. (Luk. 8:1; 9:1, 2) Abaadi abatentekyesha mayi abebalungwile shi: “Byumbulwa bi bungi, anka bafubi mbapêla. Bînyibyabya, tekai kwi Yawa sha byumbulwa byadya kutuma bafubi mu kuumbula byumbulwa byê.” (Luk. 10:2, EEM) Kadi mushindo kinyi ubabadi balombeene kulungula mukandu wibuwa “pa nsenga yooso ishadiibwe” na kulesha “bu kamonyi kwi maumbo ooso”? Bafubi abadya kutuukila mbalo kinyi? Bibadya kukitshika nka su pababadi na Yesu abaadi batuule binangu ku mafuku aafiki kumpala. Kulombana kwa ano mayi apeela abatukatuka mu kubadika mu mukanda wa Mateo 24:14 takubadya kwibakanyisha nya.

3. Mushindo kinyi ukwete kulombana mukanda wa Luuka 21:34, na nkonko kinyi ayitungu kwiyela?

³ Twi mu mafuku akwete kulombana butemuki bwa Yesu. Bantu midiyo mbebungye bwa kulungula mukandu  wibuwa wa Bufumu mu nsenga ishima. (Yesh. 60:22) Anka Yesu baadi muleshe shi mu mafuku a ku nfudiilo bangi abakakutwa mushindo wa kutuula binangu byabo ku myanda i na muulo. Abakekala batuule binangu byabo ku myanda ya bisumanga na kwikala na mashimba ‘aneeme.’ (Badika Luuka 21:34.) Tukwete kumona kulombana kwa aa mayi. Bangi be munkatshi mwa bafubi b’Efile Mukulu bakwete kupambushibwa. Bino abimweka ku bitshibilo byabata pabitale midimo ya masa, kulonga kwa tulasa twi bungi, kukimba kwa bintu bya ku mbidi, mpa na nsaa yabakwete kukisha ku maasha. Bangi mbapwe kukooka pa mwanda wa nkalakasho ya kwifuku n’efuku. Banda kwiyipusha bino: ‘Ne muntu e naminyi? Bitshibilo byankwete kwata abilesha kinyi pabitale myanda yangataa na muulo mu nshalelo ande?

4. (a) Mpoolo baadi mwele luteko kinyi bwa beena Kidishitu ba kumpala ba mu Fidipe, na mbwa kinyi? (b) Mu uno mwisambo na mu ungi aulondo atukyebe kulonga myanda kinyi, na bwakinyi?

⁴ Beena Kidishitu ba kumpala abaadi na kya kwitatshisha bwa kulama binangu byabo ku myanda ya mu kikudi. Mpoolo mutumibwa bamwene shi bibuwa kutekyela baaba abaadi mu Fidipe bwabadya “kushingûla byabya bikile buwa.” (Badika Beena-Fidipe 1:9-11.) Anka bu bibaadi Mpoolo mutumibwa, bangi ba mu aa mafuku abaadi bakwete “kulungula mukandu w’Efile Mukulu kushii mô.” (Fid. 1:12-14, EEM) Bi mumune n’atwe lelo uno, tukwete kulungula Eyi dy’Efile Mukulu kushii kutshina. Kadi, myanda yatukwete kumona mu ndumbulwilo a Yehowa, ngilombeene kwitukwasha bwa kutuula binangu byetu mu mudimo wa kulungula mukandu wibuwa su? Oolo! Mu uno mwisambo, atukyebe kulonga myanda yabadi balumbuule kwi Yehowa bwashi butemuki bwi mu mukanda wa Mateo 24:14 bulombane. Ndumbulwilo aaye e na mudimo kinyi, na dingi kuuka mudimo waadi nawo nkulombeene kwitukwasha atwe na bifuko byetu mushindo kinyi? Mu mwisambo aulondo, atukyebe kutaluula kilombeene kwitukwasha bwa kushaala banyingye na kulonda ndumbulwilo a Yehowa.

5, 6. (a) Bwakinyi Yehowa baadi mutuushe kimonwa kya kipindji kya ndumbulwilo aaye ki mwiyilu? (b) Nkinyi kibaadi Ezekyele mumone mu kimonwa?

⁵ Kwi myanda ibungi yabashi bakumiine kwi Yehowa bwashi ifundjibwe mu Bible. Bu kileshesho, tamutemune kantu na kantu kooso pabitale mushindo ukwete kutumika bongo bwa muntu sunga autumika eyilu na nsenga nya, aku namu, yaaya myanda i na muulo ukata! Sunga mbyabya, Yehowa mmwitulungule myanda yatudi nayo lukalo bwa kupusha bi mpàngo yaaye na kwikala na nshalelo mwipushene na yaaya mpàngo. (2 Tim. 3:16, 17) Mmwanda wa muloo ukata nkumona mushindo wi Bible kwete kwakula mu kikoso pabitale kipindji kya ndumbulwilo a Yehowa kishy’akimweka! Patubadika mushindo wabadi baleshe mu mukanda wa Ezekyele, Danyele na mu Bifumbulwe bya Yowano pabitale kipindji kya ndumbulwilo a Yehowa ki mwiyilu, abitusangasha ngofu. (Yesh. 6:1-4; Ez. 1:4-14, 22-24; Dan. 7:9-14; Bif. 4:1-11) Bi nka bu shi Yehowa kwete kukaasha kilamba kitushikiile bwashi tumone bi mwiyilu. Bwakinyi baadi mufundjishe ino myanda yooso?

⁶ Lukalo lwa Yehowa ndwa shi tatulubanga shi booso bwetu twi mu ndumbulwilo aaye. Kwi myanda ibungi ikile ino yatukwete kumona ikwete kukitshika bwa kukwasha mpàngo ya Yehowa. Bu kileshesho, Ezekyele bamwene kipindji kya ndumbulwilo a Yehowa ki mwiyilu bu etempu dikile bukata. Dino etempu dibaadi adyende lubilo ku lupese looso lwadikumiina kwenda. (Ez. 1:15-21) Etempu ndilombeene kwenda kooso kwadikumina pa mwanda wa bukome bwa bipombo byadyo. Mu kyakya kimonwa, Ezekyele bamwene  dingi muntu baadi atambusha etempu. Bakwile shi: “Namwene yawa muntu apenyapenya’nka bu kilonda ki nsembwe na bu mwifûnyishwe na kâlo. . . . Nyi nkupenyapenya kwa ntumbo ya Yehowa.” (Ez. 1:25-28, EEM) Kyakya kimonwa kibaadi kikanyishe Ezekyele ngofu! Bamwene Yehowa kwete kukunkusha ndumbulwilo aaye, kwete kumukunkusha ku bukwashi bwa kikudi kyaye kiselele. Patumono mushindo w’abalesha bikwete kutambuka kino kipindji kya ndumbulwilo a Yehowa abitukanyinsha ngofu!

7. Mushindo kinyi wi kimonwa kya Danyele akitunyingisha ku mashimba?

⁷ Danyele bamwene dingi myanda ilombeene kwitunyingisha ku mashimba. Baadi mumone Yehowa bu “Mukulu a mafuku” mushaale ku lupuna nsulu na ndimi ya kaalo. Lupuna nsulu lwaye lubaadi lushaale ku bipombo. (Dan. 7:9) Lukalo lwa Yehowa lubaadi lwa kulesha Danyele shi, ndumbulwilo Aaye kwete kwenda kumpala, na kulombasha mpàngo Yaaye. Danyele bamwene dingi “nka bu mwana a muntu,” Yesu abamupa matalwa a kukunkusha kipindji kya ndumbulwilo a Yehowa ki mwiyilu. Bukunkushi bwa Kidishitu tabwi kwanka penda bwa bipwa bipela nya. Mwanda “aa matalwa ê nga ikalaika! Bwabwa bufumu bwê namu t’abukalwishibwa, nyâ!” (Dan. 7:13, 14, EEM) Twi na kya kutuula lukulupilo lwetu mwi Yehowa na kushinguula byooso byakwete kulombasha. Mmupe Yesu Mwan’aaye aadi mukumiine “matalwa na ntumbo na Bufumu.” Yehowa mmukulupile Mwan’aaye ngofu. Nyi bwakinyi twi na kya kukulupila bukunkushi bwaye.

8. Bimonwa bibamwene Ezekyele na Yeeshaya bibaadi bibatakule mu kukita kinyi, na mbilombeene kukita kinyi kwatudi?

⁸ Mushindo kinyi ulombeene kwitukwasha kino kipindji kya ndumbulwilo a Yehowa kishy’akimweneka? Anka bu Ezekyele, twi na kya kutshina na kunemeka  myanda yabakwete kukita kwi Yehowa. (Ez. 1:28) Kunangwila pabitale ndumbulwilo a Yehowa nkulombeene kwitutakula mu kukita kintu kampanda, bu bibakitshine Yeeshaya. Pakubaadi lukalo lwa muntu a kwenda mu kulungula bangi myanda ibaadi Yehowa kwete kukita, Yeeshaya tabaadi mwiyalushe kumonga nya, bakuminyine musango umune. (Badika Yeeshaya 6:5, 8.) Yeeshaya baadi mukulupile shi ku bukwashi bwa Yehowa, mmulombeene koobesha sunga afumankana na bitompwanga bi naminyi. Mpan’atwe namu, ino myanda ipeela itale kipindji kya ndumbulwilo a Yehowa kishy’akimweneka ayitusangasha na kwitutakula mu kukita kintu kampanda. Mmwanda wa muloo patumono uno ndumbulwilo, na mushindo wa kwete kwenda na kulombasha mpàngo ya Yehowa!

9, 10. Bwakinyi abitungu shi kwikale kipindji kya ndumbulwilo a Yehowa pano pa nsenga?

⁹ Ku bukwashi bwa Mwan’aaye, Yehowa mmutuule ndumbulwilo pano pa nsenga kwete kufuba mu buumune na kipindji kya ndumbulwilo aaye kishy’akimweneka. Bwakinyi abitungu shi kwikale kingi kipindji kya ndumbulwilo a Yehowa akimweneka bwa kulombasha mudimo wabadi baleshe mu mukanda wa Mateo 24:14? Tubande kutala ino myanda isatu.

¹⁰ Mwanda wa kumpala, Yesu bambile shi uno mukandu wa Bufumu, balongi baaye abakeulungula “mpaa na kufudiile nsenga.” (Bik. 1:8) Wa kabidi, bibaadi abitungu shi kwikale ndumbulwilo mulombeene kutuusha byakudya bya mu kikudi na kukwasha booso bakwete kukita uno mudimo. (Yo. 21:15-17) Wa kasatu, bibaadi abitungu kwata mpàngo ya kubunga pamune booso bakwete kulungula mukandu wi buwa bwa kulangwila Yehowa na bwabadya kulongyeshibwa bwa kuuka bya kukita uno mudimo. (Eb. 10:24, 25) Kulombasha kwa uno mudimo kalolo takwi bu mwanda wa kukita kushii kwilumbuula nya. Bwashi balongi ba Kidishitu boobeshe mudimo, abitungu bekale belumbuule kalolo.

11. Mushindo kinyi watukwete kukwasha ku mpàngo yabadi baate kwi ndumbulwilo a Yehowa?

¹¹ Mmushindo kinyi watukwete kukwasha ku mpàngo yabadi baate kwi ndumbulwilo a Yehowa? Mushindo ukile buwa nyi nkutuula lukulupilo lwetu mwi baaba babadi bape matalwa kwi Yehowa na Yesu a kwitukunkusha mu mudimo wa bulungundi. Kwi midimo ibungi sunga myanda ibungi lelo uno pa nsenga yabadi balombeene kukita kwi baaba bakwete kwitukunkusha. Kadi, kinyi ki na muulo ukata mu kipindji akimweneka kya ndumbulwilo a Yehowa?

12, 13. Beena Kidishitu bakulu mu tukongye bakwete kulombasha mudimo wabo naminyi, na bwakinyi bino abinyingisha eshimba dyoobe?

¹² Beena Kidishitu bakulu mu tukongye twi mu nsenga ishima, mbebatuule bwa kukunkusha mudimo wa kulungula mukandu wa Bufumu mu maumbo abadi bashaale. Kumpala kwabadya kwata bitshibilo, bano bakwetu abakimbaa bukunkushi bw’Eyi dy’Efile Mukulu, adyo di bu ‘etaata adimunyika ku ngwa yaabo, etaata adibatoshesha eshinda dyabo,’ na dingi abelaa nteko na mashimba aabo ooso bwashi Yehowa ebakunkushe.​—Mis. 119:105; Mat. 7:7, 8.

¹³ Anka bu bibaadi baaba abadi abakunkusha mu mafuku a batumibwa, bakulu beena Kidishitu bakwete kukunkusha mudimo wa bulungudi lelo uno, mbepane ku “mufubo wa kulungula wawa mukandu.” (Bik. 6:4) Be na muloo nsaa yabamono bi mudimo wa kulungula mukandu wibuwa ukwete kwenda kumpala mu nsenga ishima mpa na mu mbalo yabadi bashaale. (Bik. 21:19, 20) Tabakwete kwela mayi na miiya ikilekile bungi nya. Anka bakwete kulonda abyamba Bifundwe na bukunkushi bwa kikudi  ky’Efile Mukulu nsaa yabaata bitshibilo bikumbeene kukwasha bwashi mudimo wa bulungudi wende kumpala. (Badika Bikitshino 15:28.) Nsaa yabakwete kukita bino, bano bakwetu be bu kileshesho kya kulonda kwi booso be mu tukongye twi mu nsenga ishima.​—Ef. 4:11, 12.

14, 15. (a) Midimo kinyi yabadi balumbuule bwa kukwasha mudimo wa kulungula mukandu wibuwa mu nsenga ishima? (b) Okwete kupusha naminyi pabitale mushindo okwete kukwasha mu mudimo wa kulungula mukandu wa Bufumu?

¹⁴ Kwi midimo ibungi ya kulumbuula bidibwa bya mu kikudi abituuku mu mikanda yetu, bisangilo, na kulumbuula bikongeno byetu, ishikwete kumweneka ku meso kwa bantu bebungi. Bantu binunu mbepaane kushii kukooka mu mudimo wa kwalula bino bidibwa bya mu kikudi mu ndimi i pepi na 600 bwashi bantu bamone mushindo wa kulonga mu ndimi yaabo “myanda ya kukânya y’abakitshîne kwi Efile Mukulu.” (Bik. 2:7-11, EEM) Bansongwalume na bansongwakashi bakwete kutumika ku byamo abituusha mikanda ibungi na kwiyela mu bipusu. Kunyima, ino mikanda ikwete kwabilwa mu tukongye mpa na mu ma mbalo e kwibula.

¹⁵ Kwi midimo ibungi yabadi balumbuule ayikwasha bwashi tumone mushindo wa kutuula binangu byetu penda mu mudimo wa kulungula mukandu wibuwa na kakongye ketu. Twi balombeene kuteemuna penda midimo ipeela ikwete kukitshika, bu kileshesho bantu binunu mbepaane mu kwibaka kwa Mashibo a Bufumu na Mashibo a Bikongeno, bangi bakwete kwenda mu kukwasha mu ma mbalo e bantu bapete masaku sunga be na lukalo lukata lwa ba munganga, bangi namu bakwete kukwasha mu kulumbuula kwa bikongeno byetu na kulongyesha mu tulasa twa mudimo w’Efile Mukulu. Ino midimo yooso ayikitshika bwakinyi? Bwa kukwasha mudimo wa kulungula mukandu wibuwa, bwashi bano abakitshi uno mudimo bekale na kipwano kibuwa na Yehowa, bwashi lulangwilo lwa binyibinyi lwende kumpala. Byabya twi kwamba shi kipindji kya ndumbulwilo a Yehowa ki pa nsenga, kikwete kutuula binangu ku byabya bikile buwa.

16. Mushindo kinyi wibuwa odya kusangula bwa kulonga kwa Bible bupenka sunga mu kifuko?

¹⁶ Tukwete kwata nsaa ya kunangwila ku midimo ya ndumbulwilo a Yehowa su? Bangi mbamone shi bibuwa kwata nsaa ipeela pabakitshi lulangwilo lwa mu kifuko sunga pabelongyela bwa kukimbuula ino myanda na kunangwila pa yanka. Kimonwa kibapetele Yeeshaya, Ezekyele, Danyele, na Yowano mmyanda ibuwa kulonga. Mukanda wa Les Témoins de Jéhovah: Prédicateurs du Royaume de Dieu na ingi mikanda na ma DVD e mu ludimi loobe ngalombeene nkukwasha bwa kuuka bi ndumbulwilo a Yehowa.

17, 18. (a) Uno mwisambo ubakukwasha naminyi? (b) Nkonko kinyi ayitungu shi twiyele?

¹⁷ Kunangwila ku myanda ikwete kulombasha Yehowa ku bukwashi bwa ndumbulwilo aaye mmwanda wibuwa kwatudi. Pamune na uno ndumbulwilo ebuwa, twateyi kitshibilo kya kutuula binangu byetu ku byabya bikile buwa. Kukita byabya akwitunyingisha bwa kwata kitshibilo bu kibaatshile Mpoolo, pabafundjile shi: “Bu bitupe Efile Mukulu uno mufubo ku lusa lwê, t’atutshoboloka ooo.” (2 Kod. 4:1, EEM) Na dingi baadi munyingishe beena mudimo naaye shi: “Tatukôkanga mu kukita kwa bi buwa, mwanda su atuîdidîla mwanka, byabya, atukaumbula bi buwa pa kipindji kilombane.”​—Gal. 6:9, EEM.

¹⁸ Kwi myanda kampanda ayitungu shi tushintuule atwe banabeene sunga mu kifuko bwa kushingûla byabya bikile buwa mu nshalelo etu a kwifuku n’efuku su? Twi balombeene kupelepesha nshalelo etu sunga bintu bilombeene kukaasha binangu byetu ku myanda i na muulo bwa kutuula binangu penda ku mudimo wa bulungudi su? Mu mwisambo aulondo, atukyebe kutaluula bintu bitano bilombeene kwitukwasha bwa kutambuka pamune na ndumbulwilo a Yehowa.