We mulombeene kukulupila bipwilo pabitale ngoshi?
Alberto baadi afubu mu kisaka kya basalayi takudi bipwa ekumi, atentekyesha shi: “Pabaadi mukata etu a kipwilo etwelela myabi baadi amba shi, ‘Efile Mukulu e neenu.’ Kadi naadi neyipusha shi, ‘nkwete kwenda mu kwipaa bantu, aku namu Bible amba shi, “toyipanga muntu.”’”
Ray baadi atumika na maato a ngoshi mu Ngoshi ya Kabidi ya nsenga ishima. Ungi musuusa bayipwishe muntu baadi atekyela kisaka kyabo shi: “Okwete kufika mu bwato bwa kutekyela kisaka kya basalayi bwashi bakatshokole, beshikwanyi betu be na namu muntu ebatekyelaa su?” Yawa muntu balulwile shi Mwanana akitaa bipaso.
Su omono shi luno lwalulo ta lwi buwa, twe bupenka nya.
BIBLE ALONGYESHA KINYI?
Yesu bambile shi, mwiya ukata ku miiya y’Efile Mukulu nyi nguno, “ofule muntu-noobe buu’be nabeene.” (Maako 12:31) Yesu baadi mwambe shi kifulo kyetu bwa muntu netu nkitale penda mbalo yaadi mushale sunga eumbo kampanda su? Nya. Balungwile balondji baaye shi: “Abakatundula’shi nwi balondji bande anka ku kifulo kyaanwifuleena.” (Yowano 13:34, 35) Kifulo kyabo akikyebe kukanyisha bantu mu mushindo wabekala abebatundwila ku kyanka. Mbalombeene mpa na kutusha muwa wabo bwa bakwabo pamutwe pa kwiupaasha.
Beena Kidishitu ba kumpala abaadi abalondo mayi a Yesu. Ungi mukanda (The Encyclopedia of Religion) aulesha shi: “Bakata ba bipwilo bya kumpala, mpa na Tertulien na Origène, abashinkamisha shi, beena Kishitu abaadi abapele kwipaa muntu, nyi bwakinyi tababaadi abakumiina kutwelakana mu ngoshi ya beena Looma.”
BATEMWE BA YEHOWA ABAKITAA NAMINYI?
Mu maumbo ebungi mwi Batemwe ba Yehowa, bantu bakwete kutwelakana mu bilumbu bi pankatshi pa maumbo. Sunga mbyabya, Batemwe ba Yehowa bakwete kukita mwabo mooso bwa kulama kitundwilo kyabo kya kwikala na kifulo.
Bakata ba bipwilo mbalongyeshe bantu kifulo kya binyibinyi kya beena Kidishitu su?
Bu Kileshesho, mu ngoshi ya bisamba ibaadi ituukye mu 1994 pankatshi pa ba Hutu na ba Tutsi mu Rwanda, Batemwe ba Yehowa abaadi bapele kutwelakana mu yaaya ngoshi. Batemwe ba mu kingi kisamba abaadi abakalwila bakwabo be mu kingi kisamba. Batemwe babidi ba Hutu abaadi bebakwate mwanda abaadi bafwamishe bakwabo Batemwe ba Tutsi. Musalayi umune a mu kisaka kya ba Hutu kyabetamina bu ba Interahamwe bambile shi, “abitungu kwinwipaa mwanda nubapaasha ba Tutsi.” Bi malwa, mwanda abayipayile baaba bakwetu ba Hutu.—Yowano 15:13.
Banda kwela binangu, bikitshino bya Batemwe ba Yehowa mbipushene na mayi a Yesu a kwikala na kifulo kya kwisumina ingi miloo su?
