1. Anka bu bibaadi batumibwa, twi na lukalo lwa kuuka kinyi?

MUDIMO wa Yesu pa nsenga ubaadi awende ku nfudiilo na balongi baaye abaadi na lukalo lwa kuuka myanda ayikyebe kwibafikila mu mafuku e kumpala. Byabya mafuku apeela kumpala kwa lufu lwaye, balondji baaye bananka abamwipwishe shi: “Etulungule namu apakakitshika yaya myanda. Nkitundwilo kinyi namu akikalêsha’shi kufika kobe mu ntumbo, na nfudîlo ya nsenga tábidi pepi?” (Mat. 24:3, EEM; Mak. 13:3) Yesu bebalulwile ku bukwashi bwa butemuki bukata abusanganyibwa mu Mateo shapitre 24 na 25. Mu bwabwa butemuki, Yesu baadi mutemukye myanda ikata ayikakitshika. Bishima bibakwile bi na bukwashi bukata kwatudi mwanda atwe naamu twi na lukalo lukata lwa kuuka myanda ayiketufwila mu mafuku e kumpala.

2. (a) Munda mwa bipwa bibungi, twi bakimbe bwa kupeta mpushisho ebuwa pabitale kinyi? (b) Nkonko kinyi isatu yatukyebe kutaluula?

² Munda mwa bipwa bibungi, bafubi ba Yehowa abekalanga bepaane ngofu mu kulonga kwa butemuki bwa Yesu pabitale mafuku a nfudiilo. Mbakimbe mushindo wa kupeta mpushisho ebuwa pabitale nguba akakumbana mayi a Yesu. Bwa kupusha kalolo mushindo watudi bapete yawa mpushisho ebuwa, tubandeyi kutaluula nkonko isatu itale kuuka kwa “nguba.” Nguba kinyi akabanga “mpombo ikata”? Nguba kinyi akaabuula Yesu “mikooko na mbushi”? Na nguba kinyi ‘akafiki’ Yesu sunga kwaluka?—Mat. 24:21; 25:31-33.

3. Kala, tubaadi na mpushisho kinyi pabitale nguba akabanga mpombo ikata?

³ Takudi bipwa bibungi, tubaadi atuuku shi mpombo ikata ibabangile mu 1914 pa Ngoshi ya kumpala ya nsenga ishima; na’shi Yehowa baadi ‘mupeeleshe aa mafuku’ a ngoshi mu 1918 nsaa ibaadi imane ngoshi bwashi bashingwe mwimu bakii pa nsenga bamone mushindo wa kulungula mukandu wi buwa kwi miilo yooso. (Mat. 24:21, 22) Ku nfudiilo kwa wawa mudimo wa bulungudi, bufumu bwa Satana abukabutudibwa. Byabya,  tubaadi atupwandikisha shi, mpombo ikata i na bipindji bisatu: Ayikabanga mu (1914-1918), ayikemana (kubanga mu 1918 mpa na mu mafuku aalondo), na ayikafudiila ku Armagedone.

4. Mushindo kinyi watudi bafikye mu kupeta mpushisho a myanda ibungi ya mu butemuki bwa Yesu pabitale mafuku a nfudiilo?

⁴ Mu kutaluula kukata kwa butemuki bwa Yesu, twi basangane shi kipindji kya butemuki bwa Yesu pabitale mafuku a nfudiilo nkilombane mu bipindji bibidi. (Mat. 24:4-22) Kulombana kwa kumpala kubaadi mu Yudeya mu siekele a kumpala, na kulombana kwa kabidi akukekala kwa mu nsenga ishima mu ano mafuku etu. Uno mpushisho mmukwashe bwa kuuka myanda ibungi. *

5. (a) Nkipungo kinyi ki bukopo kibabangile mu 1914? (b) Kyakya kipungo kya mitanyo ki mumune na kipungo kinyi kibaadi mu siekele a kumpala?

⁵ Twi basangane dingi shi, mpombo ikata ta ngibangye mu 1914 nya. Bwakinyi atwamba byabya? Mwanda butemuki bwa mu Bible tabulesha shi mpombo ikata ayikabanga na ngoshi ayituukila munkatshi mwa miilo ya bantu nya, anka ayikabanga nsaa yabakalwisha bipwilo bya madimi ngoshi. Byabya, myanda ibabangile mu 1914 tayibaadi bu mbangilo a mpombo ikata nya, anka nyi “mbangilo ya mitanyo.” (Mat. 24:8, Kilombeno kipya 2009) Ino “mitanyo” i mumune na yaaya ibaadi mu Yeelusaleme na mu Yudeya kubanga mu kipwa kya 33 na ku kipwa kya 66 kunyima kwa Yesu Kidishitu (K.Y.K.).

6. Nkitundwilo kinyi akikalesha mbangilo a mpombo ikata?

⁶ Nkitundwilo kinyi akikalesha mbangilo a mpombo ikata? Yesu baadi mutemukye shi: “Biabia panukamono kintu kibi ki butete kya kutuutshisha kibaakwilwe kwi Danyele mutemuki nkishaale mu mbalo yi selele (yawa abala ashinguule), paapa be mu Yudeya basuukile mu miengye.” (Mat. 24:15, 16, Kilombeno kipya 2009) Mu kulombana kwa kumpala, ‘kushaala kwa mu mbalo yi selele’ kubaadi kumwenekye mu kipwa kya 66 K.Y.K. nsaa ibaadi basalayi ba beena Loma (“kintu kibi ki butete”) balwe ngoshi na Yeelusaleme na kulwisha ntempelo aaye (mbalo i selele ku meso kwa beena Yuuda). Mu kulombana kukata,  kuno ‘kushaala’ akukamweneka nsaa ayikekala Nations-Unies (“kintu kibi ki butete” kya ano mafuku) akalwisha bipwilo bya madimi (abyo abimweneka bu bi selele ku meso kwa bwina Kidishitu bwa kwishina) na bangi bakii mu Babilone Mukata. Ngoshi i byabya ayisanganyibwa mu Bifumbulwe 17:16-18. Wawa mwanda aukekala mbangilo a mpombo ikata.

7. (a) Mushindo kinyi ubaadi ‘upashibwe bantu’ mu siekele a kumpala? (b) Nkinyi kyatudi balombeene kutengyela mu mafuku e kumpala?

⁷ Yesu batemukile dingi shi: “Aa mafuku aekala apeeleshiibwe.” Mu kulombana kwa kumpala, bino bibamwekyele mu kipwa kya 66 K.Y.K. nsaa ibaadi basalayi ba beena Loma babande kwimika ngoshi. Paapa, beena Kidishitu bashingwe mwimu ba mu Yeelusaleme na ba mu Yudeya abasuukile; bisumanga “takubadya kupashibwa muntu su ngumune.” (Badika Mateo 24:22, Kilombeno kipya 2009; Ma. 3:17) Byabya, nkinyi kyatudi balombeene kutengyela mu nsaa ya mpombo ikata? Yehowa ‘akapeelesha mafuku’ a ngoshi yabakalwisha bipwilo bya madimi kwi Nations-Unies, bwashi kipwilo kya binyibinyi takibutulwanga pamune na bipwilo bya madimi nya. Bino abilesha shi mwilo w’Efile Mukulu aukapashibwa.

8. (a) Nkinyi akikakitshika kunyima kwa kipindji kya kumpala kya mpombo ikata? (b) Muyiile by’abimweneka, nsaa kinyi ayikapete mushingwe mwimu a nfudiilo a ku bantu 144 000 bwedi bwaye bwa kwenda mwiyilu? (Tala mayi a ku nfudiilo.)

 ⁸ Nkinyi akikakitshika kunyima kwa kipindji kya kumpala kya mpombo ikata? Mayi a Yesu aalesha shi akukakidi kipungo akyende mpaa na ku mbangilo kwa Armagedone. Mmyanda kinyi ayikakitshika mu kyakya kipungo? Lwalulo lwi mu mukanda wa Ezekyele 38:14-16 na Mateo 24:29-31. (Badika.) * Kunyima kwa byabya, atukyebe nkamona Armagedone, kipindji kya nfudiilo kya mpombo ikata i mumune na bibaadi kabutu ka Yeelusaleme mu kipwa 70 K.Y.K. (Ma. 4:1) Bu bi ngoshi ya Armagedone nkipindji kyayo kya nfudiilo, ino mpombo ikata ikwete kufika ayikala mwanda umune wa “malwa akile ashamwekyele dimo kubanga ku kibangilo kia nsenga mpaa na binobino.”  (Mat. 24:21, Kilombeno kipya 2009) Apakakidi ino mpombo, Bipwa Kinunu bya Kumunana kwa Kidishitu abikabanga.

9. Butemuki bwa Yesu pabitale mpombo ikata bwi na bukwashi kinyi kwi mwilo wa Yehowa?

⁹ Buno butemuki butale mpombo ikata abwitunyingisha. Bwakinyi? Mwanda abwitushinkamiisha shi, sunga twekala mu nkalakasho i naminyi, kisaka kya mwilo wa Yehowa akikapanda mu mpombo ikata. (Bif. 7:9, 14) Mu byooso, twi na muloo mwanda mu nsaa ya Armagedone, Yehowa akyebe kulesha bi matalwa aaye a kumunana na kutumbisha eshina dyaaye diselele.—Mis. 83:19; Ez. 38:23.

10. Kala, tubaadi na mpushisho e naminyi pabitale nguba abakaabuula mikooko na mbushi?

¹⁰ Banda kutala binobino nsaa ayikalombana kingi kipindji kya butemuki bwa Yesu​—lukindji lwa kwabuula mikooko na mbushi. (Mat. 25:31-46) Kala, tubaadi atwamba shi kutshibila kwa bantu kiimu bu kwabuula kwa mbushi na mikooko akukakitshika mu kipungo kyooso kya mafuku a nfudiilo kubanga mu 1914 mpa na mu mafuku aalondo. Tubaadi atwamba shi booso abaadi abapele mukandu wa Bufumu na abafwile kumpala kwa mpombo ikata abaadi bafwe bu mbushi​—kushii lukulupilo lwa lusangukilo.

11. Bwakinyi atwamba shi kwabuula kwa bantu bu mikooko na mbushi takubabangile mu 1914?

¹¹ Mu kipwa kya 1995, Kitenta kya Mulami kibaadi kitaluule mukanda wa Mateo 25:31, (Kilombeno kipya 2009) awamba shi: “Biabia apakafiki Mwana a muntu mu ntumbo yaye pamune na bamwikeilu boso, peenipaapa aye akashaala ku nkwasa a bufumu bwa ntumbo yaye.” Tubaadi basangane shi Yesu bafikile bu Nfumu a Bufumu bw’Efile Mukulu mu 1914, kadi tabaadi ‘mushaale ku nkwasa a bufumu’ bu nsushi a “bisamba bioso” nya. (Mat. 25:32, Kilombeno kipya 2009; tala kwipushena na Danyele 7:13.) Byabya, lukindji lwa mikooko na mbushi alulesha kya kumpala Yesu bu Nsushi. (Badika Mateo 25:31-34, 41, 46.) Bu bibaadi Yesu tabaadi mubande kwikala Nsushi a bisamba byoso mu kipwa kya 1914, kwabuula kwaye kwa mikooko na mbushi takubaadi kubangye mu kyakya kipwa nya. * Byabya, nguba kinyi akabanga Yesu kwabuula mikooko na mbushi?

12. (a) Nsaa kinyi ayikekala Yesu bwa mususa wa kumpala bu Nsushi a bisamba byoso? (b) Myanda kinyi yabadi baleshe mu Mateo 24:30, 31 na mu Mateo 25:31-33, 46?

 ¹² Butemuki bwa Yesu pabitale mafuku a nfudiilo abulesha shi, bwa mususa wa kumpala Yesu akyebe kwikala bu Nsushi a bisamba byoso kunyima kwa kabutu ka bipwilo bya madimi. Anka bu byabidi mu  paragrafe 8, ingi myanda ayikyebe nkakitshika mu aa mafuku ayisanganyibwa mu Mateo 24:30, 31. Nsaa yotalula ano maverse, okyebe kusangana shi Yesu bakwile myanda i mumune na ino ibakwile mu lukindji lwaye lwa mikooko na mbushi. Bu kileshesho: Mwana a muntu afiki mu ntumbo yaaye na bamwikeyilu; bisamba byoso na miilo yooso mbibungye; baaba booso baakatshibila kiimu bu mikoko ‘abebwesha mitwe [yaabo]’ mwanda “muwa wa iikalaika” awibatengyela. * Baaba baakatshibila kiimu bu mbushi, “abakadidi mpolo” mwanda “malwa aa iikalaika” aebatengyela.—Mat. 25:31-33, 46.

13. (a) Nguba kinyi akyebe Yesu kutshibila bantu be bu mikooko sunga bu mbushi kiimu? (b) Uno mpushisho e na bukwashi kinyi pabitale mweneno etu a mudimo wetu wa bulungudi?

¹³ Kadi, twi balombeene kulamiina kinyi? Yesu akyebe kutshibila bantu ba bisamba byoso kiimu bu mikooko sunga bu mbushi nsaa yakafiki mu mafuka a mpombo ikata. Akupu, mu nsaa ya Armagedone, kipindji kya nfudiilo kya mpombo ikata, bantu be bu mbushi abakekala mu ‘malwa’ a ikalaika. Uno mpushisho e na bukwashi kinyi pabitale mweneno etu a mudimo wetu wa bulungudi? Etukwasha bwa kumona muulo wi nawo mudimo wetu wa bulungudi. Tuukye shi, mpaa na apakabanga mpombo ikata, bantu abekala nka na nsaa ya kushintuula binangu byabo na kubanga kutambukila mwishinda  dipeela “adifishanaa ku muuwa.” (Mat. 7:13, 14) Kyatudya kuuka nkino, lelo uno bantu mbalombeene kwikala bu mikooko sunga bu mbushi. Sunga mbyabya, abitungu tutentekyeshe shi kiimu kya nfudiilo kya baaba be bu mikooko na be bu mbushi akikekala mu mafuku a mpombo ikata. Byabya, twi na kya kutungunuka na kupa bantu bebungi mushindo wabadya kuteemesha na kutambula mukandu wa Bufumu.

14, 15. Mbifundwe kinyi binanka bitale kufika kwa Kidishitu mu mafuku e kumpala bu Nsushi?

¹⁴ Kutaluula ngofu butemuki bwa Yesu akulesha shi abitungu kushintuula mpushisho etu pabitale nguba akalombana ingi myanda ya mu butemuki bwa Yesu? Myanda i mu butemuki ayitupa lwalulo. Tubande kutala byabidi.

¹⁵ Mu kipindji kya butemuki bwaye kyabadi bafunde mu Mateo 24:29–25:46, Yesu baadi mutuule binangu ngofu pabitale akikyebe kukitshika mu ano mafuku a nfudiilo na mu mafuku a mpombo ikata ayifiki. Mu buno butemuki Yesu alesha bifundwe 8 abilesha “kufika,” sunga kwaluka kwaye. * Pabitale mpombo ikata, bambile shi: ‘Abakamono Mwan’a-muntu afiki pa makumbi.’ “Taanuwuku efuku adikafiki Mfumwenu.” “Nguba anushyaabatentekyesha, ngi akafiki Mwan’a-muntu.” Na mu lukindji lwaye lwa mikooko na mbushi, Yesu bakwile pabitale “apakafiki Mwan’a-muntu mu ntumbo yaaye.” (Mat. 24:30, 42, 44; 25:31) Kifundwe kyooso kya ku bino bifundwe binanka nkitale kufika kwa Kidishitu mu mafuku e kumpala bu Nsushi. Mbalo kinyi yatusangana bingi bifundwe binanka bya mu butemuki bwa Yesu bibashaala?

16. Kufika kwa Yesu akusanganyibwa dingi mu angi maverse kinyi?

¹⁶ Pabitale mpika a kishima na mupatulukye Yesu amba shi: “Sha muloo nka yawa mpika abakasanga kwi nfumwaye pakafiki kwete kukita byabya.” Mu lukindji lwa bansongwakashi bashyaukile balume Yesu bambile shi: “P’abaîle mu kûla mwimu, mulume bafikile.” Mu lukindji lwa talenta, Yesu bambile shi: “Kunyima kwa mafuku ebungi nfumu aa bano beena-mufubo baafikile.” Mu lwalwa lukindji lumune, nfumu bambile shi: Pakwaluka [“kufika,” Kilombeno kipya 2009] kwande naady’a kupeta kintu kyande.” (Mat. 24:46; 25:10, 19, 27, EEM) Bino bileshesho binanka bya kufika kwa Yesu mbitale nguba kinyi?

17. Kala tubaadi na mpushisho e naminyi pabitale kufika kwabadi baleshe mu Mateo 24:46?

 ¹⁷ Kala tubaadi bafunde mu mikanda yetu shi bino bifundwe binanka mbitale kufika sunga kwaluka kwa Yesu mu 1918. Bu kileshesho, banda kutala bishima bya Yesu pabitale “mpika a kishima na mupatulukye.” (Badika Mateo 24:45-47.) Tubaadi atupusha shi kwakwa “kufika” kwi mu verse 46 kubaadi kwipushene na mu mafuku abafikile Yesu mu kutala bi kipwano kya bashingwe mwimune n’Efile Mukulu mu 1918 na aye nkwibatuula bu mpika e ku mutwe kwa bintu byooso bya Nfumu mu 1919. (Ma. 3:1) Byabya, patubataluula butemuki bwa Yesu ngofu, tubasangana shi abitungu kushintuula ingi myanda mu mpushisho etu pabitale nguba akalombana ingi myanda ya mu butemuki bwa Yesu. Bwakinyi byabya?

18. Kutaluula kwa myanda i mu butemuki booso bwa Yesu nkwitufishe mu kushinkamisha kinyi pabitale kufika kwaye?

¹⁸ Mu maverse e kumpala kwa Mateo 24:46, kishima “kufika” nkitale menemene nguba akafiki Yesu bwa kutshiba kiimu mu nsaa ya mpombo ikata. (Mat. 24:30, 42, 44) Na dingi, nka bu byatwikalanga bamone mu  paragrafe 12, ‘kufika’ kwa Yesu kwabadi baleshe mu Mateo 25:31 nkutale dingi kwakwa kufika kwaye mu nsaa ya kiimu mu mafuku e kumpala. Byabya twi na kya kwamba shi, kufika kwa Yesu bwa kutuula mpika a kishima ku mutwe kwa bintu byaaye byooso kwabadi baleshe mu Mateo 24:46, 47, nkutale dingi kufika kwaye mu mafuku e kumpala, mu nsaa ya mpombo ikata. * Kushii mpaka, kutaluula kwa myanda itale butemuki booso bwa Yesu nkuleshe patooka shi, kifundwe kyooso kya ku bino bifundwe 8 pabitale kufika kwaye, nkitale nsaa ya kiimu ayifiki mu nsaa ya mpombo ikata.

19. Myanda kinyi ipya itale mpushisho etu yatubakatuka mu kutaluula, na nkonko kinyi yatukyebe kwaluula mu miisambo ayilondo?

¹⁹ Mu byooso, nkinyi kibatulongo mu uno mwisambo? Ku mbangilo kwa uno mwisambo, twelanga nkonko isatu pabitale kuuka “nguba.” Kya kumpala tubasangana shi mpombo ikata tayibaadi ibangye mu 1914 nya, anka ayikyebe kubanga nsaa yabakalwisha Babilone Mukata ngoshi kwi Nations-Unis. Akupu tubauku bwakinyi kwabuula kwa Yesu kwa mikooko na mbushi ta nkubangye mu 1914 kadi akukyebe kukitshika mu nsaa ya mpombo ikata. Ku nfudiilo, tubakatuka mu kutaluula bwakinyi atwamba shi Yesu tabaadi mufikye mu kutuula mpika a kishima ku mutwe kwa bintu byaye byooso mu 1919 nya, kadi akyebe nkamutuula ku mutwe kwa bintu byaaye byooso mu nsaa ya mpombo ikata. Byabya, ino nkonko isatu ya kuuka kwa “nguba” ngitale penda kipungo kimune kya—mpombo ikata ayifiki mu mafuku e kumpala. Mbukwashi kinyi bwi nabo ino myanda ipya kwatudi pabitale mpushisho etu a lukindji lwa mpika a kishima? Na dingi, mushindo kinyi wayidi itale mpushisho etu pabitale ingi nkindji ya Yesu ikwete kulombana mu ano mafuku etu a ku nfudiilo? Atukyebe kutaluula ino nkonko ya muulo ukata mu miisambo ayilondo.