Sylvia alesha shi, “naadi nende mu kufuba ku kalasa na bantu, abaadi abatumika mu myanda ya ba munganga, abaadi abeamba bu balangwidi, aku namu abaadi abayibila ku bipimo na ku manga abadi bakandikye kwi mbulamatadi. Bipwilo byabo tabikwete kwibakwasha mu mwikeelo wabo nya.”

Ungi mulume abetamina bu Lionnel amba shi: “Beena mufubo naami tabakwete kwakula bya binyibinyi nya, bakwete kwitamina mukata a mudimo bwa kudimba shi be na maladi aku namu tabenao. Be mu kipwilo anka tabalongo myanda ayibakwasha nya; kwabadi, kipwilo ki nka abikalaa bintu bitudiibwe mu nshibo bwa kulesha shi bi mwanka.”

Kipwilo takii na matalwa pabitale mwikeelo wa mu nshaleelo a bantu bebungi nya. Lelo uno bantu bebungi ‘abelesha bu beena Efile Mukulu’ anka ‘mbatune bukome bwaye.’ (2 Timotee 3:5) Bakata ba bipwilo, tambalekyele bantu ba bipwilo byabo kileshesho kibuwa nya sunga kupa mikooko yabo malango a mu Bifundwe pabitale mwikeelo wabo. Muyiile mwikeelo wabo be bu abalesha shi, Efile Mukulu ta talaa byoso byabakitshi mu nshalelo abo.

Bible alesha shi Efile Mukulu atalaa byooso byatukitshi, na mwikeelo wetu wi na muulo ku meso kwaye. Beena Isaleele pabaabadi batombokyele Efile Mukulu, babaadi ‘abamwinyongosha.’ (Misambo 78:40) Byabya, “mwiilu mwi mulô” ukata nsaa i muntu elanga n’eshimba dyaaye dyooso na kushintuula mwikeelo waye wi bubi. (Luuka 15:7, EEM) Nsaa i muntu asangeela ngikashi ibuwa ya Nsheetu e mwiyilu, kifulo kyaaye bw’Efile Mukulu akitama, na akimutakula mu kufula myanda yaadi mufule na kushikwa myanda yaadi mushikwe.—Amose 5:15.

Ungi jurnale (Deseret News of Salt Lake City, Utah, U.S.A.) amba shi, Batemwe ba Yehowa “bakwete kukwasha bantu bwabadya kulumbuula kipwano kya mu bifuko byabo, bwashi bekale abekwashena na kwikala bu bantu baasha kululama.” Yawa jurnale alesha dingi shi: “Balangwidi baabo bakwete kulonda miiya ikata ya mu nshalelo. Abauku shi kutoma nfwanka, kukolwa maalwa, kutoma kwa bingi bintu abikolanaa, kwasha maasha a makuta, kutambuka kwa lusandji na kulala kwa mulume na mulume sunga mukashi na mukashi nyi mbintu abilwisha kipwano kya muntu n’Efile Mukulu.”

Kulonga kwa ngikashi y’Efile Mukulu akukwasha Batemwe naminyi? Sylvia atuleshanga kunundu alesha shi: “Mbibofule bwa kulonda bantu bakwete kwiba mu myanda ya kubuka kwa bantu. Kadi kupusha kwa mushindo aupushaa Yehowa * pabitale wawa mwanda nkunkwashe bwa kukita myanda ibuwa. Ne mupete muloo n’eshimba difukame.” Sylvia mmushinkamishe shi kwikala na nshalelo mwipushene na abyamba kipwilo kyaaye, nkulumbuule nshalelo aaye.