‘Nnanyi e bu mpika a kishima na mupatulukye?’
‘Nanyi e bu mpika a kishima na mudimukye [mupatulukye] abadi batuule kwi fumwaye bu mukata a bafubi ba mu shibo yaye?”—MAT. 24:45, Kilombeno kipya 2009.
1, 2. Yesu kwete kwitudiisha ano mafuku ku bukwashi bwa nnanyi, na bwakinyi bi na muulo bwa kumuuka?
“UNGI mukwetu mukashi baadi mufundjile bakwetu abafubaa mu biro byetu bikata bwa kuleesha lutumbu lwaye shi: “Bakwetu, ntshi mulombeene kubadika misusa yandi mubadikye miisambo yandi nayo lukalo mu nsaa yandi na lukalo lukata nya.” Uno mwanda taubakufwidiile namu su? Bebungi ba kwatudi mbipwe kwibafwila. Mbilombeene kwitukemesha su? Nyaa.
2 Bidibwa bya mu kikudi by’atupete pa nsaa ilombane abilesha shi, Yesu Mutwe wa kakongye, kwete kulombasha mulayilo waye wa kwitudiisha. Kwete kwitudiisha ku bukwashi bwa nanyi? Pabaadi aleesha bitundwilo bya kufika kwaye, Yesu baadi muleshe shi akyebe kufuba na “mpika a kishima na mupatulukye” bwa kupa ba mu nshibo yaaye “bidiibwa byabo ku kipindji kikumbane.” * (Badika Mateo 24:45-47, Kilombeno kipya 2009.) Yesu kwete kufuba na mpika a kishima bu mushindo waadi mulombeene kudiisha balondji baaye ba binyibinyi mu ano mafuku a ku nfudiilo. Kuuka mpika a kishima kwi na muulo. Mwanda, kunyinga kwetu kwa mu kikudi na kipwano kyetu n’Efile Mukulu abituukila kwi mpika a kishima.—Mat. 4:4; Yo. 17:3.
3. Mikanda yetu ibaadi ileshe naminyi pabitale lukindji lwa mpika a kishima?
3 Mushindo kinyi watudi balombeene kupusha lukindji lwa Yesu lutale mpika a kishima? Kala, mikanda yeetu ibaadi ayilesha shi: Mu Pentekote a 33 K.Y.K., Yesu baadi mutuule mpika a kishima ku mutwe kwa bafubi ba mu nshibo yaaye. Mpika aleesha kisaka kya beena Kidishitu booso bashingwe mwimu be pa nsenga sunga bekala ba mu kipungo kinyi. Ba mu nshibo yaaye abaleesha mushingwe mwimu ooso a kwabadi. Mu 1919, Yesu batudile mpika a kishima “ku mutwe kwa bintu byaaye byooso” bitale Bufumu bwaye pa nsenga. Anka twi bapete mpushisho ebuwa a mayi a Yesu pabitale mpika a kishima na mupatulukye ku bukwashi bwa kutaluula kwa bifundwe kalolo na kunangwila menemene mu luteko. (Mye. 4:18) Tubandeyi kutaluula mushindo witutale luno kukindji, byatwikala na lukulupilo lwa kwenda mwiyilu sunga kwikala na muwa pa nsenga.
LUKINDJI LUBALOMBEENE NSAA KINYI?
4-6. Mushindo kinyi watuuku shi lukindji lwa Yesu pabitale mpika a kishima lubabangile kulombana penda kunyima kwa kipwa kya 1914?
4 Myanda i mu lukindji lwa mpika a kishima na mupatulukye ayilesha shi, luno lukindji talubaadi lulombane mu Pentekote a mu kipwa kya 33 K.Y.K., anka ndulombane mu ano mafuku a nfudiilo. Tubandeyi kutala mushindo witukwashe Bifundwe bwa kupeta uno mpushisho.
5 Lukindji lwa mpika a kishima na mupatulukye nyi nkipindji kya mu butemuki bwa Yesu pabitale “kitundwilo kya kufika [kwaye] naa kya nfudiilo a byaa-pano.” (Mat. 24:3) Kipindji kya kumpala kya butemuki, ki mu Mateo 24:4-22, nkilombane mu bipindji bibidi—kya kumpala, mu bipwa bibangye mu kipwa kya 33 K.Y.K. na mu kipwa kya 70 K.Y.K., na kya kabidi nkulombana kukata mu ano mafuku etu. Bino abilesha shi bishima bya Yesu pabitale mpika a kishima bibadya kulombana mu bipindji bibidi su? Nya.
6 Patutala mayi e mu mukanda wa Mateo 24:29, kya kumpala Yesu baadi mutuule binangu byaye ngofu mu myanda ayikakitshika mu ano mafuku etu. (Badika Mateo 24:30, 42, 44.) Pabaadi akula pabitale abikakitshika mu nsaa ya mpombo ikata, bakwile bino: “Abakamono Mwan’a-muntu bya afiki pa makumbi a mwiyilu.” Akupu, mu mayi abakwile pabitale abikafikila baaba abekala mu mafuku a nfudiilo, baadi mwibalungule bwashi bapasukye, aye nkwamba shi: “Taanuwuku efuku adikafiki Nfumwenu” nashi, “nguba anushyaabatentekyesha, ngi akafiki Mwan’a-muntu.” * Uno mwanda aulesha shi, Yesu—pabaadi akula pabitale myanda ayikakitshika mu mafuku a nfudiilo—ndjo pabaadi mwele lukindji lwa mpika a kishima na mupatulukye. Byabya, twi balombeene kulamiina shi, bishima byaaye pabitale mpika a kishima na mupatulukye bibabangile kulombana penda kunyima kwa mafuku a nfudiilo ababangile mu kipwa kya 1914. Uno mpushisho nga binyibinyi. Bwakinyi atwamba byabya?
7. Ndukonko kinyi lubaadi lwibwee pababangile kipungo kya kuumbula, na mbwakinyi?
7 Banda kwela binangu, pabitale luno lukonko: ‘Nnanyi e bu mpika a kishima na mupatulukye?’ Mu mafuku a batumibwa, luno lukonko talubaadi na muulo nya. Anka bu byatwikeele bamone mu mwisambo ushaale, batumibwa abaadi abakitshi bipaso mpa na kutuusha byabuntu mu kukita kwa bipaso abilesha shi be na bukome bw’Efile Mukulu. (Bik. 5:12) Byabya, bwakinyi abaadi balombeene kwipusha shi, nnanyi abadi batuule kwi Kidishitu bwa kukunkusha? Byabya, mu 1914 myanda ibaadi ilekene. Kipungo kya kuumbula kibabangile mu kyakya kipwa. Nsaa ibaadi ilombane ya kwabuula lubishi lubi na mbyo ibuwa. (Mat. 13:36-43) Pababangile kipungo kya kuumbula, lukonko lukata lubaadi lwibwee nduno: Na bano beena Kidishitu ba madimi booso abeamba bu balondji ba Yesu, mushindo kinyi wa kutundula mbyo ibuwa—beena Kidishitu bashingwe mwimu? Lukindji lwa mpika a kishima alwitupa lwalulo. Balondji ba Yesu beena Kidishitu bashingwe mwimu abekala baaba baabadiisha mu kikudi kalolo.
NNANYI E BU MPIKA A KISHIMA NA MUPATULUKYE?
8. Bwakinyi mbilombane bwashi mpika a kishima ekale mukitshibwe na beena Kidishitu bashingwe mwimu?
8 Bashingwe mwimu be pa nsenga ndjo bekale mpika a kishima. Bano, abetaminyibwa bu “kibumbu kya butshiite-mwakwidi” na bu be na mudimo wa “‘kuukisha myanda ya-kukaanya yaadi mukite, aye [mwibetamine] ku mufito bwa kwibatadiisha kwitaata dyaaye dya kukanya.” (1 Mp. 2:9) Mbilombane bwashi baaba be mu “kibumbu kya butshiite-mwakwidi” bepaane mu kulongyesha balangwidi nabo bya binyibinyi.—Mal. 2:7; Bif. 12:17.
9. Beena Kidishitu bashingwe mwimu booso mbekale mpika a kishima su? Patuula.
9 Bashingwe mwimu booso be pa nsenga mbekale mpika a kishima su? Nya. Kya kuuka nkwamba shi, ta mbooso bashingwe mwimu be na mudimo wa kutuusha bidibwa bya mu kikudi bya kupa beena Kidishitu be mu nsenga ishima nya. Mu mbyo ibuwa mwi bakwetu balume bashingwe mwimu balombeene kwikala bakulu sunga bafubi ba midimo mu tukongye. Bakwete kulongyesha ku nshibo na nshibo na mu tukongye twabo, na mbalamate ku bukunkushi bwa biro bikata bya Batemwe ba Yehowa. Anka tabakwete kukita mudimo wa kutuusha bidibwa bya mu kikudi kwi bakwabo be mu nsenga ishima nya. Na dingi munkatshi mwa bashingwe mwimu mwi bakwetu bakashi baasha kwiyisha, bashii balombeene kukita mudimo wa kulongyesha mu kakongye.—1 Kod. 11:3; 14:34.
10. Nnanyi e bu mpika a kishima na mupatulukye?
10 Byabya, a nnanyi e bu mpika a kishima na mupatulukye? Mu kulonda kwa mushindo ubaadi Yesu mudiishe bantu bebungi ku maasa a bantu bapeela, yawa mpika mmukitshibwe na kasaka kapeela ka bakwetu balume bashingwe mwimu bepaane mu kulumbuula na kwabila bidibwa bya mu kikudi mu nsaa ya kwikala kwa Kidishitu. Mu mafuku a nfudiilo, bakwetu balume bashingwe mwimu bekale mpika a kishima bakwete kufuba pamune ku biro bikata bya Batemwe ba Yehowa. Yawa mpika nyi Nkasaka ka Bakunkushi-Bakulu ka ba Batemwe ba Yehowa. Byabya, lamiina shi, mu lukindji lwaye, Yesu bambile shi akwikala “mpika” umune. Kasaka ka Bakunkushi-Bakulu abateya bitshibilo byabo pamune, nka bu muntu umune.
BAFUBI BA MU NSHIBO YAAYE MBA NNANYI?
11, 12. (a) Myasu kinyi ibidi ayipete mpika a kishima na mupatulukye? (b) Yesu baadi mutuule mpika a kishima ku mutwe kwa bafubi ba mu nshibo yaaye mu kipwa kinyi, na mba nnanyi babasangwile?
11 Mu lukindji lwa Yesu, atusangana shi mpika a kishima na mupatulukye apete myasu ibidi ilekeene. Wa kumpala amutuulu ku mutwe kwa bafubi ba mu nshibo yaaye; wa kabidi amutuulu ku mutwe kwa bintu byaaye byooso. Bu bi luno lukindji ndulombane penda mu ano mafuku a nfudiilo, ino myasu yooso eyipete kunyima kwa kwikala kwa Yesu na matalwa a bu nfumu bubangye mu 1914.
12 Nsaa kinyi ibaadi Yesu mutuule mpika a kishima ku mutwe kwa bafubi ba mu nshibo yaaye? Bwa kwalula ku luno lukonko, abitungu twalukiile mu kipwa kya 1914—mbangilo a kipungo kya kuumbula. Anka bu byatwikeele balongye kumpala, mu aa mafuku bisaka bibungi bibaadi abiilesha bu bya beena Kidishitu. Yesu baadi mulombeene kusangula mpika a kishima mu kisaka kinyi? Luno lukonko lubaadi lwalulwe kunyima kwa nsaa ibafikile Yesu na Nshaaye mu kutala ntempelo, sunga ndumbulwilo a mu kikudi a lulangwilo, kubanga mu 1914 na ku mbangilo kwa kipindji kya kipwa kya 1919. * (Mal. 3:1) Abaadi na muloo wa kumona kasaka kapeela ka balongi ba Bible baasha kululama abaadi baleshe shi, mashimba aabo ngalamate kwi Yehowa na ku Eyi dyaaye. Eyendo, abaadi na lukalo lwa kusuudibwa, abo nkukookyela na kwiyisha kooso mu nsaa ya kutompa na kulumbuula. (Mal. 3:2-4) Baaba balongi ba Bible baasha kululama abaadi beena Kidishitu ba binyibinyi, mbyo ibuwa. Mu kipwa kya 1919, nsaa ya kupasuka kwa mu kikudi, Yesu basangwile munkatshi mwabo bakwetu balume bashingwe mwimu balombane bwashi bekale mpika a kishima na mupatulukye, na aye nkwibatuula ku mutwe kwa bafubi ba mu nshibo yaaye.
13. Mu bafubi ba mu nshibo mwi ba nnanyi, na mbwakinyi atwamba byabya?
13 Byabya, bafubi ba mu nshibo mba nnanyi? Atwamba shi, mbano bakwete kudishiibwa. Ku mbangilo kwa mafuku a nfudiilo, bafubi ba mu nshibo abaadi penda bashingwe mwimu booso. Kunyima, mu bafubi ba mu nshibo mubekeele lombe lukata lwa ingi mikooko. Ingi mikooko binobino ngikite kisaka kikata kya “lombe lumune” ku bukunkushi bwa Kidishitu. (Yo. 10:16, EEM) Bino bisaka byooso bikwete kudya byabya bidibwa bimune bya mu kikudi byabakwete kutuusha kwi mpika a kishima pa nsaa ilombane. Kadi, twi kwamba naminyi bwa bano be mu Kasaka ka Bakunkushi-Bakulu abo bekale lelo uno mpika a kishima na mupatulukye? Mpa na bano bakwetu naamu be na lukalo lwa kudya bidibwa bya mu kikudi. Byabya, booso bwabo abauku shi ooso a kwabadi mmufubi a mu nshibo anka bi bangi balondji ba binyibinyi ba Yesu.
Sunga byekala shi lukulupilo lwetu ndwa kwenda mwiyilu sunga kushaala pa nsenga, atwe booso twi bafubi ba mu nshibo na twi na lukalo lwa kudya bidibwa bya mu kikudi pa nsaa ilombane
14. (a) Mpika a kishima mbamupe mudimo kinyi, wawa mudimo ngutale myanda kinyi? (b) Yesu baadi mudimushe mpika a kishima na mupatulukye pabitale mwanda kinyi? (Tala kashibo akamba shi: “Anka su yawa mpika ekala mubi . . .”)
14 Yesu bapeele mpika a kishima mudimo ukata. Kala, mpika abadi bakulupile sunga mufubi, baadi mukunkushi a nshibo. (Luk. 12:42) Mpika a kishima na mupatulukye mbamupe mudimo wa kukunkusha bintu bya Kidishitu bi pa nsenga. Bino mbitale kukunkusha mashibo, myanda itale mudimo wa bulungudi, ma programe a bikongeno, na kutuusha kwa mikanda ayipatuula Bible ya kufuba nayo mu mudimo wa bulungudi mpa na bwa kwilongyela sunga kulonga mu kakongye. Bafubi ba mu nshibo mbatuule lukulupilo lwabo ku bidibwa bya mu kikudi byabatuusha kwi mpika.
ABAMUTUULU KU MUTWE KWA BINTU BYOOSO
15, 16. Yesu atuulu mpika a kishima ku mutwe kwa bintu byaaye byooso nsaa kinyi?
15 Yesu amupa mwasu wa kabidi bu nfumu a “bupeta bwaye booso” mafuku kinyi? Yesu bambile shi: “Ngaa-mwabi uno mufubi aabasangana kwi nfumwaye, [kwamba shi “pakaaluka”] mwikale akitshi uno mufubo. Eyendo, neenulungula shi amutuulu ku mutwe wa bintu byaaye byooso.” (Mat. 24:46, 47) Lamiina shi wawa mwasu wa kabidi, Yesu akeutuusha kunyima kwa kufika kwaye na pakasangana mpika kwete “kukita uno mufubo,” kutuusha kwa bidibwa bya mu kikudi na kishima kyooso. Byabya, akwikala kipungo pankatshi pa ino myasu yooso ibidi. Abitungu tuukye bintu bibidi bwa kushinguula mushindo kinyi na nsaa kinyi ayikyebe Yesu kutuula mpika ku mutwe kwa bintu byaaye byooso: nsaa yafiki na akilesha bintu byaaye.
16 Yesu afiki nsaa kinyi? Lwalulo lwi mu myanda i mu lukindji lwaye. Tentekyesha shi, maverse e kumpala aesambila Yesu shi “afiki,” ano mayi ngatale nsaa yakatshibi kiimu mu nsaa ya nfudiilo a bya-pano. * (Mat. 24:30, 42, 44) Byabya, ‘kwaluka,’ sunga “kufika” kwa Yesu kwabadi baleshe mu lukindji lwa mpika a kishima akulombana mu nsaa ya mpombo ikata.
17. Mu bintu bya Yesu mwi kinyi?
17 “Bintu [bya Yesu] byooso” mbintu kinyi? Yesu tabaadi muleshe shi kishima “byooso” nkimeene pa bintu bi pa nsenga nya. Byabya, Yesu e na matalwa akata mwiyilu. Bambile shi: “Matalwa ooso, mbeampe mwiyilu na pa nsenga.” (Mat. 28:18; Ef. 1:20-23) Binobino, mu bintu byaye mwi Bufumu bwaye bwa bu Mesiya, bwadi mupete kubanga mu 1914 bwakyebe kumunana pamune na balondji baaye bashingwe mwimu.—Bif. 11:15.
18. Bwakinyi Yesu ekala na muloo wa kupa mpika mwasu wa kabidi; kumutuula ku mutwe kwa bintu byaaye byooso?
18 Muyiile bibatukatuka mu kumona, tubalamiina nkinyi? Yesu pafiki bwa kutshiba kiimu mu nsaa ya mpombo ikata, akyebe kusangana shi mpika a kishima kwete kupa bafubi ba mu nshibo yaaye bidibwa bya mu kikudi na kishima kyooso. Yesu akyebe kwikala dingi na muloo wa kumupa mwasu wa kabidi—kumutuula ku mutwe kwa bintu byaaye byooso. Baaba bekale mpika a kishima abakyebe kupeta uno mwasu nsaa yabapete bwedi bwabo bwa kwenda mwiyilu, mu kumunana pamune na Kidishitu.
19. Mpika a kishima apete bwedi bukile bwa bangi bashingwe mwimu mwiyilu su? Patuula.
19 Mpika a kishima apete bwedi bukile bwa bangi bashingwe mwimu su? Nya. Bwedi bwabadi balee kasaka kapeela abebupete dingi kwi bangi bashingwe mwimu. Bu kileshesho, banda kutala bibaadi Yesu mulungule batumibwa baaye 11 baasha kululama bufuku bwa kumpala kw’efuku dya lufu lwaye. (Badika Luuka 22:28-30.) Yesu balayile kaaka kasaka kapeela ka bantu shi abakapete efuto dibuwa bwa kululama kwabo. Booso abakyebe kushala pa nkwasa a bufumu. Kadi, kunyima kwa bipwa balesheshe shi, booso bantu 144000 abakashala pa nkwasa a bufumu na kumunana pamune naaye. (Bif. 1:1; 3:21) Bi mumune, nka byabidi bifundjibwe mu mukanda wa Mateo 24:47, Yesu balayile shi kasaka ka bakwetu balume bashingwe mwimu abo bekale mpika a kishima abakatudiibwa ku mutwe kwa bintu byaye byooso. Mu binyibinyi, bano bantu booso 144 000 abakyebe kwikala na matalwa pamune naaye mwiyilu.—Bif. 20:4, 6.
Bantu booso 144 000 abakyebe kumunana pamune na Yesu mwiyilu (Tala paragrafe 19)
20. Bwakinyi Yesu mmutuule mpika a kishima, na nkitshibilo kinyi kyodi nakyo?
20 Ku bukwashi bwa mpika a kishima na mupatulukye, Yesu kwete kulonda mushindo umune ubaadi mudiishe bantu bebungi ku maasa a bantu bapeela mu mafuku a batumibwa. Yesu mmutuule mpika a kishima bwashi balondji baaye byabekala bashingwe mwimu sunga ingi mikooko bapete bidibwa bya mu kikudi bibungi pa nsaa mu mafuku a nfudiilo. Twikaleyi na kitshibilo kya kulesha lutumbu lwetu nsaa yatukwasha na kululama kooso bakwetu balume bashingwe mwimu bekale mpika a kishima na mupatulukye.—Eb. 13:7, 17.
^ par. 2 Paragrafe 2: Ungi mususa Yesu baadi mwele lungi lukindji lwi mumune, mu lwalwa lukindji baadi mwakule pabitale “mpika” bu “mulami,” na pabitale “bafubi ba mu nshibo” bu “beena mufubo baaye.”—Luk. 12:42-44.
^ par. 6 Paragrafe 6: “Kufika” kwa Kidishitu (Mu ki na Greke, erʹkho·mai) nkwilekene na “kwikala” kwaye (pa·rou·siʹa). Kwikala kwaye kushy’akumweneka nkubangye kumpala kwa kufika kwaye bwa kutshiba kiimu.
^ par. 12 Paragrafe 12: Tala mwisambo awamba shi: “Talayi, ami ne n’enu mafuku oso” mwisaki 10-12, paragrafe 5-8.
^ par. 16 Paragrafe 16: Tala mwisambo awamba shi: ‘Etulungule namu, nguba akakitshika yaaya myanda’ mwisaki 7-8, paragrafe 14-18.
